ʼE Haʼu Moʼoni Koa Te ʼu Logo Lelei ʼo Te Tohi-Tapu Mai Te ʼAtua?

1. Ko ai ʼaē neʼe haʼu mai ai te Tohi-Tapu?

Ko te logo lelei ʼaē ʼe māʼuʼuli anai te hahaʼi ʼo heʼegata ʼi te kele ʼe tuʼu ʼi te Tohi-Tapu. (Pesalemo 37:29) ʼE faʼufaʼu te Tohi-Tapu ʼaki te ʼu kiʼi tohi liliki e 66. Neʼe fakaʼaoga e te ʼAtua ia te toko 40 hahaʼi agatonu ke natou tohi te Tohi-Tapu. Ko te ʼu ʼuluaki tohi ʼaē e nima neʼe tohi e Moisese kua hili kiai taʼu e 3 500. Pea ko te tohi fakaʼosi neʼe tohi e te ʼapositolo ko Soane kua hili kiai taʼu e 1 900 tupu. Ko te ʼu manatu ʼa ai ʼaē neʼe tohi ʼi te Tohi-Tapu? Neʼe fakaʼaoga e te ʼAtua tona laumālie māʼoniʼoni moʼo felōgoi mo nātou ʼaē neʼe natou tohi te Tohi-Tapu. (2 Samuele 23:2) Neʼe natou tohi te ʼu manatu ʼa te ʼAtua kae mole ko ʼanatou manatu. Koia ʼe ko Sehova ʼaē neʼe haʼu mai ai te Tohi-Tapu.​—Lau ia 2 Timoteo 3:16; 2 Petelo 1:20, 21.

Vakaʼi Te ʼAta Ko Ai Te Tupuʼaga ʼo Te Tohi-Tapu?

2. ʼE tou lava ʼiloʼi feafeaʼi ʼe moʼoni te Tohi-Tapu?

ʼE tou ʼiloʼi ko te Tohi-Tapu ʼe haʼu mai te ʼAtua koteʼuhi ʼe ina fakakikite te ʼu meʼa ʼaē kā hoko ʼi te kā haʼu pea ʼe mole toe hala. ʼE mole feala ki he tagata ke ina lava fai te faʼahi ʼaia. (Sosue 23:14) ʼE gata pē ki he ʼAtua Māfimāfi ʼe ina lavaʼi te sio fakatomuʼa ki te meʼa ʼaē kā hoko ʼi te kā haʼu ʼo te tagata.​—Lau ia Esaia 42:9; 46:10.

ʼE tou ʼamanaki ko he tohi ʼe haʼu mai te ʼAtua ʼe makehe ia, pea ʼe moʼoni te faʼahi ʼaia. Heʼe kua lauʼi miliale te ʼu Tohi-Tapu neʼe tufa ʼi te ʼu lea e lauʼi teau. Pea logopē tona kua ʼāfea, ko te ʼu meʼa ʼaē ʼe talanoa kiai te Tohi-Tapu ʼe ʼalutahi mo te ʼu meʼa ʼaē kua fakamoʼoni kiai te kau popoto lalahi. Pea tahi, neʼe mole fefakafeagaiʼaki te ʼu manatu ʼaē neʼe tohi e te toko 40 kau tagata faitohi ʼo te Tohi-Tapu. Pea ko te Tohi-Tapu ʼe hā ai te ʼofa ʼo te ʼAtua, pea ʼe feala ke ina fetogi te maʼuli ʼo te hahaʼi ke lelei age. Ko te ʼu faʼahi lā ʼaia neʼe tupu ai te tui ʼa te toko lauʼi miliona hahaʼi ko te Tohi-Tapu ʼe ko te Folafola moʼoni ia ʼa te ʼAtua.​—Lau ia 1 Tesalonika 2:13.

Vakaʼi Te ʼAta ʼE Tou Lava Iloʼi Feafeaʼi Ko Te Tohi-Tapu ʼe Moʼoni?

3. Koteā ʼaē ʼe talanoa kiai te Tohi-Tapu?

Ko te Tohi-Tapu ʼe talanoa tāfito ki te ʼu logo lelei ʼaē ʼo ʼuhiga mo te fakatuʼutuʼu ʼofa ʼa te ʼAtua maʼa te tagata. ʼE fakamahino mai ʼi te Tohi-Tapu pe neʼe pulihi feafeaʼi e te tagata ʼi te kamataʼaga tona fealagia ʼaē ke maʼuli ʼi he palatiso ʼi te kele pea mo te toe fakatuʼu anai ʼo te palatiso ʼaia.​—Lau ia Apokalipisi 21:4, 5.

ʼE toe maʼu foki ʼi te Folafola ʼa te ʼAtua te ʼu lao mo te ʼu tokoni. Pea ʼe toe fakamatala foki ʼi te Tohi-Tapu te ʼu felōgoi ʼa te ʼAtua mo te tagata ʼo hā ai te ʼulugaaga ʼo te ʼAtua. Koia ʼe tokoni atu te Tohi-Tapu ke ke ʼiloʼi te ʼAtua. ʼE ina toe fakamahino mai peʼe feafeaʼi hau liliu ko he kaumeʼa ʼo te ʼAtua.​—Lau ia Pesalemo 19:8, 12; Sakopo 2:23; 4:8.

4. ʼE ke lava mahino feafeaʼi ki te Tohi-Tapu?

ʼE feala ke tokoni atu te kaupepa lahi ʼaenī ke ke mahino ki te Tohi-Tapu ʼaki tana fakaʼaogaʼi te faʼahiga faiako ʼa Sesu. Neʼe ina fakaʼaogaʼi tuʼumaʼu te ʼu vaega ʼo te Tohi-Tapu pea mo ina fakamahino tonatou fakaʼuhiga.​—Lau ia Luka 24:27, 45.

Ko te ʼu logo lelei ʼaē ʼe haʼu mai te ʼAtua ʼe taulekaleka ia. Kae ko ʼihi ʼe mole natou tokaga ki te ʼu logo ʼaia, pea ko ʼihi atu ʼe mole natou fia logo kiai. ʼAua naʼa ke lotovaivai. Ko te fealagia ʼaē ke ke maʼu te maʼuli heʼegata ʼe fakalogo ki tau ʼiloʼi te ʼAtua.​—Lau ia Soane 17:3.