Ako 1
ʼE Koutou Lava ʼIloʼi Feafeaʼi Te ʼu Meʼa ʼAē ʼe Fakamaʼua Atu e Te ʼAtua
Koteā te ʼu logo maʼuhiga ʼaē ʼe maʼu ʼi te Tohi-Tapu? (1)
Ko ai ʼaē neʼe ina tohi te Tohi-Tapu? (2)
He koʼe ʼe tonu ke koutou ako te Tohi-Tapu? (3)
1. Ko te Tohi-Tapu ʼe ko te meʼa ʼofa maʼuhiga mai te ʼAtua. ʼE hage ko he tohi mai he tāmai ʼofa ki tana ʼu fānau. ʼE ina tala mai te moʼoni ʼo ʼuhiga mo te ʼAtua—pe ko ai ia ia pea koteā tana ʼu lekula. ʼE ina fakamahino mai peʼe lava feafeaʼi ke tou tauʼi te ʼu fihifihia pea mo maʼu te fiafia moʼoni. ʼE ko te Tohi-Tapu tokotahi pe ʼaē ʼe ina ʼui mai te meʼa ʼaē ʼe tonu ke tou fai ke leleiʼia ai tatou e te ʼAtua.—Pesalemo 1:1-3; Isaia 48:17, 18.
2. Neʼe tohi te Tohi-Tapu e te toko 40 kau tagata kehekehe lolotoga ni ʼu taʼu e 1 600, ʼaē neʼe kamata ʼi te taʼu 1513 ʼi muʼa ʼo totatou temi. ʼE faʼufaʼu te Tohi-Tapu ʼaki te ʼu tohi liliki e 66. Ko nātou ʼaē neʼe nātou tohi te Tohi-Tapu neʼe nātou tohi ʼaki te laumālie ʼo te ʼAtua. Neʼe nātou tohi te ʼu manatu ʼa te ʼAtua, kae mole ko tanatou ʼu manatu fakatagata. Koia, ko te ʼAtua ʼaē ʼe ʼi te lagi, ʼaē neʼe ina tohi te Tohi-Tapu, kae mole ko te ʼu tagata ʼaē ʼe ʼi te kele.—2 Timoteo 3:16, 17; 2 Petelo 1:20, 21.
3. Neʼe tokaga te ʼAtua ke hiki lelei pea mo taupau lelei te Tohi-Tapu. Neʼe lahi age te tā ʼo te Tohi-Tapu ʼi te tahi age ʼu tohi. ʼE mole fiafia anai te hahaʼi fuli ʼi tanatou sisio ʼaē ʼe koutou ako te Tohi-Tapu, kae ʼaua naʼa koutou tuku te faʼahi ʼaia ke ina fakagata takotou ako. Ko tokotou ka haʼu heʼegata ʼe fakalogo ki takotou ako ʼaē ke koutou ʼiloʼi te ʼAtua pea mo koutou fai ia tona finegalo logope te ʼu fakafeagai.—Mateo 5:10-12; Soane 17:3.