Kapite 126

“ ʼE Moʼoni Ia, Ko Ia Nei ʼe Ko Te ʼAlo Ia ʼo Te ʼAtua”

ʼE MOLE heʼeki faʼa fualoa te tautau ʼo Sesu ʼi te pou, pea fokifā pe ʼi te fetapā, neʼe hoko te fakapōʼuli faikehe, ʼo pōʼuli ai te fenua ia hola e tolu. Neʼe mole feala ia ko he ūgia ʼo te laʼā ʼi te māhina, heʼe ko te taʼi ūgia ʼaia ʼo te laʼā ʼi te māhina ʼe hoki hoko pe ʼi te temi ʼaē ʼe fanoloa ai te māhina; kae ko te Pāsikate ʼe hoko ʼi te temi ʼaē ʼe katoa ai te māhina. Tahi ʼaē meʼa, ko te ūgia ʼo te laʼā ʼi te māhina ʼe fualoa pe ia ʼi te ʼu kiʼi minuta. Koia ko te ʼu fakapōʼuli ʼaia ʼe haʼu ia mai te ʼAtua! Ko te meʼa fakapuna’maʼuli ʼaia neʼe hoko, neʼe lagi feala ke fakakaukau ai ia nātou ʼaē neʼe nātou vāʼi ia Sesu, ʼo lagi fakagata ʼaki ai pe la tanatou ʼu manukinuki.

Kapau neʼe hoko te ʼu fakapōʼuli ʼaia ʼi muʼa ʼo te fakatonutonuʼi e te tagata kaihaʼa tona kaumeʼa ʼaē, pea mo kole age kia Sesu ke ina manatuʼi ia ia, pea e lagi ko he meʼa ia neʼe tupu ai tana fakahemala. E lagi feala pe neʼe ko te temi fakapōʼuli ʼaia ʼaē neʼe ʼōmai ai te ʼu fafine e toko fā, ko te faʼe ʼa Sesu mo tona tēhina ko Salome, ʼo kau ai foki mo Malia Maketalena pea mo Malia, faʼe ʼa Sake Veliveli, ʼonatou fakaōvi age ki te pou fakamamahi. Ko Soane, te ʼapositolo ʼofaina ʼa Sesu neʼe kaugā ʼolo age mo nātou.

Neʼe hukiʼi te loto ʼo te faʼe ʼa Sesu ʼi tana sio ʼaē, ki tana tama ʼaē neʼe ina fafaga, pea mo pusiaki, ʼe tautau ʼi te pou ʼo tau mo te ʼu toe mamahi lahi. ʼE mole tokaga ia Sesu ki tona mamahi, kae ʼe tokaga muʼa ia ki tana faʼe. Neʼe ina kātakiʼi tona mamahi, kae ina hinoʼi ia Soane ʼaki tona ʼulu pea ʼui maʼana ki tana faʼe: “Fafine, koʼena tau tama!” Pea ina kaloʼi tona ʼulu ʼo fakahaga kia Malia pea ʼui maʼana kia Soane: “Koʼena tau faʼe!”

Neʼe tuku ai e Sesu tana faʼe, ʼaē ʼe ʼiloga mai kua vitua, ki te ʼapositolo ʼaē ʼe ʼofa kehe age ki ai. Neʼe ina fai te filifili ʼaia heʼe ko te ʼu tama ʼaē ʼa Malia neʼe mole heʼeki nātou fakahā tanatou tui kia te ia. ʼE ina tuku mai ai te faʼifaʼitaki lelei ʼi tana mole tokaga pe ki te ʼu meʼa fakasino ʼaē ʼe ʼaoga ki tana faʼe, kae tāfito foki ki te ʼu meʼa fakalaumālie ʼaē ʼe ʼaoga ki ai.

ʼI te temi ʼo te hola tolu hoʼatā, neʼe ʼui e Sesu: “ ʼE ʼau fia ʼinu.” ʼE ina logoʼi e ia kua toʼo e tana Tāmai te puipui ʼaē neʼe puipui ʼaki ia ia, ke feala ai te ʼahiʼahiʼi katoa ʼo tana agatonu. Neʼe kalaga leʼolahi ai leva: “E toku ʼAtua, e toku ʼAtua! koteā ʼaē kua ke līaki ai ʼau?” ʼI tanatou fagono ki te meʼa ʼaia, ko ʼihi ia nātou ʼaē neʼe tutuʼu ʼi ai neʼe nātou ʼui fēnei: “Koʼena ʼe pāui ia kia Elia.” Neʼe tafusi atu ai pe te tahi ia nātou ʼaia ko te foaki kia te ia te meʼa ʼinu, ʼo ina ai ki te kaho te eposi neʼe fakapalapalaʼi ʼaki te vinika. Kae neʼe ʼui age e ʼihi. “Tukunoaʼi muʼa ia ia! Tou vakaʼi muʼa peʼe haʼu ia Elia ʼo fakahifo ifo ia ia.”

ʼI te temi ʼaē neʼe foaki age ai kia Sesu te vino kona, neʼe kalaga ia ʼo fēnei: “Ko te meʼa ʼaia kua hoko!” ʼIo, kua ina fakahoko ia meʼa fuli ʼaē neʼe tuku age e tana Tāmai ki ai ʼi tana fekauʼi ifo ia ia ki te kele. Moʼo fakaʼosi neʼe ina ʼui fēnei: “Tāmai, ʼe ʼau tuku toku laumālie ki ʼou nima.” ʼAki te ʼu palalau ʼaia, neʼe tuku e Sesu ki te ʼAtua ia tona mālohi maʼuli, heʼe falala ia ʼe ina toe tuku age anai kia te ia. Pea falele ai tona ʼulu pea mate.

ʼI te lakaga ʼaē neʼe mate ai ia Sesu, neʼe tō te toe mafuike fakamataku ʼo makafaʼafaʼa ai te ʼu mata maka. ʼI te mālohi fau ʼo te mafuike ʼaia, neʼe fokifā pe kua ava te ʼu falemaka fakamanatu ʼaē ʼe tuʼu ʼi tuʼa ʼo Selusalemi pea mo puna mai ai ki tuʼa te ʼu sino. Ko te hahaʼi ʼaē neʼe fakalaka ʼi ai neʼe nātou sisio ki te ʼu sino ʼaia pea, ʼi tanatou hū ʼaē ki te kolo neʼe nātou fakamatala te meʼa ʼaē neʼe nātou sisio kiai.

Pea tahi ʼaenī meʼa, ʼi te temi tonu ʼaē neʼe mate ai ia Sesu, ʼi te fale lotu ʼo te ʼAtua ko te puipui lahi ʼaē ʼe ina vaheʼi te Potu Tapu mai te Potu Taputapu ʼaupito neʼe mahae lua, mai ʼoluga ki lalo. Kae ko te puipui ʼaia, ʼaē neʼe matalelei tona teuteuʼi, e lagi ko he kie e meta 18 tona māʼoluga pea mo mamafa ʼaupito! ʼAki te milakulo ʼaia, neʼe fakahā ai e Sehova tona hāūhāū kia nātou ʼaē neʼe nātou fakapogi tona ʼAlo, kae neʼe ina toe fakahā ai foki ko te ala ʼaē ki te Potu Taputapu ʼaupito, ʼaē ko te lagi, kua ava leva ʼaki te mate ʼo Sesu.

Ko te hahaʼi ʼaē neʼe nātou logoʼi te mafuike pea mo mamata ki te tahi ʼu meʼa ʼaē neʼe hoko neʼe nātou matataku ʼaupito. Ko te ofisie ʼaē neʼe pule ki te fai ʼo te tautea neʼe faka kolōlia ki te ʼAtua. “ ʼE moʼoni ia, ko ia nei ʼe ko te ʼAlo ia ʼo te ʼAtua”, ko tana ʼui ʼaia. E lagi neʼe nofo ia, ʼi te fakamāu ʼaē neʼe fai ia muʼa ʼo Pilato, ʼi te fai ʼo te fakafeagai ʼo ʼuhiga mo te ʼui ʼa Sesu ko ia ko te ʼAlo ʼo te ʼAtua. ʼI te temi leva ʼaenī kua ina ʼiloʼi papau ko Sesu ʼe ko te ʼAlo totonu ia ʼo te ʼAtua, ʼio, ʼe moʼoni, ʼe ko te tagata ʼaē ʼe lahi tokotahi ʼo te ʼu temi fuli.

Ko ʼihi neʼe lave ʼaupito kia nātou te ʼu meʼa faka milakulo ʼaia neʼe hoko, pea neʼe nātou toe liliu ai mo tuki fatafata, ko te fakaʼiloga ʼaia ʼo tonatou lotomamahi lahi pea mo tonatou ufiufi. Neʼe tokolahi te ʼu fafine, ko te ʼu tisipulo ʼa Sesu, neʼe tutuʼu mamaʼo pea neʼe nātou mamata mo lotomamahi ʼaupito ki te ʼu meʼa ʼaia neʼe hoko ʼaē ʼe ʼi ai tona toe maʼuhiga lahi ʼaupito. Ko te ʼapositolo ko Soane neʼe toe ʼi ai foki mo ia. Mateo 27:45-56; Maleko 15:33-41; Luka 23:44-49; 2:34, 35; Soane 19:25-30.

▪ He koʼe ʼe mole feala ke ʼui ko te fakapōʼuli ʼaē neʼe hoko ia hola e tolu ʼe ko te ūgia ʼo te laʼā ʼi te māhina?

▪ Koteā te faʼifaʼitaki lelei ʼaē neʼe tuku mai e Sesu, ʼi muʼa ʼo tona mate, kia nātou ʼaē ʼe ʼi ai tanatou ʼu mātuʼa kua matutuʼa?

▪ Koteā te ʼu palalau ʼaē e fā neʼe fai e Sesu ʼi muʼa ʼo tona mate?

▪ Koteā te ʼu meʼa neʼe hoko ʼi te tō ʼo te mafuike, pea koteā te faka ʼuhiga ʼo te mahae lua ʼo te puipui ʼo te fale lotu?

▪ Neʼe lave feafeaʼi ki te ofisie te ʼu milakulo ʼaē neʼe hoko?