Kapite 85

Te Kumi ʼo Te Kau Agahala Kua Hēhē

ʼE KUMI fakamālohi e Sesu ia nātou ʼaē ʼe lotolelei ʼo kaugana ki te ʼAtua ʼaki te agavaivai. ʼE ʼalu ia ki te hahaʼi fuli, māʼia la mo te kau agahala ʼaē kua ʼiloʼi lelei e te hahaʼi, ʼo palalau kia nātou ʼo ʼuhiga mo te Puleʼaga. Ko te kau agahala ʼaē kua fakaōvi age ki ai ʼi te temi nei ʼo fakalogo ia ia.

Ko te kau Faliseo pea mo te kau sekelipa ʼaē neʼe sisio ki te meʼa ʼaia neʼe nātou fakaʼāgaʼi ia Sesu ʼuhi ko tana fakatahi mo te hahaʼi ʼaia ʼaē ʼe meʼa noaʼi e nātou. Neʼe nātou muhumuhu fēnei: “Ko te tagata ʼaenī ʼe ina tali lelei te kau agahala pea ʼe kai ia mo nātou.” Ko nātou totonu ʼe mole nātou fakamālaloʼi anai ia nātou ʼo fai te meʼa ʼaia! ʼIo, ko te kau Faliseo pea mo te kau sekelipa ʼe nātou fakatatau te hahaʼi māhani ki te efu ʼaē ʼi ʼonatou lalo vaʼe. Koia, neʼe nātou fakahigoaʼi ai ia nātou ko te kau ‘am haʼarèts, “hahaʼi ʼo te fenua [ʼo te kele]”, ko te fakahā ʼaki ʼaia ʼo tanatou vaʼiganoaʼi te hahaʼi.

Kae, ko Sesu, ʼe ina gaohi fakalelei te hahaʼi takitokotahi ʼaki tona manavaʼofa pea mo tana agalelei. Koia neʼe tokolahi ʼi te hahaʼi agavaivai ʼaia, ʼo kau ai foki mo te ʼu hahaʼi neʼe ʼiloa ʼe nātou maʼuliʼi te agahala, ʼe nātou holi fakamālohi ke nātou fagono ki ai. Kae koteā te manatu ia ki te fakaʼāga ʼa te kau Faliseo ʼaē kua ʼiʼita kia Sesu ʼi tana faiga ʼaē ki te hahaʼi ʼaē ʼe ʼui maʼa nātou ʼe mole tau mo nātou ke tokagaʼi?

Neʼe tali age e Sesu ki tanatou fakatokaga ʼaē ʼe lave kovi ʼaki te lea fakatātā. ʼI tana nofo ʼi te tonu ʼa te kau Faliseo, ohage ʼe nātou faitotonu pea mo nofo fīmālie ia tafa ʼo te ʼAtua ʼo kehe ia mo te kau ‘am haʼarèts ʼaē kua hēhē pea mo pulinoa, neʼe ina ʼui age kia nātou:

“Ko ai te tagata ʼaē ia koutou ʼe nofo mo hana ʼu ōvi e teau, pea ka puli hana ōvi e tahi, ʼe mole ina tuku anai te hivagofulu-ma-hiva ʼi te toafa kae ʼalu ia ki ʼaē kua puli, ʼo aʼu ki hana toe maʼu? Pea ʼi tana toe maʼu, neʼe ina hili ia ki ʼona fugaʼuma pea fiafia ia. Pea ʼi tana toe liliu mai ki tona ʼapi, neʼe ina pāuiʼi tona ʼu kaumeʼa pea mo tona ʼu vāhaʼa fale ke fakatahi age, pea ina ʼui age kia nātou: ‘Koutou fakafiafia mo ʼau, heʼe ku ʼau toe maʼu taku ōvi ʼaē neʼe puli.’ ”

ʼOsi ʼaia pea ina fai te fakaʼaoga ʼo tana hisitolia ʼo fēnei: “ ʼE ʼau tala atu kia koutou, ʼe lahi anai te fiafia ʼi selo ʼi he fakahemala ʼa he tokotahi ʼe agahala ʼi he kau agatonu e hivagofulu-ma-hiva ʼe mole ʼaoga ke nātou fakahemala.”

ʼI te manatu ʼa te kau Faliseo ko nātou ʼe nātou faitotonu, pea ʼe mole ʼaoga kia nātou te fakahemala. ʼI te ʼu taʼu e lua ki muʼa atu, ʼi te haga ʼa ʼihi ʼo nātou ʼo lau age kia Sesu tana kai fakatahi mo te kau tānaki tukuhau pea mo te kau agahala, neʼe ina ʼui age kia nātou: “Neʼe mole ʼau haʼu ko te pāuiʼi ʼo te kau agatonu, kae ko te kau agahala.” Ko te kau Faliseo, ʼaē ʼe ʼui maʼa nātou ʼe nātou faitotonu, ʼe mole nātou sio ki te ʼaoga ʼaē kia nātou ʼo te fakahemala, ʼe mole nātou fakatupu he fiafia e tahi ʼi te lagi. Kae, ko te meʼa ʼaia ʼe hoko ki te kau agahala mokā ʼe nātou fakahemala moʼoni.

Moʼo fakamālohiʼi ʼo te manatu ʼaē ko te fakahemala ʼa te kau agahala ʼaē neʼe hēhē ʼe fakatupu ai he fiafia lahi, neʼe toe fai e Sesu te tahi lea fakatātā. “Ko ai te fafine ʼaē, ʼe nofo mo ʼana talame e hogofulu, pea ka puli hana talame e tahi, ʼe mole ina tutu he mālama, mo hiko tona loto fale pea mo ina kumi fakalelei ʼo aʼu ki tana maʼu? Pea ka ina maʼu, pea ʼe ina pāuiʼi tona ʼu kaumeʼa pea mo tona ʼu vāhaʼa fale, pea ʼui maʼana: ‘Koutou fakafiafia mo ʼau, heʼe ku ʼau maʼu te talame ʼaē neʼe puli.’ ”

Neʼe fai e Sesu te fakaʼaoga ʼe tatau mo te ʼuluaki, ʼo fēnei: “Koia, ʼe ʼau tala atu kia koutou, ʼe ʼi ai te fiafia ʼi te kau ʼaselo ʼa te ʼAtua ki he tagata agahala e tahi ʼe fakahemala.”

ʼE ko he meʼa ʼiloa ia te tokaga ʼa te kau ʼaselo ʼaki te ʼofa ki te fakaāke ʼo te hahaʼi agahala ʼaē neʼe hēhē. ʼE ko he meʼa foki ʼe toe ʼāsili ʼiloa heʼe ko te kau ‘am haʼarèts agavaivai ʼaia pea mo vaʼiganoaʼi ʼe nātou maʼu te fealagia ke nātou kau ʼi te kau faʼu ʼo te Puleʼaga ʼo te ʼAtua ʼi selo, ʼo feala ai ke nātou maʼuʼuli ʼi te lagi, ʼi he tuʼulaga ʼe māʼoluga ake ʼi te kau ʼaselo! Kae, neʼe mole nātou maheka peʼe ʼiʼita, ko te kau ʼaselo ʼe nātou maʼu te agavaivai ke nātou mahino ai ko te hahaʼi agahala ʼaia ʼe nātou tauʼi pea mo lavaʼi te ʼu faʼahiga meʼa ʼe nātou akoʼi ai ia nātou ke nātou gāue ai ʼi te lagi ohage ko he ʼu hau mo he ʼu pelepitelo manavaʼofa pea mo fakamolemole gafua. Luka 15:1-10; Mateo 9:13; 1 Kolonito 6:2, 3; Fakahā 20:6.

▪ He koʼe ʼe fakatahi ia Sesu mo te kau agahala kua ʼiloʼi lelei e te hahaʼi, pea koteā te fakaʼāga neʼe fai e te kau Faliseo kia ia?

▪ E feafeaʼi te manatu ʼa te kau Faliseo ʼo ʼuhiga mo te hahaʼi māhani?

▪ Ko te ʼu lea fakatātā fea ʼaē neʼe fakaʼaogaʼi e Sesu, pea koteā te ako ʼe maʼu mai ai?

▪ He koʼe ʼe ko he meʼa ia ʼe ʼiloa te fiafia ʼa te kau ʼaselo?