Neʼe Natou Faitohi ʼo ʼUhiga Mo Sesu

ʼE ke sio ki te ʼu tagata ʼae ʼe tuʼu ʼi te pakī?— ʼE ko Mateo, mo Maleko, mo Luka, mo Soane, mo Petelo, mo Sakopo, mo Suta pea mo Paulo. Ko te ʼu tagata ʼaeni, neʼe natou maʼuʼuli fuli ʼi te temi ʼo Sesu. Pea neʼe natou tohi te maʼuli ʼo Sesu. Ta vakaʼi he tahi ʼu faʼahi ʼo ʼuhiga mo natou ʼaia.

Ko te ʼu tagata ʼe tokotolu ia natou ʼaia neʼe ko te ʼu apositolo pea neʼe natou faifakamafola mo Sesu. ʼE ke iloʼi peʼe ko ai te tokotolu ʼaia?— Ko Mateo, mo Soane pea mo Petelo. Ko te ʼu apositolo ko Mateo pea mo Soane neʼe nā iloʼi lelei ia Sesu pea neʼe nā tahi fai tana tohi ʼo ʼuhiga mo te maʼuli ʼo Sesu. Neʼe toe fai e te apositolo ko Soane te tohi ʼe higoa ko Apokalipisi pea mo te ʼu tohi ʼe tolu ʼe higoa ko Uluaki tohi a Soane, mo Lua tohi a Soane pea mo Tolu tohi a Soane. Neʼe fai e te apositolo ko Petelo te ʼu tohi ʼe lua, ʼe maʼu ʼi te Tohi-Tapu. ʼE higoa ko te Uluaki tohi a Petelo mo te Lua tohi a Petelo. ʼI tana lua tohi, neʼe fakamatala e Petelo te lakaga ʼae neʼe palalau ai Sehova mai te lagi ʼo ina ui ʼo ʼuhiga mo Sesu: ‘Ko ia ʼaeni ko toku ʼAlo. ʼE au ʼofa ʼi ai pea mo au fiafia ki ai.’

Ko te tahi ʼu tagata ʼae ʼe tuʼu ʼi te pakī, ʼe natou toe fakaha mai he ʼu faʼahi ʼo ʼuhiga mo Sesu ʼi te ʼu tohi ʼae neʼe natou fai. ʼE kau ia natou ʼaia ia Maleko. Neʼe lagi sio ki te puke ʼo Sesu pea mo te ʼu meʼa fuli ʼae neʼe hoko. Ko te tahi tagata ʼe ko Luka. Neʼe toketa pea neʼe lagi tui kia Sesu ʼi te kua ʼosi mate ʼa Sesu.

Ko te tahi age ʼu tagata faitohi ʼe lua ʼo te Tohi-Tapu ʼae ʼe ke sio ki ai ʼi te pakī neʼe ko te ʼu tehina liliki ʼo Sesu. ʼE ke iloʼi ʼonā higoa?— Neʼe nā higoa ko Sakopo pea mo Suta. ʼI te kamata, neʼe mole nā tui kia Sesu. Neʼe nā manatu kua vale ia. Kaʼe ki muli age, neʼe nā tui leva kia Sesu pea mo mulimuli ia te ia.

Ko te tahi tagata faitohi ʼo te Tohi-Tapu ʼae ʼe ke sio ki ai ʼi te pakī ʼe ko Paulo. ʼI muʼa atu ʼo tana liliu ʼo tui kia Kilisito, neʼe higoa ko Saulo. Neʼe fehiʼa ki te hahaʼi ʼae neʼe tui kia Sesu pea neʼe ina gaohi koviʼi natou. ʼE ke iloʼi la pe neʼe liliu feafeaʼi ia Paulo ʼo tui kia Kilisito?— ʼI te tahi ʼaho, ʼi te lolotoga faifagona ʼa Paulo, neʼe fokifa pe neʼe logo ki te leʼo mai te lagi. Neʼe ko Sesu. Neʼe ina fehuʼi kia Paulo: ‘He ko ʼe ʼe ke gaohi koviʼi feia natou ʼae ʼe tui kia te au?’ Hili ʼaia, neʼe fetogi leva ia Paulo pea neʼe liliu ai ʼo tui kia Kilisito. Neʼe fai e Paulo te ʼu tohi ʼe 14 ʼo te Tohi-Tapu, mai te tohi ʼo Loma kia Hepeleo.

ʼE tou lau koa ia te Tohi-Tapu ʼi te ʼaho fuli peʼe kailoa?— ʼAki tatatou lau te Tohi-Tapu, ʼe lahi te ʼu faʼahi ʼe tou ako ʼo ʼuhiga mo Sesu. ʼE ke fia mahino lahi koa ʼo ʼuhiga mo Sesu?—