FEHUʼI 3
ʼE Feafeaʼi Haku Felogoʼi Mo ʼAku Matuʼā?
KOTEA ʼAE KA KE FAI ANAI?
Fakakaukauʼi te aluʼaga ʼaeni: Ko te Feliafa afiafi, pea kua ʼosi fai e Geoff ʼae ʼe taʼu 17 ʼana gaue ʼae ʼi fale. Kua heka nei ʼi te sofa ke ʼai muʼa hana kiʼi malolō pea mo televisio.
ʼI te lakaga ʼaia, ʼe ʼasi mai tana tamai ʼi te matapa pea ʼe ita.
“Geoffrey, kotea te fai televisio ʼaena, kaʼe mole ke alu ʼo tokoni ki te ʼu meʼa ako ʼo tou kiʼi tehina? ʼE mole pe la ke fai he meʼa ʼe ui atu.”
Kaʼe potepote fenei ia Geoff: “Ko te toe kamata leva e tana meʼa.”
Pea ui age e tana tamai, “Kotea koa ʼe ke ui?”
Kaʼe ʼe fute ia Geoff ʼo ina ui, “Mole he meʼa ia papa.”
Kua kovi ʼosi te ita ʼo tana tamai ʼo ina ui ai, “Ka au ui atu he meʼa, ʼaua tau toe gu mai.”
Ka na ko koe la ia Geoff, kotea ʼe feala ke ke fai ke mole hoko te fihi ʼaia?
FAKAKAUKAUʼI MUʼA
Ko tau felogoʼi ʼae mo ʼau matuʼa, ʼe hage pe ko hau alu ʼi he motoka. Koteʼuhi kapau ʼe ke alu ʼi he ala ʼe pupunu, pea ʼe ke kumi anai he tahi age ala.
KO HE FAʼIFAʼITAKI:
ʼE ui fenei e te taʼahine ʼe higoa ko Leah: “ ʼE faigataʼa haku felogoʼi lelei mo taku tamai. ʼI ʼihi temi, ʼe au palalau age ki ai pea ʼosi ʼaia, ʼe ina ui mai, ‘Kotea koa la neʼe ke ui?’ ”
KO FAʼAHI ʼE TOLU ʼE FEALA KE FAI E LEAH.
ʼE muna ki tana tamai.
ʼE muna fenei ia Leah: “Papa, fakalogo mai muʼa.”
ʼE mole kei palalau ki tana tamai.
ʼE mole kei faigaʼi e Leah ke palalau ki tana tamai ʼo ʼuhiga mo tona fihifihia.
ʼE toe palalau ki te aluʼaga ʼaia ʼi he tahi temi faigamalie.
ʼE hoki toe palalau ia Leah ki tana tamai ʼi he tahi lakaga, peʼe faitohi ki ai ʼo ʼuhiga mo tona fihifihia.
Ko te faʼahi fea ʼae ʼe ke filifili anai maʼa Leah?
VAKAʼI TE ALUʼAGA ʼAENI: ʼE mole tokagaʼi e tana tamai ʼana palalau, ʼo mole ina iloʼi ai te ita ʼo tona ʼofafine. Koia, kapau ʼe filifili e Leah ia te A Faʼahi, ʼe feala ke feʼekeʼaki e tana tamai pe koʼe ʼe ita. Kapau ʼe muna ia Leah ki tana tamai, ʼe mole fakaʼapaʼapa anai ki ai, pea ʼe mole fagono age anai tana tamai. (Efeso 6:2) Koia, ʼe mole fua lelei anai te ʼuluaki faʼahi.
Ko te kumi ʼo he ʼu felogoʼi lelei mo ʼau matuʼā ʼe hage pe ko hau alu ʼi he ala ʼe pupunu pea ʼe ke kumi age he tahi ala
ʼE lagi faigafua te filifili ʼo te B Faʼahi, kaʼe ʼe mole ko he agapoto anai. Kotea tona tupuʼaga? Koteʼuhi, ke fakatokatoka e Leah tona fihifihia, ʼe tonu ke palalau ki tana tamai. Pea ke feala he tokoni age ʼo tana tamai, ʼe tonu ke ina iloʼi pe kotea ʼae ʼe mamahi ai tona loto. Kaʼe kapau ʼe mole fia palalau ia Leah ki tana tamai, ʼe mole ʼi ai anai hona fua lelei.
Kaʼe ʼaki te C Faʼahi, ʼe mole fakagafua e Leah ki he meʼa ke ina taʼofi ia tana palalau ki tana tamai. ʼE ina kumi aipe he ʼu faigamalie ke palalau ai ki tana tamai ʼo ʼuhiga mo tona fihifihia. Pea kapau ʼe ina filifili ke faitohi ki tana tamai, ʼe feala ke fimalie ai tona loto.
Kapau ʼe faitohi ia Leah, pea ʼe feala anai ke ina fakaha lelei ʼana manatu. ʼI te temi ʼae ka lau ai e tana tamai tana tohi, ʼe ina iloʼi anai pe kotea ʼae neʼe faigaʼi e Leah ke ina ui age. Pea ʼe mahino lelei ai anai ki te fitaʼa ʼo tona ʼofafine. Koia ʼe fua lelei ia te 3 faʼahi kia Leah mo tana tamai. Ko te fepalalauʼaki, peʼe ko te fai ʼo he tohi, ʼe alu tahi mo te fakalotomalohi Fakatohi-tapu ʼaeni: “Kumi te u mea ae e aoga ki te tokalelei pea mo te faufau.”—Loma 14:19.
Kotea te tahi ʼu faʼahi neʼe feala ke fai e Leah?
Kapau ʼe ke manatu ki he tahi age faʼahi, pea ke tohi ki lalo ifo. ʼOsi ʼaia pea ke tohi ʼona fua.
KE MAHINO ʼAU PALALAU
Manatuʼi, ʼe mole mahino tuʼumaʼu ʼau matuʼā ki ʼau palalau.
TOU TOʼO HE FAʼIFAʼITAKI:
ʼE fehuʼi atu e ʼau matuʼā pe ʼe ʼi ai he meʼa ʼe ke mamahi ki ai. Pea ʼe ke tali fenei age: “ ʼE mole au fia palalau ki ai.”
Kaʼe ʼe mahino fenei anai ʼau matuʼā ki ʼau palalau: “ ʼE mole au falala kia koulua. ʼE au palalau anai ki ʼoku kaumeʼa ʼo ʼuhiga mo toku fihifihia, kaʼe mole kia koulua.”
Fakakaukauʼi age muʼa mo kapau ʼe ke tau mo hou fihifihia faigataʼa, kaʼe ʼe fia tokoni atu ʼau matuʼā. Pea ʼe ke tali fenei age: “ ʼAua takolua tuʼania, ʼe au lavaʼi pe.”
ʼE lagi mahino fenei ʼau matuʼā?
ʼE lagi lelei age ke ke tali fenei?