Tou Maʼu Te Manatu Faka Pionie
1. ʼE koutou fakamahino feafeaʼi anai te manatu faka pionie?
1 Peʼe feala ke nātou pionie ʼi te temi nei peʼe kailoa, kae ko te kau fai faka mafola fuli ʼo te Puleʼaga ʼe feala ke nātou maʼu te manatu faka pionie. ʼE nātou fakalogo ki te fakatotonu ʼaē ke nātou faka mafola pea mo fai he ʼu tisipulo. (Mat. 28:19, 20; Gaue 18:5) ʼE nātou ʼofa ki te hahaʼi pea mo nātou maʼuli faka sakilifisio moʼo fakahoko tanatou minisitelio. (Mat. 9:36; Gaue 20:24) Ko te kau kaugana ʼa Sehova ʼe nātou fia fai ia meʼa fuli ʼaē ʼe ʼaoga moʼo tokoni ki te hahaʼi ke nātou ʼiloʼi te moʼoni. (1 Ko. 9:19-23) Tou vakaʼi te faʼifaʼitaki ʼo te tagata neʼe ina maʼu te manatu ʼaia, ko Filipo te tagata faka mafola evaselio.
2. ʼE lava faʼifaʼitaki feafeaʼi e te kau tagata ʼāfea pea mo te kau tagata faifekau faka minisitelio ia te faiva ʼa Filipo ʼi te minisitelio?
2 Te Fai Faka Mafola Pea Mo Te Faiako: Neʼe tokaga ia Filipo ki te ʼu maʼua maʼuhiga ʼi te kokelekasio ʼo te ʼuluaki sēkulō. (Gaue 6:1-6) Kae ko te gāue ʼaē neʼe ina fai tāfito, neʼe ko te faka mafola ʼo te logo lelei. (Gaue 8:40) Koia, ia ʼaho nei, logola tanatou fakahoko tanatou ʼu gāue, kae ko te kau tagata ʼāfea pea mo te kau tagata faifekau faka minisitelio, ʼe feala ke nātou maʼu te manatu faka pionie ʼo nātou kau fakafiafia ki te minisitelio. Kapau ʼe nātou fai feiā, ʼe tupu ai anai he fakaloto mālohi ʼo te kokelekasio!—Loma 12:11.
3. ʼE tou lava maʼu feafeaʼi te manatu faka pionie mokā tou tau mo he ʼu faigataʼaʼia?
3 ʼI te ʼosi mate ʼa Setefano, neʼe hoko te fakataga lahi ʼo tupu ai te fetogi lahi ʼi te maʼuli ʼa te kau tisipulo. Kae neʼe hoko atu pe te faka mafola ʼa Filipo, pea neʼe fakaʼaogaʼi ia ia moʼo avahi te gāue ki te kau Samalitana. (Gaue 8:1, 4-6, 12, 14-17) ʼE feala ke tou faʼifaʼitakiʼi ia ia ʼo tou haga fakahā te logo lelei ʼi te ʼu temi ʼaē ʼe tou tau ai mo ni ʼu faigataʼaʼia, pea mo faka mafola ki te hahaʼi fuli pe ʼaē ʼe tou felāveʼi mo nātou, kae mole tou fakapalatahi.—Soa. 4:9.
4. Koteā te faʼifaʼitaki neʼe tuku mai e Filipo ʼo ʼuhiga mo te akoʼi ki te hahaʼi?
4 ʼI te fakamatala ʼo ʼuhiga mo te tafoki ʼa te enuke Etiopea, ʼe hā lelei ai te poto ʼa Filipo ʼi te akoʼi ki te hahaʼi ia te Folafola ʼa te ʼAtua. (Gaue 8:26-38) ʼE toe feala ke tou maʼu he manatu faka pionie mokā tou hikihiki tatatou poto ʼi te fakaʼaogaʼi ʼo te Tohi-Tapu pea mo ‘fakakaukau ʼaki te Tohi-Tapu.’ (Gaue 17:2, 3) Ohage ko Filipo, ʼe tou kumi ke tou faka mafola te logo lelei ʼi te ʼu potu fuli pe ʼaē ʼe tou maʼu ai te hahaʼi pea ʼi te ʼu faigamālie fuli pe.
5. Koteā ʼaē ʼe feala ke tokoni ki te ʼu mātuʼa Kilisitiano ke nātou fakahū te manatu faka pionie ki tanatou fānau?
5 ʼI Te Loto Fale Pea Mo Te Kokelekasio: Ko te aga pea mo te faʼifaʼitaki ʼa Filipo neʼe ʼi ai tona ʼu fua lelei ki tona ʼu ʼofafine. (Gaue 21:9) ʼO toe feiā pe, ko te ʼu mātuʼa Kilisitiano ʼaē ʼe nātou fakatafito tonatou maʼuli ki te ʼu gāue ʼo te Puleʼaga, ʼe nātou fakaloto mālohiʼi ai tanatou fānau ke nātou mulimuli ki tanatou faʼifaʼitaki. Logola tanatou gaʼegaʼe ʼuhi ko tanatou gāue ʼi te vāhaʼa katoa, kae ko he tāmai peʼe ko he faʼe ʼe faka mafola moʼoni ki te hahaʼi, ʼe feala ke malave fualoa ai ki te loto ʼo he tamasiʼi.—Taag. 22:6.
6. ʼE tou lava fakahā feafeaʼi totatou loto fakafetaʼi ki te kau pionie ʼi tatatou kokelekasio?
6 Neʼe tali kāiga ia Filipo kia Paulo pea mo Luka, ko te ʼu Kilisitiano faʼafai neʼe nā gāue kinakina ʼi te tauhi kia Sehova. (Gaue 21:8, 10) ʼE tou lava fakahā feafeaʼi ia ʼaho nei totatou loto fakafetaʼi pea mo tatatou lagolago kia nātou ʼaē ʼe faʼafai? ʼE lagi feala ke tou kole ke tou gāue mo te kau pionie ʼi he uhu peʼe ko he hili hoʼatā ʼaē ʼe mole hahaʼi ai nātou ʼaē ʼe fai faka mafola. (Filp. 2:4) ʼE feala ke tou fakaafe nātou ki totatou loto fale ke tou lotomālohi ʼi tatatou fakatahi mo nātou. Tatau aipe peʼe koteā totatou ʼaluʼaga, kae ʼofa pe ke tou faiga fuli ʼo maʼu te manatu faka pionie.