Ko Te ʼAtua Tokotou Kaumeʼa ʼAē ʼe Lelei Tokotahi

ʼE ko he meʼa lelei ʼaupito hakotou fakakaumeʼa mo te ʼAtua. ʼE akoʼi atu anai e te ʼAtua peʼe feafeaʼi hakotou maʼuli fiafia pea mo maʼuli fīmālie; ʼe ina faka ʼāteaina anai koutou mai te ʼu akonaki hala pea mo te ʼu aga ʼaē ʼe kovi. ʼE fakalogo anai ki takotou ʼu faikole. ʼE tokoni atu anai ke koutou maʼuli tokalelei pea mo loto falala. (Pesalemo 71:5; 73:28) ʼE lagolago anai te ʼAtua kia koutou lolotoga te ʼu temi faigataʼa. (Pesalemo 18:18) Pea ʼe foaki atu e te ʼAtua tana meʼa ʼofa ʼaē ko te maʼuli heʼegata.—Loma 6:23.

ʼI takotou fakaōvi ki te ʼAtua, ʼe koutou fakaōvi anai ki tona ʼu kaumeʼa. ʼE nātou liliu anai ko hokotou ʼu kaumeʼa. Ei, ʼe nātou hage anai ko hokotou ʼu tēhina mo tuagaʼane. ʼE nātou fiafia anai ʼi te akoʼi atu pe ko ai te ʼAtua, pea ʼe nātou tokoni atu anai pea mo fakaloto mālohiʼi koutou.

ʼE mole tou tatau mo te ʼAtua. Kapau ʼe koutou fia kaumeʼa mo te ʼAtua, pea ʼe ʼi ai te meʼa maʼuhiga ʼe tonu ke koutou mahino kiai. Ko te fakakaumeʼa mo te ʼAtua, ʼe mole ko he fakakaumeʼa mo hokita tatau, koteʼuhi ʼe matuʼa age, mo poto age pea mo mālohi age ia tatou. Ko ia ʼaē ʼe tonu ke Pule kia tatou. Koia, kapau ʼe tou fia kaumeʼa mo ia, pea ʼe tonu ke tou fakalogo kia te ia pea mo tou fai te ʼu meʼa ʼaē ʼe ina fakatotonu mai. Kapau ʼe tou fai feiā pea ʼe fua lelei tuʼumaʼu anai kia tatou.—Isaia 48:18.