Koutou Mulimuli Ki Te Tauhi Moʼoni

1, 2. ʼI takotou ʼosi mavae mai te lotu hala, ko te fehuʼi fea ʼaē ʼe tonu ke koutou fai kiā koutou, pea ʼi takotou manatu he koʼe ʼe maʼuhiga te fehuʼi ʼaia?

KOTEĀ ʼaē ka koutou fai, mo kapau ʼe koutou ʼiloʼi neʼe ʼulihi e he tahi te tane vai ʼo tokotou kolo, pea ʼe mamate anai te hahaʼi he neʼe nātou ʼinu te vai ʼaia? ʼE mahino ia, ʼe koutou ʼolo anai ki he tahi kolo, mo kapau ʼe feala. Kae ʼi takotou ʼosi mavae, ʼe ʼi ai te fehuʼi ʼe koutou fai: ‘Neʼe kua au pikisia koa ʼi taku ʼinu te vai ʼaia neʼe ʼulihi?’

² ʼE hoko te ʼaluʼaga ʼaia ʼi te lotu hala. ʼE akoʼi mai ʼi te Tohi-Tapu ko te tauhi ʼaia ʼe ʼuli ʼuhi ko te ʼu akonaki hala pea mo te ʼu aga heʼemaʼa. (2 Kolonito 6:17) Koia ʼaē ʼe maʼuhiga ai ke koutou mavae mai ia “Papiloni Lahi,” te kautahi faka malamanei ʼo te ʼu lotu hala. (Apokalipesi 18:​2, 4, MN ) Kua koutou fai koa te faʼahi ʼaia? Kapau kua koutou fai, pea ʼe ko he meʼa lelei. Kae ʼe mole tonu ke gata ʼaki pe takotou mavae mai te lotu hala, heʼe ʼosi ʼaia pea ʼe tonu ke koutou fai te fehuʼi ʼaenī kiā koutou: ‘ ʼE kei au mulimuli koa ki he ʼu faʼahi ʼo te tauhi hala?’ Tou vakaʼi he ʼu ʼaluʼaga ʼo ʼuhiga mo te faʼahi ʼaia.

TE ʼU FAKATĀTĀ PEA MO TE TAUHI KI TE ʼU KUI

3. (a) Koteā ʼaē ʼe ʼui ʼi te Tohi-Tapu ʼo ʼuhiga mo te fakaʼaogaʼi ʼo te ʼu fakatātā, pea he koʼe ʼe lagi faigataʼa maʼa ʼihi hanatou tali te manatu ʼa te ʼAtua? (b) Koteā ʼaē ʼe tonu ke koutou fai ʼo ʼuhiga mo te ʼu meʼa ʼaē ʼe pikipikiga mo te tauhi hala?

³ Ko ʼihi talu mai fualoa ʼe nātou taupau ʼiō nātou te ʼu ʼaletale pea mo te ʼu fakatātā. ʼE ʼi ai koa hakotou ʼu fakatātā peʼe ko hakotou ʼaletale? Kapau koia, pea ʼe lagi mata faikehe kiā koutou peʼe koutou koviʼia hakotou faikole ki te ʼAtua kae mole koutou fakaʼaogaʼi he ʼu ʼaletale peʼe ko he ʼu fakatātā. ʼE lagi ko he ʼu meʼa ʼe maʼuhiga ʼaupito kiā koutou. Kae ko te ʼAtua ʼaē ʼe tonu ke ina fakahinohino mai te faʼahiga tauhi ʼaē ʼe tonu ke tou fai kiā te ia, pea ʼe akoʼi mai ʼi te Tohi-Tapu ʼe mole loto ia ke tou fakaʼaogaʼi te ʼu fakatātā. (Ekesote 20:​4, 5; Pesalemo 115:​4-8; Isaia 42:8; 1 Soane 5:21) Koia ʼe feala hakotou mulimuli ki te tauhi moʼoni mo kapau ʼe koutou maumauʼi te ʼu meʼa ʼaia ʼaē ʼe pipiki ki te tauhi hala. Koutou manatu ohage ko Sehova, ʼaē ʼe “fakalialia” ki te ʼu meʼa aia.​—Teutalonome 27:15.

4. (a) He koʼe ʼe tou ʼiloʼi ʼe mole hona fua ke tou tauhi ki te ʼu kui? (b) He koʼe neʼe tapuʼi e Sehova ki tana hahaʼi ke mole nātou kau ki te ʼu meʼa fai fakalauʼakau?

⁴ Ko te tauhi ki te ʼu kui ʼe ko te tahi ʼaia faʼahi ʼe tau fai ʼi te ʼu lotu hala. ʼI muʼa ʼo tanatou ako ia te moʼoni, ko ʼihi neʼe nātou faka tui ʼe māʼuʼuli te kau mate ʼi he potu fakalaumālie, pea ʼe feala ke tokoni age te kau mate ʼaia, peʼe nātou fai he meʼa kovi ki te hahaʼi māʼuʼuli. Neʼe lagi lahi he ʼu meʼa neʼe koutou fai moʼo faka fīmālieʼi takotou ʼu kui ʼaē kua mamate. Kae ohage ko te meʼa ʼaē neʼe koutou ako ʼi te Kapite 6 ʼo te tohi ʼaenī, ko te kau mate ʼe mole kei nātou ʼioʼi he meʼa, pea ʼe mole he potu ʼe nātou māʼuʼuli ai. Koia ʼe mole hona fua mo kapau ʼe koutou faiga ke koutou palalau mo nātou. ʼI tona fakahagatonu, ko te ʼu logo ʼaē ʼe hage ʼe haʼu mai he tahi kua mate kae neʼe koutou ʼofa ai, ʼe ko he ʼu logo ia mai te kau temonio. Neʼe tapuʼi e Sehova ki te kau Iselaele tanatou palalau mo te kau mate, peʼe ko tanatou kau ki te ʼu meʼa fai fakalauʼakau.​—Teutalonome 18:​10-12.

5. Koteā ʼaē ʼe feala ke koutou fai mo kapau ʼi takotou tauhi ʼāfea, neʼe koutou tauhi ki te ʼu fakatātā peʼe koutou tauhi ki te ʼu kui?

⁵ Koteā ʼaē ʼe feala ke koutou fai, mo kapau ʼi takotou tauhi ʼāfea, neʼe koutou tauhi ki te ʼu fakatātā peʼe koutou tauhi ki te ʼu kui? Koutou lau pea mo metitāsio ki te ʼu vaega Tohi-Tapu ʼaē ʼe fakahā ai te manatu ʼa te ʼAtua ʼo ʼuhiga mo te ʼu tauhi ʼaia. Koutou faikole kiā Sehova ʼo ʼuhiga mo takotou fia mulimuli ki te tauhi moʼoni, pea mo kole age kiā te ia ke tokoni atu ke koutou manatu tahi mo ia.​—Isaia 55:9.

NEʼE MOLE FAI TE PŌ TAPU E TE KAU ʼULUAKI KILISITIANO

6, 7. (a) ʼE ʼui ko te Pō Tapu ʼe ina fakamanatuʼi te ʼaho fea, pea neʼe taupau koa te ʼaho lahi ʼaia e te kau tisipulo ʼa Sesu ʼo te ʼuluaki sēkulō? (b) ʼI te temi ʼo te kau ʼuluaki tisipulo ʼa Sesu, ko ai ʼaē neʼe nātou taupau te ʼu ʼaho tupu?

⁶ Neʼe lagi ʼulihi e te lotu hala te tauhi ʼa he tahi, ʼaki tana ʼu ʼaho lalahi faka lotu, ohage la ko te Pō Tapu. ʼE ʼui ko te Pō Tapu ʼe ko he fakamanatu ʼo te ʼaho tupu ʼa Sesu Kilisito, pea ʼe fakafiafia ʼi te ʼaho lahi ʼaia ia te ʼu teitei lotu fuli ʼaē ʼe nātou lau ʼe nātou tui kiā Kilisito. Kae ʼe mole maʼu he fakamoʼoni neʼe taupau te ʼaho lahi ʼaia e te kau tisipulo ʼa Sesu ʼo te ʼuluaki sēkulō. ʼE ʼui fēnei ʼi te tohi Sacred Origins of Profound Things: “Lolotoga sēkulō e lua ʼi te ʼosi tupu ʼa Sesu, neʼe mole he tahi neʼe ina ʼiloʼi tona ʼaho tupu, pea ʼe mole hahaʼi ia nātou ʼaē neʼe nātou fia ʼiloʼi te ʼaho tonu ʼaē neʼe tupu ai.”

⁷ Tatau aipe pe neʼe ʼiloʼi e te ʼu tisipulo ʼa Sesu tona ʼaho tupu, kae neʼe mole nātou fakamanatuʼi te ʼaho ʼaia. Koteā tona tupuʼaga? Heʼe ʼui ʼi te tohi The World Book Encyclopedia, “[maʼa te kau ʼuluaki Kilisitiano] ko te fakamanatu ʼo he ʼaho tupu, neʼe ko he fakafiafia faka pagani.” ʼI te Tohi-Tapu ʼe talanoa pe ia ki te ʼu fakamanatu ʼo te ʼu ʼaho tupu e lua, ʼo te ʼu hau neʼe mole nā atolasio kiā Sehova. (Senesi 40:20; Maleko 6:21) Ko te ʼu fakafiafia ʼi te ʼu ʼaho tupu neʼe toe fai foki moʼo fakafetaʼi ki te ʼu ʼatua pagani. Ohage la, ʼi te ʼaho 24 ʼo Maio, neʼe fakamanatu e te kau Loma te ʼaho tupu ʼo te ʼatua fafine ko Diane. ʼI te ʼaho ʼaē neʼe hoa kiai, neʼe nātou fakamanatu te ʼaho tupu ʼo tonatou ʼatua ʼo te laʼā, ia Apollon. Koia ko te ʼu fakamanatu ʼo te ʼaho tupu, neʼe ko he ʼu fakafiafia faka pagani, kae neʼe mole ko he ʼu fakafiafia faka Kilisitiano.

8. Koutou fakamahinohino ia te pikipikiga ʼo te fakafiafia ʼo te ʼaho tupu pea mo te ʼu meʼa fakatemonio.

⁸ ʼE ʼi ai te tahi tupuʼaga ʼo te mole fakamanatuʼi e te kau ʼuluaki Kilisitiano, ia te ʼaho tupu ʼa Sesu. Neʼe lagi ʼiloʼi e tana ʼu tisipulo ko te ʼu ʼaho tupu neʼe ʼi ai tonatou pikipikiga mo te ʼu meʼa fakatemonio. Ohage la, tokolahi ʼi te kau Keleka pea mo te kau Loma ʼo te temi muʼa, neʼe nātou faka tui ʼe ʼi ai te laumālie leʼoleʼo ʼa te tagata takitokotahi, ʼe puipui kiā ia talu mai tona tupu ʼo hoko atu ʼi tona maʼuli kātoa. ʼE ʼui ʼi te tohi The Lore of Birthdays (Te ʼu Talatisio ʼo ʼUhiga Mo Te ʼu ʼAho Tupu): “Ko te laumālie leʼoleʼo ʼaia neʼe faka misitelio tana ʼu felogoi mo te ʼatua neʼe tō tonu tona ʼaho tupu pea mo te ʼaho tupu ʼa te tagata.” ʼE mahino ia, ʼe mole fiafia anai ia Sehova mo kapau ʼe tou fai he toʼotoʼoga ʼe ina fakapipiki ai ia Sesu ki he ʼu meʼa fakatemonio. (Isaia 65:​11, 12) Kae he koʼe kua fai e te tokolahi te lafeti ʼo te Pō Tapu?

TE TAFITOʼAGA ʼO TE PŌ TAPU

9. He koʼe neʼe liliu ia te ʼaho 25 ʼo Tesepeli ko te ʼaho lahi ʼo te ʼaho tupu ʼo Sesu?

⁹ Neʼe kamata fai e te hahaʼi te fakamanatu ʼo te ʼaho tupu ʼo Sesu ʼi te ʼaho 25 ʼo Tesepeli, ʼi te hili ʼo te ʼu taʼu ʼe lauʼi teau ʼi te ʼosi mavae ʼa Sesu ʼi te kele. Kae neʼe mole ko te ʼaho tupu ʼaia ʼo Sesu, he neʼe lagi tupu Sesu ʼi te māhina ʼo ʼOketopeli.a Kae he koʼe neʼe fili te ʼaho 25 ʼo Tesepeli? Heʼe mahino mai, ʼi he ʼu taʼu ki muli age, ko te ʼu hahaʼi neʼe nātou ʼui ko te kau Kilisitiano, “neʼe nātou loto ke fakatō tahi te ʼaho ʼaia mo te ʼaho lahi ʼo Loma” ko te ʼaho tupu ʼo te laʼā. (The New Encyclopædia Britannica) ʼI te temi nive, mokā hage ʼe mole kei mū mālohi ia te laʼā, neʼe fai e te kau pagani te ʼu toʼotoʼoga ke toe liliu mai te laʼā, matapuna ʼo te mālama mo te faka māfana, ʼaē kua fakamamaʼo ʼi te kele. Neʼe nātou manatu ko te ʼaho 25 ʼo Tesepeli, neʼe ko te ʼaho ʼaia neʼe kamata ai te toe liliu mai ʼa te laʼā. Moʼo fakatafoki te kau pagani, neʼe tali e te kau takitaki lotu te ʼaho ʼaia, pea nātou faigaʼi ke hage ko he ʼaho lahi “faka Kilisitiano.”b

10. ʼI te temi muʼa, he koʼe ko ʼihi hahaʼi neʼe mole nātou fai ia te Pō Tapu?

¹⁰ Kua ʼiloʼi talu mai fualoa, ko te Pō Tapu ʼe ko he ʼaho lahi faka pagani. ʼUhi ko tana mole tuʼu ʼi te Tohi-Tapu, neʼe tapuʼi te Pō Tapu ʼi Pilitania, pea mo ʼihi kolo ʼo Amelika lolotoga te 17 sēkulō. Neʼe fakatūʼa ia ia ʼaē neʼe mole ʼalu ʼo gāue ʼi te ʼaho ʼo te Pō Tapu. Kae neʼe mole fualoa, pea toe fakaʼaogaʼi e te hahaʼi te ʼu ʼaho fakafiafia ʼāfea ʼaia, pea mo hilifaki kiai te tahi ʼu fakafiafia foʼou. Kua toe liliu te Pō Tapu ko he ʼaho lahi maʼuhiga, pea ʼe lahi te ʼu fenua ʼe kei nātou taupau ia te ʼaho lahi ʼaia. Kae ko te Pō Tapu ʼe ʼi ai tona pikipikiga mo te lotu hala, koia ko nātou ʼaē ʼe nātou fia taupau te tauhi ʼaē ʼe leleiʼia e te ʼAtua, ʼe mole nātou fakamanatu anai ia te ʼaho lahi ʼaia peʼe ko he tahi age ʼaho lahi ʼe ʼi ai hona pikipikiga mo te tauhi faka pagani.c

ʼE MAʼUHIGA KOA KE TOU TOKAGAʼI TE TAFITOʼAGA ʼA TE ʼU LAFETI ʼAIA?

11. He koʼe ko ʼihi hahaʼi ʼe nātou fakafiafia ʼi te ʼu ʼaho lalahi, kae koteā ʼaē ʼe tonu ke maʼuhiga kiā tatou?

¹¹ ʼE ʼiloʼi e ʼihi ko te ʼu ʼaho lalahi ohage ko te Pō Tapu ʼe ko he ʼu fakafiafia pagani, kae kiā nātou ʼe mole he kovi ʼo te fakafiafia ʼi te ʼu ʼaho lalahi ʼaia. Heʼe maʼa te tokolahi, ka nātou fakafiafia ʼi te ʼu ʼaho lalahi ʼaia, ʼe mole nātou faka ʼuhiga ki te tauhi hala, kae ʼe ko he ʼu temi faigamālie ʼaia maʼa te ʼu famili ke nātou fakatahitahi. ʼE koutou manatu feiā koa? Kapau ʼe feiā, pea ʼe faigataʼa anai hakotou mulimuli ki te tauhi moʼoni, ʼuhi heʼe mole ko takotou pipiki ki te lotu hala ʼaē ʼe takimuʼa, kae ko takotou ʼofa ʼaē ki tokotou famili. Kae koutou tui papau, ko Sehova te Tupuʼaga ʼo te famili, ʼe ina fakaʼamu ke koutou felogoi lelei mo takotou ʼu famili. (Efeso 3:​14, 15) Pea ʼe feala ke koutou felogoi lelei mo takotou famili, ʼo koutou mulimuli ki te ʼu meʼa ʼaē ʼe leleiʼia e te ʼAtua. ʼO ʼuhiga mo te faʼahi ʼaē ʼe tonu ke maʼuhiga kiā tatou, neʼe tohi fēnei e te ʼapositolo ko Paulo: “Koutou vakai te mea ae e lelei ki te Aliki.”​—Efeso 5:10.

12. Koutou tuku mai he fakatā moʼo fakahā pe koʼe ʼe tonu ke tou fakafisi ki te ʼu fakafiafia pea mo te ʼu ʼaho lalahi ʼaē ʼe kovi tonatou ʼu tafitoʼaga.

¹² Lagi maʼa koutou, ko te ʼu fakafiafia ʼaia ʼe mole kei fai iā ʼaho nei ʼo mulimuli ki tonatou ʼu tafitoʼaga faka pagani. Kae ʼe maʼuhiga koa ke tou tokagaʼi te tafitoʼaga ʼo te ʼu ʼaho lalahi ʼaia? Ei. Tou fakatā muʼa ia te ʼaluʼaga ʼaia: Kapau ʼe koutou sio ki he foʼi lole ʼe tuku ʼi te kanivo, ʼe koutou toʼo anai koa ʼo kai? Kailoa, heʼe ʼuli te foʼi lole ʼaia. Ohage ko te foʼi lole ʼaia, ʼe hage ʼe lelei te ʼu ʼaho lalahi ʼaia, kae ʼe ʼuli tonatou ʼu tafitoʼaga. Kapau ʼe tou fia mulimuli ki te tauhi maʼa, pea ʼe tonu ke tou maʼu te manatu ʼa te polofeta ko Isaia, ʼaē neʼe ina ʼui fēnei ki te kau atolasio moʼoni: “ ʼAua naʼa koutou fāfā ki he meʼa ʼe heʼemaʼa.”​—Isaia 52:11.

KOUTOU MAʼU TE FAKASIOSIO TONU ʼI TAKOTOU ʼU FELOGOI MO TE HAHAʼI

13. Koteā te ʼu fihifihia ʼaē ʼe feala ke hoko mo kapau ʼe koutou fakafisi ki te ʼu ʼaho lalahi ʼaia?

¹³ ʼE feala ke hoko he ʼu fihifihia mo kapau ʼe koutou fakafisi ki te ʼu fakafiafia ʼi te ʼu ʼaho lalahi ʼaia. Ohage la, ʼi tokotou fale gāue, ʼe lagi mata faikehe ki takotou ʼu kaugā gāue takotou mole kau ʼi ʼihi fakafiafia. ʼE feafeaʼi anai mo kapau ʼe foaki atu hakotou meʼa ʼofa ʼi te Pō Tapu? ʼE kovi koa hona tali? E feafeaʼi mo kapau ko tokotou ʼohoana ʼe mole tauhi kiā Sehova? Koteā ʼaē ʼe feala ke koutou fai ke mole lotomamahi takotou fānau heʼe mole nātou kau ki te ʼu ʼaho lalahi ʼaia?

14, 15. Koteā ʼaē ʼe tonu ke koutou fai mo kapau ʼe fai atu e he tahi he ʼu poapoaki ʼofa ʼo ʼuhiga mo te Pō Tapu, peʼe kapau ʼe fia foaki atu e he tahi he meʼa ʼofa?

¹⁴ ʼE maʼua ke koutou fakasiosio tonu ʼi te ʼu ʼaluʼaga ʼaia. Kapau ʼe fai atu e he tahi hana ʼu poapoaki ʼofa ʼo ʼuhiga mo te Pō Tapu, ʼe feala hakotou fakamālo age ki ai. Kae kapau ʼe ko he tahi ʼe koutou sio tuʼumaʼu ki ai pea mo gāue tuʼumaʼu mo ia, pea ʼe feala anai hakotou fakamahinohino lelei age, ʼaki he aga fakaʼeteʼete. ʼE tuku mai te tokoni ʼaenī ʼi te Tohi-Tapu: “Koutou fai ke lelei tuʼumaʼu takotou ʼu palalau pea ke konakonaʼi ʼaki te māsima, ke koutou ʼiloʼi te tali ʼaē ʼe tonu ke koutou fai ki te hahaʼi takitokotahi.” (Kolose 4:​6, MN ) Koutou tōkakaga ʼo aga fakaʼapaʼapa ki te hahaʼi, ʼo koutou fakaʼeteʼete ʼi takotou fakamahino kiā nātou te tupuʼaga ʼo takotou mole fakafiafia ʼi te ʼaho lalahi ʼaia. Koutou fakahā lelei age ʼe mole koutou koviʼia te ʼu meʼa ʼofa pea mo te ʼu fakafiafia, kae ʼe koutou leleiʼia age ia te ʼu faʼahi ʼaia mo kapau ʼe fai ʼi he tahi lakaga.

¹⁵ Kae kapau ʼe fia foaki atu e he tahi he meʼa ʼofa? ʼE fakalogo pe ki te ʼu ʼaluʼaga ʼaē ʼe foaki atu ai te meʼa ʼofa ʼaia. ʼE feala ke ʼui atu e ia ʼaē ʼe ina foaki atu te meʼa ʼofa: “ ʼE au ʼiloʼi ʼe mole ke taupau te Pō Tapu, kae ʼe au fakaʼamu ʼe ke tali pe anai ia te meʼa ʼofa ʼaenī.” ʼE feala pe hakotou manatu ko takotou tali te meʼa ʼofa ʼaia, ʼe mole tatau mo hakotou kau ki te fakafiafia ʼo te Pō Tapu. Kae kapau ko ia ʼaē ʼe ina foaki atu te meʼa ʼofa ʼe mole mahino ki takotou lotu, ʼe feala hakotou fakamahino age ʼe mole koutou taupau ia te ʼaho lahi ʼaia. ʼE faigafua ai anai hakotou fakamahino age pe koʼe ʼe koutou tali te meʼa ʼofa, kae ʼe mole koutou foaki age hana meʼa ʼofa. ʼI te tahi faʼahi, ʼe lagi lelei age hatatou mole tali he meʼa ʼofa, mo kapau ʼe foaki mai ʼaki te fakatuʼutuʼu ʼaē ke fakahā ʼe mole tou mulimuli lelei ki tatatou lotu, peʼe tou tali te meʼa ʼofa ʼaia heʼe tou mānumānu koloā.

TE ʼU FELOGOI MO TE FAMILI

16. E feafeaʼi hakotou aga fakaʼeteʼete ʼo ʼuhiga mo te ʼu ʼaho lalahi?

¹⁶ Kae e feafeaʼi mo kapau ʼe mole tauhi tokotou famili kiā Sehova? ʼO toe feiā aipe, ʼe tonu ke koutou aga fakaʼeteʼete. ʼAua naʼa koutou valoki te ʼu ʼaho lalahi ʼaē ʼe fia taupau e takotou ʼu famili, kae ke koutou fakaʼapaʼapa ki tanatou ʼu manatu, ohage pe ko takotou loto ʼaē ke nātou fakaʼapaʼapa atu ki takotou ʼu manatu. (Mateo 7:12) ʼAua naʼa koutou fai he meʼa ʼe tupu ai anai hakotou kau ki tanatou ʼu ʼaho lalahi, kae ʼe feala hakotou fakafuafua lelei mo kapau ʼe koutou sio ko he ʼu fakafiafia ʼe mole honatou pikipikiga mo te ʼu ʼaho lalahi ʼaia. Koutou tōkakaga tuʼumaʼu ke lelei tokotou leʼo ʼo loto.​—1 Timoteo 1:​18, 19.

17. Koteā ʼae ʼe feala ke koutou fai ke mole lotomamahi takotou fānau ʼi tanatou sio ki te hahaʼi ʼe nātou fakafiafia ʼi te ʼu ʼaho lalahi?

¹⁷ Koteā ʼaē ʼe feala ke koutou fai ke mole lotomamahi takotou fānau heʼe mole nātou fakafiafia ʼi te ʼu ʼaho lalahi ʼaia ʼaē ʼe mole tuʼu ʼi te Tohi-Tapu? ʼE fakalogo te faʼahi ʼaia ki te ʼu meʼa ʼaē ʼe koutou fai ʼi te tahi ʼu lakaga ʼo te taʼu. Ko ʼihi mātuʼa, kua nātou fakatuʼutuʼu he ʼu temi ke nātou foaki ai he ʼu meʼa ʼofa ki tanatou fānau. ʼI te ʼu meʼa ʼofa lelei ʼaē ʼe feala ke koutou foaki ki takotou fānau, ʼe ko tokotou temi pea mo tokotou ʼofa.

KOUTOU MAʼULIʼI TE TAUHI MOʼONI

18. ʼE lava tokoni feafeaʼi kiā koutou te ʼu fono faka Kilisitiano ke feala hakotou mulimuli ki te tauhi moʼoni?

¹⁸ Ke feala he tali ʼo koutou e te ʼAtua, ʼe tonu ke koutou lītuʼa ki te tauhi hala kae ke koutou mulimuli ki te tauhi moʼoni. Koteā ʼaē ʼe tonu ke koutou fai? ʼE ʼui fēnei ʼi te Tohi-Tapu: “Tou fetokagaʼaki ke tou uga ia tatou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi, ohage ko te agamāhani ʼa ʼihi, kae ke tou fefakaloto mālohiʼaki, tāfito la he kua koutou sio ki te fakaōviōvi mai ʼo te ʼaho.” (Hepeleo 10:​24, 25, MN ) Ko te ʼu fono faka Kilisitiano, ʼe ko he ʼu lakaga fakafiafia ke koutou tauhi ai ki te ʼAtua ʼo mulimuli ki te faʼahiga tauhi ʼaē ʼe ina tali. (Pesalemo 22:22; 122:1) ʼI te ʼu fono ʼaia, ʼe maʼu ai he ʼu “fefakaloto mālohiʼaki” ʼi te kau Kilisitiano agatonu.​—Loma 1:​12, MN.

19. He koʼe ʼe maʼuhiga ke koutou palalau ki te hahaʼi ʼo ʼuhiga mo te ʼu meʼa ʼaē neʼe koutou ako ʼi te Tohi-Tapu?

¹⁹ Ko te tahi faʼahi ʼaē ʼe feala ai ke koutou mulimuli ki te tauhi moʼoni, ʼe ko takotou palalau ki te hahaʼi ʼo ʼuhiga mo te ʼu meʼa ʼaē ʼe koutou ako ʼi te Tohi-Tapu mo te kau Fakamoʼoni ʼa Sehova. ʼE moʼoni ko te tokolahi ʼe nātou “toʼetoʼe pea mo lotomamahi” ʼuhi ko te ʼu meʼa kovi ʼaē ʼe hoko iā ʼaho nei ʼi te malamanei. (Esekiele 9:4) E lagi koutou ʼiloʼi he ʼu hahaʼi ʼe nātou tau mo te ʼu faigataʼaʼia ʼaia. He koʼe ʼe mole koutou palalau age ʼo ʼuhiga mo te ʼamanaki ʼaē ʼe koutou ako ʼi te Tohi-Tapu ʼo ʼuhiga mo te ka haʼu? Kapau ʼe koutou fakatahi mo te kau Kilisitiano moʼoni, pea mo palalau ki te hahaʼi ʼo ʼuhiga mo te ʼu moʼoni taulekaleka ʼaē neʼe koutou ako ʼi te Tohi-Tapu, ʼe koutou sisio anai ki te puli māmālie ʼi tokotou loto takotou fia fai ki te ʼu fakafiafia ʼo te tauhi hala. Koutou tui papau ʼe koutou fiafia ʼaupito anai pea mo koutou maʼu anai he ʼu tuʼuga tapuakina, mo kapau ʼe koutou mulimuli ki te tauhi moʼoni.​—Malakia 3:10.