Neʼe Ina Pauʼi Ia Mateo

Neʼe nofo ia Sesu ʼi te ʼu tafaʼaki ʼo Kapenaume ʼe ovi ki te Tai ʼo Kalilea. Neʼe nofo ai lolotoga he kiʼi temi nounou hili tana fakamalolo ia te tagata palalisia. Neʼe toe ʼomai ia te hahaʼi kia te ia, pea neʼe ina kamata akoʼi leva ia natou. ʼI tana fakalaka ʼi te fale ʼo te ʼu tukuhau, neʼe sio ia Sesu ki te tagata neʼe higoa ko Mateo peʼe ko Levi neʼe heka ai. Neʼe fakaafe ia ia e Sesu ʼo ina ui fenei age: “Muli mai ia te au.”—Mateo 9:9.

Neʼe lagi iloʼi e Mateo ia te ʼu akonaki ʼa Sesu mo te ʼu milakulo ʼae neʼe ina fai ʼi Kapenaume mo ʼona tafaʼaki, ohage pe ko Petelo, mo Atelea, mo Sakopo pea mo Soane. Neʼe tali atu aipe e Mateo ohage ko natou. Pea neʼe ina fakaha te faʼahi ʼaia ʼi tana Evaselio, ʼi tana tohi fenei: “Neʼe tuʼu ake aipe [ia Mateo] pea ina muliʼi” ia Sesu. (Mateo 9:9) Koia, neʼe tuku e Mateo ʼona maʼua ʼi tona ʼuhiga tanaki tukuhau kaʼe liliu leva ko he tisipulo ʼa Sesu.

Ki muli age, lagi moʼo fakaha tana leleiʼia te fakaafe makehe ʼae neʼe fai age e Sesu, neʼe fai e Mateo ia he toe kaitahi ʼi tona ʼapi. ʼO mole gata pe kia Sesu mo ʼana tisipulo, ko ai ʼihi ʼae neʼe fakaafe? Neʼe ʼi ai te ʼu kaugā gaue ʼo Mateo, neʼe ko he kau tanaki tukuhau. Neʼe natou tanaki te ʼu tukuhau maʼa te kau takitaki ʼo Loma ʼae neʼe fehiʼaʼinaʼi e te kau Sutea. Ohage la neʼe natou tanaki te ʼu tukuhau mai te ʼu vaka ʼae ʼe ʼomai ʼo tau ʼi te ’u ʼuafu, mo te ʼu tukuhau mai te hahaʼi ʼae neʼe feoloʼaki ʼi te ʼu ala lalahi pea mo te ʼu tukuhau mai te ʼu koloa ʼae neʼe ʼaumai mai te tahi ʼu puleʼaga. Neʼe kotea te manatu ʼa te kau Sutea ʼo ʼuhiga mo te kau tanaki tukuhau? Neʼe natou fehihiʼa ia natou koteʼuhi neʼe natou aga fakakaka ʼo natou fakamaʼua ke laka age te meʼa ʼae neʼe tonu ke totogi e te hahaʼi. Neʼe toe ʼi ai foki mo te kau agahala ʼi te kaitahi, ia natou ʼae neʼe mole alu tahi ʼonatou maʼuli mo te lao ʼa te ʼAtua.—Luka 7:37-39.

Neʼe manatu te kau Faliseo ko natou pe ia ʼe faitotonu pea ʼi tanatou sisio ki te fakatahi ʼa Sesu mo te ʼu hahaʼi ʼaia ʼi te kaitahi, neʼe natou fehuʼi fenei age ki ʼana tisipulo: “He koʼe ʼe kai fakatahi takotou faiako mo te kau tanaki tukuhau pea mo te kau agahala?” (Mateo 9:11) ʼI te logo ʼa Sesu ki te faʼahi ʼaia, neʼe ina tali fenei age kia natou: “ ʼE mole ko te hahaʼi malolohi ʼae ʼe ʼaoga ki ai he toketa, kaʼe ko natou ʼae ʼe mahahaki. Koia, kotou olo pea kotou ako te fakaʼuhiga ʼo te folafola ʼaeni: ‘ ʼE au loto ki te manavaʼofa kaʼe mole ki te sakilifisio.’ Koteʼuhi neʼe mole au haʼu ʼo pauʼi te kau faitotonu, kaʼe ko te kau agahala.” (Mateo 9:12, 13; Oseo 6:6) Neʼe mole fakamalotoloto te kau Faliseo moka natou fakahigoaʼi ia Sesu “faiako,” kaʼe neʼe feala pe ke natou taʼofi he ako mai ia te ia ʼo ʼuhiga mo te faitotonu.

Neʼe lagi fakaafe e Mateo te kau tanaki tukuhau pea mo te kau agahala ki tona ʼapi, ke natou fagono kia Sesu pea ke fakamalolo natou ʼi te faʼahi fakalaumalie. Koia “neʼe natou mulimuli ia te ia.” (Maleko 2:15) Neʼe fia tokoni ia Sesu kia natou ke natou maʼu ia he ʼu felogoʼi lelei mo te ʼAtua. Neʼe mole hage ia Sesu ko te kau Faliseo, ʼo fehiʼa kia natou ʼaia. Neʼe lotomanavaʼofa ia Sesu, pea neʼe hage ko he toketa maʼa natou fuli ʼae ʼe mahahaki ’i te faʼahi fakalaumalie.

Logo la tana lotomanavaʼofa ki te kau tanaki tukuhau mo te kau agahala, kaʼe ʼe mole fakaʼuhiga leva neʼe tali e Sesu ʼanatou agahala. Kaʼe neʼe lotoʼofa ia kia natou ohage ko tana fai kia natou ʼae neʼe mahahaki. Ohage la, kei ke manatuʼi tona ʼofa ʼi tana fa ki te tagata kilia, ʼo ina ui fenei age: “ ʼE au loto ki ai! Ke ke maʼa.” (Mateo 8:3) ʼE mahino ia, ʼe tonu ke tou ako ia te manavaʼofa ʼaia pea mo tou tokoni kia natou ʼae ʼe nonofo ʼi te faigataʼaʼia, kaʼe tafito ʼi te faʼahi fakalaumalie.