Ko He ʼAmanaki Taulekaleka!

“Ko ʼaē ʼe maʼuli pea mo tui kia te ʼau, ʼe mole mate anai ia.”—Soane 11:⁠26.

1. ʼE feafeaʼi anai te kele ʼi te fakatuʼuake ʼo te toko lauʼi miliona hahaʼi ʼaē kua mamate?

KA FAKATUʼUAKE anai te toko lauʼi miliona hahaʼi, ʼe mole nātou maʼuli anai ʼi he kele ʼe lāvaki. (Gāue 24:15) ʼE nātou tutuʼuake anai ʼi he potu kua matalelei pea ʼe nātou maʼu anai he ʼu nofoʼaga, mo he ʼu mutuʼi meʼa pea mo he tuʼuga meʼa kai ʼe kua teuteuʼi maʼa nātou. Ko ai koa ʼaē ka nātou teuteuʼi anai te ʼu meʼa fuli ʼaia? ʼE mahino papau ia, ʼe tonu anai ke maʼuli he ʼu hahaʼi ʼi te mālama foʼou ʼaia ʼi muʼa ʼo te kamata hoko ʼo te fakatuʼuake ʼi te kele. Kae ko ai koa te ʼu hahaʼi ʼaia?

2-4. Koteā te ʼamanaki taulekaleka ʼaē ʼe fakatalitali kiai te hahaʼi ʼaē ʼe maʼuʼuli ʼi “te ʼu ʼaho fakamuli”?

² ʼE hā mai ʼi te hoko ʼo te ʼu lea faka polofeta ʼo te Tohi-Tapu, ʼe tou lolotoga maʼuʼuli nei ʼi “te ʼu ʼaho fakamuli” ʼo te tuʼu ʼo te ʼu faʼahiga meʼa ʼaenī.a (2 Timoteo 3:1) ʼE mole kei tuai pea ʼe fakatokatoka anai e Sehova te ʼu meʼa ʼa te tagata pea mo pulihi te agakovi ʼi te kele. (Pesalemo 37:10, 11; Tāʼaga Lea 2:21, 22) Koteā ʼaē ka hoko anai kia nātou ʼaē ka nātou tauhi agatonu ki te ʼAtua ʼi te temi ʼaia?

³ ʼE mole fakaʼauha fakatahi anai e Sehova te kau faitotonu pea mo te kau agakovi. (Pesalemo 145:20) Neʼe mole he temi neʼe ina fai ai te faʼahi ʼaia, pea ʼe mole ina fai anai te faʼahi ʼaia ʼi te temi ʼaē ka ina pulihi ai te agakovi ʼi te kele. (Vakaʼi ia Senesi 18:22, 23, 26.) ʼI tona fakahagatonu, ʼe talanoa te tohi fakaʼosi ʼo te Tohi-Tapu ki he “toe hahaʼi tokolahi, ʼe mole feala hona lau e he tahi, mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli,” pea ʼe nātou ʼōmai mai te “mamahi lahi.” (Fakahā 7:9-14) Ei, ʼe hāo anai te toe hahaʼi tokolahi ʼi te mamahi lahi ʼaē ka ina fakaʼauha te mālama kovi ʼaenī, pea ʼe nātou hū anai ki te mālama foʼou ʼaē neʼe fakapapau mai e te ʼAtua. ʼI te mālama ʼaia, ʼe maʼu katoa anai e te hahaʼi te ʼu fua ʼo te fakatuʼutuʼu ʼa te ʼAtua, ʼaē ko te faka ʼāteaina ʼo te malamanei mai te agahala pea mo te mate. (Fakahā 22:1, 2) Koia, ʼe mole toe mamate anai te “toe hahaʼi tokolahi.” ʼI ʼamanaki taulekaleka leva!

⁴ ʼE feala koa hatatou falala ki te ʼamanaki fakaofoofo ʼaia? Ei! Ko Sesu Kilisito totonu neʼe ina ʼui, ʼe ʼi ai anai he temi ʼe mole toe mamate ai te hahaʼi. ʼI muʼa ʼo tana fakatuʼuake tona kaumeʼa ko Lasalo, neʼe ʼui fēnei e Sesu kia Maleta: “Ko ʼaē ʼe maʼuli pea mo tui kia te ʼau, ʼe mole mate anai ia.”—Soane 11:26.

ʼE Feala Foki Mo Koutou Ke Koutou Maʼuʼuli ʼo Heʼegata

5, 6. Kapau ʼe koutou fia maʼuʼuli ʼo heʼegata ʼi te Palatiso ʼi te kele, koteā te meʼa ʼaē ʼe tonu ke koutou fai?

⁵ ʼE koutou loto koa ke koutou maʼuʼuli ʼo heʼegata ʼi te Palatiso ʼi te kele? ʼE koutou fakaʼamu koa ke koutou toe sio ki te kau mate ʼaē neʼe koutou ʼofa mamahi ai? Kapau koia ʼaia, pea ʼe tonu ke koutou maʼu te ʼatamai mālama totonu ʼo ʼuhiga mo te finegalo ʼo te ʼAtua pea mo ʼiloʼi tana ʼu fakatuʼutuʼu. ʼI tana faikole ki te ʼAtua, neʼe ʼui fēnei e Sesu: “Ko te faka ʼuhiga ʼaenī ʼo te maʼuli heʼegata, ke nātou ako te ʼiloʼi ʼo koe, te ʼAtua moʼoni pe e tahi, pea mo ia ʼaē neʼe ke fekauʼi mai, ia Sesu Kilisito.”—Soane 17:3.

⁶ Ko te finegalo ʼaenī ʼo te ʼAtua, “ke hāofaki te faʼahiga tagata fuli pe, pea ke nātou maʼu te ʼatamai mālama totonu ʼo te moʼoni.” (1 Timoteo 2:3, 4) ʼI te temi ʼaenī, ʼe tonu ke koutou ako peʼe lava feafeaʼi hakotou maʼuli ʼo heʼegata ʼi te Palatiso ʼi te kele, ʼo fakatahi mo te toko lauʼi miliona hahaʼi ʼaē kua nātou fai te finegalo ʼo te ʼAtua. ʼE ko he meʼa fakafiafia ki te kau Fakamoʼoni ʼa Sehova ke nātou tokoni atu ke koutou ʼiloʼi te ʼu meʼa ʼo ʼuhiga mo te ʼAtua pea mo te ʼu meʼa ʼaē ʼe ina fakamaʼua mai kia tatou. ʼE fakaloto mālohiʼi koutou ke koutou felāveʼi mo nātou ʼi tonatou Fale ʼo te Puleʼaga peʼe koutou faitohi ki he tahi tuʼasila ʼe tuʼu ʼi te pasina ʼaē ʼe hoa mai.

[Nota]

[Paki ʼo te pasina 31]

Ko “te toe hahaʼi tokolahi” ʼe mole toe mamate anai