Kapite Fā

Ko Ia ʼAē ʼe Fakamoʼoni Ki Ai Te ʼu Polofeta Fuli

1. Koteā ʼaē ʼe fakahā mai e te maʼuli ʼa Sesu ʼi selo ʼo ʼuhiga mo tana felogoi mo Sehova?

“HEʼE ʼofa te Tāmai ki te ʼAlo pea ʼe ina fakahā age kia te ia te ʼu meʼa fuli ʼaē ʼe ina fai.” (Soane 5:20) ʼE felogoi lelei te ʼAlo pea mo tana Tāmai ko Sehova. Ko te felogoi lelei ʼaia neʼe kamata ʼi te temi ʼaē neʼe fakatupu ai te ʼAlo, kua hili kiai taʼu e afe mo afe ʼi muʼa ʼo tana tupu tagata. Neʼe ko te ʼAlo ʼulu tokotahi pea mo ʼofaina ʼo te ʼAtua, ia ia tokotahi ʼaē neʼe fakatupu totonu e Sehova. Ko meʼa fuli ʼi selo pea ʼi te kele neʼe fakatupu ʼaki tona ʼAlo ʼofaina ʼaia, tana ʼuluaki tupu. (Kolose 1:​15, 16) Neʼe toe fakahigoaʼi foki ko te Folafola ʼa te ʼAtua, peʼe ko tana tagata ʼAve Folafola, he neʼe ko ia ʼaē neʼe ina fakahā te finegalo ʼo te ʼAtua ki te hahaʼi. Ko te ʼAlo ʼaia neʼe ʼofa lahi ki ai te ʼAtua, neʼe liliu ko te tagata ʼaē ko Sesu Kilisito.​—Tāʼaga Lea 8:​22-30; Soane 1:​14, 18; 12:​49, 50.

2. Neʼe faka maʼuhiga feafeaʼi e te ʼu lea faka polofeta ʼo te Tohi-Tapu ʼi tanatou palalau ʼo ʼuhiga mo Sesu?

² ʼI muʼa ʼo te tupu faka milakulo ʼo te ʼAlo ʼuluaki tupu ʼa te ʼAtua, neʼe lahi te ʼu lea faka polofeta neʼe tohi ʼo ʼuhiga mo ia. Neʼe fakamoʼoni fēnei e te ʼapositolo ko Petelo kia Kolonelio: “Ko te kau polofeta fuli ʼe nātou fakamoʼoni kia te ia.” (Gaue 10:​43) Neʼe fakahā lelei ʼi te Tohi-Tapu te tuʼulaga ʼa Sesu, pea neʼe tala fēnei e te ʼaselo ki te ʼapositolo ko Soane: “Neʼe fai te ʼu lea faka polofeta moʼo fakamoʼoni kia Sesu.” (Apokalipesi 19:​10) Ko te ʼu lea faka polofeta ʼaia ʼe nātou fakahā lelei ko ia te Mesia. Neʼe nātou talanoa ki te ʼu gāue kehekehe ʼaē ka ina fai anai moʼo fakahoko te ʼu fakatuʼutuʼu ʼa te ʼAtua. Ko te ʼu meʼa fuli ʼaia ʼe tonu ke tou fia ʼiloʼi lelei.

Te Meʼa ʼAē ʼe Fakahā e Te ʼu Lea Faka Polofeta

3. (a) ʼI te lea faka polofeta ʼo Senesi 3:​15, ko ai ʼaē ʼe ina fakatātā te gata, mo “te fafine,” pea mo te ‘hāko ʼo te gata’? (b) He koʼe ʼe tonu ke fia ʼiloʼi e te ʼu kaugana ʼa Sehova te faka ʼuhiga ʼo te ‘fakavolu ʼo te gata ʼi tona ʼulu’?

³ Neʼe tala ia te ʼuluaki lea faka polofeta ʼi te ʼosi hoko ʼo te agatuʼu ʼi Eteni. Neʼe ʼui fēnei e Sehova ki te gata: “ ʼE ʼau tuku anai he fehiʼa ia koe mo te fafine, ʼi tou hāko pea mo tona hāko. Pea ʼe ina fakavolu anai koe ʼi tou ʼulu pea ʼe ke fakavolu anai ia ia ʼi tona muliʼi vaʼe.” (Senesi 3:15) Neʼe fai moʼoni te lea faka polofeta ʼaia kia Satana, ia ia ʼaē neʼe fakatātā e te gata. Ko “te fafine” ʼe ko te kautahi agatonu ʼa Sehova ʼi selo, ʼaē ʼe hage ko he fafine ʼohoana ʼe nofo agatonu kia te ia. Ko te ‘hāko ʼo te gata’ ʼe kau kiai te ʼu ʼaselo pea mo te hahaʼi fuli ʼaē ʼe hā ia nātou te gāue ʼa Satana, ia nātou ʼaē ʼe fakafeagai kia Sehova pea mo Tana hahaʼi. Ko te ‘fakavolu ʼo te gata ʼi tona ʼulu’ ko tona faka ʼuhiga ʼe fakaʼauha anai te ʼaselo agatuʼu ko Satana, ʼaē neʼe fasituʼu kia Sehova pea mo ina fakatupu te mamahi lahi ki te malamanei katoa. Kae ko ai koa te koga tāfito ʼo te “hāko” ʼaē ka ina fakavolu te gata? Lolotoga ni ʼu sēkulō neʼe taupau te faʼahi ʼaia ko he “meʼa fakalilo tapu.”​—Loma 16:​20, 25, 26.

4. Koteā ʼaē ʼe faka fealagia e te tohi hāko ʼo Sesu ke ʼiloʼi ko ia te Hāko ʼaē neʼe fakapapauʼi mai?

⁴ Hili kiai taʼu e 2 000 ʼo te hisitolia ʼa te tagata, neʼe fakahā e Sehova te tahi ʼu meʼa ʼo ʼuhiga mo te hāko ʼaia. Neʼe ina fakahā ʼe tupu anai te Hāko ʼaia ʼi te hōloga ʼo Apalahamo. (Senesi 22:​15-18) Kae ko ia ʼaē ka ina hoko atu anai te hōloga ʼaē ka tupu mai ai te Hāko, ʼe mole fakalogo anai ki tona haʼuʼaga ʼi te kakano, kae ki te hōloga ʼaē ka fili anai e te ʼAtua. Logola te ʼofa ʼa Apalahamo ki tona foha ko Isimaele, ʼaē neʼe fānauʼi e Akale, kae neʼe ʼui fēnei e Sehova: “Ko taku fuakava, ʼe ʼau fakatuʼu anai mo Isaake ʼaē ka fānauʼi anai e Sala.” (Senesi 17:​18-21) Ki muli age, neʼe mole fai te fuakava ʼaia mo te ʼuluaki foha ʼo Isaake, ʼaē ko Esau, kae neʼe fai mo Sakopo ʼaē neʼe tupu mai ai te ʼu telepi e 12 ʼo Iselaele. (Senesi 28:​10-14) ʼAki te temi, neʼe fakahā ko te Hāko ʼe tupu anai ʼi te telepi ʼo Suta, te hōloga ʼo Tavite.​—Senesi 49:10; 1 Fakamatala 17:​3, 4, 11-14.

5. ʼI te temi ʼaē neʼe kamata ai e Sesu tana minisitelio ʼi te kele, koteā ʼaē neʼe ʼasi lelei ai ko ia te Mesia?

⁵ Koteā te tahi ʼu faʼahi neʼe fakahā moʼo ʼiloʼi peʼe ko ai te Hāko? Ia taʼu e 700 ki muʼa atu, neʼe ʼui e te Tohi-Tapu ko te Hāko ʼo te fakapapau ʼe tupu tagata anai ʼi Petelehemi. Neʼe toe fakahā ko te Hāko ʼaia neʼe kua maʼuli ia “talu mai te ʼu ʼaho ʼo te ʼu temi heʼegata,” talu mai te temi ʼaē neʼe fakatupu ai ʼi selo. (Mikea 5:2) ʼAki te polofeta ko Taniela, neʼe toe fakakikite te temi totonu ʼaē ʼe tonu ke haʼu ai te Mesia ki te kele. (Taniela 9:​24-26) Pea ʼi te temi ʼaē neʼe fakanofo ai Sesu ʼaki te laumālie maʼoniʼoni, ʼo liliu moʼoni ai ko te Fakanofo ʼa Sehova, neʼe tala fakalelei e te leʼo ʼa te ʼAtua mai selo ko ia ko Tona ʼAlo. (Mateo 3:​16, 17) Neʼe ʼiloʼi ai peʼe ko ai te Hāko. Koia neʼe feala ke ʼui papau fēnei e Filipo: “Kua mātou maʼu ia ia ʼaē neʼe faitohi ia Moisese ʼo ʼuhiga mo ia ʼi te Lao, pea mo te kau Polofeta, ko Sesu.”​—Soane 1:45.

6. (a) ʼO mulimuli kia Luka 24:​27, koteā ʼaē neʼe mahino kiai te kau tisipulo ʼa Sesu? (b) Ko ai te koga tāfito ʼo te ‘hāko ʼo te fafine,’ pea koteā te faka ʼuhiga ʼo tana fakavolu te ʼulu ʼo te gata?

⁶ Ki muli age, neʼe mahino ki te kau tisipulo ʼa Sesu ko te ʼatu lea faka polofeta fuli ʼo ʼuhiga mo ia, neʼe ko he ʼu koga ia ʼo te Tohi-Tapu. (Luka 24:27) Neʼe hā lelei ko Sesu te koga tāfito ʼo te ‘hāko ʼo te fafine,’ ia ia ʼaē ka ina fakavolu anai te ʼulu ʼo te gata, pea mo ina laliki mo fakaʼauha anai ia Satana. ʼAki ia Sesu, ʼe fakahoko anai te ʼu fakapapau fuli ʼa te ʼAtua ki te malamanei, meʼa fuli ʼaē ʼe tou loto la kiai.​—2 Kolonito 1:20.

7. ʼI te ʼosi leva ʼo tatatou mahino kia Ia ʼaē ʼe talanoa ki ai ia te ʼu lea faka polofeta, koteā te tahi meʼa ʼe lelei ke tou toe mahino kiai?

⁷ ʼE tonu ke malave feafeaʼi kia tatou te faʼahi ʼaia? ʼE talanoa te Tohi-Tapu ʼo ʼuhiga mo te enuke Etiopea neʼe ina lau ʼihi koga ʼo te ʼu lea faka polofeta ʼaia, ʼo ʼuhiga mo te haʼu ʼo te Fakamaʼuli pea mo te Mesia. ʼI tana mole mahino kiai, neʼe ina fehuʼi fēnei age ki te tagata fai faka mafola evaselio ko Filipo: “Ko ai koa ʼaē ʼe talanoa ki ai te polofeta?” Pea ʼi te ʼosi maʼu e te enuke te tali kiai neʼe mole gata ai. Hili tana fakalogo lelei ki te fakamahino ʼa Filipo, neʼe mahino kia ia ko tana loto fakafetaʼi ʼo ʼuhiga mo te fakahoko ʼo te lea faka polofeta ʼaia, ʼe ina fakamaʼua ke ina fai he puleʼaki, ke papitema. (Gaue 8:​32-38; Isaia 53:​3-9) ʼE tou talagafua koa ohage ko te tagata ʼaia?

8. (a) Koteā ʼaē neʼe fakatātā e te faiga ʼa Apalahamo ke ina momoli ia Isaake? (b) He koʼe neʼe ʼui e Sehova kia Apalahamo ʼe tapuakina anai te ʼu fenua fuli ʼaki ia te Hāko, pea koteā tona pikipikiga mo tatou ia ʼaho nei?

⁸ Koutou tokagaʼi foki mo te fakamatala fakaʼofaʼofa, ʼo ʼuhiga mo te faiga ʼa Apalahamo ke ina momoli ia Isaake, tona foha ʼulu tokotahi ʼaē neʼe ina maʼu mo Sala. (Senesi 22:​1-18) Neʼe fakatātā e te faʼahi ʼaia te meʼa ʼaē ka fai anai e Sehova​—tana momoli anai tona ʼAlo ʼulu tokotahi: “Heʼe ko te ʼAtua ʼi tona ʼofa lahi ki te malamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kia te ia, ke ʼaua naʼa fakaʼauha kaʼe ke ina maʼu te maʼuli heʼegata.” (Soane 3:16) Ko te meʼa la ʼaia ʼe fakatupu falala, kapau neʼe foaki e Sehova tona ʼAlo ʼulu tokotahi moʼo fakahoko Tona finegalo, ʼe mahino papau ia ʼe ina toe “foaki mai [anai] kia tatou te ʼatu ʼu meʼa fuli ʼaē.” (Loma 8:​32) Koteā ʼaē ʼe fakamaʼua mai e Sehova? Ohage ko tona tohi ia Senesi 22:​18, neʼe ʼui e Sehova kia Apalahamo ʼe tapuakina anai te ʼu fenua fuli ʼaki te Hāko, “koteʼuhi neʼe . . . fakalogo [Apalahamo] ki . . . [te] leʼo [ʼa te ʼAtua].” ʼE tonu mo tatou ke tou fakalogo kia Sehova pea mo tona ʼAlo: “Ko ʼaē ʼe tui ki te ʼAlo, ʼe ina maʼu te maʼuli heʼegata; ko ʼaē ʼe talagataʼa ki te ʼAlo, ʼe mole mamata anai ia ki te maʼuli, kae ʼe nofo te hāūhāū ʼo te ʼAtua ia te ia.”​—Soane 3:36.

9. Kapau ʼe tou loto fakafetaʼi ki te ʼamanaki ki te maʼuli heʼegata ʼaē neʼe faka fealagia ʼaki te sakilifisio ʼa Sesu, pea koteā anai ka tou fai?

⁹ Kapau ʼe tou loto fakafetaʼi ki te ʼamanaki ʼo te maʼuli heʼegata ʼaē neʼe faka fealagia ʼaki te sakilifisio ʼa Sesu, pea ʼe tou fia fai anai te ʼu meʼa ʼaē neʼe tala mai e Sehova kia tatou ʼaki ia Sesu. ʼE pipiki ki te ʼu meʼa ʼaia tatatou ʼofa ki te ʼAtua pea mo ʼotatou kāiga. (Mateo 22:​37-39) Neʼe fakahā e Sesu ko tatatou ʼofa kia Sehova ʼe ina uga anai tatou ke tou akoʼi ki te hahaʼi ke nātou “mulimuli ki te ʼu meʼa fuli pe ʼaē neʼe fakatotonu [mai e Sesu] kia [tatou].” (Mateo 28:​19, 20) Pea ʼe tou fia vaevae te ʼofa ʼaia mo te tahi ʼu kaugana ʼa Sehova, ʼo tou “fakatahi” tuʼumaʼu mo nātou. (Hepeleo 10:25; Kalate 6:10) Pea ʼi tatatou fia fakalogo ki te ʼAtua pea mo tona ʼAlo, ʼe mole tonu ke tou manatu ʼe nā fakamaʼua mai he ʼu meʼa ʼe mole tou lavaʼi. ʼE ʼui ia Hepeleo 4:15, ko Sesu, tatatou Pelepitelo Lahi, ʼe feala ke “mahino ki totatou ʼu vaivaiʼaga.” ʼE ko he meʼa fakaloto fīmālie, tāfito la mokā tou fakaōvi ki te ʼAtua ʼi te faikole ʼaki ia Kilisito, ke tokoni mai ke tou lava kātakiʼi totatou ʼu vaivaiʼaga.​—Mateo 6:12.

Tou Tui Kia Kilisito

10. He koʼe ʼe ko Sesu Kilisito tokotahi pe ʼaē ʼe ina lava hāofaki tatou?

¹⁰ ʼI tana ʼosi fakamahino ki te telepinale lahi ʼa te kau Sutea ʼi Selusalemi, ko te ʼu lea faka polofeta ʼo te Tohi-Tapu neʼe fakahoko e Sesu, neʼe fakaʼosi mālohi fēnei e te ʼapositolo ko Petelo: “ ʼE mole ʼi ai he fakamaʼuli ʼi he tahi atu, heʼe mole ʼi te lalo lagi he tahi higoa neʼe tuku ki te hahaʼi, ʼe tonu ke tou maʼuʼuli ai.” (Gaue 4:12) Mai tona ʼaluʼaga ʼaē ko te hōloga fuli ʼa Atama neʼe agahala, koia neʼe mole feala ʼaki tanatou mate ke nātou foaki he totogi maʼa he tahi. Kae ko Sesu neʼe haohaoa, pea ko tona maʼuli neʼe feala ke momoli faka sakilifisio. (Pesalemo 49:​6-9; Hepeleo 2:9) Neʼe ina momoli ki te ʼAtua te totogi neʼe tatau tona maʼuhiga mo te maʼuli haohaoa ʼaē neʼe pulihi e Atama. (1 Timoteo 2:​5, 6) Neʼe ina faka fealagia ai ke tou maʼu te maʼuli heʼegata ʼi te mālama foʼou ʼa te ʼAtua.

11. Koutou fakamahino he lelei lahi ʼi te ʼu lelei ʼaē ʼe faka fealagia e te sakilifisio ʼa Sesu.

¹¹ ʼAki te totogi ʼe tou lava maʼu ai mo te tahi ʼu lelei ʼi te temi nei. Ohage la, logola ʼe tou agahala, kae ʼaki te sakilifisio ʼa Sesu ʼe feala ke fakamaʼa totatou leʼo ʼo loto ʼuhi ko te fakamolemole ʼo tatatou ʼu agahala. Ko te meʼa ʼaia ʼe maʼuhiga age ia ʼi te ʼu sakilifisio manu ʼaē neʼe fai e te kau Iselaele, ʼo mulimuli ki te Lao Faka Moisese. (Gaue 13:​38, 39; Hepeleo 9:​13, 14; 10:22) Kapau ʼe tou loto ke fakamolemole mai kia tatou, pea ʼe tonu ke tou fakamoʼoni ʼe ʼaoga ʼaupito kia tatou te sakilifisio ʼa Kilisito: “Kapau ʼe tou ʼui: ‘ ʼE mole hatatou agahala,’ pea ʼe tou kākāʼi pe tatou, pea ʼe mole ia tatou te moʼoni. Kapau ʼe tou kofesioʼi ʼatatou agahala, pea ʼe agatonu ia mo faitotonu ke ina fakamolemole ʼatatou agahala pea mo fakamaʼa tatou mai te aga heʼe faitotonu fuape.”​—1 Soane 1:​8, 9.

12. He koʼe ʼe maʼuhiga te papitema ʼi te vai ke tou maʼu ai he leʼo ʼo loto ʼe lelei ia muʼa ʼo te ʼAtua?

¹² ʼE lava fakahā feafeaʼi e te kau agahala tanatou tui kia Kilisito pea mo tona sakilifisio? ʼI te ʼuluaki sēkulō ka liliu he tahi ʼo tui kia Sesu, neʼe ina fakahā te faʼahi ʼaia ia muʼa ʼo te kaugamālie. ʼO feafeaʼi? ʼO papitema. Koteā tona tupuʼaga? He neʼe fakatotonu e Sesu ke papitema tana ʼu tisipulo fuli. (Mateo 28:​19, 20; Gaue 8:12; 18:8) Ko ʼaē ʼe malave gafua ki ai te fakatuʼutuʼu fonu ʼi te ʼofa ʼaē neʼe fai e Sehova ʼaki ia Sesu Kilisito, ʼe mole ina toe tātāʼofi anai. ʼE ina fai anai te ʼu fetogi ʼaē ʼe tonu ke ina fai ʼi tona maʼuli, ʼo ina foaki tona maʼuli ki te ʼAtua ʼi te faikole, pea mo fakahā ʼi tana papitema. ʼAki tana fakahā ʼaia ʼo tana tui, ʼe ina “kole ki te ʼAtua he leʼo ʼo loto ʼe lelei.”​—1 Petelo 3:21.

13. Kapau ʼe tou ʼiloʼi neʼe tou agahala, koteā ʼaē ʼe tonu ke tou fai, pea koteā tona tupuʼaga?

¹³ Pea hili te papitema, ʼe mahino ia ʼe kei tou agahala pe anai. Koteā ʼaē ʼe tonu ke tou fai? Neʼe ʼui fēnei e te ʼapositolo ko Soane: “ ʼE ʼau tohi atu kia koutou te ʼu meʼa ʼaenī ke ʼaua naʼa koutou fai he agahala. Kae kapau ʼe agahala he tahi, ʼe ʼi ai totatou tokoni ia tafa ʼo te Tāmai, ko Sesu Kilisito, ko te faitotonu. Pea ko ia ko te sakilifisio faifakalelei ʼo ʼuhiga mo ʼatatou agahala.” (1 Soane 2:​1, 2) Ko tona faka ʼuhiga koa, tatau aipe peʼe koteā te agahala ʼaē neʼe tou fai, kapau ʼe tou faikole ke fakamolemole mai te ʼAtua, pea ʼe ina fakamolemole anai? ʼE mole feiā. Ke feala ke fakamolemole ki he tahi, ʼe tonu ke fakahemala moʼoni. ʼE lagi toe ʼaoga anai kia ia ke tokoni age ki ai he ʼu hahaʼi Kilisitiano kua matutuʼa age, peʼe ko he ʼu Kilisitiano faiva ʼo te kokelekasio. ʼE tonu ke tou fakamoʼoni neʼe tou fai te agahala, pea mo fakahemala moʼoni, ʼo tou faiga mālohi ke mole tou toe fai te aga kovi ʼaia. (Gaue 3:19; Sakopo 5:​13-16) Kapau ʼe tou fai te faʼahi ʼaia, tou tui papau ʼe tokoni mai anai Sesu pea ʼe tou toe maʼu anai te ʼofa ʼa Sehova.

14. (a) Koutou fakamahino he ʼaluʼaga maʼuhiga neʼe fua lelei ai kia tatou te sakilifisio ʼa Sesu. (b) Kapau ʼe tou maʼu moʼoni te tui, koteā te meʼa ka tou fai anai?

¹⁴ Ko te sakilifisio ʼa Sesu neʼe ina tofa te ala ki te maʼuli heʼegata ʼi te lagi maʼa te “kiʼi faga ōvi,” te lua koga ʼo te hāko ʼo Senesi 3:15. (Luka 12:32; Kalate 3:​26-29) Neʼe ina toe tofa foki te ala maʼa te lauʼi miliale hahaʼi ʼo te malamanei ke nātou maʼuʼuli ʼo heʼegata ʼi te palatiso ʼi te kele. (Pesalemo 37:29; Apokalipesi 20:​11, 12; 21:​3, 4) Ko te maʼuli heʼegata ʼe ko “te meʼa ʼofa ʼaē ʼe foaki e te ʼAtua . . . ʼaki ia Kilisito Sesu totatou ʼAliki.” (Loma 6:23; Efeso 2:​8-10) Kapau ʼe tou tui ki te meʼa ʼofa ʼaia pea mo fakafetaʼi ki te meʼa ʼaē neʼe ina faka fealagia, ʼe tou fakahā anai te faʼahi ʼaia. Kapau ʼe tou mahino ki te ʼaluʼaga fakaofoofo ʼaē neʼe fakaʼaogaʼi e Sehova ia Sesu moʼo fakahoko Tona finegalo, pea mo te maʼuhiga ʼaē kia tatou fuli ke tou mulimuli fakalelei ki te ʼu tafuga vaʼe ʼo Sesu, ʼe tou fakaliliu anai te minisitelio faka Kilisitiano ko te gāue ʼaē ʼe maʼuhiga tāfito ʼi totatou maʼuli. ʼE hā lelei anai tatatou tui ʼi tatatou palalau ʼaki he loto falala ki te hahaʼi ʼo ʼuhiga mo te meʼa ʼofa fakatalakitupua ʼa te ʼAtua.​—Gaue 20:24.

15. ʼE tokoni feafeaʼi ki te logo tahi, te tui ʼaē kia Sesu Kilisito?

¹⁵ Ko te taʼi tui ʼaia ʼe lagolago lelei ki tatatou logo tahi! Pea ʼe ina fakaōvi tatou kia Sehova, mo tona ʼAlo, pea mo ʼotatou kaugā fagona ʼi te kokelekasio faka Kilisitiano. (1 Soane 3:​23, 24) ʼE ko he meʼa fakatupu fiafia kia tatou te agalelei ʼa Sehova, ʼi tana lotoʼofa ʼo foaki ki tona ʼAlo “te higoa ʼaē ʼe māʼoluga age ʼi te ʼu higoa fuli pe [gata pe ki te huafa ʼo te ʼAtua], ke feala ʼi te higoa ʼo Sesu ke tuʼutuli ia nātou fuli ʼi te lagi, pea mo nātou ʼi te kele, pea mo nātou ʼi te lalo kele, pea ke fakahā e te lea fuli pe ko Sesu Kilisito ʼe ʼAliki ki te kolōlia ʼo te ʼAtua te Tāmai.”​—Filipe 2:​9-11.

Fakamanatu

• ʼI te temi ʼaē neʼe hā ai te Mesia, he koʼe neʼe ʼiloʼi lelei ia ia e nātou ʼaē neʼe tui moʼoni ki te Folafola ʼa te ʼAtua?

• Koteā te ʼu meʼa ʼaē ʼe tonu ke tou fai mo kapau ʼe tou fia fakahā tatatou loto fakafetaʼi ki te sakilifisio ʼa Sesu?

• Koteā te ʼu lelei ʼaē kua tou maʼu ʼaki te sakilifisio ʼa Sesu? ʼE tokoni feafeaʼi mai te sakilifisio ʼaia mokā tou faikole kia Sehova ke ina fakamolemole tatatou ʼu agahala?

[Paki ʼo te pasina 36]

Neʼe ʼui e Sesu ki tana kau tisipulo ke nātou akoʼi ki te hahaʼi ke nātou mulimuli ki te ʼu fakatotonu ʼa te ʼAtua