Kotea takotou manatu ʼo ʼuhiga mo te Tohi-Tapu?

ʼE UI ʼI TE TOHI-TAPU

“Ko te Tohi-Tapu katoa ʼe haʼu mai te ʼAtua.”—2 Timoteo 3:16, Traduction du monde nouveau.

TONA FAKAʼUHIGA KIA KOUTOU

ʼE tali ki he ʼu fehuʼi maʼuhiga ʼo ʼuhiga mo te maʼuli.—Taaga Lea 2:1-5.

ʼE ina foaki he takitaki ʼe tuha mo te falala.—Pesalemo 119:105

ʼE ina foaki he ʼamanaki moʼoni ki te ka haʼu.—Loma 15:4.

ʼE FEALA KOA KE TOU TUI KI TE TOHI-TAPU?

ʼEi, pea ko ʼona tupuʼaga ʼe tolu:

• Te alu tahi ʼo te ʼu manatu. Neʼe tohi te Tohi-Tapu e te ʼu tagata ʼe toko 40 lolotoga ni taʼu ʼe 1 600. Tokolahi ia natou neʼe mole natou maʼuʼuli tahi. ʼE toe alu tahi te ʼu manatu ʼo te tohi katoa koteʼuhi ʼe talanoa ki te manatu tafitō ʼe tahi.

• Te fakamatala ʼo te hisitolia ʼe tuha mo te falala. ʼI te agamahani, ko te kau tagata faihisitolia ʼe mole natou talanoa ki te ʼu tau ʼae neʼe mole malo ai ʼanatou hahaʼi. Kaʼe ko te kau tagata faitohi ʼo te Tohi-Tapu neʼe natou fakamatala ʼanatou hala pea mo ʼae ʼo ʼanatou hahaʼi.—2 Koloniko 36:15, 16; Pesalemo 51:3-6.

• Te ʼu lea fakakikite ʼe tuha mo te falala. Neʼe fakakikite ʼi te Tohi-Tapu ia te fakaʼauha ʼo te kolo ʼafeā ʼo Papilone ia taʼu ʼe 200 ki muʼa atu. (Esaia 13:17-22) Neʼe mole gata ʼaki pe tana fakamatala te agaaga ʼo te fakaʼauha ʼo Papilone kaʼe neʼe ina toe fakaha mo te higoa ʼo te tagata ʼae neʼe ina ʼohofi.—Esaia 45:1-3.

Neʼe toe lahi te tahi ʼu lea fakakikite ʼi te Tohi-Tapu neʼe fakahoko katoa feia. Kaʼe, ʼe mole koa la ko te aluʼaga ʼaia ʼae ʼe tou ʼamanaki ki ai ʼo ʼuhiga mo te Folafola ʼa te ʼAtua?—2 Petelo 1:21.