Ako 2

Ko Ai Te ʼAtua?

Ko ai te ʼAtua moʼoni, pea ko ai tona huafa? (1, 2)

E feafeaʼi tona sino? (3)

Koteā tona ʼu kalitate maʼuhiga? (4)

ʼE feala koa ke tou fakaʼaogaʼi he ʼu paki pea mo he ʼu fakatātā ʼi tatatou tauhi ʼaē kia te ia? (5)

Koteā te ʼu faʼahi e lua ʼaē ʼe feala ai ke tou ako ʼo ʼuhiga mo te ʼAtua? (6)

1. ʼE lahi te ʼu meʼa ʼe tauhi kiai te hahaʼi. Kae ʼe ʼui mai e te Tohi-Tapu ʼe ko te ʼAtua MOʼONI pe e tahi. Neʼe ina fakatupu ia meʼa fuli ʼi te lagi pea mo te kele. ʼE ko Ia tokotahi pe ʼaē ʼe tonu ke tou tauhi ki ai, he ko ia ʼaē neʼe ina foaki mai te maʼuli.​—⁠1 Kolonito 8:​5, 6; Fakahā 4:⁠11.

2. ʼE lahi te ʼu higoa faka tuʼulaga ʼe maʼu e te ʼAtua, kae ʼe ko tona huafa pe e tahi. Ko te huafa ʼaia ʼe ko SEHOVA. ʼE lahi te ʼu Tohi-Tapu, neʼe molehi ai te huafa ʼo te ʼAtua pe neʼe fetogi ʼaki te ʼu higoa faka tuʼulaga ʼALIKI peʼe ʼATUA. Kae ʼi te temi ʼaē neʼe tohi ai te Tohi-Tapu, ko te huafa ʼo Sehova neʼe hā tuʼa 7 000 ai!​—⁠Ekesote 3:15; Pesalemo 83:18.

3. Ko Sehova ʼe ʼi ai tona sino, kae ʼe mole tatau tona sino ohage ko tatou. ʼE ʼui fēnei e te Tohi-Tapu: “Ko te ʼAtua ʼe Laumālie.” (Soane 4:24) Ko te laumālie ʼe ko he faʼahiga maʼuli ʼe lahi age ʼi totatou maʼuli. ʼE mole heʼeki sio he tahi ki te ʼAtua. ʼE maʼuli Sehova ʼi te lagi, kae ʼe feala pe ke sio kia meʼa fuli. (Pesalemo 11:​4, 5; Soane 1:18) Kae, koteā koa te laumālie maʼoniʼoni? ʼE mole ko he tahi ia ohage ko te ʼAtua. Kae, ko te mālohi gāue ʼo te ʼAtua.​—⁠Pesalemo 104:⁠30.

4. ʼE fakahā mai e te Tohi-Tapu kia tatou te ʼulugaaga ʼo Sehova. ʼE ina fakahā mai tona ʼu kalitate maʼuhiga ʼaē ko te ʼofa, te faitotonu, te poto, pea mo te mālohi. (Teutalonome 32:4; Sopo 12:13; Isaia 40:26; 1 Soane 4:⁠8) ʼE toe ʼui mai pe foki e te Tohi-Tapu ko Sehova ʼe loto manavaʼofa, agalelei, loto fakamolemole, agaʼofa, pea mo loto faʼa kātaki. Ko tatou, ohage ko he ʼu fānau fakalogo, ʼe tonu ke tou faigaʼi ke tou faʼifaʼitakiʼi ia ia.​—⁠Efesi 5:​1, 2.

5. ʼE tonu koa ke tou tulolo peʼe tou faikole ia muʼa ʼo he ʼu paki, peʼe ko he ʼu fakatātā ʼi tatatou tauhi? Kailoa! (Ekesote 20:​4, 5) ʼE ʼui e Sehova ʼe tonu ke tou tauhi ʼāteaina pe kia te ia. ʼE mole ina vaevae anai tona kolōlia mo he tahi kehe age peʼe ko he tahi age meʼa. ʼE mole he mālohi ʼo te ʼu paki moʼo tokoni mai kia tatou.​—⁠Pesalemo 115:​4-8; Isaia 42:8.

6. ʼE lava feafeaʼi hatatou ʼiloʼi lelei age te ʼAtua? Ko te ʼuluaki faʼahi, ko te sioʼi ʼo te ʼu meʼa ʼaē neʼe ina fakatupu pea mo metitasio lelei ki te ʼu meʼa ʼaē ʼe tou ako mai ai. Ko te ʼu meʼa ʼaē neʼe fakatupu e te ʼAtua, ʼe nātou fakahā mai kia tatou ʼe ina maʼu te mālohi lahi pea mo te poto lahi. ʼE tou sio ki tona ʼofa ʼi te ʼu meʼa fuli ʼaē neʼe ina fai. (Pesalemo 19:​1-6; Loma 1:20) Ko te tahi faʼahiga fai moʼo ʼiloʼi ʼo te ʼAtua ʼe ko te akoʼi ʼo te Tohi-Tapu. ʼE lahi te palalau ʼa te Tohi-Tapu ʼo ʼuhiga mo te faʼahiga ʼAtua ʼaē ko Sehova. ʼE ina toe fakahā mai foki pe koteā tana ʼu fakatuʼutuʼu pea mo te ʼu meʼa ʼaē ʼe ina loto ke tou fai.​—⁠Amosi 3:7; 2 Timoteo 3:​16, 17.

[Paki ʼo te pasina 5]

ʼE tou ako ʼo ʼuhiga mo te ʼAtua mai te ʼu meʼa ʼaē neʼe ina fakatupu pea mo te Tohi-Tapu