Kapite 27

Neʼe Fakaafe e Sesu Ia Mateo Ke Muli Ia Te Ia

ʼI TE ʼosi pe ʼo tana fakamālōlō te tagata palalisia, neʼe mavae ia Sesu ʼi Kapenaume pea ʼalu ia ki te matatai ʼo Kalilea. Neʼe lahi te ʼu hahaʼi neʼe toe ʼōmai kia te ia, pea neʼe fai akonaki ai kia nātou. ʼI tana ʼalu ʼi te ala, neʼe sio ia kia Mateo, ʼe toe higoa foki ko Levi, ʼe heka ʼi te pilō ʼo te ʼu tukuhau. ʼO ina fai age ki ai te fakaafe ʼaenī: “Haʼu ʼo muli mai ia te ʼau.”

Neʼe lagi kua ʼiloʼi pe e Mateo te ʼu akonaki ʼa Sesu, ohage pe ko tona kua ʼiloʼi e Petelo, Atelea, Sake pea mo Soane ʼi te fakaafe ʼonatou e Sesu ke nātou muli age ia te ia. Pea ohage pe ko nātou, neʼe tali atu aipe e Mateo te fakaafe ʼi te temi pe ʼaia. ʼO tuʼu ake ai, ʼo līaki tana gāue ʼaē ko te tānaki ʼo te ʼu tukuhau, kae muli ia Sesu.

Pea ki muli age, ʼi tona lagi fiafia ʼi te fakaafe ʼaē neʼe fai age kia ia, neʼe fai e Mateo te fakaafe lahi ki te meʼa kai ʼi tona ʼapi. ʼO haʼu ki ai Sesu pea mo tana ʼu tisipulo, mo ʼihi kaumeʼa ʼo Mateo ʼi te gāue. Ko nātou ʼaia neʼe fehiʼaʼinaʼi e te kau Sutea, heʼe nātou tānaki te ʼu tukuhau maʼa te puleʼaga ʼo Loma ʼaē ʼe fehiʼaʼinaʼi e te kau Iselaele. Pea tahi, ʼe nātou tautau kākāʼi te hahaʼi heʼe nātou fakamaʼua kia nātou ke nātou totogi tanatou ʼu tukuhau ʼo laka ake ʼi te totogi māhani.

ʼI tanatou sio ki te kai tahi ʼa Sesu mo te ʼu taʼi hahaʼi ʼaia, neʼe fehuʼi e te kau Faliseo ki tana ʼu tisipulo: “He koʼe ʼe kai fakatahi tokotou faiako mo te kau tānaki tukuhau pea mo te kau agahala?” ʼI te logo ʼa Sesu ki te palalau ʼaia neʼe ina tali age: “ ʼE mole ko te hahaʼi mālolohi ʼaē ʼe ʼaoga kia nātou te tōketā, ka ko te hahaʼi mahahaki. Koutou ʼolo ʼo ako te faka ʼuhiga ʼo te lea ʼaenī: ‘ ʼE ʼau loto ki te manavaʼofa ka mole ko te sakilifisio.’ He neʼe mole ʼau haʼu ko te pāuiʼi ʼo te kau agatonu, kaʼe ko te kau agahala.”

Neʼe lagi fakaafe e Mateo te kau tānaki tukuhau ʼaia ki tona ʼapi ke feala ai hanatou logo kia Sesu pea mo nātou maʼu ai he fakamālōlō fakalaumālie. Neʼe fakatahi ia Sesu mo nātou ko tana fia tokoni kia nātou ke nātou felogoi lelei mo te ʼAtua. Neʼe mole fehiʼa ia kia nātou, ohage ko te kau Faliseo ʼaē ʼe nātou manatu ko nātou pe ʼe agatonu. Neʼe fonu ia te ia te ʼofa, koia neʼe gāue ai kia nātou ohage ko he tōketā fakalaumālie.

Kapau neʼe ʼofa ia Sesu ki te kau agahala, neʼe mole ko he fakahā ʼaki ia ʼe mole ina koviʼia tanatou ʼu agahala, kae neʼe ina fakahā ai, ʼe ʼofa kia nātou ohage pe ko tona ʼofa ʼaē ki te hahaʼi ʼe mahahaki fakasino. Koutou manatuʼi ko te tahi ʼaho neʼe fāfā ai Sesu ki te tagata kilia mo ina ʼui age ki ai: “ ʼE ʼau loto kiai. Ke ke liliu ʼo maʼa.” ʼOfa pe ke tou hage ko ia, ke tou maʼu te manavaʼofa ʼo tokoni kia nātou ʼaē ʼe nonofo ʼi te faigataʼa, kae tāfito te fai kia nātou he tokoni fakalaumālie! Mateo 8:3; 9:9-13; Maleko 2:13-17; Luka 5:27-32.

▪ Neʼe sio ia Sesu kia Mateo ʼi te faʼahi fea?

▪ Koteā te gāue ʼa Mateo, pea koteā te tupuʼaga ʼo te fehiʼa ʼa te kau Sutea kia nātou ʼaē ʼe gāue ohage ko ia?

▪ Koteā te palalau ʼaē neʼe fai ʼo ʼuhiga mo Sesu, pea koteā tana tali kiai?

▪ He koʼe neʼe fakatahi ia Sesu mo te kau agahala?