ʼE Tonu Koa Ke Ke Fakagata Te Faipalalau Peʼe Kailoa?

ʼI ʼihi temi, ʼe tou felaveʼi mo he tahi ʼe fakamalotoloto ʼe ina fai mai hana fehuʼi peʼe palalau mai ki he aluʼaga ʼe tuʼania ki ai. Ka hoko te aluʼaga ʼaia, pea ʼe tou fiafia ʼi te hoko atu ʼo te faipalalau mo ia he ʼe lagi ‘lelei tona loto ke ina maʼu te maʼuli heʼe gata.’​—Gaue 13:48.

Kae ʼe feafeaʼi mo kapau ʼe itaita ia ia ʼae ʼe kolua faipalalau, peʼe fia fihi mo koe, peʼe ke alu atu ʼe maʼumaʼua? ʼAki he agalelei, ʼe lelei age ke ke fakatuʼu te faipalalau. (Taag. 17:14) Kapau ʼe tou vete lelei, pea ʼe feala pe anai ke ina tali lelei tatou moka tou toe omai ki ai.​—1 Pet. 2:12.