Koteā Te ʼAmanaki Kiā Nātou ʼAē Kua Mamate?

1. Koteā te logo lelei ʼo ʼuhiga mo nātou ʼaē kua mamate?

ʼI te tau atu ʼa Sesu ki Petania, ʼaē ʼe ovi ki Selusalemi, kua ʼosi ʼaho e fā ki te mate ʼo tona kaumeʼa ko Lasalo. Neʼe ʼalu ia Sesu ki te tānuma mo Maleta pea mo Malia, te ʼu tuagaʼane ʼo te mate. Mole tuai pea fakatahitahi te hahaʼi kaugamālie. Fakakaukauʼi age muʼa ki te fiafia ʼaē ʼo Maleta pea mo Malia ʼi te toe fakatuʼuake ʼaē e Sesu ia Lasalo ki te maʼuli.​—Lau ia Soane 11:21-24, 38-44.

Neʼe kua ʼiloʼi e Maleta ia te logo lelei ʼo ʼuhiga mo nātou ʼaē kua mamate. Neʼe kua ina ʼiloʼi ko Sehova ʼe ina toe fakatuʼuake anai ki te maʼuli ʼi te kele ia nātou ʼaē kua mamate.​—Lau ia Sopo 14:14, 15.

2. Koteā te ʼaluʼaga ʼo nātou ʼaē kua mamate?

Neʼe faʼu te tagata ʼaki te efu ʼo te kele. (Senesi 3:19) ʼE mole ko tātou ko he ʼu laumālie ʼe māʼuʼuli ʼi he ʼu sino kakano. Ko tātou ko te ʼu sino ʼe kakano, ʼe mole hotatou faʼahi ʼe hoko atu tona maʼuli mokā tou ʼosi mamate. Kā tou mamate, pea ʼe mate ai mo totatou ʼuto pea ʼe gata ai mo ʼatatou fakakaukau. Koia, neʼe mole talanoa ai Lasalo ki he meʼa ʼo ʼuhiga mo te temi ʼaē neʼe nofo ai ʼi te mate koteʼuhi he neʼe mole kei ina ʼiloʼi he meʼa.​—Lau ia Pesalemo 146:4; Ekelesiasi 9:5, 6, 10.

ʼE fakamamahiʼi koa e te ʼAtua ʼi he afi te hahaʼi ʼaē kua mamate? Mai tona ʼaluʼaga ʼaē ʼe fakahā mai ʼi te Tohi-Tapu ʼe mole kei ʼiloʼi he meʼa e nātou ʼaē kua mamate, ko te akonaki ʼaē ki te ʼifeli kakaha ʼe hala pea ʼe fasituʼu ki te ʼAtua. Ko te manatu ʼaē ki te fakamamahiʼi ʼo te hahaʼi ʼi he afi ʼe fakalialia kiai te ʼAtua.​—Lau ia Selemia 7:31.

Vakaʼi Te ʼAta ʼE Feafeaʼi Te Aluʼaga ʼo Te Kau Mate?

3. ʼE feala koa ke palalau mai ia nātou ʼaē kua mamate?

ʼE mole feala kiā nātou ʼaē kua mamate ke natou palalau pea mo logo. (Pesalemo 115:17) Kae ʼe ʼi ai te kau ʼāselo agakovi ʼe feala ke natou palalau ki te hahaʼi ke natou ʼui ko te ʼu mate ʼaē ʼe palalau age kiā nātou. (2 Petelo 2:4) ʼE tapuʼi mai kiā tātou e Sehova te faiga ʼaē ke tou palalau mo te ʼu mate.​—Lau ia Tetelonome 18:10, 11.

4. Ko ai ʼaē kā toe fakatuʼuake mai te mate?

Ko te toko lauʼi miliona hahaʼi kua mamate ʼe natou toe tutuʼuake anai ki te maʼuli ʼi te kele. Māʼia mo nātou ʼaē neʼe mole natou ʼiloʼi te ʼAtua pea mo natou fai te ʼu meʼa ʼaē ʼe kovi ʼe toe fakatuʼuake anai mo nātou.​—Lau ia Pesalemo 37:29; Gaue 24:15.

ʼE feala anai kiā nātou ʼaē kā toe fakatuʼuake ke natou ako te moʼoni ʼo ʼuhiga mo te ʼAtua pea mo natou fakahā tanatou tui kiā Sesu ʼaki tanatou fakalogo kiā te ia. (Apokalipisi 20:11-13) Ko nātou ʼaē kā toe fakatuʼuake ki te maʼuli pea mo natou fai te ʼu meʼa ʼaē ʼe lelei, ʼe natou māʼuʼuli fiafia anai ʼo talu ai ʼi te kele.​—Lau ia Soane 5:28, 29.

5. Koteā ʼaē ʼe fakahā mai e te toe fakatuʼuake ʼo ʼuhiga mo Sehova?

Neʼe fakafealagia e te ʼAtua ke toe fakamaʼuli mai ia nātou ʼaē kua mamate, ʼaki tana fekauʼi mai tona ʼAlo ke haʼu ʼo mate maʼa tātou. ʼE fakahā mai e te toe fakatuʼuake ia te ʼofa makehe ʼaē ʼo Sehova kiā tātou. Kā toe fakatuʼuake anai iā nātou ʼaē kua mamate, ko ai ʼaē kā ke toe fia sio tāfito anai ki ai?​—Lau ia Soane 3:16; Loma 6:23.