Neʼe Haga Fai Pe e Samuele Te Meʼa ʼAe ʼe Lelei

Talu mai te kei veliveli ʼa Samuele mo tana maʼuli pea mo gaue ʼi te tapenakulo, te fale ʼae neʼe tauhi ai te hahaʼi kia Sehova. ʼE ke iloʼi te tupuʼaga ʼo te maʼuli ʼa Samuele ʼi te tapenakulo? Ta vakaʼi muʼa te faʼahi ʼo ʼuhiga mo te faʼe ʼa Samuele, ia Ana.

Lolotoga he temi loaloaga, neʼe mole feala ke maʼu e Ana hana tamasiʼi, logo la tana fakaʼamu ki ai. Koia neʼe faikole ai kia Sehova pea mo kole mamahi ke tokoni age. Neʼe ina fai te fakapapau ʼae, kapau ʼe maʼu hana tama, pea ʼe ina ʼave anai ke maʼuli pea mo gaue ʼi te tapenakulo. Neʼe tali e Sehova ia tana faikole pea neʼe maʼu leva tana tama. Neʼe ina fakahigoa ko Samuele. Pea ohage pe ko tana fakapapau, ʼi te taʼu tolu peʼe fa ʼo Samuele, neʼe ʼave e Ana ia ia ki te tapenakulo ke tauhi ai ki te ʼAtua.

Ko Eli neʼe ko te pelepitelo lahi ʼo te tapenakulo. Neʼe toe gaue ai mo ʼona foha ʼe lua. ʼE ke manatuʼi ko te tapenakulo neʼe ko te fale ʼae neʼe tauhi ai te hahaʼi kia Sehova pea ko natou ʼae neʼe gaue ai neʼe tonu ke natou fai he ʼu aga ʼe lelei. Kaʼe ko te ʼu foha ʼo Eli, neʼe nā fai te ʼu aga ʼe kovi. Neʼe sio ki ai ia Samuele. Neʼe fai koa e Samuele te ʼu aga ʼae ʼe kovi ohage ko te ʼu foha ʼo Eli?— Kailoa ia, neʼe ina haga fai pe ia te meʼa ʼae ʼe lelei, ohage ko tona akoʼi age ʼe ʼana matuʼā.

ʼI tau manatu la, kotea ʼae neʼe tonu ke fai e Eli ki ʼona foha?— Neʼe tonu ke ina fakatuʼa naua. Neʼe tonu ke ina fakagata tanā gaue ʼi te fale ʼo te ʼAtua. Kaʼe neʼe mole fai e Eli ia te faʼahi ʼaia, koia neʼe ita ai ia Sehova kia ia pea mo ʼona foha. Neʼe fakatuʼutuʼu ai e Sehova ke ina tauteaʼi natou.

ʼI te tahi po, ʼi te lolotoga moe ʼa Samuele, neʼe logo ki he tahi ʼe pauʼi age: ‘Samuele!’ Neʼe lele atu kia Eli kaʼe neʼe ui age e Eli: ‘Neʼe mole au pauʼi koe.’ Neʼe toe pauʼi tuʼa lua. ʼI tona tuʼa tolu leva, neʼe ui e Eli kia Samuele kapau ʼe toe logo ki tona pauʼi, ʼe tonu ke ina tali: ‘Palalau Sehova, ʼe au fakalogo atu.’ Pea neʼe fai e Samuele ia te faʼahi ʼaia. Neʼe ui age e Sehova kia Samuele: ‘Ke ke fakaha kia Eli, ʼe au tautea anai tona loto fale ʼuhi ko te ʼu aga ʼae ʼe kovi ʼe natou fai.’ ʼI tau manatu la, neʼe faigafua koa kia Samuele ia tana fakaha ia te logo ʼaia kia Eli?— Kailoa ia. Logo la te mataku ʼa Samuele, neʼe ina fai pe te meʼa ʼae neʼe fakatotonu age e Sehova. Pea neʼe hoko te ʼu palalau ʼa Sehova. Neʼe tamateʼi te ʼu foha ʼo Eli, pea toe mate mo Eli.

ʼE ko he faʼifaʼitaki lelei neʼe tuku mai e Samuele. Neʼe ina haga fai pe ia te meʼa ʼae ʼe lelei logo la tana sio ki te fai e te hahaʼi ia te ʼu meʼa ʼae ʼe kovi. Kaʼe feafeaʼi ia koe? ʼE ke fia hage koa ko Samuele pea mo ke haga fai ia te meʼa ʼae ʼe lelei? Kapau ʼe ke fai feia, ʼe ke fakafiafiaʼi anai te loto ʼo Sehova pea mo ʼae ʼo ʼau matuʼā.