Kapite 125

ʼI Te Pou Fakamamahi

KO TAGATA kaihaʼa e toko lua neʼe ʼave fakatahi mo Sesu ke matematehi. Neʼe tutuʼu te hahaʼi ʼi te koga meʼa ʼe mole mamaʼo ʼi te kolo, ʼe higoa ko Kolokota, ko tona faka ʼuhiga ko te Koga meʼa ʼo te Ulupoko.

Neʼe toʼo te ʼu kofu ʼo te kau pilisoni. ʼOsi ʼaia pea ʼavage kia nātou te vino neʼe fiofio ʼaki te mila. E lagi ko te ʼu fafine ʼo Selusalemi ʼaē neʼe nātou teuteuʼi te meʼa ʼinu ʼaia, pea ʼe fakagafua e te kau Loma te foaki ʼo te meʼa ʼinu ʼaia moʼo pulihi ʼo te mamahi ʼo nātou ʼaē ʼe haʼi ki te ʼu pou. ʼI tana ʼosi ʼahiʼahi, neʼe fakafisi ia Sesu ki tona ʼinu. Koteā tona tupuʼaga? E lagi ko tona loto ʼaē ke ina maʼu katoa tona ʼatamai pea mo tona ʼu logoʼaga sino fuli ʼi tana tau mo te ʼahiʼahiʼi fakaʼosi ʼaia ʼo tana tui.

ʼE fakafālō nei ia Sesu ki te pou, ʼo ʼave ʼona nima ki tona fuga ʼulu. Pea tutuki ai e te kau solia te ʼu toe faʼo lalahi ki tona ʼu vaʼe pea mo tona ʼu nima. Neʼe kekeva ia Sesu ʼi tona mamahi ʼi te ulu ʼaē ʼo te ʼu faʼo ki tona kakano pea mo tona ʼu ivi. Kae ʼi te temi leva ʼaē neʼe hiki ai te pou ʼo fakatuʼu, neʼe toe ʼāsili age te fakamataku ʼo te mamahi, heʼe ko te mamafa ʼo te sino ʼe mahaehae ai te ʼu mataʼi lavea ʼaē ʼi te ʼu faʼo. Kae, neʼe mole lea fakamana ia, neʼe hūfaki pe e Sesu te kau solia loma ʼo ina ʼui fēnei: “Tāmai, fakamolemole age kia nātou, heʼe mole nātou ʼiloʼi te meʼa ʼaē ʼe nātou fai.”

Neʼe fekau e Pilato ke fakapipiki ki te pou he papa ʼe tohi ai te ʼu palalau ʼaenī: “Ko Sesu te Nasalea, te hau ʼo te kau Sutea.” ʼE ʼiloga mai ia neʼe fia fakahā e Pilato ʼaki tana tohi te ʼu kupuʼi palalau ʼaia tana fakaʼapaʼapa ʼaē kia Sesu, pea mo toe fakaʼiloga ʼaki tana manukinuki ʼaē ki te kau pelepitelo sutea ʼaē neʼe nātou fakakinauʼi ia ia ke ina fakatūʼa ia Sesu ki te mate. Ke feala tona lau e te hahaʼi fuli ia te meʼa ʼaē ʼe tohi ʼi te papa, he neʼe fekau e Pilato ke tohi ʼi te ʼu lea e tolu: ʼi te faka hepeleo, ʼi te faka latina ʼaē ko te lea faka puleʼaga, pea mo te faka keleka ʼaē ʼe teitei ʼiloʼi e te hahaʼi fuli pe.

Ko Ana, mo Kaifa pea mo te tahi ʼu pelepitelo pule kua nātou ʼiʼita. Ko te talanoa ʼaē neʼe tohi ʼo fakapipiki ki te pou ʼe ina fakakoviʼi tonatou mālo. Koia neʼe nātou meo ai ʼo ʼui maʼa nātou: “Tuku tau tohi: ‘Ko te hau ʼo te kau Sutea’, kae neʼe ina ʼui: ‘Ko ʼau ko te hau ʼo te kau Sutea.’ ” ʼI te ʼita ʼaē ʼo Pilato ʼi tona palu ʼaē e te kau pelepitelo, neʼe ina tali age kia nātou ʼaki he manukinuki ʼe mole toe fakameʼameʼa. “Ko te meʼa ʼaē neʼe kua ʼau tohi, kua ʼau tohi.”

Ko te kau pelepitelo, ʼo takatakai e te hahaʼi tokolahi, kua nātou fakatahitahi ʼi te koga meʼa ʼaia, pea ʼe nātou faigaʼi ke nātou faka lākahalaʼi te talanoa ʼaē ʼi te papa. Kua nātou toe fakaʼaogaʼi te ʼu fakamoʼoni loi ʼaē neʼe fai ʼi te Sanetualio ʼi muʼa atu. Koia ʼe mole he punamaʼuli ki te laukovi ʼa te hahaʼi ʼaē ʼe fakalaka ʼi te koga meʼa ʼaia kia Sesu, ʼo kalokalo ʼonatou ʼulu mo ʼui maʼa nātou: “Ia koe ʼaē neʼe ke fia holoʼi te fale lotu pea mo toe laga ia ʼaho e tolu, hāofaki ia koe totonu! Mo kapau ko te ʼAlo koe ʼo te ʼAtua, hifo ifo mai te pou fakamamahi!”

Ko te kau pelepitelo pule pea mo tonatou ʼu kaumeʼa neʼe kau mo nātou ki te hahaʼi manukinuki ʼo ʼui maʼa nātou: “Neʼe ina hāofaki te tahi ʼu hahaʼi; ka mole ina faʼa hāofaki ia ia totonu! Kapau ko ia ko te Hau ʼo Iselaele; pea ke hifo ifo la ʼi te pou fakamamahi pea ʼe hoki tou tui ai leva kia te ia. Neʼe ina tuku tana falala ki te ʼAtua; ke Ina hāofaki la ia ia ʼi te lakaga nei mo kapau ʼe loto kia te ia, he neʼe ʼui maʼana, ‘Ko te ʼAlo ʼau ʼo te ʼAtua’.”

ʼI te lave kia nātou ʼo te faʼahiga loto ʼaia neʼe toe kau foki mo te kau solia ki te vāʼi ʼaē ʼo Sesu. Neʼe nātou faka galivaleʼi ia ia ʼo nātou foaki age ki ai te vino ʼe anokona, ʼo lagi nātou fakaōvi age pe ki tona gutu, kae neʼe mamaʼo mo tona ʼu laugutu ʼaē kua magemage. “Kapau ko koe ko te hau ʼo te kau Sutea, ko tanatou ʼui age ʼaia, fakahāo ia koe totonu!” “Neʼe toe feiā aipe mo te ʼu tagata kaihaʼa ʼaē neʼe haʼi ʼi te ʼu pou ia tafa ʼo Sesu, ko te tahi ʼi tona toʼomataʼu pea ko te tahi ʼi tona toʼohema”, neʼe nā toe vāʼi mo nāua ia ia. Koteā leva takotou ʼui! Ko te tagata ʼaē ʼe lahi tokotahi ʼo te ʼu temi fuli, ʼio, ia ia ʼaē neʼe kaugā gāue fakatahi mo Sehova ki te fakatupu ʼo meʼa fuli, neʼe ina tuku pe ia ke gaohi koviʼi feiāʼi!

Neʼe toʼo e te kau solia te ʼu kofu tuʼa ʼaē ʼo Sesu pea nātou haga ʼo fai ʼaki ia vahe e fā. Neʼe nātou mate pe ko ai ʼaē ka ina maʼu te ʼu vahe ʼaia. Ko te kofu ʼaē ʼi loto, ʼe lelei ʼaupito tona kie, pea ʼe mole ʼi ai hona kauʼi tui. Neʼe feʼuiʼaki e te kau solia: “ ʼAua naʼa tou haeʼi te kofu, kae ke tou mate kiai pe ko ai ʼaē ka ina maʼu.” ʼO nātou fakahoko ai ka mole nātou ʼiloʼi, te folafola ʼa te Tohi-Tapu, ʼaē neʼe tala fēnei ai: “Neʼe nātou vaevae ia nātou toku ʼu kofu tuʼa, pea ki toku kofu neʼe nātou mate kiai pe ko ai ʼaē ka ina maʼu.”

Ko te tokotahi ʼi te ʼu tagata kaihaʼa neʼe hoki mahino leva kia ia, ko Sesu e lagi ko he hau moʼoni. Koia ʼi tana munaʼi tona kaumeʼa, neʼe ʼui maʼana: “ ʼE mole ke manavasiʼi koa la koe ki te ʼAtua, ʼi te temi ʼaenī kua ke nofo ai mo koe ʼi te fakamāu pe e tahi? Pea kia taua, ʼe totonu ia, heʼe tali e taua, ʼo ʼuhiga mo te ʼu meʼa ʼaē neʼe tā fai, te totogi ʼaē ʼe tau mo taua, ʼo katoa lelei te meʼa ʼaia, kae ko te tagata ʼaenī neʼe mole ina fai ia he meʼa ʼe kovi.” Pea neʼe palalau age ai leva kia Sesu, ʼo ina fai age te kole ʼaenī: “Ke ke manatuʼi ʼau mokā ke hū anai ki tou puleʼaga.”

Neʼe tali age Sesu ki ai: “ ʼE ʼau tala moʼoni atu kia te koe ʼi te ʼaho nei: ʼE ke ʼi te Palatiso anai mo ʼau.” Ko te fakapapau ʼaia ʼe hoko anai mokā haga ia Sesu, ʼaē kua Hau ʼi selo, ʼo fakatuʼuake te tagata agakovi ʼaia kua fakahemala ke feala ai tana maʼuli ʼi te Palatiso ʼi te kele, ʼaē ka gāueʼi anai pea mo taupau e te hahaʼi ʼaē ka maʼuʼuli ʼi Halamaketone pea mo ʼonatou ʼu kaumeʼa. Mateo 27:33-44; Maleko 15:22-32; Luka 23:27, 32-43; Soane 19:17-24.

▪ He koʼe neʼe fakafisi ia Sesu ki te ʼinu ʼo te vino ʼaē ʼe fiofio ʼaki te mila?

▪ Koteā te tupuʼaga ʼaē, ʼe ʼiloga mai, ʼo te fakapipiki ʼo te papa ki te pou fakamamahi ʼo Sesu? Pea koteā te fetalanoaʼaki ʼaē neʼe hoko ai ia Pilato pea mo te kau pelepitelo pule?

▪ Koteā te tahi gaohi fakalainoaʼi ʼo Sesu ʼi te pou, pea koteā te meʼa ʼaē ʼe ʼiloga mai ko tona tupuʼaga ʼaia?

▪ Neʼe feafeaʼi te fakahoko ʼo te lea faka polofeta e te meʼa ʼaē neʼe hoko ki te ʼu kofu ʼo Sesu?

▪ Koteā te fetogiʼaga ʼaē neʼe fai e te tokotahi ʼi te ʼu tagata kaihaʼa, pea ʼe feafeaʼi anai te tali e Sesu ʼo tana kole?