Kapite 120

Te ʼu Fakafisi ʼi Te Lotoʼā

ʼI TANĀ ʼosi siʼaki ia Sesu ʼi te ʼōloto ʼo Setesemane pea mo tanā feholaki ʼi tonā matataku mo te kau ʼapositolo ʼaē, neʼe tutuʼu ia Petelo pea mo Soane ʼi tanā feholaki. E lagi neʼe nā toe maʼu atu ia Sesu ʼi te temi ʼaē ʼe fakahū ai ki te ʼapi ʼo Ana. ʼI te fekau ʼaē ke ʼave ia Sesu ki te pelepitelo lahi ʼaē ko Kaifa, neʼe muliʼi e Petelo mo Soane ia Sesu mai mamaʼo, ʼe ʼiloga mai ia ʼe nā maʼu te manavasiʼi ʼaē ki tonā ʼu maʼuli ʼo nāua pea mo te tuʼania ʼaē ki te meʼa ʼaē ka hoko ki tonā Pule.

ʼI tanā kaku atu ki te nofoʼaga ʼaē e lahi ʼo Kaifa, neʼe lava ʼo hū ia Soane ki te lotoʼā, koteʼuhi heʼe ʼiloʼi ia e te pelepitelo lahi. Ko Petelo, neʼe tuku ia ʼi tuʼa, ʼi te vaʼe matapā. Kae neʼe toe liliu mai ia Soane ʼo palalau ki te fafine kaugana ʼaē ʼe tuʼu matapā, ʼo ina fakahū ai ia Petelo.

ʼI te kua momoko leva ʼi te moʼi temi ʼaia, neʼe tafu te afi mamala e te hahaʼi gāue pea mo te kau tagata fekau ʼa te pelepitelo lahi. Neʼe ʼunuʼunu atu ia Petelo kia nātou ʼo fakamāfana ai pea mo talitali ai ki te ikuʼaga ʼo te fakamāuʼi ʼo Sesu. ʼI te temi ʼaia, ʼaki te mālama ʼo te afi, ko te fafine tuʼu matapā ʼaē neʼe ina fakahū ia Petelo kua sio lelei kia ia. “Mo koe foki la, neʼe ke nofo fakatahi mo Sesu te Kalilea!” ko tana kalaga ʼaia.

ʼI tana hoha ʼaupito ʼi tona kua ʼiloʼi, neʼe fakafisi ia Petelo ia muʼa ʼo te hahaʼi fuli ʼe mole ina ʼiloʼi ia Sesu. “ ʼE mole ʼau ʼiloʼi ia ia pea ʼe mole ʼau mahino ki te meʼa ʼaē ʼe ke ʼui”, ko tana tali ʼaia.

ʼOsi ʼaia, pea ʼalu ia Petelo ki te vaʼe matapā. Neʼe fakatokagaʼi ia ia e te tahi fafine kaugana pea ina toe ʼui mo ia kia nātou ʼaē neʼe nonofo ʼi ai: “Ko ia ʼaenā neʼe nofo fakatahi mo Sesu te Nasalea.” Neʼe toe fakafisi ia Petelo, pea mo fakamoʼomoʼoni age: “ ʼE mole ʼau ʼiloʼi te tagata ʼaia!”

Neʼe nofo ia Petelo ʼi te lotoʼā, ʼo ina faigaʼi ke ʼaua naʼa fakatokagaʼi ia ia. E lagi ko te temi ʼaia, ka kei hegihegi te māfoatā, neʼe ʼoho ai ʼi te ʼuʼua ʼa te moa. Kae ʼi te lolotoga ʼo te temi ʼaia, neʼe kei fai pe te fakamāuʼi ʼo Sesu, ʼo lagi fai ʼi he koga fale ʼo te fale ʼaē ʼe tuʼu ʼi ʼoluga ʼi te fuga lotoʼā. ʼE mahino ia ko Petelo pea mo nātou ʼaē ʼe tutuʼu mo ia ʼi lalo neʼe nātou sisio ki te ʼu feʼaluʼaki ʼa te hahaʼi kehekehe ʼaē neʼe pāuiʼi ke ʼōmai ʼo fai fakamoʼoni.

Kua hili te hola katoa ki te temi ʼaē neʼe ʼiloʼi ai ia Petelo ko te kaugā fagona ʼo Sesu. ʼI te temi nei, ko ʼihi ia nātou ʼaē neʼe tutuʼu ʼi ai neʼe nātou fakaōvi age kia Petelo pea ʼui maʼa nātou: “ ʼE mahino papau ia ʼe ke toe kau mo koe ia nātou; pea tahi, ʼe fakaʼilo ia koe e tau faʼahiga palalau.” Ko te tahi ia nātou ko te kāiga ʼo Malekusi te tagata ʼaē neʼe tuʼusi tona taliga e Petelo. “Neʼe mole ʼau sio koa la kia koe pea mo ia ʼi te ʼōloto?” ko tana fehuʼi ʼaia.

“ ʼE mole ʼau ʼiloʼi te tagata ʼaia!” ko te tali mālohi ʼaia ʼa Petelo. Pea, neʼe ina faigaʼi ke ʼui maʼa nātou ʼe nātou faihala fuli ʼaki tana fai te ʼu laukovi pea mo fai fakamoʼomoʼoni, ko tona faka ʼuhiga ʼe ina pāuiʼi te malaʼia kia te ia mo kapau ʼe mole ina tala te moʼoni.

ʼI te lolotoga fakafisi tuʼa tolu ʼa Petelo kia Sesu, neʼe ʼuʼua te moa. ʼI te moʼi temi pe ʼaia, neʼe lagi haʼu ia Sesu, ki te fakaheketālaʼa ʼe haga ifo ki te lotoʼā ʼaia, pea maliu ia ʼo sio kia Petelo, pea ʼi te moʼi temi pe ʼaia neʼe ina manatuʼi ai te palalau ʼaē neʼe ina fai age ʼi te ʼu hola ki muʼa atu ʼi te koga fale fata: “ ʼI muʼa ʼo te ʼuʼua tuʼa lua ʼa te moa, ʼe ke fakafisi tuʼa tolu anai kia te ʼau.” ʼI tona ogosia ʼaē ʼi te mamafa ʼo tana agahala, neʼe hū ia Petelo ki tuʼa pea tagi mamahi ai.

He koʼe neʼe feala ke hoko te faʼahi ʼaia? Neʼe feafeaʼi te lavaʼi e Petelo ʼo fakafisi tuʼa tolu ki tona Pule ʼi he kiʼi temi siʼisiʼipe, ia ia ʼaē neʼe ina fakahā ʼi muʼa atu ʼe falala ki tona mālohi fakalaumālie? Ko te ʼu ʼaluʼaga ʼo te ʼu meʼa ʼaē neʼe hoko neʼe lagi fakapuna’maʼuli kia te ia. ʼI te temi ʼaia neʼe ʼave keheʼi te moʼoni ʼo fakahā ia Sesu ohage ko he tagata fai fakapō kovi. Kua fakaliliu ʼo kovi te meʼa ʼaē ʼe totonu, pea mo faka lākahalaʼi ia ia ʼaē ʼe agatonu. ʼI te fakafitaʼa ʼaupito ʼo te ʼu meʼa ʼaia neʼe hoko, neʼe hēʼia ai te fakakaukau tonu ʼa Petelo. Neʼe fokifā pe, tana fakasiosio lelei ʼaē ʼo ʼuhiga mo te nofo agatonu kua hēʼia; logope la tona lotomamahi ʼaupito, neʼe kua palalisia ia ʼuhi ko te manavasiʼi ki te tagata. Ke ʼaua naʼa hoko he meʼa feiā kia tatou ʼi he ʼaho! Mateo 26:57, 58, 69-75; Maleko 14:30, 53, 54, 66-72; Luka 22:54-62; Soane 18:15-18, 25-27.

▪ Neʼe feafeaʼi te hū ʼa Petelo pea mo Soane ki te lotoʼā ʼo te pelepitelo lahi?

▪ ʼI te lolotoga ʼo te nonofo ʼa Petelo pea mo Soane ʼi te lotoʼā, koteā te meʼa ʼaē neʼe hoko ʼi te fale?

▪ Neʼe ʼuʼua tuʼa fia te moa; pea neʼe tuʼa fia te fakafisi ʼa Petelo ʼe mole ina ʼiloʼi ia Kilisito?

▪ Koteā te faka ʼuhiga ʼo te fai ʼaē e Petelo te ʼu laukovi pea mo fai fakamoʼomoʼoni?

▪ Koteā te tupuʼaga ʼo te fakafisi ʼaē ʼa Petelo ʼe mole ina ʼiloʼi ia Sesu?