Faʼahi 6
He Koʼe Neʼe Fakagafua e Te ʼAtua Te Mamahi
1, 2. Neʼe feafeaʼi koa te fakakoviʼi ʼe tatatou ʼu ʼuluaki mātuʼa te kamataʼaga lelei ʼaē neʼe foaki age e te ʼAtua?
HE KOʼE koa neʼe iku kovi te ʼu meʼa? Koteā koa te meʼa ʼaē neʼe fakakovi ki te kamataʼaga lelei ʼaē neʼe foaki e te ʼAtua ki tatatou ʼu ʼuluaki mātuʼa ʼi te Palatiso ʼi Eteni? He koʼe koa, neʼe fetogi te tokalelei pea mo te faʼifaʼitahi ʼi te Palatiso e te agakovi pea mo te mamahi talu te ʼu taʼu ʼe lauʼi afe?
2 Ko tona tupuʼaga ʼaē ko Atama pea mo Eva neʼe nā fakaʼaogaʼi kovi tona loto faʼifaʼitaliha. Neʼe galo kia nāua neʼe mole fakatupu nāua ke nā maʼuʼuli ʼo mole nā tokagaʼi te ʼAtua pea mo tana ʼu lao. Kua nā tonu ke nā ʼāteaina mai te ʼAtua, ʼo nā manatu ʼe toe lelei age ai tonā maʼuli. Neʼe nā maumauʼi te ʼu tuʼakoi ʼaē neʼe fakatuʼu e te ʼAtua ʼo ʼuhiga mo te loto faʼifaʼitaliha. — Senesi, kapite 3.
Ko te fehuʼi ʼo ʼuhiga mo te pule faka ʼatulaulau
3-5. He koʼe koa neʼe mole pulihi e te ʼAtua ia Atama pea mo Eva pea ina toe kamata mai tona kamataʼaga?
3 He koʼe koa neʼe mole faka ʼauha e te ʼAtua ia Atama pea mo Eva pea mo ina toe fakatupu he tahi taumātuʼa ʼo toe kamata? Koteʼuhi he ko tana pule faka ʼatulaulau, tona maʼua ʼaē ke pule faʼitaliha, neʼe fakafihiʼi.
4 Koʼeni te fehuʼi ʼe fēnei: Ko ai koa ʼaē ʼe tonu ke pule, pea ko te pule koa ʼa ai ʼaē ʼe totonu? ʼI tona ʼuhiga māfimāfi pea ko ia ko te Tupuʼaga ʼo te ʼu meʼa maʼuli fuli, ʼe tonu ke pule te ʼAtua kia nātou. ʼI tona lahi ʼaupito ʼi te poto, ko tana pule ʼe ko te gata pe ʼaia ʼo te meʼa ʼe lelei kia nātou. Kae ko te pule ʼaē ʼa te ʼAtua kua fakafihiʼi. Tahi ʼaē meʼa, ʼe mole ʼi ai koa la he meʼa ʼe hāla ʼi te tagata, ʼaē neʼe ina fakatupu? ʼE tou fakasiosio anai ki muli pe ʼe feafeaʼi te kau ai ʼo te nofo agatonu ʼa te hahaʼi ʼi te fehuʼi ʼaia.
5 ʼI te kua liliu ʼa te tagata ʼo ʼāteaina mai te ʼAtua, neʼe malaga ai te tahi fehuʼi: ko te hahaʼi ʼe feala anai koa ke lelei age tonatou maʼuli mokā ʼe mole nātou fakalogo ki te pule ʼa te ʼAtua? ʼE lagi ʼiloʼi lelei pe e te Tupuʼaga te tali ki te fehuʼi ʼaia, kae ko he puleʼaki lelei ki te hahaʼi ke nātou maʼu tona tali, neʼe ina foaki age kia nātou te ʼāteaina katoa ʼaē ʼe nātou loto ki ai. ʼI tonatou kua fili te ala ʼaia ʼaki tonatou loto faʼitaliha, neʼe tuku e te ʼAtua ke nātou fai te meʼa ʼaē ʼe nātou loto ki ai.
6, 7. He koʼe neʼe foaki e te ʼAtua he ʼāteaina katoa ʼo fualoa ki te tagata?
6 ʼI tana tuku he temi loaloaga ki te hahaʼi ke nātou fakaʼaogaʼi te ʼāteaina katoa, ʼe fakamoʼoni ai e te ʼAtua ke talu ai peʼe ko te hahaʼi ʼe nātou maʼuli fīmālie ʼi te pule ʼa te ʼAtua peʼe ʼi tanatou takitaki pe ʼaē ia nātou. ʼE tonu foki ko te temi ʼaia ke loaloaga ke feala ai ki te hahaʼi tanatou kaku ki te tumutumu ʼo te poto ʼi te faʼahi faka politike, ʼi te faʼu masini, ʼi te ʼu meʼa fakapoto lalahi pea mo te ʼu meʼa faka tōketā.
7 Neʼe tuku e te ʼAtua ki te hahaʼi te faʼitaliha lahi ʼaupito ʼo aʼu mai ki te temi nei, ke fakahā lelei ai ʼo mole toe ʼi ai he kinau ki ai peʼe nātou lavaʼi ʼo ʼāteaina mai te ʼAtua te takitaki ʼonatou ʼo laka lelei. ʼE feala ai leva te fili e te tagata te agalelei pe ko te agafekai, te ʼofa pe ko te fehiʼa, te faitotonu pe ko te heʼefaitotonu. Kae neʼe toe fakahaga foki ki te ʼu fua ʼo tana filifili: te tokalelei ʼaē ʼe ʼaumai e te agalelei, peʼe ko te mamahi ʼuhi ko te agakovi.
Neʼe fakafeagai te ʼu meʼa maʼuli fakalaumālie
8, 9. a) Neʼe feafeaʼi koa te hoko ʼo te fakafeagai ʼi te faʼahi fakalaumālie? b) ʼO kehe age ia mo Atama pea mo Eva, ko ai ʼihi neʼe uga e Satana ke fakafeagai?
8 Ko te tahi ʼaē meʼa ʼe tonu ke vakaʼi ki ai. Neʼe mole ko tatatou ʼu ʼuluaki mātuʼa pe ʼaē neʼe fakafeagai ki te pule ʼa te ʼAtua. Kae ko ai koa te tahi ʼu hahaʼi neʼe maʼuʼuli ʼi te temi ʼaia? Ko te ʼu hahaʼi fakalaumālie. ʼI muʼa ʼo tana fakatupu te tagata, neʼe fakatupu e te ʼAtua te ʼu faʼahiga maʼuli ʼe maʼoluga ake: ko te kau ʼaselo ʼe tokolahi, ko tonatou tōfiʼa ko te maʼuli ʼi te lagi. Ko te kau ʼaselo ʼaia neʼe toe fakatupu ia nātou mo te loto faʼifaʼitaliha pea mo te toe ʼaoga kia nātou ke nātou fakalogo ki te pule ʼa te ʼAtua. — Sopo 38:7; Pesalemo 104:4; Fakahā 5:11.
9 ʼE fakahā e te Tohi-Tapu ko te fakafeagai neʼe ʼuluaki hoko ʼi te faʼahi fakalaumālie. Ko he tahi meʼa maʼuli fakalaumālie neʼe loto ki he ʼāteaina katoa. Neʼe toe loto foki ia ke ʼatolasio age te tagata kia ia (Mateo 4:8, 9). Ko te laumālie talagataʼa ʼaia neʼe fasituʼu ʼo ina ʼui ko te ʼAtua ʼe ina fufū kia Atama pea mo Eva te meʼa ʼe lelei pea ina uga feiā ai nāua ke nā fakafeagai (Senesi 3:1-5). Koia neʼe fakahigoa ai ko te Tevolo (Fasituʼu) pea ko Satana (Fakafeagai). Ki muli mai, neʼe ina uga te tahi ʼu meʼa maʼuli fakalaumālie ke fakafeagai. Neʼe fakahigoaʼi nātou ko te kau temonio. — Teutalonome 32:17; Fakahā 12:9; 16:14.
10. Koteā te ʼu fua ʼo te fakafeagai ʼa te tagata pea mo te ʼu meʼa maʼuli fakalaumālie?
10 ʼAki tanatou fakafeagai ki te ʼAtua, neʼe fakatō tonu pe e te hahaʼi ia nātou ki te pule ʼa Satana pea mo tana kau temonio. Koia ʼe fakahigoaʼi ai e te Tohi-Tapu ia Satana “ko te ʼatua ʼo te tuʼu ʼaenī” ʼaē neʼe “fakakiviʼi te laumālie ʼonatou ʼe mole tui”. ʼE toe ʼui mai foki e te Folafola ʼa te ʼAtua ko “ko te malamanei katoa ʼe takoto ia ʼi te mālohi ʼo te agakovi”. Neʼe fakahigoaʼi e Sesu totonu ia Satana “ko te pule ʼo te mālama ʼaenī”. — 2 Kolonito 4:4; 1 Soane 5:19; Soane 12:31.
Te ʼu fehuʼi e lua
11. ʼO ʼuhiga mo te tahi fehuʼi fea ʼaē neʼe fakalaka hālaʼi te ʼAtua e Satana?
11 Neʼe toe fai e Satana te tahi fehuʼi ʼe fakalaka hālaʼi ai te ʼAtua. ʼIo, neʼe ina ʼui neʼe faihāla te ʼAtua ʼi te agaaga ʼo tana fakatupu te tagata pea neʼe ina lau ʼe mole he tahi ʼi te hahaʼi ʼe ina fia fai te meʼa ʼaē ʼe lelei mokā ʼe ʼi ai he ʼu fakamaʼua. Koia, neʼe ina ʼui ai ka hoko he fakataga ʼe feala te tagata ke aʼu ʼo laukovi ki te ʼAtua (Sopo 2:1-5). ʼI tana aga ʼaia, neʼe lagaʼi ai e Satana ke toe vakaʼi te fehuʼi ʼo ʼuhiga mo te agatonu ʼa te tagata.
12-14. ʼE feafeaʼi koa te fakahā mai e te temi ʼaē ʼe ʼalu ia te moʼoni ʼo ʼuhiga mo te ʼu fehuʼi ʼaia e lua neʼe lagaʼi e Satana?
12 Koia neʼe tuku ai e te ʼAtua te temi loaloaga ki tana ʼu meʼa maʼuli fuli ke nātou fakahā pe ʼe feafeaʼi te tali ki te fehuʼi ʼaia pea mo ʼaē ʼo te pule faka ʼatulaulau (vakaʼi ia Ekesote 9:16). Ko te ʼu meʼa ka hoko ki muli mai ʼo te hisitolia ʼo te tagata ʼe nātou fakahā anai te moʼoni ʼo ʼuhiga mo te ʼu fehuʼi ʼaia e lua.
13 Koteā anai ka hā ʼi te temi ki ʼa muli ʼo ʼuhiga mo te fehuʼi ki te pule faka ʼatulaulau, ki te tonu ʼo te pule ʼa te ʼAtua? ʼE feala koa te takitaki e te hahaʼi ia nātou totonu, ʼo lelei age ia ʼi he takitaki neʼe fai e te ʼAtua? ʼE ʼi ai anai koa he faʼahiga pule fakatagata ʼe ʼāteaina mai te ʼAtua ʼe feala ke ina fakakaku ki he malamanei ʼe fiafia, ʼe mole toe ʼi ai he ʼu tau, he ʼu fakapō pea mo he heʼefaitotonu? ʼE feala anai koa ke ina lavaʼi ʼo pulihi te masiva pea mo foaki te maʼuli fīmālie ki te hahaʼi fuli? ʼE feala anai koa tana pulihi te mahaki, te matutuʼa pea mo te mate? ʼE ko te ʼu meʼa fuli ʼaia ʼaē neʼe tonu ke fakahoko e te pule ʼa te ʼAtua. — Senesi 1:26-31.
14 ʼO ʼuhiga mo te lua fehuʼi, koteā anai te meʼa ʼaē ka hā mai ʼaki te temi ʼo ʼuhiga mo te maʼuhiga ʼaē ʼo te tagata? Neʼe faihāla koa te ʼAtua ʼi tana fakatupu te tagata ohage ko te meʼa ʼaē neʼe ina fai? ʼE ʼi ai ʼāpe anai koa niʼihi, logope te ʼu faigataʼaʼia, ʼe nātou fai anai te meʼa ʼaē ʼe lelei? ʼE ʼi ai ʼāpe anai koa ni tagata ʼe nātou leleiʼia age te pule ʼa te ʼAtua ʼi te pule ʼāteaina ʼa te tagata?
[Paki ʼo te pasina 13]
Neʼe tuku e te ʼAtua ki te hahaʼi te temi loaloaga moʼo fakahoko ki tona gataʼaga tanatou ʼu gāue ʼaē ʼe nātou fai.
[Haʼuʼaga ʼo te paki]
Shuttle: Based on NASA photo