HOKO ATU TONA ʼAʼAHI
AKO 8
Tou Kataki Fualoa
Pelesepeto: “Ko he tahi ʼe ʼofa, ʼe kataki fualoa ia.”—1 Ko. 13:4.
Te Meʼa ʼAe Neʼe Fai e Sesu
1. Sioʼi te ʼATA VITEO, peʼe lau ia Soane 7:3-5 pea mo 1 Kolonito 15:3, 4, 7. Pea tali ki te ʼu fehuʼi ʼaeni:
Neʼe ʼuluaki tali feafeaʼi e te ʼu tehina ʼo Sesu te logo ʼae neʼe ina fakamafola?
Kotea ʼae ʼe ha ai neʼe kataki fualoa pe ia Sesu ʼo ʼuhiga mo tona tehina ko Sakopo?
Kotea ʼAe ʼe Tou Ako Mai Ai?
2. ʼE tonu ke tou kataki fualoa he ʼe ʼi ai ʼihi ʼe ʼaoga he temi ke natou tali te moʼoni.
Faʼifaʼitakiʼi Ia Sesu
3. Fetogi tau faʼahiga fai. Kapau ʼe heʼeki fia kamata he ako ʼa he tahi, ʼaua naʼa ke fakakinauʼi. Ka kua faigamalie pea ke fakaha age ki ai he ʼata viteo peʼe ko he alatike ke mahino pe ʼe feafeaʼi te fai ʼo he ako pea mo ʼona fua lelei kia ia.
4. ʼAua naʼa ke fakatatau ki he tahi. ʼE mole tou tatau fuli. Kapau ko he tahi ʼo tou famili peʼe ko hau ʼaʼahi, ʼe mole fia ako peʼe faigataʼa ki ai hana tali he manatu Fakatohi-tapu, faiga ke ke iloʼi tona tupuʼaga. ʼE maʼuhiga koa kia ia tana lotu? ʼE fakaneke koa ia ia e tona famili peʼe ko te u vahaʼa fale? ʼE lagi ʼaoga ki ai he temi ke ina fakakaukauʼi te ʼu faʼahi ʼae neʼe ke ui age ʼo ʼuhiga mo te Tohi-Tapu.
5. Hufakiʼi ia ia. Kole kia Sehova ke tokoni atu ke ke maʼu tuʼumaʼu ni manatu lelei pea mo ke aga fakaʼapaʼapa. Pea ke ke toe kole ke tokoni atu ke ke iloʼi pe ʼe fia logo moʼoni te kilisitiano ʼaia peʼe tonu ke ke fakagata tau ʼaʼahi ia ia.—1 Ko. 9:26.