Faʼahi 11
Ko Te Tafito ʼo Te Mālama Foʼou Kua Fai Nei
1, 2. Ohage ko te ʼu lea faka polofeta faka tohi-tapu, koteā te meʼa ʼaē ʼe tou sisio ki ai ʼi te temi nei?
KO HE tahi meʼa fakatalakitupua ʼaenī: ko te tafito ʼo te mālama foʼou ʼa te ʼAtua kua fai nei, ka ko te mālama ʼāfea ʼa Satana kua ʼāsili ʼosi tona kovi. Ko te ʼAtua ʼe ina tatanaki te hahaʼi ʼo te puleʼaga fuli pea ko nātou ʼaia ko te tafito ʼo te sosiete foʼou ʼi te kele ʼaē ka ina fetogi anai ʼi he temi kua ōvi mai ia te mālama maveuveu ʼaenī ʼe tou ʼiloʼi ʼi te temi nei. ʼI te Tohi-Tapu, ia 2 Petelo 3:13, ko te sosiete foʼou ʼaia ʼe fakahigoaʼi “ko te kele foʼou”.
2 ʼE toe ʼui foki e te lea faka polofeta: “ ʼI te temi fakaʼosi ʼo te ʼu ʼaho [ʼi totatou temi], (...) ʼe tokolahi te hahaʼi ʼe nātou ʼolo anai pea mo nātou ʼui anai: ‘Koutou ʼomai pea ke tou hake ki te moʼuga ʼo Sehova [te tauhi moʼoni], (...) pea ʼe ina akonakiʼi anai tatou ki tona ʼu ala, pea ʼe tou haʼele anai ʼi tona ʼu ala foufou.’ ” — Isaia 2:2, 3.
3. a) Ko te ʼu hahaʼi fea ʼaē ʼe hoko ki ai te lea faka polofeta ʼa Isaia? b) Koteā ʼaē ʼe ʼui ki ai e te tohi fakaʼosi ʼo te Tohi-Tapu?
3 Ko te lea faka polofeta ʼaia ʼe hoko ʼi te temi nei kia nātou ʼaē ʼe fakalogo ‘ki te ʼu ala ʼo Sehova pea mo haʼele ʼi tana ʼu ala foufou’. Ko te tohi fakaʼosi ʼo te Tohi-Tapu ʼe talanoa ai ki te sosiete faka malamanei ʼe faʼufaʼu e te hahaʼi ʼe pipiki ki te tokalelei pea ʼe fakahigoaʼi “te toe hahaʼi lahi (...) mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli”, ʼe ko he famili faka malamanei moʼoni ia ʼe gāue ki te ʼAtua ʼi te logo tahi. Neʼe toe ʼui ʼe te Tohi-Tapu: “Ko nātou ʼaia neʼe ʼomai mai te mamahi lahi.” Ko tona faka ʼuhiga ʼe nātou hāo anai ʼi te fakaʼosi ʼo te ʼu faʼahiga meʼa ʼo te tuʼu agakovi ʼaenī. — Fakahā 7:9, 14; Mateo 24:3.
Ko he famili faka malamanei
4, 5. Koteā ʼaē ʼe feala ai te fakatahitahi ʼo te famili faka malamanei ʼo te kau Fakamoʼoni ʼa Sehova?
4 Ko te ʼu miliona kau Fakamoʼoni ʼa Sehova ʼe nātou faigaʼi fakamalotoloto ke nātou maʼuli ʼalu tahi mo te ʼu fakatotonu pea mo te ʼu ala ʼo Sehova. ʼE fakatafito tanatou falala ki he maʼuli heʼegata ʼi te mālama foʼou ʼa te ʼAtua. Ko tonatou maʼuli ʼi te ʼaho fuli ʼe faka ʼalu tahi ki te ʼu lao ʼa te ʼAtua pea ʼe nātou fakahā ai foki tanatou holi ʼaē ki te fakalogo ki tana pule, ʼo kamata atu ʼi te temi nei kae toe feiā foki ʼi te mālama foʼou. Logope te kehekehe ʼo tonatou ʼu fenua pea mo tonatou ʼu lanu, ʼe nātou fakaʼapaʼapa fuli ki te ʼu faʼahiga meʼa ʼe tatau ʼo ʼuhiga mo te aga ʼe tonu ke fai ʼaē ʼe fakamahino lelei mai e te ʼAtua ʼi tana Folafola. Koia ʼaē ʼe nātou fakatahi ai ko he famili faka malamanei moʼoni, te sosiete ʼo he mālama foʼou, ʼaē neʼe fakatuʼu e te ʼAtua. — Isaia 54:13; Mateo 22:37, 38; Soane 15:9, 14.
5 Kapau ko te kau Fakamoʼoni ʼa Sehova ʼe nātou fakatahitahi ko he famili faka malamanei ʼe mole hona tatau, ʼe nātou ʼiloʼi lelei neʼe mole hoko te fahaʼi ʼaia ʼuhi ko nātou. ʼE nātou ʼiloʼi ko te fua ʼo te gāue ʼo te laumālie mālohi ʼo te ʼAtua ki te ʼu hahaʼi ʼe fakalogo ki tana ʼu lao (Gāue 5:29, 32; Kalate 5:22, 23). ʼE ko he gāue fakaʼatua ia. Ohage ko te ʼui ʼa Sesu, “ko te ʼu meʼa ʼaē ʼe mole fealagia ki te tagata, ʼe faigafua ia ki te ʼAtua”. (Luka 18:27.) Ko te ʼAtua ʼaē neʼe ina fakatupu te ʼatulaulau ʼaē ʼe tuʼu ʼo maʼu lelei neʼe ina toe fakagafua foki ke tupu te sosiete ʼaia ʼo te mālama foʼou ke tuʼu ʼo maʼu lelei.
6. He koʼe ʼe feala tatatou palalau ki te kau Fakamoʼoni ʼa Sehova ohage ko he milakulo ʼi totatou temi?
6 ʼE feala ai foki hatatou fakakaukauʼi te faʼahiga pule ka fai anai e Sehova ʼi te mālama foʼou ʼi tatatou fakasiosio te meʼa ʼaē ʼe ina fai ʼi loto ʼo te tafito ʼo te mālama foʼou, tafito ʼaenī ʼe lolotoga faʼufaʼu nei. Pea ko te meʼa ʼaē neʼe ina fai ʼaki tana kau Fakamoʼoni ʼe ko he milakulo ia ʼi te temi nei. ʼO feafeaʼi koa? Koteʼuhi neʼe ina faʼufaʼu te kau Fakamoʼoni ʼa Sehova ko he famili faka malamanei moʼoni, ko he famili ʼe mole feala ke fakamavetevete ʼaki te ʼu meʼa fakatupu maveuveu ohage la ko te ʼu meʼa fakafenua, faka lanu peʼe faka lotu. Logope ko te kau Fakamoʼoni ʼe lauʼi miliona pea ʼe nātou nonofo ʼi te ʼu fenua ʼe laka ʼi te 200, ʼe nātou logo tahi ohage ko he meʼa e tahi ʼaki te noʼo ʼe mole feala ke maumauʼi. Ko te famili faka malamanei ʼaia ʼaē ʼe tokotahi ʼosi ʼi te Hisitolia katoa, ʼe ko he milakulo moʼoni ia ʼo te ʼu temi nei — ʼe ko he gāue fakaʼatua ia. — Isaia 43:10, 11, 21; Gāue 10:34, 35; Kalate 3:28.
ʼE feafeaʼi te ʼiloʼi ʼo te hahaʼi ʼa te ʼAtua
7. ʼI te palalau ʼa Sesu, koteā te meʼa ʼaē ʼe feala ai ke ʼiloʼi tana ʼu tisipulo moʼoni?
7 Koteā he tahi meʼa ke tou ʼiloʼi ai te hahaʼi moʼoni ʼaē ʼe fakaʼaogaʼi e te ʼAtua ko te fakatafito ʼo tana mālama foʼou? Ko ai ʼaē ʼe ina fakahoko te ʼu palalau ʼa Sesu ia Soane 13:34, 35? “ ʼE ʼau foaki atu kia koutou he fakatotonu foʼou: ke koutou feʼofaʼofaniʼaki ia koutou, pea ohage ko taku ʼofa ʼaē kia koutou, mo koutou foki ke koutou feʼofaʼofaniʼaki ia koutou. ʼAki te meʼa ʼaenī ʼe ʼiloʼi fuli ai e te hahaʼi ko koutou ko taku ʼu tisipulo: mo kapau ʼe koutou femāʼuʼaki te ʼofa.” Ko te kau Fakamoʼoni ʼa Sehova ʼe nātou muliʼi te ʼu folafola ʼa Sesu pea ʼe nātou maʼuliʼi te fahaʼi ʼaia ʼi te ʼaho fuli. Ohage ko te fakamahino mai e te Folafola ʼa te ʼAtua, ʼe nātou “femāʼuʼaki te ʼofa loloto”. (1 Petelo 4:8.) ʼE nātou ‘kofuʼi te ʼofa, heʼe ko te noʼo lelei ia ki te logo tahi’. (Kolose 3:14.) Ko te ʼofa fakatautehina ʼe ko te “sima” ʼaia ʼe ina tāʼofi nātou ʼi te logo tahi ʼi te malamanei katoa.
8. Koteā te tahi meʼa ʼaē neʼe fakahā ia 1 Soane 3:10-12 ke ʼiloʼi ai te kau kaugana ʼa te ʼAtua?
8 ʼE toe tatau aipe, ia 1 Soane 3:10-12 ʼe ina ʼui mai: “Ko te ʼu fānau ʼa te ʼAtua pea mo te ʼu fānau ʼa te Tevolo ʼe ʼiloga ʼaki te meʼa ʼaenī: ko ʼaē ʼe mole ina taupau te faitotonu ʼe mole haʼu ia mai te ʼAtua, ʼo tatau aipe mo ia ʼaē ʼe mole ʼofa ki tona tēhina. Heʼe koʼeni te fekau ʼaē neʼe koutou logo ki ai ʼi te kamataʼaga: ke tou feʼofaʼofaniʼaki ia tatou; ʼo mole ohage ko Kaino ʼaē neʼe haʼu mai te agakovi pea neʼe ina matehi tona tēhina.” ʼE feiā la te liliu ʼaē ʼa te kau kaugana ʼa te ʼAtua ko he famili ʼe mole aga fakamālohi pea ʼe ko he famili ʼi te malamanei katoa.
Ko he tahi fakaʼiloga
9, 10. a) Ko te gāue feafeaʼi ʼaē ʼe feala ai te ʼiloʼi ʼo te kau kaugana ʼa te ʼAtua ʼi te ʼu ʼaho fakaʼosi? b) Neʼe feafeaʼi koa te fakahoko e te kau Fakamoʼoni ʼa Sehova ia Mateo 24:14?
9 ʼE ʼi ai te tahi meʼa ʼe feala ke ʼiloʼi ai te kau kaugana ʼa te ʼAtua. ʼI tana lea faka polofeta ʼaē ʼo ʼuhiga mo te fakaʼosi ʼo te malamanei, neʼe lahi te ʼu meʼa neʼe palalau ki ai Sesu ʼe nātou fakaʼiloga te ʼu ʼaho fakaʼosi (vakaʼi te fahaʼi 9). Ko te agaaga e tahi ʼi te ʼu agaaga tāfito ʼo te lea faka polofeta ʼaia ʼe tohi ia Mateo 24:14: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, moʼo fakamoʼoni ki te ʼu puleʼaga katoa; pea hoki hoko mai ai leva mo te fakaʼosi.”
10 Neʼe tou sio koa ki te lea faka polofeta ʼaia kua hoko? Ei, heʼe talu mai te kamata ʼo te ʼu ʼaho fakamuli ʼi te taʼu 1914, ko te kau Fakamoʼoni ʼa Sehova ʼe nātou faka mafola te logo lelei ʼo te Puleʼaga ʼo te ʼAtua ʼi te kele katoa ohage pe ko te meʼa ʼaē neʼe fakatotonu e Sesu, ʼaē ko te ʼolo ki te ʼu ʼapi ʼo te hahaʼi (Mateo 10:7, 12; Gāue 20:20). Ko te ʼu miliona kau Fakamoʼoni ʼe nātou ʼaʼahi te hahaʼi ʼi te atu puleʼaga fuli ʼo palalau mo nātou ki te mālama foʼou. Koia neʼe koutou maʼu ai te kaupepa ʼaenī, heʼe ko te gāue ʼa te kau Fakamoʼoni ʼa Sehova ʼe kau ki ai te ta pea mo te tufa ʼo te ʼu tohi ʼe lauʼi miliale tona lahi ʼaia ʼe palalau ai ki te Puleʼaga ʼo te ʼAtua. ʼE koutou toe ʼiloʼi atu koa la he tahi hahaʼi ʼe nātou faka mafola te Puleʼaga ʼo te ʼAtua ʼi te ʼu ʼapi, pea mo fai te fahaʼi ʼaia ʼi te malamanei katoa? Ia Maleko 13:10 ʼe fakahā mai ai ko te gāue faka mafola pea mo fai akonaki ʼaia ʼe tonu “muʼa” ke fai, ia muʼa ʼo te hoko mai ʼo te fakaʼosi.
Ko he tali ki te lua fehuʼi lahi
11. Koteā ʼaē ʼe toe fakahoko e te kau Fakamoʼoni ʼa Sehova ʼaki tanatou fakalogo ki te pule fakaʼatua?
11 ʼAki tanatou fakalogo ki te ʼu lao pea mo te ʼu lekula ʼa te ʼAtua, ko te kau Fakamoʼoni ʼa Sehova ʼe nātou toe fakahoko te tahi meʼa: ʼe nātou fakahā ai ko Satana neʼe gutu loi ʼi tana ʼui ʼaē ko te hahaʼi ʼe mole nātou lavaʼi anai te nonofo agatonu ki te ʼAtua mokā ʼe ʼahiʼahiʼi ia nātou pea ʼe nātou foaki ai te tali ki te lua fehuʼi lahi, ʼaē ʼo ʼuhiga mo te agatonu ʼa te hahaʼi (Sopo 2:1-5). Ko te kau Fakamoʼoni ʼaia, ʼaē ʼe nātou faʼufaʼu te sosiete ʼe lauʼi miliona tona hahaʼi mai te atu puleʼaga kehekehe, ʼe nātou fakahā ohage he tagata e tahi tanatou nonofo agatonu ki te pule ʼa te ʼAtua. Logope ko nātou ko te ʼu hahaʼi agahala, ʼe nātou kau ki te faʼahi ʼo te ʼAtua ʼi te fehuʼi ʼaē ʼo ʼuhiga mo te pule faka ʼatulaulau, logope te ʼu fakafeagai ʼa Satana.
12. Ko ai ʼaē ʼe faʼifaʼitaki ki ai te kau Fakamoʼoni ʼaki tanatou tui?
12 ʼI te temi nei, ko te ʼu miliona kau Fakamoʼoni ʼaia ʼa Sehova kua nātou toe fakatahiʼi tanatou fakamoʼoni ki te lisi loaloaga ʼo te tahi kau fakamoʼoni ʼo te temi muʼa ʼaē neʼe nātou fakahā tanatou agatonu ki te ʼAtua. Ko Apele, Noe, Sopo, Apalahamo, Sala, Isaake, Sakopo, Tepola, Luti, Tavite pea mo Taniela, ko te ʼu higoa pe ʼaia ʼo ʼihi kae kei toe lahi age (Hepeleo, kapite 11). ʼE nātou hage ko tona ʼui mai e te Tohi-Tapu, ko he ‘ ʼao lahi ʼo te kau fakamoʼoni agatonu’. (Hepeleo 12:1.) Ko te ʼu hahaʼi ʼaia, pea mo ʼihi atu, ʼo kau ai mo te kau tisipulo ʼa Sesu neʼe nātou nonofo agatonu ki te ʼAtua. Pea ko Sesu, neʼe tuku mai te faʼifaʼitaki lelei ʼaki tana nofo agatonu haohaoa.
13. Koteā te palalau ʼa Sesu ʼo ʼuhiga mo Satana kua moʼoni ia?
13 ʼE hā mai ai te moʼoni ʼo te palalau ʼa Sesu ʼi tana ʼui ʼaē ki te ʼu pule faka lotu, ʼo fēnei tana palalau ʼo ʼuhiga mo Satana: “Kae ʼi te temi nei ʼe koutou faigaʼi ke koutou matehi ʼau, ia ʼau, he tagata neʼe ʼau ʼui atu te moʼoni ʼaē neʼe ʼau logo ki ai mai te ʼAtua. (...) ʼE koutou haʼu, koutou, mai tokotou tāmai, te Tevolo, pea ʼe koutou fia fakahoko te ʼu meʼa ʼaē ʼe holi ki ai takotou tāmai. Neʼe ko he fakapō ia ʼi tana kamata, pea neʼe mole haga nofo ia ʼi te moʼoni, koteʼuhi heʼe mole he moʼoni ia ia. Ka ina fai he ʼu palalau loi, pea ʼe palalau ia ohage ko tona ʼulugaaga ʼo ia, koteʼuhi heʼe gutu loi pea ʼe ko te tāmai ʼo te loi.” — Soane 8:40, 44.
Koteā anai ka koutou fili?
14. Koteā te meʼa ʼaē ʼe hoko nei ʼi te tafito ʼo te mālama foʼou?
14 Ko te tafito ʼo te mālama foʼou ʼaē ʼe fai nei e te ʼAtua ʼi te loto sosiete faka malamanei ʼaē ʼe faʼufaʼu e te kau Fakamoʼoni ʼa Sehova ʼe ʼāsili tuʼumaʼu pe tona mālohi. ʼI te taʼu fuli, ko te hahaʼi ʼe lauʼi afe tona tokolahi ʼe nātou fakaʼaoga tonatou loto faʼitaliha, ʼo falanaki ki he mālama totonu, moʼo tali ʼo te pule ʼa te ʼAtua. ʼE nātou ʼolo ʼo kau ki te sosiete ʼo te mālama foʼou, ʼo nātou kau ki te faʼahi ʼo te ʼAtua ʼi te fehuʼi ʼaē ʼo ʼuhiga mo te pule faka ʼatulaulau pea ʼe nātou fakahā ai ko Satana ʼe gutu loi.
15. Ko te gāue fakamavaevae feafeaʼi ʼaē ʼe fai e Sesu ia ʼaho nei?
15 ʼI tanatou fili te pule fakaʼatua, ko Kilisito, ʼaē ʼe ina vaeʼi “te ʼu ōvi” mai te ʼu “tao”, kua ina fakafuafua ko nātou ʼaia ʼe tau mo nātou ke nātou tutuʼu “ ʼi tona fahaʼi mataʼu”. ʼI tana lea faka polofeta ʼaē ʼo ʼuhiga mo te ʼu ʼaho fakamuli, neʼe fakahā e Sesu: “ ʼE fakatahitahiʼi anai ʼi ʼona muʼa te atu puleʼaga katoa, pea ʼe ina vaevae anai te hahaʼi, ohage ko te vaheʼi e te tagata tauhi manu te ʼu ōvi mai te ʼu tao. Pea ʼe ina tuku anai te ʼu ōvi ki tona fahaʼi mataʼu, kae ko te ʼu tao ki tona fahaʼi hema.” Ko te ʼu ōvi ʼe ko he ʼu hahaʼi agavaivai ʼaē ʼe nātou fakatahi ki te ʼu tēhina ʼo Kilisito pea mo tokoni kia nātou, ʼo nātou fakalogo ai ki te pule ʼa te ʼAtua. Ko te ʼu tao ʼe ko he ʼu hahaʼi logogataʼa, ʼaē ʼe nātou fakafisi ki te ʼu tēhina ʼo Kilisito pea ʼe mole nātou fai he meʼa moʼo lagolago ki te pule ʼa te ʼAtua. Koteā anai tona ʼu fua? Neʼe tali fēnei e Sesu: “Ko nātou ʼaenī [te ʼu tao] ʼe nātou ʼolo anai ki te mate heʼegata, kae ko te kau agatonu [te ʼu ōvi], ki te maʼuli heʼegata.” — Mateo 25:31-46.
16. Koteā te meʼa ʼaē ʼe tonu ke koutou fai mokā ʼe koutou fia maʼuli ʼi te Palatiso ʼaē ka haʼu?
16 ʼE mahino papau ia, ko te ʼAtua ʼe tokaga moʼoni kia tatou! Kua vave nei pe, tana fakatuʼu te palatiso ʼi te kele. ʼE koutou fia maʼuli koa ʼi te Palatiso ʼaia? Kapau ʼe koutou loto ki ai, fakahā tokotou loto fakafetaʼi ki te ʼu fakatuʼutuʼu ʼaē ʼe fai e te ʼAtua: koutou ako te ʼiloʼi ʼo ia pea ke koutou maʼuli tahi mo te ʼu meʼa ʼaē ʼe koutou ako. “Koutou kumi ia Sehova, ʼi te temi ʼaē kei feala tona maʼu. Koutou pāuʼi kia te ia, ʼi te temi ʼaē ʼe kei ōvi mai ai. Ke mavae te tagata agakovi mai tona ala pea ke līaki e te tagata aga fakalialia tana ʼu manatu; pea ke liliu ia kia Sehova, ʼaia ka ʼofa moʼoni anai ki ai!” — Isaia 55:6, 7.
17. He koʼe ʼe mole kei ʼaoga te pulihi ʼo te temi ʼi tatatou fili pe ko ai ʼaē ka tou kaugana ki ai?
17 ʼE mole kei ʼaoga te pulinoa ʼo te temi. Ko te fakaʼosi ʼo te tuʼu ʼāfea ʼaenī kua ōvi ʼaupito mai. Ko te Folafola ʼa te ʼAtua ʼe ina foaki mai te tokoni ʼaenī: “ ʼAua naʼa koutou manako ki te malamanei peʼe ko te ʼu meʼa ʼaē ʼe ʼi te malamanei. Kapau ʼe manako he tahi ki te malamanei, ko te ʼofa ki te Tāmai ʼe mole ia ia (...). ʼE mole te malamanei pea mo tona loto, ka ko ʼaē ʼe ina fai te finegalo ʼo te ʼAtua ʼe nofo anai ia ʼo heʼegata.” — 1 Soane 2:15-17.
18. Koteā te ʼu faʼahiga meʼa ʼaē ʼe tonu ke fai ke feala ai takotou ʼamanaki mo he falala ki te maʼuli ʼi te mālama foʼou taulekaleka ʼa te ʼAtua?
18 Ko te kau kaugana ʼa te ʼAtua ʼe akoʼi ia nātou ʼi te temi nei ki te maʼuli heʼegata ʼaē ʼi te mālama foʼou. ʼE nātou maʼu te ʼu poto, fakalaumālie peʼe ʼi he tahi atu ʼu fahaʼi, ʼaē ʼe tonu ke maʼu moʼo teuteuʼi ʼo te palatiso. ʼE mātou fakaloto mālohiʼi ʼaupito atu ia koutou ke koutou fili te ʼAtua ko he Pule pea mo lagolago ki te gāue fakamaʼuli ʼaē ʼe ina fakatotonu ke fai ʼi te temi nei ʼi te kele katoa. Koutou ako te Tohi-Tapu mo te kau Fakamoʼoni ʼa Sehova pea ke koutou ako te ʼiloʼi ʼo te ʼAtua ʼaē ʼe tokaga moʼoni kia koutou ʼaia ka ina fakagata anai te mamahi. Kapau ʼe koutou fai feiā, pea ʼe feala ai anai, ke koutou kau ki te tafito ʼo te mālama foʼou. ʼE feala ai leva takotou ʼamanaki mo he falala ke koutou maʼu te ʼofa ʼo te ʼAtua pea mo maʼuli ʼo heʼegata ʼi te mālama foʼou taulekaleka ʼaē ka ina fakatuʼu anai.
[Paki ʼo te pasina 31]
Ko te kau Fakamoʼoni ʼa Sehova ʼe nātou nonofo ʼi te faʼifaʼitahi fakatautehina moʼoni ʼi te malamanei katoa.
[Paki ʼo te pasina 32]
Ko te tafito ʼo te mālama foʼou ʼo te ʼAtua ʼe lolotoga fakatuʼutuʼu nei.