Ko Filipo—Te Evaselisita Fakamalotoloto
ʼI TE Tohi-Tapu, ʼe lahi te ʼu fakamatala ʼo ʼuhiga mo te ʼu tagata pea mo te ʼu fafine ʼe feala ke tou faʼifaʼitakiʼi tanatou tui. Ohage la ko Filipo, ko te Kilisitiano misionea ʼo te ʼuluaki sēkulō. Neʼe mole ko he ʼapositolo, kae neʼe lahi tona fakaʼaogaʼi ki te faka mafola ʼo te logo ʼo te Puleʼaga. ʼI tona fakahagatonu, neʼe fakahigoaʼi ia ia ko “Filipo te evaselisita.” (Gaue 21:8) He koʼe neʼe fakahigoaʼi feiā ia Filipo? Pea koteā te meʼa ʼaē ʼe feala ke tou ako mai tana faʼifaʼitaki?
ʼE ʼuluaki talanoa te Tohi-Tapu kia Filipo ʼi te hili pe ʼo te Penikosite ʼo te taʼu 33 ʼo totatou temi. ʼI te temi ʼaia, ko te kau Sutea ʼaē neʼe lea faka Keleka neʼe nātou kamata meo ʼo fakafeagai ki te kau Sutea ʼaē neʼe lea faka Hepeleo, ʼo nātou ʼui neʼe meʼa noaʼi tonatou ʼu fafine vitua ʼi te tufa meʼa kai ʼi te ʼaho fuli. Moʼo fakatokatoka te faʼahi ʼaia, neʼe hinoʼi e te ʼu ʼapositolo “ni tagata fakaapaapaʼia e fitu.” Ko Filipo neʼe kau ia nātou ʼaia neʼe filifili.—Gaue 6:1-6.
Ko te toko fitu tagata ʼaia neʼe “fakaapaapaʼia.” ʼI te fakaliliu Tohi-Tapu ʼa James Moffatt, ʼe ina ʼui neʼe “lelei tonatou matagafua.” Ei, ʼi te temi ʼaē neʼe hinoʼi ai nātou, neʼe kua ʼiloa tanatou aga fakapotopoto ʼi te faʼahi fakalaumālie, pea neʼe nātou popoto ʼi te fai puleʼaki. ʼE toe feiā pe mo nātou ʼaē ʼe tagata ʼāfea ia ʼaho nei. ʼE mole hinoʼi fakavilivili te ʼu tagata ʼaia. (1 Timoteo 5:22) “E tonu ke lelei te fakamooni a natou e mole lotu o uhiga mo [nātou],” pea ʼe tonu ke hā ki tonatou ʼu tēhina Kilisitiano, ko nātou ko he ʼu tagata aga fakapotopoto.—1 Timoteo 3:2, 3, 7; Filipe 4:5.
ʼE hā mai, neʼe fakahoko fakalelei e Filipo tana fekau ʼi Selusalemi. Kae neʼe hoko ai leva te ʼu fakataga mālohi, ʼo mavetevete ai te kau tisipulo ʼa Kilisito. Ohage ko te tokolahi ʼo te kau Kilisitiano, neʼe mavae ia Filipo ʼi te kolo, kae neʼe mole fakagata ai tona minisitelio. Mole tuai, pea neʼe kamata fai faka mafola ʼi he telituale foʼou, ko Samalia.—Gaue 8:1-5.
ʼE Fai Faka Mafola ʼi He ʼu Telituale Foʼou
Neʼe fakakikite e Sesu, ʼe fai faka mafola anai tana kau tisipulo “i Selusalemi, mo Sutea katoa; mo Samalia o kaku ki te u tuakoi o te kelekele.” (Gaue 1:8) ʼI tana tau ki Samalia, neʼe kau ia Filipo ki te fakahoko ʼo te ʼu palalau ʼaia. ʼI te agamāhani, neʼe mole faʼa fakaʼapaʼapa te kau Sutea ki te hahaʼi Samalitana. Kae neʼe mole fakapalatahi ia Filipo ki te hahaʼi ʼaia, ʼo fua lelei ai tana gāue. Ei, neʼe tokolahi te kau Samalitana neʼe papitema, ʼo kau ai mo te tagata ko Simone ʼaē neʼe faifakalauʼakau.—Gaue 8:6-13.
Ki muli age, ko te ʼaselo ʼa Sehova neʼe ina taki ia Filipo ki te ala ʼo te toafa ʼaē ʼe haʼu mai Selusalemi ki Kasa. Neʼe fakatokagaʼi ai e Filipo te saliote neʼe heka ai te ofisie Etiopea neʼe ina lau leʼolahi te lea faka polofeta ʼa Isaia. Neʼe lele ia Filipo ia tafa ʼo te saliote pea kamata fai palalau mo te tagata ʼaia. Logope la ko te tagata Etiopea ʼaia neʼe ko te poloselite neʼe kua mālama ki te ʼAtua pea mo te Tohi-Tapu, kae neʼe agavaivai ʼo kole tokoni ke fakamahino age te meʼa ʼaē neʼe ina lau. Koia, neʼe ina fakaafe ai Filipo ke nā kaugā fagona ʼi tona saliote. ʼI te ʼosi fai faka mafola ʼa Filipo kia ia, neʼe nā tau ki he vai. Neʼe fehuʼi fēnei e te tagata Etiopea, “kotea ae e ina taofi toku papitemaʼi?” Neʼe papitemaʼi atu aipe ia ia e Filipo, pea hoko atu fakafiafia e te tagata Etiopea tana fagona. ʼE mahino ia, ko te tisipulo foʼou ʼaia neʼe ina faka mafola te logo lelei ʼi tona fenua.—Gaue 8:26-39.
Koteā ʼaē ʼe tou ako mai te fai faka mafola ʼa Filipo ki te kau Samalitana pea mo te ofisie Etiopea? ʼE mole he temi ʼe tonu ke tou manatu ai, ko te hahaʼi ʼo te tahi lanu pe ko te tahi fenua ʼe mole nātou tali anai te logo lelei. Kae ʼe tonu ke tou kalagaʼi te logo ʼo te Puleʼaga “ki te tagata fuape.” (1 Kolonito 9:19-23) Kapau ʼe tou faiga ke tou fai faka mafola ki te hahaʼi fuli pe, pea ʼe fakaʼaogaʼi anai tatou e Sehova moʼo ‘fakahoko he u tisipulo i te atu puleaga’ ʼi muʼa ʼo te fakaʼosi ʼo te mālama agakovi ʼaenī.—Mateo 28:19, 20.
Te Tahi ʼu Pilivilesio ʼa Filipo
ʼI tana ʼosi faka mafola ki te ofisie Etiopea, neʼe ʼalu ai leva Filipo ʼo fai faka mafola ʼi Asote, pea “nee ina fagonogono te Logolelei i te atu kolo fuape o kaku ki Sesalea.” (Gaue 8:40) ʼI te ʼuluaki sēkulō, ko te ʼu kolo ʼaia e lua neʼe hahaʼi ai te kau Senitile. ʼI tana hake ki Sesalea, lagi neʼe fai faka mafola ia Filipo ʼi te ʼu kolo Sutea maʼuhiga, ohage ko Lita pea mo Sopa. Ko te lagi tupuʼaga la ʼaia ʼo te maʼu ʼo he ʼu tisipulo ʼi te ʼu kolo ʼaia ki muli age.—Gaue 9:32-43.
Neʼe toe talanoa fakaʼosi pe te Tohi-Tapu kia Filipo hili kiai taʼu e 20. ʼI te ʼosi ʼo tana tolu folau misionea, neʼe tau age Paulo ki Patolemaite. ʼE ʼui fēnei e te kaugā fagona ʼa Paulo ko Luka, “i te aho ake, nee hoko atu tomatou fagona o matou tau ki Sesalea, nee matou olo ki te api o Filipo te evaselisita.” ʼI te temi ʼaia, ko Filipo “nee i ai ona ofafine e fa pea nee ko he u polofeta.”—Gaue 21:8, 9.
ʼE hā mai, neʼe nofo Filipo ʼi Sesalea. Kae neʼe mole heʼeki ina tuku tana gāue misionea, heʼe fakahigoaʼi ia ia e Luka ko “te evaselisita.” Ko te kupu ʼaia ʼe tau faka ʼuhiga ki he tahi ʼe mavae ʼi tona ʼapi ke ʼalu ʼo faka mafola te logo lelei ʼi te ʼu koga meʼa ʼaē ʼe mole heʼeki fai ai te gāue. Neʼe ʼi ai te ʼu ʼofafine e fā ʼa Filipo neʼe nātou lea faka polofeta, pea ʼe hā ʼaki mai neʼe nātou faʼifaʼitakiʼi te gāue fakamalotoloto ʼa tanatou tāmai.
ʼE mole tonu ke galo ki te ʼu mātuʼa Kilisitiano ia ʼaho nei, ko tanatou fānau ʼe ko tanatou ʼu tisipulo tāfito. Tatau aipe peʼe tonu ki te ʼu mātuʼa ʼaia ke nātou fakafisi ki he ʼu pilivilesio faka teokalatike ʼuhi ko tonatou ʼu maʼua faka famili, kae ohage ko Filipo ʼe feala ke hoko atu tanatou kaugana fakamalotoloto ki te ʼAtua, ʼo nātou tuku he faʼifaʼitaki lelei ki tanatou ʼu fānau.—Efeso 6:4.
ʼI te ʼaʼahi ʼo nātou e Paulo pea mo tana ʼu kaugā fagona, neʼe maʼu ai e te famili ʼa Filipo te fealagia ʼaē ke nātou tali kāiga. Koutou fakakaukauʼi age muʼa te ʼu fefakaloto mālohi ʼaē neʼe nātou fai! Neʼe lagi ko te lakaga ʼaia ʼaē neʼe tānaki ai e Luka te ʼu fakamatala ʼo ʼuhiga mo te ʼu gāue ʼa Filipo, ʼaē neʼe ina tohi ki muli age ia Gaue kapite 6 pea mo te 8.
Ko Sehova ʼAtua, neʼe lahi tana fakaʼaogaʼi ʼo Filipo moʼo fakahaʼele ki muʼa te ʼu meʼa ʼo te Puleʼaga. Ko te lotomālohi ʼa Filipo neʼe tokoni kia ia ke ina faka mafola te logo lelei ʼi te ʼu telituale foʼou, pea ke ina taupau lelei tona famili ʼi te faʼahi fakalaumālie. ʼE koutou fia maʼu koa mo koutou he ʼu pilivilesio pea mo he ʼu tapuakina feiā? Kapau koia ʼaia, pea ʼe lelei ke koutou faʼifaʼitakiʼi te ʼu kalitate ʼaē neʼe fakahā e Filipo te evaselisita.