Kapite 117

Ko Te Hoha Lahi ʼa Sesu ʼi Te ’Ōloto

ʼI TE ʼosi faikole ʼa Sesu, ko ia pea mo tana ʼu ʼapositolo agatonu ʼaē e toko 11 neʼe nātou hiva te ʼu fakavikiviki kia Sehova. ʼOsi ʼaia pea nātou hifo mai te koga fale fata, ʼonatou hū ki tuʼa ʼi te po mokomoko ʼaia ʼonatou toe fakalaka ʼi te mafa ʼo Setelone ʼo fakahaga tonatou fagona ki Petania. Kae, ʼi tanatou ʼalu ʼi te ala, neʼe nātou tutuʼu ʼi te koga meʼa ʼe nātou leleiʼia, ko te ʼōloto ʼo Setesemane, ʼe tuʼu ʼi te moʼuga ʼo Oliveto peʼe ōvi kiai. ʼI te koga meʼa ʼaia, ʼi te ʼu fuʼu oliveto, neʼe tautau fakatahi ai ia Sesu pea mo tana kau ʼapositolo.

Pea ina tuku te toko valu ʼo tana ʼu ʼapositolo — ʼi te lagi ōvi ki te hūʼaga ʼo te ʼōloto —, ʼo ʼui maʼana kia nātou: “Koutou nonofo ʼi henī kae ʼau ʼalu ʼo faikole ʼi hē age.” ʼOsi ʼaia pea ina toʼo te toko tolu ʼaē, ko Petelo, Sake pea mo Soane, pea nātou hoho atu ki muʼa ʼi te ʼōloto. Neʼe kamata logoʼi e Sesu tona lotomamahi mo te hoha lahi. “Kua lotomamahi ʼaupito toku nefesi, ko tana ʼui age ʼaia kia nātou, ʼio, ʼo aʼu ki te mate. Koutou nonofo ʼi henī pea ke koutou nonofo fakaonoono mo ʼau.”

ʼI tana ʼunuʼunu siʼisiʼi atu, neʼe tō ifo ia Sesu ki te kele pea, neʼe lave tona fofoga ki te kele, ʼo kamata ai tana faikole mamahi ʼaenī: “Tāmai, kapau ʼe ko he meʼa ʼe feala, pea ke fakalaka mamaʼo te ipu ʼaenī ia te ʼau. Kae, ke mole fai ki te meʼa ʼaē ʼe ʼau loto kiai, kae ke fai pe ki te meʼa ʼaē ʼe ke loto kiai.” Koteā koa te faka ʼuhiga ʼo tana palalau? He koʼe kua ‘lotomamahi ʼaupito, ʼo aʼu ki te mate’? ʼE fakahemala koa ia ʼo ʼuhiga mo tana tonu ʼaē ke mate ke ina fai ai te totogi?

Kailoa! ʼE mole kole ia e Sesu ke hāo ia ia mai te mate. Ko te manatu ʼaē ke hāo mai te mate sakilifisio ohage ko te ʼui age ʼaē e Petelo, ʼe fehiʼa ia kiai. Kae, ʼe nofo ia ʼi te hoha lahi heʼe ina tuʼania naʼa hage te faʼahiga mate ʼaē ka tau kia ia — ko he mate ʼo he tagata fai fakapō — ke ina fakalainoaʼi te huafa ʼo tana Tāmai. ʼE mahino lelei kia ia ʼi te temi nei ʼe kei toe pe te ʼu kiʼi hola pea haʼi ia ia ki te pou ohage ko he tagata ʼe kovi ʼaupito ʼi te kau fai fakapō, peʼe hage ko he tagata ʼe laukovi ki te ʼAtua! Koʼena la te meʼa ʼaē ʼe lotomamahi ʼaupito ai.

ʼI te ʼosi ʼo tana faikole loaloaga ʼaia, neʼe toe haʼu ia Sesu pea ina maʼu mai ʼana ʼapositolo toko tolu ʼe momoe. ʼO ʼui maʼana kia Petelo: “Neʼe mole koutou lavaʼi pe la ke koutou ʼalaʼala pea mo ʼau ʼi he hola pe e tahi? Koutou nonofo fakaonoono pea ke koutou faikole tuʼumaʼu, ke ʼaua naʼa koutou tō ki he fakahala.” Kae ʼi tana ʼiloʼi ʼaē neʼe lahi tonatou lotomamahi pea kua vave māʼupō, neʼe toe ʼui maʼana: “Ko te laumālie, ʼe moʼoni, ʼe mālohi, kae ko te kakano ʼe vaivai.”

Neʼe toe fakamamaʼo atu ia Sesu, ko te tuʼa lua ʼaia, pea ina kole ki tana Tāmai ke fakamamaʼo ia te ia “te ipu ʼaia”, ʼaē ʼe ina fakatātā te vahe ʼaē neʼe tuku e Sehova kia te ia, ʼaē ko tona finegalo ʼo ʼuhiga mo ia. ʼI tana toe haʼu, neʼe ina toe maʼu mai pe tana kau ʼapositolo toko tolu ʼe momoe kae neʼe tonu ke nātou faikole ke ʼaua naʼa nātou tō ki he fakahala. ʼI te palalau age ʼa Sesu kia nātou, ʼe mole nātou ʼiloʼi he meʼa ke nātou tali age kia te ia.

Pea, neʼe toe fakamamaʼo ia, ko te tuʼa tolu leva ʼaia, ko tona vaha mamaʼo ko he lī ʼo he foʼi maka pea, neʼe tuʼutuli ia, ʼo kalaga mālohi pea mo tagi loʼimata, ʼo fēnei tana faikole: “Tāmai, kapau ʼe ke loto kiai, pea ke ke fakamamaʼo ia te ʼau te ipu nei.” Neʼe lahi ʼaupito te lotomamahi ʼo Sesu ʼuhi ko te manuki ʼaē ka tuku anai e tona mate ʼaē ohage ko he tagata fakapō ki te huafa ʼo tana Tāmai. Ko te manatu ʼaē ki te tauteaʼi ʼo ia ohage ko he tagata ʼe laukovi ki te ʼAtua — ko he tahi ʼe ina fakamalaʼia te ʼAtua — ʼe teitei pe ke mole ina lavaʼi tona ʼutaki.

Kae, neʼe toe hoko atu pe te faikole ʼa Sesu, ʼo ʼui maʼana: “Kae, ke mole fai ki te meʼa ʼaē ʼe ʼau loto kiai, kae ke fai pe ki te meʼa ʼaē ʼe ke loto kiai.” ʼIo, ʼaki tana fakalogo, neʼe mulimuli aipe tona finegalo ki te finegalo ʼo te ʼAtua. ʼI te moʼi temi ʼaia, neʼe hā age ai te ʼaselo mai te lagi kia ia pea ina fakamālohiʼi ia ia ʼaki te ʼu palalau fakaloto mālohi. E lagi neʼe ina ʼui age ki ai, ʼe fakamoʼoni tana Tāmai kia te ia.

Kae, ʼi kavega mamafa leva ʼaē ʼe hili ki te ʼu fugaʼuma ʼo Sesu! Ko tona maʼuli heʼegata pea mo ʼaē ʼo te hahaʼi katoa ʼe fakalogo nei kia ia. Ko tana tuʼania kua mālohi ʼaupito. Koia ʼe faikole mālohi ʼaupito ai ia Sesu; pea ko tona kakava kua liliu ohage ko he ʼu toʼi toto ʼe tō ki te kele. “Logope la ko te meʼa ʼaia ʼe tahitahiga ʼaupito tona hoko, ko tona fakahā ʼaia e te tohi (Journal de lʼAssociation des médecins américains), ʼe feala ia te tafe kakava toto (...) mokā ʼe mālohi ʼaupito he meʼa ʼe lave ki te loto.”

ʼOsi ʼaia, pea toe haʼu ia Sesu ko te tuʼa tolu ʼaia ki tana ʼu ʼapositolo, pea ina toe maʼu mai ia nātou ʼe nātou momoe. Kua nātou gaʼegaʼe ʼuhi ko tonatou lotomamahi. “ ʼI te taʼi lakaga ʼaenī, ko tana ʼui age ʼaia, ko koutou ʼe koutou momoe pea mo koutou mālōlō! Kua feʼauga! Kua hoko mai te hola! Koʼeni ia te Foha ʼo te tagata ʼe ʼave ki te ʼu nima ʼo te kau agahala. Koutou tutuʼu ake! Kae tou ʼolo! Koʼeni ko ia ʼaē ʼe ina lavakiʼi ʼau kua ōvi mai.”

ʼI te lolotoga ʼo tana palalau, neʼe fakaōvi age ia Sutasi Isikaliote, mo te tokolahi ʼe nātou toʼo te ʼu afi, te ʼu mālama, pea mo te ʼu mahafu. Mateo 26:30, 36-47; 16:21-23; Maleko 14:26, 32-43; Luka 22:39-47; Soane 18:1-3; Hepeleo 5:7.

▪ ʼI tanatou ʼosi mavae mai te koga fale fata, neʼe ʼave e Sesu kifea tana kau ʼapositolo, pea koteā te meʼa neʼe ina fai ʼi tana kaku ki te koga meʼa ʼaia?

▪ ʼI te lolotoga ʼo te faikole ʼa Sesu, koteā te meʼa ia ʼaē neʼe fai e te kau ʼapositolo?

▪ He koʼe neʼe nofo ia Sesu ʼi te tuʼania, pea koteā te kole neʼe ina fai ki te ʼAtua?

▪ Koteā te meʼa ʼaē neʼe ʼiloga mai ai ʼi te liliu ʼo te kakava ʼo Sesu ohage he ʼu toʼi toto?