Neʼe Tui Ia Laape Kia Sehova

Neʼe hoko ia te hisitolia ʼaeni ʼi te kolo ko Seliko. Neʼe tuʼu te kolo ʼaia ʼi te fenua ko Kanaane, pea neʼe mole tui te hahaʼi ʼo te kolo ʼaia kia Sehova. Neʼe toe maʼuli ai mo te fafine ko Laape.

ʼI te kei veliveli ʼa Laape, neʼe logo ki te ʼu fakamatala ʼo ʼuhiga mo te vaeluaʼi e Moisese ia te Tai Kula pea mo tana fakamavae ia te kau Iselaele mai Esipito. Neʼe toe logo ʼo ʼuhiga mo te tokoni ʼa Sehova kia natou ke natou malo ʼi tanatou tauʼi ʼonatou fili. Pea neʼe logo leva kua nonofo ovi age ia te kau Iselaele ki Seliko.

ʼI te tahi po, neʼe olo fakafufu ia te ʼu Iselaele ʼe tokolua ʼo vakavakaʼi ia te kolo ko Seliko. Neʼe nā olo ki te ʼapi ʼo Laape. Neʼe ina fakaafe naua ke nā nonofo ai. ʼI te poʼuli, neʼe iloʼi e te hau ʼo Seliko neʼe olo age te ʼu tagata fakafufu pea kei nā nonofo ʼi te ʼapi ʼo Laape. Neʼe fekauʼi ai e te hau he ʼu tagata faifekau ke natou olo ʼo puke mai naua. Neʼe fakanono e Laape ia te ʼu tagata ʼaia e tokolua ʼi te ʼato ʼo tona ʼapi pea mo ina ui ki te ʼu tagata ʼa te hau: ‘Neʼe ʼomai ki heni te ʼu tagata fakafufu kaʼe kua nā toe mavae ʼi te kolo. Kapau ʼe kotou fakavilivili pea ʼe kotou puke anai naua.’ ʼE ke iloʼi pe ko ʼe neʼe puipui e Laape ia te ʼu tagata fakafufu ʼaia?— Koteʼuhi neʼe tui kia Sehova pea neʼe ina iloʼi ʼe ina foaki anai te fenua ʼo Kanaane ki te kau Iselaele.

ʼI muʼa ʼo te mavae ʼa te ʼu tagata fakafufu mai te ʼapi ʼo Laape, neʼe nā fakapapau age ʼe haofaki anai ia ia pea mo tona famili ʼi te temi ʼae ka maumauʼi ai ia Seliko. ʼE ke iloʼi pe kotea ʼae neʼe nā kole age ke ina fai?— Neʼe nā ui age: ‘Toʼo te maea kula ʼaeni pea ke tautau ki tou matapa fakamalama. Kapau ʼe ke fai ia te faʼahi ʼaia, ko natou fuli ʼae ka nonofo ʼi tou ʼapi ʼe haofaki anai natou.’ Neʼe mulimuli lelei ia Laape ki te ʼu meʼa ʼae neʼe ui age e te ʼu tagata fakafufu. ʼE ke iloʼi pe kotea ʼae neʼe hoko ki muli age?—

Mole fualoa ki muli age, neʼe foli fakalogologo e te kau Iselaele ia te kolo. Lolotoga ʼaho ʼe ono ia tanatou foli ʼaia, ʼo tuʼa tahi ʼi te ʼaho. Kaʼe ʼi te fitu ʼaho leva, neʼe natou foli tuʼa fitu ia te kolo. Hili ʼaia, pea natou kalaga leʼo lahi leva. Neʼe haga Sehova ʼo holoʼi ifo te ʼu kaupa ʼo te kolo. Kaʼe neʼe kei tuʼu pe te ʼapi ʼae neʼe tautau ai ia te maea kula ʼi te matapa fakamalama. E ke sio ki ai ʼi te pakī?— Neʼe haofaki ia Laape pea mo tona famili.

Kotea te ako ʼe feala ke ke maʼu mai ia Laape?— Neʼe tui ia Laape kia Sehova koteʼuhi neʼe logo ki te ʼu gaue maʼuhiga neʼe fai e Sehova. Mo koe la, kua ke iloʼi he ʼu gaue maʼuhiga neʼe fai e Sehova. ʼE ke tui koa kia Sehova ohage ko Laape?— ʼE mahino ia.