ʼE Fakalogo Koa Te ʼAtua Ki Tatatou ʼu Faikole?

KO TE tagata pule ʼe feala tana foaki he gāue ki he tahi, pe ʼe ina fai totonu pe te fahaʼi ʼaia? ʼO tatau aipe, mo te Tuʼi ʼo te ʼatulaulau ʼe feala tana faitotonu pe ʼe feafeaʼi ānai tana kau ki te vetevete ʼo he fehuʼi. ʼE akoʼi mai e te Tohi-Tapu neʼe fili e te ʼAtua ke ina tokagaʼi tatatou ʼu faikole pea mo ina ʼui mai ke tou kole age kia te ia. — Pesalemo 66:19; 69:13.

Ko te tonu ʼaē neʼe fai e te ʼAtua ʼo ʼuhiga mo te fehuʼi ʼaia ʼe hā lelei ai tana tokagaʼi te ʼu kole ʼa tana ʼu kaugana. Neʼe mole ina faigaʼi ke nātou fiu ʼi te fakahā age ʼo tanatou ʼu manatu pea mo tonatou ʼu faigataʼa ia, ʼe ina tokoniʼi fēnei nātou: “Faikole tuʼumaʼu”, “koutou kātaki ʼo faikole”, “fakahā tau kavega kia Sehova”, ‘koutou fakahā ki te ʼAtua te meʼa fuli ʼaē ʼe koutou mamahi ai’. — 1 Tesalonika 5:17; Loma 12:12; Pesalemo 55:22; 1 Petelo 5:7.

Kapau neʼe mole tokaga te ʼAtua ki te ʼu kole ʼa tana ʼu kaugana, neʼe mole ina fai he ʼu fakatuʼutuʼu ke feala ai tanatou fakaōvi age kia te ia ʼaki te faikole pea neʼe mole ina tokoniʼi nātou ke nātou fakaʼaoga tuʼumaʼu te fahaʼi ʼaia. Ko te fili e te ʼAtua ke faigafua te fakaōvi age kia te ia ʼe ko he falala ʼaia ʼe fakalogo moʼoni mai ia.

Ke ʼaua naʼa galo ia tatou te fahaʼi ʼaia: ʼe fakahā lelei mai e te Tohi-Tapu ko te ʼAtua ʼe fakalogo ki te faikole. Neʼe tohi fēnei e te ʼapositolo ko Soane: “Koʼeni te fakamoʼoni mai kia tatou; ko he meʼa pe ʼe tou kole ʼo mulimuli ki tona finegalo, ʼe fakalogo mai ia kia tatou” (1 Soane 5:14.) Neʼe ʼui fēnei e te Hau ko Tavite ʼo ʼuhiga mo Sehova ‘ko ia ʼe fakalogo ki te faikole’ pea ina tala fēnei ʼaki tana falala: “ ʼE logo ia ki toku leʼo.” — Pesalemo 55:17; 65:2.

Koia, logope te lelei ʼo te faikole, ʼe fakahā mai e te Tohi-Tapu ʼe kehe age foki tona lelei mokā faikole he tahi ʼe agatonu. ʼE ʼi ai te tahi ʼe fakalogo mai. Ko te ʼAtua totonu. — Sake 5:16-18.

Te ʼu faikole neʼe tali

Ko te Tohi-Tapu ʼe ina tau fakahā mai te ʼu fakamatala ʼa te ʼu hahaʼi neʼe ko tanatou ʼu faikole neʼe logoʼi pea neʼe tali. Ko tonatou maʼuli ʼe hā lelei ai ko te ʼu tapuakina ʼo te faikole ʼe fakalaka ia ʼi te ʼu fakaʼiloga faka tōketā ʼo ʼuhiga mo te fakatokatoka ʼo te ʼu manatu pea mo te fakahā ʼo te fahaʼi ʼaia. Ko te ʼu tapuakina ʼaia ʼe mole gata ʼaki pe te ʼu faiga takitokotahi ʼo ʼalu tahi mo te ʼu kole.

Ohage ko te fakatuʼutuʼu neʼe teuteuʼi e Apisalome moʼo faʼao te tuʼulaga hau ʼo Iselaele, neʼe faikole fēnei ia te Hau ko Tavite: “Fakalelei, e Sehova, ke ke fakagalivaleʼi te tokoni ʼa Aitofele [tagata fai tokoni ʼa Apisalome]!” Neʼe mole ko he kole veliveli, ko te ʼuhi “heʼe ko te faitokoni ʼa Aitofele, (...) ʼe hage pe ko tatatou fai fehuʼi ki te folafola ʼa te ʼAtua moʼoni. Ko te maʼuhiga ʼaia ʼo te fai tokoni ʼa Aitofele”. Ki muli mai, ko Apisalome neʼe fakafisi ia ki te fakatuʼutuʼu neʼe fai e Aitofele moʼo fakahifo ʼo te hau ko Tavite. Koteā koa tona tupuʼaga? “Neʼe fakatotonu e Sehova ke fakahalaʼi te tokoni ʼa Aitofele, logope tona lelei, ko te faigaʼi ʼa Sehova ke hoko te malaʼia kia Apisalome.” Koia neʼe tali ai te kole ʼa Tavite. — 2 Samuele 15:31; 16:23; 17:14.

ʼO toe feiā pe, ʼi te ʼosi faikole ʼa Esekiasi ki te ʼAtua ke ina hāofaki ia mai tona mahaki fakamataku, neʼe lelei atu aipe ia. Ko te lelei ʼo te mahaki ʼo Esekiasi neʼe hoko koa ia ʼuhi ko tona loto mālohi ʼi tana faikole? Kailoa. Koʼeni te meʼa neʼe ʼui age e Sehova ki ai, ʼaki te polofeta ko Isaia: “Neʼe ʼau logo ki tau faikole. Neʼe ʼau sio ki ʼou loʼimata. Koʼeni, ʼe ʼau fakafimālieʼi koe.” — 2 Hau 20:1-6.

Ko Taniela, neʼe tali tana kole ki muli mai, ʼi te temi neʼe lagi mole kei faka tuʼakoi ia ki ai, neʼe fakaloto mālohi ia e te ʼaselo ʼa Sehova: “Ko tau ʼu palalau neʼe kua ʼosi tali”. Ko te ʼu faikole ʼa ʼihi hahaʼi, ohage ko te ʼu kole ʼa Ana, te ʼu tisipulo ʼa Sesu pea mo te tagata solia ko Kolonelio neʼe tali tanatou ʼu kole, mole feala ke tou ʼui neʼe hoko pe te meʼa ʼaia ʼaki te ʼu mālohi fakatagata. Koia, ko te Tohi-Tapu ʼe ina fakahā lelei mai ko te ʼAtua ʼe ina tali, pea mo fakahoko tatatou ʼu kole ʼaē ʼe ʼalu tahi mo tona finegalo. — Taniela 10:2-14; 1 Samuele 1:1-20; Gāue 4:24-31; 10:1-7.

Kae ʼe tali feafeaʼi e te ʼAtua te ʼu kole ʼa tana kau kaugana agatonu ia ʼaho nei?

ʼE feafeaʼi te tali ʼo te ʼu faikole

Ko te ʼu faikole neʼe hoki tou palalau nei ki ai neʼe fakahoko ʼaki he meʼa fakaofoofo pea mo faka milakulo. Tou manatuʼi tatau aipe mo te ʼu temi faka tohi-tapu, ko te faʼahiga tali ʼo te ʼu kole neʼe mole hā tuʼumaʼu ia. Ko tona tupuʼaga ʼaē he neʼe ʼalu tahi ia mo tonatou mālohi fakaʼatamai pea mo te ʼu faʼahiga meʼa neʼe foaki age e te ʼAtua ki tana ʼu kaugana ke feala ai hanatou nonofo ʼo pipiki tuʼumaʼu ki te ala ʼo te faitotonu. Ki te kau kilisitiano, ko te tali ʼo tanatou ʼu kole neʼe hoko fakalaumālie, pea neʼe mole ko he ʼu meʼa neʼe fakaofoofo pe ʼe ʼaki he ʼu aga faka milakulo. — Kolose 1:9.

Kae, ʼaua naʼa koutou vaivai mokā ʼe mole tali tuʼumaʼu takotou ʼu kole ohage ko takotou fakaʼamu, pe ʼe ko te meʼa ʼe koutou loto ki ai. Ohage la, ʼe mole haga ānai te ʼAtua ʼo fakamamaʼo ia koutou te ʼu faigataʼa ia, kae ʼe lagi ʼe ina tuku atu ānai te “mālohi ke fakalaka age ʼi te mālohi fakatagata” ke feala ai tau faʼa kātaki (2 Kolonito 4:7; 2 Timoteo 4:17). Ke ʼaua naʼa tou meʼa noaʼi te toe mālohi ʼaia, pe ʼe tou ʼui ko Sehova ʼe mole ina tali ānai tatatou ʼu kole.

Tou fakasiosio te faʼifaʼitaki ʼo te ʼAlo ʼo te ʼAtua ia Sesu Kilisito. Neʼe ia te ia te tuʼania, ko tona ʼuhiga ʼaē neʼe mole fia mate ia ohage he tagata malaʼia, neʼe faikole ia ʼo fēnei: “Tāmai, kapau ʼe ke loto ki ai, pea ke ke fakamamaʼo atu ia te ʼau te kalise”. Kae neʼe tali leleiʼi koa e te ʼAtua tana kole? Ei, ohage ko te fakamoʼoni mai ʼa Hepeleo 5:7. Neʼe mole haga ia Sehova ʼo hāofaki tona ʼAlo mai te mate ʼi te pou mamahi, ko te mate ʼaia ʼe ʼaoga. Kae, neʼe hā kia te ia te ʼaselo mai te lagi pea ina fakamālohiʼi ia. — Luka 22:42, 43.

Ko he tali fakaofoofo, mo faka milakulo? Ki he tahi pe ia tatou, ʼe feala pe ke tou ʼui feiā! Kae kia Sehova ʼAtua, te matapuna ʼo te toe mālohi ʼaia, mole ko he milakulo ia. Pea ko Sesu ia, ʼaē neʼe maʼuli ki muʼa atu ʼi te lagi, neʼe ina ʼiloʼi ʼi te temi muʼa neʼe hā te kau ʼaselo ki te ʼu tagata. Ko te hā ʼo he ʼaselo ki te ia neʼe mole tatau ia mo kapau neʼe hā mai kia tatou. Koia, ko te ʼaselo ʼaia, neʼe ʼiloʼi totonu e Sesu ʼi tana maʼuli ʼi selo, neʼe tokoni age kia te ia ke feala ai tana tauʼi te faigataʼa ka hoko mai kia te ia.

Moʼo tali te ʼu kole ʼo tana kau kaugana agatonu ʼo te temi nei, ʼe foaki age e Sehova kia nātou te faʼa kātaki. Ko te tokoni ʼaia ʼe feala pe tona fakahoko ʼaki he tokoni ʼe foaki mai e totatou ʼu kaumeʼa ʼi te moʼoni. Ko he tahi ʼe fakafisi ānai ki te tokoni ʼaia, heʼe ʼi tana manatu neʼe mole heʼeki hoko te fakataga ʼaia kia nātou koia ʼe mole feala ānai ke nātou tokoniʼi tatou? Neʼe feala ke ia Sesu he manatu feiā ʼo ʼuhiga mo te ʼaselo ʼaē neʼe hā age kia te ia. Kae, neʼe ina tali te tokoni ʼaia, ohage kia te ia ko he tali ʼaia ʼa Sehova ki tana kole, pea neʼe feala ai tana fai te finegalo ʼo tana Tāmai. Mo tatou foki, ʼe tonu ke tou tali leleiʼi te mālohi ʼe foaki mai e te ʼAtua, ko tana tali ʼaia ki ʼatatou ʼu kole. Tou manatuʼi foki ko te ʼu temi ʼaē ʼe hoholo ai tatatou faʼa kātaki, ʼe tou maʼu tuʼumaʼu ai te ʼu tapuakina mole hona fakafuafua. — Tagata Tānaki 11:6; Sake 5:11.

Tou faka tui ko te ʼAtua ʼe fakalogo mai

Kapau ʼe mole tali tatatou ʼu kole ʼi te temi pe ʼaia, ʼaua naʼa puli kia tatou te maʼuhiga ʼo te faikole. ʼI muʼa ʼo te tali ʼo ʼihi faikole, ohage ko te ʼu kole ʼe tou fai ke tokoni mai ki ʼotatou mamahi, pe ʼe ke fakalahi totatou ʼu maʼua ʼi te gāue ki te ʼAtua, ʼe feala ke tali e te ʼAtua ʼi he temi ʼe ina fakafuafua ai ʼe ʼaoga kia tatou (Luka 18:7, 8; 1 Petelo 5:6). Kapau ʼe tou faikole ʼo ʼuhiga mo he faigataʼa ia ʼotatou takitokotahi, tou fakahā ki te ʼAtua, ʼaki tatatou faʼa kātaki, ko te meʼa ʼe tou holi ki ai ʼe loloto pea ko tatatou ʼu manatu ʼe maʼa pea mo fakamalotoloto. Neʼe ia Sakopo te manatu ʼaia heʼe ʼi te ʼosi ʼo tana tauʼi te ʼaselo, neʼe ina ʼui fēnei: “Mole ʼau tuku ānai koe ke ke ʼalu ʼi muʼa ʼo tau tapuakiʼi ʼau.” (Senesi 32:24-32). ʼE tonu ke ia tatou te falala ʼaia: kapau ʼe tou haga kole, ʼe tou maʼu ānai te ʼu tapuakina ʼi te temi ʼaē ʼe ʼaoga totonu ai kia tatou. — Luka 11:9.

Ko he manatu fakamuli. Ko te fakalogo mai ʼa te Tuʼi ʼo te ʼatulaulau ʼe ko te pilivilesio maʼuhiga. ʼAki tatatou ʼiloʼi te fahaʼi ʼaia, e tou fakalogo lelei koa ki te ʼAtua mokā ʼe ina fakamahino mai tana ʼu fakatuʼutuʼu ʼi tana Folafola? ʼAki tatatou ʼu faikole, ko tatatou felōgoʼi mo totatou Tupuʼaga ʼe toe kehe age tona lelei, koia ke tou holi ʼo fakalogo ki te ʼu meʼa fuli ʼe ina fakahā mai.

[Paki ʼo te pasina 6]

Ko te ʼAtua ʼe fakalogo ki te ʼu faikole. ʼE tou fakalogo koa kia te ia mokā palalau mai ia ʼi tana Folafola?