“Ke Hoko Te Finegalo ʼo Sehova”

1-4. He koʼe neʼe tonu ke alu ia Paulo ki Selusalemi? Pea kotea ʼae neʼe tonu ke hoko ʼi ai?

NEʼE faigataʼa ʼosi tanatou tauʼine mo te kau tagata ʼafea ʼo Efeso ʼi Mile. Neʼe faigataʼa ʼosi kia Paulo pea mo Luka tanā tuku ʼona tehina ʼae neʼe nā ʼoʼofa ai. Kua tutuʼu leva ia te ʼu misionea ʼe toko lua ʼi te fuga vaka. Neʼe lahi ia te ʼu meʼa kai neʼe nā fafaʼo ʼi te ʼu taga ki tanā faifolau. ʼE nā ʼave mo te ʼu meʼa ʼofa ʼae neʼe tanaki maʼa te ʼu tehina ʼo Sutea, pea kua nā loto la ke nā fakatoʼo age kia natou.

² ʼE agiagi te matagi ki te ʼu la ʼo te vaka pea ʼe fakamamaʼo mamalie ia te vaka ʼi te ʼuafu. ʼE haga sioʼi e Paulo mo Luka pea mo ʼona tehina ʼe toko 7 ia tonatou ʼu tehina ʼe tutuʼu ʼi te ʼuafu. (Gaue 20:4, 14, 15) ʼE natou hiki ʼonatou nima pea mo tauʼine ki ʼonatou ʼu kaumeʼa ʼo kaku ʼosi ki tanatou mole kei lava sisio kia natou.

³ Neʼe gaue fakatahi ia Paulo pea mo te kau tagata ʼafea ʼo Efeso lolotoga taʼu ʼe tolu pea kua taki leva e te laumalie maʼoniʼoni ia ia ke alu ki Selusalemi. ʼE mole mahino katoa ki te ʼu aluʼaga ʼae ka hoko anai ʼi ai. Kae ʼi muʼa ʼo tana alu, neʼe ina ui fenei ki te kau tagata ʼafea: “ ʼE uga au e te laumalie maʼoniʼoni ke au alu ki Selusalemi, logo la ʼe mole au iloʼi pe kotea ʼae ka hoko anai kia au ʼi ai, gata pe ki te fakaha tuʼa lahi mai e te laumalie maʼoniʼoni ʼi te ʼu kolo fuli pe, ʼe pilisoniʼi mo fakatagaʼi anai au.” (Gaue 20:22, 23) Logo la te ʼu tuʼutamaki ka hoko ki ai, neʼe ina logoʼi ia tona ‘uga e te laumalie maʼoniʼoni’ ke alu ki Selusalemi. Neʼe hage kia ia ko hona maʼua ke alu pea neʼe fia fakalogo ki te takitaki ʼa te laumalie maʼoniʼoni. Neʼe fia maʼuli, kae ko te maʼuhiga kia ia ko tana fakahoko ia te finegalo ʼo te ʼAtua.

⁴ ʼE ke maʼu koa te faʼahiga sio ʼa Paulo? Ka tou foaki totatou maʼuli kia Sehova, ʼe tou fakapapau age ʼe tou fakamuʼamuʼa anai ia te fakahoko ʼo tona finegalo ʼi totatou maʼuli. Koia ʼe ʼaoga kia tatou ke tou ako ia te faʼifaʼitaki ʼo te apositolo ko Paulo.

Neʼe Natou Fakalaka Mamaʼo Mai “Te Motu ʼo Sipele” (Gaue 21:1-3)

5. Neʼe feafeaʼi ia te faifolau ʼa Paulo pea mo ʼona tehina ʼo kaku ki Tile?

⁵ Neʼe heka leva ia Paulo ʼi he vaka pea mo ʼona tehina “ ʼo folau fakahagatonu” ki Kose. Ko tona fakaʼuhiga neʼe agi mai te matagi mai ʼonatou tuʼa koia neʼe natou tau atu ki Kose ʼi te ʼaho pe ʼaia. (Gaue 21:1) Neʼe natou nonofo ai ʼo kaku ki te ʼaho ake pea neʼe natou olo leva ki Lota mo Patala. ʼI tanatou tau atu ki Patala, ʼi te potu saute ʼo Asia Veliveli, neʼe toʼo leva e te ʼu tehina ia te tahi vaka fetuku koloa, ʼo natou olo fakahagatonu ai ki Tile, ʼi Fenisia. ʼI tanatou olo ʼaia, neʼe natou sisio leva mai mamaʼo ki “te motu ʼo Sipele ʼi te faʼahi hema.” (Gaue 21:3) Kae he koʼe neʼe fakatokagaʼi e Luka ia te fahaʼi ʼaia?

6. (1) He koʼe neʼe lotomalohi ia Paulo ʼi tana sio ʼae ki te motu ʼo Sipele? (2) He koʼe ʼe lelei ke tou fakakaukauʼi ia te ʼu tapuakina neʼe foaki mai e Sehova pea mo tana tokoni?

⁶ Neʼe lagi tuhiʼi e Paulo ia te motu pea mo fakamatala age ia te ʼu aluʼaga neʼe hoko ʼi tana nofo ʼi te motu ʼaia ʼo Sipele. ʼI te ʼu taʼu ʼe hiva ki muʼa atu, ʼi tana ʼuluaki folau misionea mo Palenapa pea mo Soane Maleko, neʼe felaveʼi ʼi ai pea mo te tagata gaohi meʼa fakatemonio ʼe higoa ko Elimase, neʼe fakafeagai ki tanatou gaue faifakamafola. (Gaue 13:4-12) Neʼe lagi lotomalohi ia Paulo ʼi tana sio ʼae ki te motu pea mo tana manamanatu ki te ʼu aluʼaga ʼae neʼe hoko ki ai. Koia neʼe mole tuʼania ai ia te ʼu aluʼaga ʼae ka hoko mai. ʼO toe feia pe mo tatou, ʼe lelei ke tou toʼo he temi ke tou fakakaukauʼi ia te ʼu tapuakina ʼae neʼe foaki mai e Sehova, pea mo tana tokoni mai ke tou lava katakiʼi ia te ʼu ʼahiʼahi. Ka tou fai feia, ʼe tou maʼu ai ia te manatu ʼae neʼe maʼu e Tavite ʼi tana ui fenei: “ ʼE lahi te ʼu ʼahiʼahi ʼae ʼe tau mo te tagata faitotonu, kae ʼe haofaki e Sehova ia ia mai te ʼu ʼahiʼahi fuli ʼaia.”​—Pes. 34:19.

“Neʼe Matou Kumi Pea Mo Maʼu Te ʼu Tisipulo” (Gaue 21:4-9)

7. Kotea ʼae neʼe fai e te kau folau ʼi tanatou tau atu ki Tile?

⁷ Neʼe kua mahino ia Paulo ki te maʼuhiga ʼae ke fakatahi tuʼumaʼu mo ʼona tehina mo tuagaʼane. Koia neʼe fakaʼamu lahi ke fakatahi la mo natou ʼae ʼe natou lotu tahi mo ia. ʼE ui fenei e Luka ʼi tanatou tau atu ki Tile: “Neʼe matou kumi pea mo maʼu te ʼu tisipulo.” (Gaue 21:4) Neʼe iloʼi e te kau folau ʼe ʼi ai te kau Kilisitiano ʼi te kolo ʼaia, koia neʼe natou kumi ai ia natou pea mo maʼu natou, pea neʼe lagi neʼe natou nonofo ʼi tonatou ʼu ʼapi. ʼE ko te tahi pilivilesio lahi ʼaia ʼe tou maʼu moka ʼe tou nofo ʼi te moʼoni: Pe kotea te koga meʼa ʼe tou olo ki ai, ʼe tou maʼu pe he ʼu hahaʼi ʼe natou lotu tahi mo tatou pea mo natou fakatalitali leleiʼi tatou. Ko ia ʼae ʼe ʼofa ʼi te ʼAtua pea mo ina maʼuliʼi ia te tauhi moʼoni, ʼe ʼi ai pe tona ʼu kaumeʼa ʼi te malamanei katoa.

8. ʼE feafeaʼi hatatou mahino kia Gaue 21:4?

⁸ Neʼe fakamatala leva e Luka ia tanatou nonofo ʼi Tile lolotoga ʼaho ʼe fitu. Pea neʼe ina fai he ʼu palalau ʼe feala ke tou punamaʼuli ai: “Kae ʼuhi ko te meʼa ʼae neʼe fakaha age e te laumalie maʼoniʼoni kia natou [te ʼu tehina ʼo Tile] neʼe natou ui liuliuga kia Paulo ke ʼaua naʼa alu ki Selusalemi.” (Gaue 21:4) Neʼe kua fetogi koa e Sehova tana fakatuʼutuʼu? Kua ina fakatotonu leva kia Paulo ke ʼaua naʼa alu ki Selusalemi? Kailoa. Neʼe fakaha e te laumalie maʼoniʼoni kia Paulo ʼe gaohi koviʼi anai ia ia ʼi Selusalemi, kae neʼe mole ina ui age ke ʼaua naʼa alu ki ai. Neʼe kua mahino lelei pe ki te ʼu tehina ʼo Tile, ʼe fakatagaʼi anai ia Paulo ʼi Selusalemi. Kae neʼe natou ʼoʼofa ai, koia neʼe natou ui age ki ai ke ʼaua naʼa hake ki Selusalemi. Neʼe natou fia puipui ia te apositolo ko Paulo naʼa hoko he tuʼutamaki ki ai. Pea ʼe tou mahino pe ki te fahaʼi ʼaia. Kae neʼe kua fakatotonu malohi e Paulo ʼe ina fakahoko anai ia te finegalo ʼo Sehova, koia neʼe hoko pe tana alu ohage ko tana kua fakatuʼutuʼu.​—Gaue 21:12.

9, 10. (1) Kotea ʼae neʼe manatu ki ai ia Paulo ʼi tana logo ʼae ki te hoha ʼo te ʼu tehina ʼo Tile? (2) Kotea ia te manatu ʼa te hahaʼi tokolahi ia ʼaho nei? Pea he koʼe ʼe mole alu tahi pea mo te ʼu palalau ʼae neʼe fai e Sesu?

⁹ Neʼe tokagaʼi e Paulo te hoha ʼo ʼona tehina pea neʼe lagi ina manatuʼi ia te ʼu palalau ʼae neʼe logo ki ai Sesu ʼi tana ui ki ʼana tisipulo ʼe tonu ke alu ki Selusalemi pea ʼe fakamamahiʼi anai ia ia mo fakapogi. Pea neʼe mamahi te loto ʼo Petelo ʼo ina ui fenei ki ai: “ ʼAliki, tuku tau palalau feia, ʼe mole hoko anai kia koe te ʼu faʼahi ʼaia.” Kae neʼe tali fenei e Sesu: “Fakalaka ʼi ʼoku tuʼa, Satana! Ko koe ko he maka fakatupu tukia kia au, koteʼuhi ʼe mole ke maʼu te ʼu manatu ʼa te ʼAtua, kae ko te ʼu manatu ʼa te tagata.” (Mat. 16:21-23) Neʼe kua ina fakatotonu ʼe ina sakilifisioʼi anai ia tona maʼuli he neʼe ko te finegalo ʼaia ʼo Sehova. Neʼe maʼu e Paulo te faʼahiga sio ʼa Sesu. Pea neʼe hage pe te ʼu tehina ʼo Tile ko te apositolo ko Petelo, neʼe mole natou loto ke mate ia Paulo. Neʼe heʼeki natou mahino natou ki te finegalo ʼo te ʼAtua.

¹⁰ Tokolahi te hahaʼi ia ʼaho nei, ʼe mole natou fia maʼuli mamahi pea mo maʼuli fakasakilifisio. Tokolahi ʼe natou kumi he lotu ʼe mole faʼa mamafa fau ia te ʼu koga ʼae ʼe fakamaʼua ki tanatou ʼu hahaʼi, kae neʼe mole ko te manatu ʼaia neʼe loto e Sesu ke tou maʼu. Neʼe ina ui fenei ki ʼana tisipulo: “Kapau ʼe fia muli mai he tahi ia te au, ke fakafisi kia ia totonu pea ke ina toʼo tona pou fakamamahi pea mo haga muli mai ia te au.” (Mat. 16:24) Kapau ʼe tou muliʼi ia Sesu, ʼe tou maʼu ai ia te faʼahiga maʼuli ʼae ʼe fakapotopoto mo lelei, kae ʼe mole ko he maʼuli ʼe faigafua.

11. Neʼe fakaha feafeaʼi e te ʼu tisipulo ʼo Tile ia tonatou ʼofa ʼae kia Paulo pea mo tanatou lagolago ki ai?

¹¹ Kua tonu leva ke hoko atu e Paulo mo Luka pea mo ʼona tehina ia tanatou faifagona. Neʼe fakaʼofaʼofa ʼosi ia tanatou tauʼine pea mo te ʼu tehina ʼo Tile. Neʼe ha ai ia te ʼoʼofa ʼa te ʼu tehina kia Paulo pea mo tanatou lagolago malohi ki tana faifakamafola. Neʼe kaugā olo fakatahi ia te ʼu tagata mo te ʼu fafine, mo ʼanatou tamaliki pea mo Paulo mo ʼona kaumeʼa ʼo kaku ki te matatai. ʼOsi ʼaia, pea neʼe natou tuʼutuli ifo fuli ki te kele ʼo faikole fakatahi pea neʼe natou tauʼine leva. Neʼe toʼo leva e Paulo mo Luka pea mo ʼona tehina ia he vaka ʼo natou olo ai ki Tolemaise. ʼI tanatou tau atu, neʼe natou felaveʼi ai mo ni tehina pea mo nonofo mo natou ʼi te ʼaho katoa.​—Gaue 21:5-7.

12, 13. (1) Kotea te ʼu gaue neʼe fakahoko e Filipo? (2) Kotea te faʼifaʼitakiʼaga lelei neʼe tuku e Filipo ki te ʼu tamai Kilisitiano?

¹² ʼOsi ʼaia, pea neʼe fakamatala leva e Luka ia te alu ʼa Paulo pea mo ʼona tehina ki Sesalea. ʼI tanatou tau atu, neʼe natou olo leva “ki te ʼapi ʼo Filipo, te Tagata Faifakamafola.”a (Gaue 21:8) ʼE mahino ia, neʼe natou fiafia ʼi tanatou toe sisio kia Filipo. ʼI ni tau ʼe ʼuafulu ki muʼa atu ʼi Selusalemi, neʼe kau ia Filipo ia natou ʼae neʼe hinoʼi e te kau apositolo ke natou tufa te meʼa kai ki te kokelekasio. Kua fualoa leva te faʼafai ʼa Filipo ʼi te gaue faifakamafola. ʼI te temi ʼae neʼe fakatagaʼi kovi ai ia te ʼu tisipulo ʼa Sesu ʼo natou mavetevete ai, neʼe alu ia Filipo ki Samalia ʼo faifakamafola ai. Ki muli age, neʼe faifakamafola leva ki te enuke Etiopea pea mo papitemaʼi ia ia. (Gaue 6:2-6; 8:4-13, 26-38) Ko he toe gaue maʼuhiga neʼe fai e te tagata agatonu ʼaia.

¹³ Neʼe kei faʼafai pe ia Filipo ʼi te faifakamafola. Kua maʼuli nei ʼi Sesalea pea neʼe kei lagolago malohi ki te faifakamafola. Koia neʼe fakahigoaʼi ai e Luka ia ia ko “te Tagata Faifakamafola.” ʼE tou iloʼi neʼe faifakakikite ia te ʼu ʼofafine ʼe toko fa ʼa Filipo, ʼo tou mahino ai neʼe natou faʼafai mo natou ʼi te faifakamafola ohage pe ko tanatou tamai.b (Gaue 21:9) Neʼe lagi tokaga lelei ia Filipo ki te maʼuli fakalaumalie ʼo tona kiʼi famili. ʼO toe feia pe ia ʼaho nei, ʼe lelei ke faʼifaʼitakiʼi e te ʼu tamai ia Filipo, ʼo natou tuku he faʼifaʼitakiʼaga lelei ki tanatou ʼu fanau ʼo ʼuhiga mo te faʼafai pea mo te manako ʼae ki te faifakamafola.

14. Kotea ia te ʼu lelei moka ʼaʼahi e Paulo ʼona tehina? Pea ʼe ʼi ai koa he ʼu aluʼaga feia ia ʼaho nei?

¹⁴ ʼI he koga meʼa pe neʼe alu ki ai ia Paulo, neʼe ina kumi tuʼumaʼu pe ʼona tehina pea mo toʼo he temi ke nofo mo natou. Neʼe lagi loto e te ʼu tehina ke natou fakaʼapi ia te tagata misionea ʼaia pea mo ʼona tehina. ʼE mahino ia, ʼi tanatou ʼaʼahi ʼonatou tehina neʼe ko he faigamalie ʼaia, ke natou “fefakalotomalohiʼaki.” (Loma 1:11, 12) ʼE toe ʼi ai pe te ʼu aluʼaga feia ia ʼaho nei. ʼE lahi te ʼu lelei ʼe feala ke tou maʼu mo kapau ʼe tou avahi ʼotatou ʼapi pea mo fakaʼapi ia te tehina taupau ʼo te siliko pea mo tona ʼohoana.​—Loma 12:13.

“Kua Au Teuteu Ke Au Mate” (Gaue 21:10-14)

15, 16. Kotea te logo ʼae neʼe haʼu mo Akapusi? Pea kotea neʼe fai e natou ʼae neʼe natou logo ki ai?

¹⁵ ʼI te temi ʼae neʼe nofo ai ia Paulo ʼio Filipo, neʼe alu age ia te tagata iloa ʼe higoa ko Akapusi. Neʼe iloʼi e Paulo mo ʼona tehina ko Akapusi ʼe ko te polofeta. Pea neʼe ina fakakikite ia te toe hoge meʼa kai ʼi te temi hau ʼo Kolote. (Gaue 11:27, 28) Neʼe lagi natou feʼekeʼaki: ‘He koʼe neʼe haʼu? ʼE ʼi ai koa he logo ʼe haʼu mo ia?’ Neʼe haga leva ia Akapusi ʼo toʼo ia te kiliʼi pipi ʼo Paulo kae natou haga sioʼi ia ia. Ko he moʼi kie neʼe ina haʼi ʼi tona koga loto pea neʼe feala ke ina ʼai ki ai he ʼu piesi falā pea mo he ʼu kiʼi meʼa liliki. Neʼe ina haʼi ʼaki ia te ʼu nima pea mo te ʼu vaʼe ʼo Paulo. Pea neʼe palalau leva ʼo ina fakaha he logo kovi. Neʼe ina ui fenei: “ ʼE ui fenei e te laumalie maʼoniʼoni: ‘Ko te tagata ʼae ʼoʼona te kiliʼi pipi ʼaeni, ʼe haʼi fenei anai ia ia e te kau Sutea ʼi Selusalemi, pea ʼe natou tuku anai ia ia ki te ʼu nima ʼo te hahaʼi ʼae ʼe mole Sutea.’ ”​—Gaue 21:11.

¹⁶ Neʼe fakamoʼoni te fakakikite ʼaia ʼe hake anai ia Paulo ki Selusalemi. Pea neʼe toe fakaha ai, ʼe tuku anai e te kau Sutea ʼi Selusalemi ia Paulo ‘ki te ʼu nima ʼo te hahaʼi ʼae ʼe mole Sutea.’ Neʼe natou punamaʼuli ʼi tanatou logo ki tana faifakakikite. ʼE ui fenei e Luka: “ ʼI tamatou logo ki ai, ʼo feia mo natou ʼae neʼe ʼi ai, neʼe matou kole mamahi age ke ʼaua naʼa hake ki Selusalemi. Kae neʼe ui fenei e Paulo: ‘He koʼe ʼe kotou fetagihi pea mo faigaʼi ke kotou fakalotovaivaiʼi au? Ke kotou iloʼi, kua au teuteu ke pilisoniʼi au pea ke au mate foki ʼi Selusalemi ʼuhi ko te huafa ʼo te ʼAliki ko Sesu.’ ”​—Gaue 21:12, 13.

17, 18. Kotea ʼae neʼe fakatotonu malohi e Paulo ke ina fai? Pea kotea ʼae neʼe fai e te ʼu tehina?

¹⁷ Kotou fakakaukauʼi age muʼa ia te aluʼaga ʼae neʼe hoko. Neʼe kole mamahi e te ʼu tehina kia Paulo, ʼo kau ai mo Luka, ke ʼaua naʼa alu ki Selusalemi. Neʼe faifetagihi ʼihi, neʼe malave ki te loto ʼo Paulo ia tanatou ʼu palalau pea neʼe ina ui age ʼaki he agalelei pe koʼe ʼe natou “faigaʼi ke [natou] fakalotovaivaiʼi” ia ia. Kae neʼe ina fia fakahoko agatonu pe ia te finegalo ʼo te ʼAtua. Ohage pe ko tana fai pea mo ʼona tehina ʼo Tile, neʼe mole ina tuku ke fakavaivaiʼi ia ia e tanatou ʼu tagi pea mo tanatou ʼu lauga. Kae neʼe ina fakamahino pe koʼe neʼe tonu ke alu, ʼo ina fakaha ai tana lototoʼa pea mo tana lotomalohi ʼae ke ina fakahoko tona maʼua. Neʼe ina fai pe ohage ko Sesu ʼi muʼa atu, neʼe fakatotonu malohi ke alu ki Selusalemi. (Hep. 12:2) Neʼe mole fakaʼamu ia ke liliu ko he maletile, kae neʼe mole mataku ia ʼi te mate ʼi tona ʼuhiga tisipulo ʼa Sesu Kilisito.

¹⁸ Kotea ʼae neʼe fai e te ʼu tehina? Neʼe natou fakaʼapaʼapa ki ai. ʼE tou lau fenei: “ ʼI tamatou sisio ʼae ʼe mole fetogi anai tana manatu, neʼe matou haganoa ai leva pea mo ui fenei: ‘Ke hoko te finegalo ʼo Sehova.’ ” (Gaue 21:14) Neʼe mole kei natou fakakinauʼi ia ia ke mulimuli ki tanatou ʼu manatu. Neʼe natou fakalogo ki ai pea mo fakaʼapaʼapa ki tana tonu. Neʼe natou mahino mo tali ia te finegalo ʼo Sehova, tatau aipe pe neʼe faigataʼa kia natou. Neʼe toʼo e Paulo ia he tonu ʼe ina iloʼi ʼe iku ki te mate. Koia, ʼe fimalie anai ia te loto ʼo Paulo mo kapau ʼe mole faiga e natou ʼae ʼe ʼoʼofa ai, ke natou fetogi tana manatu.

19. Kotea te ako ʼe feala ke tou taʼofi mai te apositolo ko Paulo?

¹⁹ ʼE ʼi ai te ako maʼuhiga ʼe tou maʼu ʼi te fakamatala ʼaeni: ʼAua naʼa tou fakalotovaivaiʼi he tahi, ke ʼaua naʼa maʼuli fakasakilifisio moʼo fakahoko ia te finegalo ʼo Sehova. ʼE mole fakahagahaga pe kia natou ʼae ʼe feala ke tuʼutamakiʼia tonatou ʼu maʼuli, kae ʼe lahi ia te ʼu aluʼaga ʼe feala ai ke tou fakaʼaoga ia te ako ʼaeni. Ohage la, ʼe faigataʼa ki ʼihi matuʼā tanatou sisio ʼae ki tanatou ʼu fanau ʼe olo ʼo gaue maʼa Sehova ʼi he tahi age koga meʼa. Kae, ʼe mole natou fakavaivaiʼi tanatou ʼu fanau ke ʼaua naʼa natou fakahoko ia te finegalo ʼo Sehova. Ohage la ko Phyllis, ʼe maʼuli ʼi Pilitania, neʼe faigataʼa kia ia tana iloʼi ʼae ʼe alu anai ia tana taʼahine ʼo gaue misionea ʼi Afelika. Neʼe ina ui fenei: “Neʼe hoha ʼosi toku loto ʼi taku manatu ʼae ʼe maʼuli anai ʼi he fenua ʼe tuʼu mamaʼo. Neʼe mamahi toku loto kae neʼe au fiameʼameʼa ʼosi. Pea neʼe au faikole kia Sehova ʼo ʼuhiga mo te faʼahi ʼaia. Neʼe ko te tonu ʼaia ʼo taku taʼahine, kae neʼe mole au faiga au ke ina holoʼi tana fakatuʼutuʼu, tafito la he neʼe au akoʼi tuʼumaʼu age ki ai ke ina fakamuʼamuʼa ia te Puleʼaga ʼo te ʼAtua. Kua taʼu 30 nei tana misionea ʼi he fenua matapule, pea ʼe au fakamalo kia Sehova ʼi te ʼaho fuli ʼi tana nofo agatonu.” ʼE lelei ke tou fakalotomalohiʼi ʼotatou tehina mo tuagaʼane ʼae ʼe fia maʼuli fakasakilifisio.

“Neʼe Fakatalitali Fakafiafia Matou e Te ʼu Tehina” (Gaue 21:15-17)

20, 21. Kotea ʼae neʼe ha ai neʼe loto tuʼumaʼu pe e Paulo ke fakatahi pea mo ʼona tehina? Pea he koʼe neʼe fia fakatahi tuʼumaʼu pe mo natou ʼae ʼe lotu tahi pea mo ia?

²⁰ Neʼe teuteuʼi e Paulo pea mo ʼona tehina ia tonatou fagona. Hili ʼaia, pea neʼe natou olo leva ʼi te ala. ʼI tanatou faifagona ʼaia ki Selusalemi, neʼe faiga tuʼumaʼu pe e Paulo pea mo ʼona tehina ke natou fakafelaveʼi pea mo ʼonatou tehina mo tuagaʼane Kilisitiano. Neʼe natou maʼu ʼi te kolo ko Tile ni tisipulo, ʼo natou nonofo fakatahi ai ʼaho ʼe fitu. ʼI te kolo ko Tolemaise, neʼe natou fakafelaveʼi mo ʼonatou tehina mo tuagaʼane pea mo fakatahi mo natou ʼi te ʼaho katoa. ʼI tanatou ʼi Sesalea, neʼe natou nonofo ʼi ni ʼaho ʼi te ʼapi ʼo Filipo. ʼOsi ʼaia, pea neʼe natou kaugā olo fakatahi mo ni tisipulo ʼo Sesalea ʼo kaku ʼosi ki Selusalemi. Pea neʼe fakaʼapi natou e te tisipulo ʼe higoa ko Manasone. Neʼe ui fenei e Luka: “ ʼI tamatou tau atu ki Selusalemi, neʼe fakatalitali fakafiafia matou e te ʼu tehina.”​—Gaue 21:17.

²¹ ʼE mahino ia, neʼe fia fakatahi tuʼumaʼu pe ia Paulo pea mo natou ʼae ʼe lotu tahi mo ia. Neʼe ina maʼu he ʼu fakalotomalohi mai ʼona tehina mo tuagaʼane ohage pe ko tatou ia ʼaho nei. Neʼe ʼaoga ʼosi ki ai ia te ʼu fakalotomalohi ʼaia ke ina lava tauʼi ia tona ʼu fili agakovi ʼae neʼe natou faiga ke natou matehi ia ia.