Ko ai te pule ʼo te malamanei?

ʼE UI ʼI TE TOHI-TAPU

“ ʼE puleʼi e te Kovi te malamanei katoa.”​—1 Soane 5:19, Bible en français courant.

“Nee ha mai te Alo o te Atua, o tupu ke maumaui te u gaue a te tiapolo.”​—1 Soane 3:8.

TONA FAKAʼUHIGA KIA KOUTOU

Te tupuʼaga ʼaia ʼo te ʼu fihifihia ʼo te malamanei.​—Apokalipisi 12:12.

Te tupuʼaga ʼaia ʼo te tui papau ʼae ʼe fetogi anai te malamanei ke lelei age.​—1 Soane 2:17.

ʼE FEALA KOA KE TOU TUI KI TE TOHI-TAPU?

ʼEi, pea ko ʼona tupuʼaga ʼe tolu:

• ʼE pulihi anai te takitaki ʼa Satana. Kua fakatuʼutuʼu e Sehova ʼe ina fakagata anai te takitaki ʼa Satana ia te malamanei. ʼE ina fakapapau mai ʼe ina “maumauʼi” anai te Tevolo, pea mo ina pulihi katoa te ʼu fua kovi ʼo tana takitaki.​—Hepeleo 2:14, Traduction du monde nouveau.

• Neʼe filifili e te ʼAtua ia Sesu Kilisito ke ina puleʼi te kele. ʼE kehekehe ia mo te pule agakovi ʼo te malama ʼaeni. ʼE fakapapau fenei mai e te ʼAtua ʼo ʼuhiga mo te takitaki ʼa Sesu: “E ofa anai ia ia i te gaegae mo te masiva . . . E ina fakaateainai anai natou i te kaka mo te fakamalohi.”​—Pesalemo 72:13, 14.

• ʼE mole loi te ʼAtua. ʼE ui fakahagatonu fenei ʼi te Tohi-Tapu: “E mole feala ke loi . . . te ʼAtua.” (Hepeleo 6:18) Ka fakapapau e Sehova he meʼa ke ina fai, pea ʼe hage pe ia kua ʼosi hoko! (Esaia 55:10, 11) “E li anai te pule o te malama aeni ki fafo.”​—Soane 12:31.