Neʼe Fakalogo Tuʼumaʼu Ia Sesu

ʼE faigafua tuʼumaʼu koa ia tau fakalogo ki ʼau matuʼā?— ʼI ʼihi temi ʼe faigataʼa. ʼE ke iloʼi koa la neʼe fakalogo ia Sesu kia Sehova pea mo ʼana matuʼā?— ʼE lava tokoni atu tana faʼifaʼitaki ke ke fakalogo ki ʼau matuʼā, tatau aipe pe ʼe faigataʼa. Ta vakaʼi he tahi age ʼu faʼahi.

ʼI muʼa ʼo te haʼu ʼa Sesu ki te kele, neʼe maʼuli ia ʼi selo mo tana Tamai, ia Sehova. Kaʼe neʼe toe ʼi ai foki mo ʼana matuʼā ʼi te kele. Neʼe nā higoa ko Sosefo mo Malia. ʼE ke iloʼi pe neʼe nā liliu feafeaʼi ko ʼana matuʼā?—

Neʼe tuku ifo e Sehova te maʼuli ʼo Sesu ki te loto fatu ʼo Malia ke tupu tagata ai pea mo maʼuli ʼi te kele. Neʼe ko he milakulo ia! Neʼe tuputupu ia Sesu ʼi te fatu ʼo Malia ohage pe ko te tamaliki fuli. Hili teitei mahina ʼe hiva pea neʼe tupu ake leva ia Sesu. Neʼe liliu ai ia Malia mo Sosefo ko te ʼu matuʼā ʼa Sesu ʼi te kele.

ʼI te taʼu 12 ʼo Sesu, neʼe ina fai ia te meʼa neʼe ha ai tona toe ʼofa lahi ki tana Tamai, ia Sehova. Neʼe hoko te aluʼaga ʼaia ʼi te temi ʼae neʼe faifagona ai ia Sesu mo tona famili ki Selusalemi ki te Pasikate. ʼI tanatou toe liliu ki tonatou ʼapi, neʼe mole maʼu e Sosefo mo Malia ia Sesu. ʼE ke iloʼi pe neʼe ʼifea?—

Neʼe toe liliu fakavilivili ia Sosefo mo Malia ki Selusalemi ʼo kumi ia Sesu. Neʼe nā tuʼania lahi he neʼe mole nā maʼu ia ia. Kaʼe hili ʼaho ʼe tolu, neʼe nā maʼu atu ia ia ʼi te fale lotu. ʼE ke iloʼi pe ko ʼe neʼe nofo ia Sesu ʼi te fale lotu?— He neʼe feala ai ke ina ako ʼo ʼuhiga mo tana Tamai, ia Sehova. Neʼe ʼofa kia Sehova pea neʼe ina fia iloʼi pe feafeaʼi hana fakafiafiaʼi ia ia. Maʼia mo tana kua lahi, neʼe fakalogo tuʼumaʼu ia Sesu kia Sehova. Neʼe hoko atu aipe tana fakalogo tatau aipe peʼe faigataʼa pea mo mamahi ai. Neʼe toe fakalogo koa ia Sesu kia Sosefo mo Malia?— ʼEi, ʼe ui ʼi te Tohi-Tapu neʼe fakalogo ia.

Kotea te ako ʼe feala ke ke maʼu mai te faʼifaʼitaki ʼo Sesu?— ʼE tonu ke ke fakalogo ki ʼau matuʼā tatau aipe pe ʼe faigataʼa. ʼE ke fai anai te faʼahi ʼaia?—