Kapite Hogofulu-Ma-Hiva
Koutou Haga Tala Te Folafola ʼa Te ʼAtua ʼAki He Lototoʼa
1. (a) Koteā te logo lelei ʼaē neʼe tala e te ʼu tisipulo ʼa Sesu, kae neʼe tali feafeaʼi e ʼihi Sutea? (b) Koteā koa te ʼu fehuʼi ʼe feala ke tou lagaʼi?
KUA teitei hili kiai taʼu e 2 000, ko te ʼAlo ʼo te ʼAtua, ia Sesu Kilisito, neʼe fakanofo ke Hau anai ʼi te kele katoa. Neʼe matehi ia ia ʼuhi ko te ʼu fakaneke ʼa te kau takitaki lotu, kae neʼe toe fakatuʼuake e Sehova mai te kau mate. ʼI te temi nei, kua feala ʼaki ia ia ke tou maʼu te maʼuli heʼegata. Kae ʼi te temi ʼaē neʼe kamata faka mafola ai e tana ʼu tisipulo te logo lelei ʼaia ki te hahaʼi, neʼe hoko ai te ʼu fakataga. Ko ʼihi ia nātou neʼe pilisoniʼi, neʼe tā nātou ʼaki te ʼu huipi, pea neʼe fakatotonu age ke fakagata tanatou talanoa ʼo ʼuhiga mo Sesu. (Gaue 4:1-3, 17; 5:17, 18, 40) Koteā ʼaē ka nātou fai? Kanapaula neʼe ko koutou, koteā anai ʼaē ka koutou fai? ʼE koutou haga hoko atu anai koa takotou fagonogono ʼaki he lototoʼa?
2. (a) Ko te logo taulekaleka fea ʼaē ʼe tonu ke faka mafola ʼi te temi ʼaenī? (b) Ko ai ʼaē ʼe tonu ke ina faka mafola te logo lelei?
2 ʼI te 1914, neʼe liliu ia Sesu Kilisito ko te Hau ʼo te Puleʼaga ʼo te ʼAtua, pea neʼe fakanofo ʼi selo ke pule ‘ ʼi te lotolotoiga ʼo tona ʼu fili.’ (Pesalemo 110:2) Pea neʼe lī ifo ia Satana mo tana kau temonio ki te kele. (Apokalipesi 12:1-5, 7-12) Neʼe ko te kamataʼaga ʼaia ʼo te ʼu ʼaho fakamuli ʼo te tuʼu agakovi ʼaenī. Ka gata anai te temi ʼaia, ʼe fakaʼauha anai e te ʼAtua te tuʼu katoa ʼo te ʼu meʼa ʼa Satana. (Taniela 2:44; Mateo 24:21) Ko te hahaʼi ʼaē ka hāo, ʼe nātou maʼuʼuli anai ʼo heʼegata ʼi he kele ʼe liliu anai ko he palatiso. Kapau kua koutou tali te logo lelei ʼaia, pea ʼe mahino ia ʼe koutou fia vaevae anai mo ʼihi. (Mateo 24:14) Kae ʼe tali feafeaʼi anai te logo lelei ʼaia?
3. (a) ʼE tali feafeaʼi koa e te hahaʼi te logo ʼo te Puleʼaga? (b) Ko te fehuʼi fea ʼaē ʼe tonu ke tou tali kiai?
3 Ko ʼihi hahaʼi ʼe nātou tali lelei anai te logo lelei ʼaē ka koutou tala age, kae ko te tokolahi ʼe mole nātou fia logo anai. (Mateo 24:37-39) Ko ʼihi ʼe nātou vāʼi anai koutou peʼe nātou fakafeagai anai. Neʼe tala e Sesu ʼe feala ke hoko te ʼu fakafeagai mai tokotou famili. (Luka 21:16-19) Peʼe hoko anai ʼi takotou fale gāue peʼe ʼi te faleako. ʼI te tahi ʼu fenua, ʼe tapuʼi e te ʼu puleʼaga te kau Fakamoʼoni ʼa Sehova. ʼI te ʼu ʼaluʼaga ʼaia, ʼe koutou haga tala anai koa te folafola ʼa te ʼAtua ʼaki he lototoʼa, pea mo ‘nofo mālohi ʼi te tui’?—1 Kolonito 16:13.
ʼAua Naʼa Tou Falala Ki Totatou Mālohi Totonu
4. (a) Koteā ʼaē ʼe maʼuhiga tāfito, mo kapau ʼe tou fia nonofo ko he ʼu kaugana agatonu ʼo te ʼAtua? (b) He koʼe ʼe maʼuhiga te ʼu fono faka Kilisitiano?
4 Kapau ʼe tou fia tauhi kia Sehova ohage ko he kaugana agatonu, pea ʼe maʼuhiga tāfito ke tou falala ki te ʼu fakatuʼutuʼu fuli ʼaē ʼe ina fakaʼaogaʼi moʼo foaki mai te fīmālie ʼi te faʼahi fakalaumālie. ʼI te ʼu fakatuʼutuʼu ʼaia, ʼe kau ai ia te ʼu fono ʼo te kokelekasio, ʼaē ʼe fakaloto mālohiʼi tatou e te Tohi-Tapu ke ʼaua naʼa tou lītuʼa kiai. (Hepeleo 10:23-25) Ko nātou ʼaē ʼe nonofo ko he kau Fakamoʼoni agatonu ʼa Sehova, ʼe nātou faiga mālohi ke nātou kau tuʼumaʼu ki te ʼu fono mo tonatou ʼu tēhina mo tuagaʼane. Ko te ʼu fono ʼaia, ʼe nātou fakalahi tatatou mālama ki te Tohi-Tapu, mo tatatou leleiʼia age te ʼu moʼoni ʼaē kua tou ʼosi ʼiloʼi, pea mo nātou fakaliliu tatou ke tou popoto ʼi tona fakaʼaogaʼi. ʼE nātou fakamālohiʼi tatatou ʼu felogoi mo totatou ʼu tēhina mo tuagaʼane ʼi te tauhi ʼi te logo tahi, pea mo fakaloto mālohiʼi tatou ke tou fai te finegalo ʼo te ʼAtua. Ko te laumālie ʼa Sehova ʼe ina takitaki tatou ʼaki te kokelekasio, pea ʼaki te laumālie ʼaia ko Sesu ʼe nofo ʼi te lotolotoiga ʼo tatou.—Mateo 18:20; Apokalipesi 3:6.
5. ʼI te ʼu fenua ʼaē ʼe tapuʼi ai tanatou gāue, e feafeaʼi koa te fai ʼa te ʼu fono ʼa te kau Fakamoʼoni ʼa Sehova?
5 ʼE koutou kau tuʼumaʼu koa ki te ʼu fono fuli, pea mo koutou maʼuliʼi te ʼu tokoni ʼaē ʼe koutou logo kiai? ʼI ʼihi temi, mokā tapuʼi te gāue ʼa te kau Fakamoʼoni ʼa Sehova, pea ʼe fai faka kūtuga te ʼu fono, ʼi te ʼu ʼapi ʼa te ʼu tēhina mo tuagaʼane. ʼE feala ke fetofetogi te ʼu ʼapi ʼaē ʼe fai ai, pea mo te ʼu hola, pea ʼe mole faigafua tuʼumaʼu te faʼahi ʼaia. Kae logola te faʼahi faigataʼa ʼaia, pea mo te ʼu tuʼutāmaki, ko te kau Kilisitiano agatonu ʼe nātou faiga mālohi ke nātou kau ki te ʼu fono fuli ʼaia.
6. E feafeaʼi hatatou fakahā ʼe tou falala kia Sehova, pea ʼe lava tokoni feafeaʼi mai te faʼahi ʼaia ke tou haga palalau ʼaki he lototoʼa?
6 ʼE tuputupu tatatou falala kia Sehova mokā tou faikole tuʼumaʼu kia te ia, ʼo avahi age totatou loto ki ai, heʼe tou ʼiloʼi ʼe ʼaoga ke tokoni mai kia tatou. ʼE koutou fai koa te faʼahi ʼaia? Neʼe faikole tuʼumaʼu ia Sesu ʼi te lolotoga ʼo tona minisitelio ʼi te kele. (Luka 3:21; 6:12, 13; 22:39-44) Pea ʼi te po ʼi muʼa ʼo tona tutuki ki te pou, neʼe ina uga fēnei tana kau tisipulo: “Koutou nonofo tokaga pea mo faikole, ke ʼaua naʼa koutou tō ki te fakahala.” (Maleko 14:38) Kapau ʼe tou sio ko te hahaʼi ʼe nātou fakafisi ki te logo ʼo te Puleʼaga, pea ʼe lagi tou manatu anai ke tou fakamāmālie tatatou minisitelio, peʼe lagi tou fakagata anai tatatou faka mafola mokā vāʼi tatou peʼe fakatagaʼi tatou e te hahaʼi, ke ʼaua naʼa hoko kia tatou he ʼu fihifihia. Kae kapau ʼe tou faikole fakamalotoloto ke tokoni mai te laumālie ʼa te ʼAtua ke tou haga palalau ʼaki he lototoʼa, pea ʼe tou maʼu anai te mālohi ke mole tou tō ki te ʼu fakahala ʼaia.—Luka 11:13; Efeso 6:18-20.
Te Kau Fakamoʼoni Lototoʼa
7. (a) He koʼe ʼe maʼuhiga ʼaupito kia tatou te tohi ʼo Gaue? (b) Koutou tali ki te ʼu fehuʼi ʼaē ʼe tuʼu ʼi te fakaʼosi ʼo te palakalafe, ʼo koutou fakahā te ʼaoga ʼo te ʼu faʼahi ʼaia kia tatou.
7 Ko te fakamatala ʼo te tohi ʼo Gaue ʼe ʼaoga ʼaupito kia tatou. ʼE ina fakamatala mai pe neʼe lava kātakiʼi feafeaʼi e te kau ʼapositolo pea mo te kau ʼuluaki tisipulo, te ʼu faigataʼaʼia, pea mo nātou fakahā ko he kau fakamoʼoni lototoʼa pea mo agatonu ʼa Sehova, logola neʼe ko he ʼu hahaʼi neʼe hage pe tonatou ʼu loto ko tatou. Tou vakavakaʼi he koga ʼo te fakamatala ʼaia, ʼo tou fakaʼaogaʼi te ʼu fehuʼi pea mo te ʼu vaega ʼaē ʼe hoa mai. ʼI tatatou vakaʼi te ʼu faʼahi ʼaia, koutou vakaʼi te ʼaoga ʼo te lautohi ʼaia kia koutou takitokotahi.
Ko te kau ʼapositolo neʼe ko he kau popoto lalahi koa? ʼI tonatou natula, neʼe ko he ʼu hahaʼi koa neʼe lototoʼa ʼi te ʼu faʼahiga ʼaluʼaga fuli pe? (Soane 18:17, 25-27; 20:19; Gaue 4:13)
Koteā ʼaē neʼe ina faka fealagia kia Petelo ke palalau ʼaki he lototoʼa ʼi muʼa ʼo te telepinale Sutea ʼaē neʼe ina fakatūʼa ia te ʼAlo ʼo te ʼAtua? (Mateo 10:19, 20; Gaue 4:8)
Koteā ʼaē neʼe fai e te kau ʼapositolo lolotoga te ʼu vāhaʼa ʼi muʼa ʼo tonatou ʼave ki te Sanetualio? (Gaue 1:14; 2:1, 42)
Neʼe tali feafeaʼi e te ʼu ʼapositolo ko Petelo pea mo Soane, ʼi te temi ʼaē neʼe fakatotonu age e te ʼu pule ke nātou fakagata tanatou fai faka mafola ʼi te huafa ʼo Sesu? (Gaue 4:19, 20)
ʼI tonatou ʼosi faka ʼāteaina, ko ai ʼaē neʼe toe kumi tokoni ki ai te kau ʼapositolo? Neʼe nātou faikole koa ke fakagata te ʼu fakataga, he kanapaula neʼe mole koia ʼaia, pea koteā te tupuʼaga ʼo tanatou faikole? (Gaue 4:24-31)
Neʼe tokoni feafeaʼi koa ia Sehova ki tana ʼu kaugana, ʼi te temi ʼaē neʼe faigaʼi e tonatou ʼu fili ke nātou fakagata te gāue fai faka mafola? (Gaue 5:17-20)
Neʼe fakahā feafeaʼi e te kau ʼapositolo neʼe nātou mahino ki te tupuʼaga ʼo tonatou faka ʼāteaina? (Gaue 5:21, 41, 42)
Koteā te faʼahi ʼaē neʼe hoko atu e te tokolahi ʼo te ʼu tisipulo, ʼaē neʼe mavetevete ʼuhi ko te ʼu fakataga? (Gaue 8:3, 4; 11:19-21)
8. Neʼe koteā te ʼu fua fakaofoofo ʼaē neʼe hoko ʼi te minisitelio ʼa te kau ʼuluaki tisipulo, pea he koʼe ʼe tou kau mo tatou ki te gāue ʼaia?
8 Neʼe ʼi ai te ʼu fua ʼo te faka mafola ʼo te logo lelei, koteʼuhi ko te teitei toko 3 000 ʼu tisipulo neʼe nātou papitema ʼi te Penikosite ʼo te taʼu 33 ʼo totatou temi. “Neʼe tuputupu te hahaʼi ʼaē neʼe tui ki te ʼAliki, ʼo kaugamālie ko te ʼu tagata pea mo fafine.” (Gaue 2:41; 4:4; 5:14) Ki muli age, māʼia mo te tagata ʼaē neʼe ina fakatagaʼi mālohi te hahaʼi ʼa te ʼAtua, ia Saulo ʼo Talesi, neʼe liliu ko te Kilisitiano, ʼo ina faka mafola te moʼoni ʼaki he lototoʼa. Ki muli mai, neʼe ʼiloʼi lelei ia ia ʼi te higoa ʼo te ʼapositolo ko Paulo. (Kalate 1:22-24) Kae neʼe hoko atu te gāue ʼaia neʼe kamata ʼi te ʼuluaki sēkulō. Lolotoga te ʼu ʼaho fakamuli ʼaenī, neʼe ʼāsili ake tona mālohi, pea kua kaku ki te ʼu potu taupotu fuli pe ʼo te kele. ʼE tou maʼu te pilivilesio ke tou kau ki te gāue ʼaia, pea ʼe feala ke tou muliʼi te faʼifaʼitaki ʼaē neʼe tuku mai e te kau fakamoʼoni agatonu ʼaē neʼe nātou faka mafola ʼi muʼa ia tatou.
9. (a) Ko te ʼu faigamālie fea ʼaē neʼe fakaʼaogaʼi e Paulo moʼo fagonogono? (b) ʼE koutou tala feafeaʼi koa te logo ʼo te Puleʼaga ki ʼokotou tatau?
9 Koteā ʼaē neʼe fai e Paulo ʼi tana ʼiloʼi te moʼoni ʼo ʼuhiga mo Sesu Kilisito? “Neʼe ʼalu atu aipe . . . ʼo fagonogono ʼo ʼuhiga mo Sesu, ʼe ko Ia te ʼAlo ʼo te ʼAtua.” (Gaue 9:20) Neʼe fakafetaʼi ki te ʼofa makehe ʼo te ʼAtua kia te ia, pea neʼe mahino kia ia ko te hahaʼi fuli ʼe ʼaoga kia nātou te logo lelei ʼaē neʼe tali totonu pe la e ia. Ko Paulo neʼe ko te Sutea, pea ʼo mulimuli ki te agaʼi fenua ʼo te temi ʼaia, neʼe ʼalu ki te ʼu sinakoka ʼo fai fagonogono ai. Neʼe toe fai faka mafola foki ʼi te ʼu ʼapi, pea mo fagonogono ki te hahaʼi ʼi te ʼu fakatauʼaga meʼa. Pea neʼe ina tali lelei ke ʼalu ʼo faka mafola te logo lelei ʼi te ʼu telituale foʼou.—Gaue 17:17; 20:20; Loma 15:23, 24.
10. (a) ʼI tana faʼahiga fai faka mafola, neʼe fakatahiʼi feafeaʼi e Paulo te lototoʼa pea mo te fakasiosio tonu? (b) E feafeaʼi hatatou fakahā tana ʼu kalitate ʼaia mokā tou fai fagonogono ki totatou ʼu kāiga, totatou ʼu kaugā gāue, peʼe ko totatou ʼu kaugā ako?
10 Ko Paulo neʼe ina fakatahiʼi te lototoʼa pea mo te fakasiosio tonu, pea ʼe tonu ke feiā mo tatou. Moʼo uga te kau Sutea ke nātou tali te logo ʼaia, neʼe talanoa ʼo ʼuhiga mo te ʼu fakapapau ʼaē neʼe fai e te ʼAtua ki tanatou ʼu kui. Ki te kau Keleka, neʼe talanoa ʼo ʼuhiga mo te ʼu meʼa neʼe nātou ʼiloʼi. ʼI ʼihi temi, moʼo fagonogono ki te hahaʼi, neʼe ina fakamatala pe neʼe ina maʼu feafeaʼi te moʼoni. Neʼe ina ʼui fēnei: “ ʼE ʼau fai ia meʼa fuli ʼuhi ko te logo lelei, ke feala haku kau mo ʼihi.”—1 Kolonito 9:20-23; Gaue 22:3-21.
11. (a) Koteā ʼaē neʼe fai e Paulo ke ʼaua naʼa hoko hana fihi tuʼumaʼu mo tana kau fakafeagai? (b) Ko te temi fea ʼaē ʼe lelei ai ke tou mulimuli ki tana faʼifaʼitaki, pea ʼo feafeaʼi? (c) ʼE haʼu maifea te mālohi ʼaē ʼe feala ke hoholo ai tatatou palalau ʼaki he lototoʼa?
11 Ka hoko he ʼu fakafeagai ki te fai faka mafola, neʼe ʼalu ia Paulo ʼo faka mafola ʼi he tahi koga meʼa lolotoga he temi, kae neʼe mole ina loto ke ʼi ai he ʼu fihi mo nātou ʼaē ʼe fakafeagai. (Gaue 14:5-7; 18:5-7; Loma 12:18) Kae neʼe mole ʼi ai he temi neʼe ufiufi ai ʼo ʼuhiga mo te logo lelei. (Loma 1:16) Neʼe mole leleiʼia e Paulo te agamālohi pea mo te agapauʼu ʼo tana kau fakafeagai, kae neʼe liliu ʼo ‘lototoʼa ʼuhi ko te ʼAtua’ moʼo hoko atu tana fai faka mafola. Neʼe ʼui maʼana: “Ko te ʼAliki neʼe tuʼu ōvi ia te ʼau, pea neʼe ina foaki mai te mālohi, ke feala ʼaki ia ʼau ke hoko katoa te fai faka mafola.” (1 Tesalonika 2:2; 2 Timoteo 4:17) Ko Sesu te Pule ʼo te kokelekasio, ʼe ina haga foaki mai te mālohi ʼaē ʼe ʼaoga kia tatou moʼo fakahoko te gāue ʼaē neʼe ina fakakikite ki totatou temi.—Maleko 13:10.
12. Koteā ʼaē ʼe ʼiloga ai te lototoʼa ʼa he Kilisitiano, pea ʼe falala kia ai?
12 ʼE tonu ke hoholo atu tatatou tala te folafola ʼa te ʼAtua ʼaki he lototoʼa, ohage ko Sesu pea mo te tahi ʼu kaugana agatonu ʼo te ʼuluaki sēkulō. Ko te lototoʼa, ʼe mole faka ʼuhiga ke tou agamālohi peʼe tou fakakinauʼi ke tali te logo e te hahaʼi ʼaē ʼe nātou fakafisi kiai. Kae ko tona faka ʼuhiga, ʼe mole tou fia tuku tatatou gāue ʼuhi ko te mole fia logo ʼa te hahaʼi, peʼe ʼuhi ko te ʼu fakafeagai. Ohage ko Sesu, ʼe tou fakamahino ko te Puleʼaga ʼo te ʼAtua ʼe ko te puleʼaga ʼaē ʼe tonu ke ina takitaki te kele katoa. ʼE tou palalau ʼaki he loto falala, koteʼuhi ʼe tou fakafofoga ia Sehova, te Tuʼi ʼAliki ʼo te ʼAtulaulau, pea ko te logo ʼaē ʼe tou tala ʼe mole haʼu mai ia tatou, kae mai ia te ia. Pea ʼe tonu ke tou fia vikiviki kia Sehova ʼuhi tāfito ko tatatou ʼofa kia te ia.—Filipe 1:27, 28; 1 Tesalonika 2:13.
Fakamanatu
• He koʼe koa ʼe maʼuhiga ke tou tala te logo ʼo te Puleʼaga ki he tokolahi ʼaupito, kae koteā te ʼu faʼahiga tali ʼa te hahaʼi ʼe tonu ke tou ʼamanaki kiai?
• E feafeaʼi hatatou fakahā ʼe mole tou falala ki totatou mālohi totonu moʼo tauhi kia Sehova?
• Koteā te ʼu ako maʼuhiga ʼaē ʼe foaki mai e te tohi ʼo Gaue?
[Paki ʼo te pasina 173]
Ia ʼaho nei, ohage ko te temi muʼa, ko te kau kaugana ʼa Sehova ʼe nātou tala te Folafola ʼa te ʼAtua ʼaki he lototoʼa