Kapite 127

Neʼe ʼAvaifo ʼi Te Feliaono, Pea Puli ʼi Te ʼAhotapu

KO TE feliaono hoʼatā kua vave hili. Ko te ʼaho 15 ʼo Nisani, ko te ʼaho ʼo te sapato, ʼe kamata ʼi te tō ʼo te laʼā. Ko te sino ʼo Sesu ʼe kei tautau pe ʼi te pou ka mole kei maʼuli ia, kae ko te ʼu tagata kaihaʼa e lua, ʼaē neʼe tautau ʼi ʼona tafa, ʼe kei nā maʼuʼuli pe. Ko te feliaono hoʼatā neʼe higoa ko te Teuteu, heʼe ko te ʼaho ʼaia ʼe teuteuʼi ai e te kau Sutea te ʼu meʼa kai pea mo nātou fakaʼosi te ʼu gāue ʼaē ʼe mole feala ke tuku ki te anoiha.

Ko te sapato ʼaenī ka kamata ʼe mole tatau ia mo te ʼu sapato māhani (ʼaē ko te fitu ʼaho ʼo te vāhaʼa), heʼe ko te sapato ʼe lolua, peʼe ko te sapato “lahi”. Ko te ʼaho 15 ʼo te Nisani ʼaia neʼe higoaʼi feiā heʼe ko te ʼuluaki ʼaho ʼo te ʼu ʼaho ʼaē e fitu ʼo te lafeti ʼo te ʼu Keke ʼaē ʼe mole hona meʼa fakatupu (pea ʼe ko te sapato ia, tatau aipe pe ko te ʼaho fea ʼo te vāhaʼa ʼaē ʼe tō ai) pea ʼe toe tō tonu foki mo te sapato ʼo te vāhaʼa.

ʼE fakatuʼu ʼi te Lao ʼa te ʼAtua ʼe mole tonu ke tuku he sino ʼi he pou ʼi te pōʼuli. ʼO kole ai leva e te kau Sutea kia Pilato ke fasifasiʼi te ʼu vaʼe ʼonatou ʼaē ʼe haʼi ʼi te ʼu pou, ke vave ʼaki ai tonatou mamate. ʼO haga ai leva te kau solia ʼo fasifasiʼi te ʼu vae ʼo te ʼu tagata kaihaʼa ʼaia e lua, kae neʼe mole nātou fai feiā kia Sesu, ʼaē ʼe ʼiloga mai kua ʼosi mate. ʼO fakahoko ʼaki ai te folafola ʼa te Tohi-Tapu ʼaē ʼe ʼui fēnei ai: “ ʼE mole ʼi ai hona hui e tahi ʼe fasiʼi anai.”

Kae, moʼo ʼiloʼi papau peʼe kua mate moʼoni ia Sesu, neʼe hukiʼi e te tahi ʼi te kau solia ʼaki tana tao tona faʼahi vakavaka. Neʼe lave te tao ki te faʼahi ʼaē ʼo tona mafu, pea neʼe maligi mai ai pe te taʼataʼa pea mo te vai. Ko te ʼapositolo ko Soane ʼaē neʼe mamata ki te meʼa ʼaia, ʼe ina fakahā anai ki muli age ko te meʼa ʼaia neʼe ina fakahoko te tahi folafola ʼa te Tohi-Tapu ʼaē ʼe ʼui fēnei ai: “ ʼE nātou sisio anai kia Ia ʼaē neʼe nātou hukiʼi.”

Ko Sosefo, mai te kolo ʼo Alimatea, ko te tagata neʼe ʼiloa tāfito ʼi te Sanetualio neʼe toe sio mo ia ki te mate ʼaia. Neʼe fakafisi ia ki te lagolago ʼaki hana vote ki te meʼa heʼe faitotonu ʼaē neʼe fai e te telepinale lahi ʼo fakafeagai kia Sesu. Ko Sosefo neʼe ko he tahi ʼi tana kau tisipulo, logope la tana manavasiʼi ʼaē naʼa ʼiloʼi te faʼahi ʼaia. Kae ʼi te temi nei, ʼaki he lototoʼa, neʼe hū ia ki te fale ʼo Pilato ʼo kole te sino ʼo Sesu. Neʼe pāuiʼi muʼa e Pilato tana ofisie gāue ke ina vakaʼi pe kua mate moʼoni ia Sesu, ʼosi ʼaia pea hoki ina tuku age te sino ʼo Sesu kia Sosefo.

Neʼe toʼo e Sosefo pea ina teuteuʼi ki tona ʼavaifo ʼo kofukofuʼi ia ia ʼi te kie lino mānifi maʼa. Neʼe tokoni ki ai ia Nikotemo, ko te tahi ʼaia tagata ʼo te Sanetualio. ʼO toe feiā pe mo ia neʼe mole ina fakahā tana tui kia Sesu, ko tona mataku ʼaē naʼa puli tona tuʼulaga. Kae, ʼi te temi nei, ʼe ina ʼaumai te takaiga e ʼai ai ia paona faka loma e teau (ʼe lau pe ki te 33 kilo tona mamafa) ʼo te mila pea mo te aloesi, ʼaē ia ʼe ko he meʼa ʼe totogi kovi ʼaupito. Ko te sino ʼo Sesu neʼe kofukofu ʼi te ʼu takatakaiga moʼi kie mo te ʼu ʼakau fakamagoni ʼaia, ohage ko te agamāhani ʼa te kau Sutea mokā nātou teuteuʼi he ʼavaifo.

Neʼe ʼave te sino ʼo ʼai ki te falemaka fakamanatu foʼou, ko te falemaka ʼo Sosefo neʼe keli ʼi te mata maka ʼi te ʼōloto ʼe ōvi mai. ʼOsi ʼaia pea tekaʼi te foʼi maka lahi ʼo pupunu ʼaki te hūʼaga ʼo te falemaka. Pea ʼi te faiga ʼaē ke ʼavaifo te sino ʼi muʼa ʼo te sapato, neʼe maʼua ke foimo teuteuʼi fakavilivili. Koia, ko Malia Maketalena pea mo Malia, faʼe ʼa Sake Veliveli, ʼaē neʼe lagi kau mo nāua ki te teuteuʼi ʼo te sino, neʼe nā ʼolo fakavilivili ki tonā ʼu ʼapi ʼo teuteuʼi te ʼu ʼakau fakamagoni pea mo te ʼu lolo magoni moʼo fakakatoa ʼaki. Neʼe nā fakatuʼutuʼu ke nā toe ʼōmai mokā hili te sapato ʼo takai te sino ʼo Sesu ke tologa ʼo fualoa.

ʼI te ʼala uhu ake, ʼi te moeaki, ʼaē ko te ʼaho ʼo te sapato, neʼe ʼolo te kau pelepitelo pule pea mo te kau Faliseo kia Pilato pea nātou ʼui age ki ai: “ ʼAliki, ʼe mātou manatuʼi, neʼe ʼui maʼa te tagata kākā ʼaenā ʼi tona kei maʼuli: ‘ ʼE hili pe ia ʼaho e tolu, pea ʼe tonu ke toe fakatuʼuake ʼau.’ Koia ke ke fekau e koe ke leʼoleʼohi ia te falemaka, ʼo aʼu ki tona tolu ʼaho, ke ʼaua naʼa haʼu tana kau tisipulo ʼo kaihaʼa ia ia pea mo nātou ʼui ki te hahaʼi: ‘Kua fakatuʼuake ia mai te kau mate!’ pea ko te kākā muli ʼaia ʼe kovi ʼosi age anai ia ʼi te ʼuluaki.”

Neʼe ʼui maʼa Pilato: “ ʼE ʼi ai takotou kau leʼo. Koutou ʼolo ʼo leʼoleʼohi, ohage pe ko takotou popoto ʼi tona fai.” Neʼe nātou ʼolo ai pea nātou vakaʼi te falemaka, ʼo nātou pulusi te foʼi maka pea mo nātou tuku ai te kau tagata leʼo loma.

ʼI te ʼahotapu, ka kei māfoatā, ko Malia Maketalena pea mo Malia, faʼe ʼa Sake, feiā mo Salome, Soana pea mo ʼihi fafine, neʼe nātou ʼolo mo te ʼu lolo pea mo te ʼu ʼakau fakamagoni moʼo takai ʼaki te sino ʼo Sesu. ʼI te ala, neʼe fēnei tanatou feʼuiʼaki: “Ko ai ʼaē ka ina fakateka anai maʼa tatou te foʼi maka mai te hūʼaga ʼo te falemaka fakamanatu?” Kae ʼi tanatou kaku atu ki te falemaka, neʼe nātou fakatokagaʼi neʼe hoko te mafuike pea ko te foʼi maka kua ʼosi toʼo, neʼe fakatekaʼi e te ʼaselo ʼa Sehova. Kua ʼolo te kau tagata leʼo pea ʼe gaʼasi te falemaka! Mateo 27:57 ki te 28:2; Maleko 15:42 ki te 16:4; Luka 23:50 ki te 24:3, 10; Soane 19:14, 31 ki te 20:1; 12:42; Levitike 23:5-7; Teutalonome 21:22, 23; Pesalemo 34:20; Sakalia 12:10.

▪ He koʼe neʼe fakahigoa te feliaono ko te Teuteu, pea koteā tatatou mahino ʼo ʼuhiga mo te kupu ʼaē ko te sapato “lahi”?

▪ Ko te ʼu folafola fea ʼa te Tohi-Tapu ʼaē ʼe hoko ʼo ʼuhiga mo te sino ʼo Sesu?

▪ Neʼe feafeaʼi te kau ʼa Sosefo pea mo Nikotemo ki te ʼavaifo ʼo Sesu, pea koteā ʼaē e nā pipiki ai kia Sesu?

▪ Koteā te kole neʼe fai e te kau pelepitelo kia Pilato, pea koteā te tali neʼe fai age kia nātou?

▪ Koteā te meʼa neʼe hoko ʼi te ʼahotapu, ʼi te māfoatā?