ʼAua Naʼa Galo Te ʼAho ʼo Sehova ʼi Totatou ʼAtamai

“Heʼe kua ōvi mai, te ʼaho ʼo Sehova ʼi te lalo moʼuga ʼo te fakatonutonu.” — Soele 3:14.

1. He koʼe koa ko te tau fakataputapu ʼaē neʼe fakahā e Sehova ʼe kehe anai ia mo te ʼu tau “fakataputapu” ʼaē ʼo te malamanei?

“KOUTOU kalagaʼi te meʼa ʼaenī ʼi te lotolotoiga ʼo te ʼu puleʼaga: ‘Koutou tapuha te tau!’ ” (Soele 3:9). Koteā koa te ʼuhiga ʼo te tau taputapu ʼaia? Koutou manatuʼi ake muʼa te ʼu tau faka lotu, pea mo te ʼu tau ʼaē e lua faka malamanei — ʼaē neʼe kau ʼaupito ki ai te hahaʼi ʼo te keletiate — ʼe tou tekelili foki ʼi te manatu ki he “tau fakataputapu”. Ko te tau fakataputapu ʼaē ʼi te fakakikite ʼa Soele, ʼe mole ko he tau ia ʼi te lotolotoiga ʼo te ʼu fenua. ʼE mole ko he tau ia ʼe fonu ai te fehiʼa ʼo ʼuhiga mo he telituale pe ʼe ko he maʼu ʼo he ʼu lelei, pea mo fakaʼaogaʼi te ʼu lotu ohage ko he meʼa moʼo takuʼaki. Ko te tau faitotonu ia. Ko te tau ʼa te ʼAtua, ʼaē ka ina hāofaki te kele mai te mānumānu, te ʼu fetauʼaki, te fakahala, pea mo te popūla. Ko te tau ʼaia ʼe ina fakahā te Pule Faʼitaliha ʼa Sehova ʼo ʼuhiga mo te ʼu meʼa fuli ʼaē neʼe ina fakatupu. ʼE ina toe fakahā lelei te haga ʼaē ʼa te Puleʼaga ʼo Kilisito ʼo fakahu te malamanei ki te tokalelei ʼo te ʼatulaulau, pea mo te mahu, pea mo fīmālie, lolotoga taʼu e afe, ohage ko tona fakakikite ʼaē e te ʼu polofeta ʼa te ʼAtua. — Pesalemo 37:9-11; Isaia 65:17, 18; Fakahā 20:6.

2, 3. a) Koteā koa “te ʼaho ʼo Sehova” ʼaē neʼe fakakikite ia Soele 3:14? b) He koʼe koa ʼe tau anai mo te ʼu puleʼaga te meʼa ʼaē ka hoko kia nātou ʼi te ʼaho ʼaia?

² Pea, koteā te fakakikite neʼe fai ia Soele 3:14 ʼo ʼuhiga mo “te ʼaho ʼo Sehova”? “ ʼOiaue! ʼi ʼaho leva!”, ko te ʼui ʼaia ʼa Sehova totonu “he kua ōvi mai te ʼaho ʼo Sehova, pea ʼe hoko mai anai ia ohage ko he faka ʼauha mai te Māfimāfi!” ʼE feafeaʼi koa te faka ʼauha ʼaia? ʼE fakamatala e te polofeta ki muli age: “Ko te tokolahi, ko te tokolahi ʼe nonofo ʼi te lalo moʼuga ʼo te fakatonutonu, heʼe kua ōvi mai, te ʼaho ʼo Sehova ʼi te lalo moʼuga ʼo te fakatonutonu.” (Soele 1:15; 3:14). Ko te ʼaho ʼaia ka fakahoko ai e Sehova tana fakamāu agatonu ki te hahaʼi tokolahi heletiko neʼe nātou siʼaki te Pule Faʼitaliha ʼa te ʼAtua ʼaē ʼo te lagi pea mo te kele. Ko te fakatotonu ʼa Sehova ʼe ina faka ʼauha te ʼu faʼahiga meʼa ʼo te tuʼu fakasatana ʼaenī ʼaē neʼe ina taʼofi fualoa te malamanei katoa ʼaki tana pule. — Selemia 17:5-7; 25:31-33.

³ Ko te faʼahiga tuʼu fakahala ʼaenī ʼi te kele ʼe tau anai mo te fakatonutonu ʼaia. Kae ʼe ko te faʼahiga tuʼu faka malamanei ʼe kovi moʼoni koa? Ko he kiʼi fakasiosio pe ki te ʼu meʼa ʼaē neʼe hoko ʼe tau mo te fehuʼi ʼaia! Neʼe fakahā e Sesu te fakatuʼutuʼu ia Mateo 7:16: “ ʼE koutou íloí natou i tonatou fua.” (TTK). Ko te ʼu kolo lalahi ʼo te malamanei ʼe mole kua liliu koa ko te ʼu koga meʼa ʼo te toloke, ʼo te fakapō, ʼo te fakamataku, ʼo te agavale fakasino, pea mo te tefu? Kua lahi te ʼu fenua kua nātou maʼu te maʼuli ʼāteaina ʼaē neʼe taʼomia e te ʼu maveuveu faka politike, te hoge, pea mo te masisiva. Kua laka ʼi te lauʼi miliale te hahaʼi ʼaē ʼe nonofo pakupaku. Pea, ko te SIDA kua mafola ia, ʼuhi ko te toloke pea mo te ʼu felāveʼi fakasino heʼe maʼa, pea kua mafola ia ʼi te kele katoa. Neʼe kamata mai ʼi te ʼUluaki Tau faka malamanei ʼo te taʼu 1914, ʼo haʼele kovi mai ai te malamanei katoa ʼi te ʼu faʼahi fuli ʼo te maʼuli. — Fakatatau mo 2 Timoteo 3:1-5.

4. Koteā te laga tau ʼaē ʼe fai e Sehova ki te ʼu puleʼaga?

⁴ Kae, neʼe toe fakatahiʼi foki e Sehova te hahaʼi ʼo te ʼu atu fenua kehekehe ʼaē neʼe nātou tali fakalelei te akonaki ʼo ʼuhiga mo tana ʼu faʼahiga aga pea mo haʼele ʼi tana ʼu ala. Ko te ʼu hahaʼi ʼaia kua nātou tuki te ʼu heletā ko he ʼu huo ta kele, ʼonatou fakafisi ki te ʼu faʼahiga agamālohi ʼo te malamanei (Isaia 2:2-4). Ei, ko te ʼu heletā kua tuki ko te ʼu huo ta kele! Kae ʼe mole fakafeagai koa mo te kalaga ʼaē ʼe fai e Sehova ia Soele 3:9, 10? ʼAē ʼe tou lau fēnei: “Koutou kalagaʼi te meʼa ʼaenī ʼi te lotolotoiga ʼo te ʼu puleʼaga: ‘Koutou teuteuʼi te tau! Koutou fakaʼaʼala te ʼu tagata mālolohi! Ke nātou hoho mai! Ke nātou hake, te kau tagata tau fuli! Koutou tuki ʼa kotou ʼu huo ta kele ko he ʼu heletā, pea mo ʼa kotou ʼu pipi tuʼusi ko he ʼu tao.’ ” ʼIo, ʼe ʼiloga mai ʼi heni, ko Sehova ʼe laga tau ki te kau takitaki ʼo te malamanei ke fakatahiʼi ʼonatou kautau solia kia te ia ʼi Halamaketone. Kae ʼe mole nātou mālo anai! ʼE nātou lavā ʼo talu ai ʼosi! — Fakahā 16:16.

5. Koteā anai te fua mokā haga anai Sesu ʼo utu “te vite ʼo te kele”?

⁵ ʼI te manukinuki ʼaē ʼo te Tuʼi ʼAliki ko Sehova, ko te kau takitaki pule mālolohi ʼe nātou faʼu te ʼu mahafu tau fakamanavahe — kae ʼe tālā! ʼE fai e Sehova te fakatotonu ʼaenī ia Soele 3:13: “Koutou ai he toki pelu, heʼe ko te utu kua matutua. Koutou ʼomai, koutou hihifo, heʼe ko te masini lomi vite kua fonu. Ko te ʼu foʼi kulo fakatali kua mahuahua; heʼe ko ʼanātou ʼu agahala kua mahu.” ʼE tatau te ʼu palalau ʼaia mo te ʼu palalau ʼaē ia Fakahā 14:18-20, ʼaē ko te hau faka mesia kua fakanofo, ia Sesu, neʼe ina fakatotonu ke “utu te ʼu fuiga vite ʼo te kele, heʼe kua matutua tona ʼu vite”. Ko te Hau ʼe ina ai tana toki pelu masilā pea mo lī te ʼu puleʼaga laga tau ʼaia “ki te masini lahi lomi ʼo te vite ʼo te hāūhāū ʼo te ʼAtua.” ʼI he lea fakatātā, ko te toto ʼaē neʼe haʼu mai te masini lomi neʼe aʼu ʼosi ia ki te kiliʼi pipi ʼaē ʼo te ʼu gutu ʼo te ʼu hosi, lagi ko kilometa e 300! ʼE ko he meʼa fakamanavahe ki te ʼu puleʼaga ʼaē ʼe nātou fakalainoaʼi ia Sehova!

Te lao ʼo te temi nei ki te hahaʼi ʼo te kele

6. Koteā te manatu ʼa te kau Fakamoʼoni ʼa Sehova ʼo ʼuhiga mo te ʼu puleʼaga pea mo tanatou kau takitaki?

⁶ ʼE tonu koa ke mole fakaʼapaʼapa te kau Fakamoʼoni ʼa Sehova ki te ʼu puleʼaga pea mo ʼanatou kau takitaki pule? Kailoa ia! ʼE nātou fakahā lelei pe, te fakahala ʼaē ʼe ʼiloga lelei ʼi te temi nei, pea ʼe nātou fakatokagaʼi fakavilivili te kua ōvi mai ʼo te ʼaho ʼo Sehova moʼo fakahoko tana fakatotonu. Pea, ʼe nātou toe fakalogo lelei ki te fakatotonu ʼaē ʼa Paulo ia Loma 13:1: “Ko te nefesi fuli ke fakalogo ki te ʼu puleʼaga maʼoluga.” ʼO ʼuhiga mo te ʼu tagata pule, ʼe nātou foaki te fakaʼapaʼapa ʼaē ʼe tau mo nātou, kae ʼe mole nātou ʼatolasioʼi leva ia nātou. Ohage pe ko te lao ʼo te fenua ʼaē ʼe nātou maʼuʼuli ai, ʼe nātou muliʼi aipe te ʼu lao ʼa te Tohi-Tapu, ʼo ʼuhiga mo te agatonu, te moʼoni, pea mo te fakamaʼa pea mo faʼufaʼu te ʼu agapoto ʼaia takitokotahi ʼi tonatou maʼuli faka famili. ʼE nātou tokoni aipe ki niʼihi, ke nātou akoʼi pe ʼe feafeaʼi te fai ʼo te meʼa ʼaia. ʼE nātou maʼuli tokalelei mo te ʼu tagata fuli, neʼe mole ko he ʼu fua ʼaia mai he fakafeagai pe ʼe ko he ʼu fakamaveuveu faka politike. Ko te kau Fakamoʼoni ʼa Sehova ʼe nātou fia fakahā ko he kau faʼifaʼitakiʼaga ʼo ʼuhiga mo te fakalogo ki te ʼu lao ʼo te ʼu puleʼaga takimuʼa fakatagata, pea mo nātou talitali ki te Tuʼi Maʼoluga, ia te Tuʼi ʼAliki ko Sehova, ʼaē ka ina fakatuʼu te puleʼaga tokalelei haohaoa pea mo faitotonu ʼi te kele.

ʼE ina fai Tana fakatonutonu

7, 8. a) ʼE feafeaʼi anai te veuki ʼo te ʼu puleʼaga pea mo tanatou to ki te fakapōʼuli? b) Ko ai ʼaē ʼe fakahāhā e Soele ia ʼaho nei, pea koteā te ʼu tapuakina ʼe maʼu e te ʼu hahaʼi ʼaia ʼe mole tatau mo te mālama ʼaenī?

⁷ ʼAki te lea fakatātā maʼuhiga, ʼe foaki fakatomuʼa mai e Sehova te hoko ʼo tana fakatonutonu: “Ko te laʼā mo te māhina ʼe nā fakapōʼuli anai, pea mo puli anai te gigila ʼo te ʼu fetuʼu. Pea ʼe gugulu anai ia Sehova totonu mai Sione, pea mai Selusalemi ʼe ina fakalogo anai tona leʼo. Pea, ʼe mahino papau, ko te lagi mo te kele ʼe galulu anai; kae ko Sehova ko te fakatauga anai ʼa tana hahaʼi, pea ko he tule mālohi maʼa te ʼu foha ʼo Iselaele.” (Soele 3:15, 16). Ko te ʼu fakaʼamu ʼaē ʼo te malamanei ʼe hage ʼe hā ko he meʼa lelei ʼe liliu anai ʼo fakapōʼuli, ko he fakaʼiloga kovi, pea ko te ʼu faʼahiga meʼa ʼo te tuʼu ʼaenī ka veuki anai ohage ko he mafuike lahi! — Asea 2:20-22.

⁸ ʼE ko he fiafia moʼoni foki ʼaē ko Sehova ko te fakatauga pea mo te tule mālohi maʼa tana hahaʼi! Koteā tona tupuʼaga? Heʼe ko nātou pe tokotahi — ko te ʼu hahaʼi ʼo te kele katoa — neʼe nātou tali ki te ʼu palalau ʼaenī ʼa Sehova: “ ʼE koutou ʼiloʼi anai ko ʼau ia Sehova, tokotou ʼAtua.” (Soele 3:17). Ko te ʼuhiga ʼo te higoa ʼo Soele: “Ko Sehova e ʼAtua”, ʼe ina fakatātā lelei te kau Fakamoʼoni fakanofo ʼa Sehova ʼo te temi nei, ʼaē ʼe kaugana fakamalotoloto ʼo faka mafola te Pule ʼa Sehova (Fakatatau mo Malakia 1:11). Ka tou vakaʼi te ʼu folafola ʼo te fakakikite ʼa Soele, ʼe tou maʼu anai, pe neʼe feafeaʼi tana fakakikite te gāue ʼo te hahaʼi ʼa te ʼAtua ia ʼaho nei.

Te faga heʼe

9, 10. a) Koteā te tautea neʼe fakakikite e Soele? b) Neʼe feafeaʼi te toe toʼo e te tohi ʼo Fakahā te tautea ʼo te lea faka polofeta ʼa Soele, pea neʼe hoko feafeaʼi koa te tautea ʼaia ki te keletiate?

⁹ Koutou fakalogo nei “ki te folafola ʼa Sehova neʼe ina fai kia Soele”: “Koutou fagono ki te meʼa ʼaenī, kau tagata ʼāfea, pea mo avahi fuli ʼo koutou taliga, koutou fuli, hahaʼi ʼo te fenua! Ko te meʼa ʼaenī neʼe kua hoko koa ʼi tokotou ʼu ʼaho, pe ʼe ʼi te ʼu ʼaho ʼo tokotou ʼu hāko? Koutou fakamatala ki ʼa koutou ʼu foha totonu, pea ko ʼo kotou foha ki ʼonatou ʼu foha, pea ko ʼonatou foha ki te taʼiake ka hoa mai. Ko te meʼa ʼaē neʼe tuku e te ʼunufe, neʼe kai e te heʼe; pea ko te meʼa ʼaē neʼe tuku e te heʼe, neʼe kai e te ʼuhi kei meamea ʼo te heʼe; pea ko te meʼa ʼaē neʼe tuku e te ʼuhi kei meamea ʼo te heʼe, neʼe kai e te mogamoga.” — Soele 1:1-4.

¹⁰ ʼE ko he gāue fakatalakitupua ia, ko te meʼa ka fakamanatuʼi anai ʼi te ʼu temi fuli. Ko te kiʼi faga manu, ko te tuʼuga heʼe neʼe nātou maumauʼi te kele. Koteā te ʼuhiga ʼo te meʼa ʼaia? ʼE toe talanoa foki ʼi te tohi ʼo Fakahā 9:1-12 ʼo ʼuhiga mo te tautea faka heʼe ʼaē neʼe fekauʼi e Sehova ʼaki te “hau, ko te ʼaselo ʼo te luo,” ʼaē ko Sesu Kilisito. Ko tona huafa ko Abaddon (faka hepeleo) pea mo Apollyon (faka keleka) ko tona ʼuhiga “Faka ʼauha” pea mo “Tagata faka ʼauha”. ʼE fakatātā te ʼu heʼe ʼaia ki te toe ʼo te kau kilisitiano fakanofo ʼaē, ʼi te ʼaho ʼo te ʼAliki, neʼe fekauʼi fakatomuʼa moʼo maumauʼi katoa te nofoʼaga ʼo te keletiate ʼaē ko te lotu hala pea mo kalagaʼi te ʼaho lagavaka ʼo Sehova ke hoko mai kia nātou.

11. Neʼe feafeaʼi te fakamālohiʼi ʼo te ʼu heʼe ia ʼaho nei, pea ko ai tāfito ʼaē ʼe nātou tauʼi?

¹¹ Ohage ko tona fakamatala ʼi te tohi ʼo Fakahā 9:13-21, ʼe hoa mai ki te tautea faka heʼe te tautea lahi fakasolia. ʼE ko he meʼa moʼoni foki, ia ʼaho nei, ko te kiʼi lauʼi afe ʼo te kau kilisitiano fakanofo neʼe toe fakamālohiʼi e te toko fā miliona ko te “tahi ʼu ōvi” ʼo nātou tānaki fakatahi ko te foʼi tau solia maʼuhiga (Soane 10:16)! ʼE nātou logo tahi ʼi te faka mafola ʼo te ʼu fakamāu fakamanavahe ʼo ʼuhiga mo te kau ʼatolasio ʼo te keletiate pea mo nātou ʼaē ‘neʼe mole fia fakahemala mai tanatou ʼu fakapō, mai tanatou ʼu aga fakatemonio, mai tanatou folonikasio, mai tanatou ʼu aga kaihaʼa’. Ko te kau takitaki — ʼo te lotu katolika pea mo poletesita — neʼe nātou lagolago ʼaupito te ʼu tau fakapō ʼo te sekulo ʼaenī, feiā aipe pea mo te kau patele ʼaē neʼe holi kovi ki te ʼu tamasiʼi pea mo te kau evaselio agavale ʼi te televisio, ko te ʼu fakamāu ʼe fai tāfito kia nātou ʼaia.

12. He koʼe ʼe tau mo te kau takitaki ʼo te keletiate te ʼu fakamāu, pea koteā anai ka vave hoko kia nātou, feiā aipe mo te ʼu hahaʼi fuli ʼo te Papiloni Lahi?

¹² Ko he tautuku feiā ʼo te aga ʼa te “hahaʼi” takitaki ʼo te lotu hala, ʼe fakatatagi ai te ʼu fakatokaga ʼa Sehova: “Koutou ʼaʼala, kau konahihia, pea mo koutou fetagihi; pea mo koutou kekē, ia koutou fuli, kau faʼapuhi ʼo te vino, ʼuhi ko te vino lelei, heʼe kua toʼo ʼi tokotou gutu.” (Soele 1:5). ʼI te 20 sekulo ʼaenī, ko te lotu ʼo te keletiate neʼe ina fetogi te ʼu fakatuʼutuʼu maʼa ʼo te Folafola ʼa te ʼAtua ʼaki te ʼu agavale ʼaē kua fakagafua. ʼE hage foki ko te ʼu ʼatua ʼo te lotu hala pea mo nātou ʼe kau ki ai ʼe nātou fai ʼaupito te ʼu aga ʼo te malamanei, kae ʼe nātou toe utu pe foki te mahaki fakalaumālie pea mo fakasino. Kua vave pe, ohage ko tona fakamatala ʼi te tohi ʼo Fakahā 17:16, 17, ko te “manatu” ʼaē ʼa te ʼAtua ʼo ʼuhiga mo te kau mālohi faka politike ʼe nātou ʼohofi anai ʼo tauʼi te puleʼaga faka lotu ʼo te malamanei, ʼaē ko Papiloni Lahi pea mo maumauʼi nātou. ʼO ina sio ai leva ki te fakatonutonu ʼaē ʼa Sehova ʼo ʼuhiga mo ia, pea mo “ ʼala” mai leva mai tana konahiʼa fakamanavahe.

“Te hahaʼi tokolahi pea mo mālohi”

13. ʼE feafeaʼi “te tokolahi pea mo te mālohi” ʼo te ʼu faga heʼe ki te keletiate?

¹³ Neʼe toe fakahā e te polofeta ʼa Sehova, ko te faga heʼe ʼe hage “ko te hahaʼi tokolahi pea mo mālohi” pea ʼe teitei feiā foki mo te Papiloni Lahi (Soele 2:2). Ohage la, ko te hahaʼi takitaki ʼo te lotu hala, ʼe nātou hohaʼa ʼi te kua mafuli ʼa ʼihi ki te Putisi ʼi Saponia. Kae ia ʼaho nei, ko te toko 160 000 Fakamoʼoni ʼa Sehova Saponia kua hā ʼi te fēnua ʼaia pea mo nātou fai te ʼu ʼako ʼo te Tohi-Tapu e 200 000 ʼi te ʼu api ʼo te hahaʼi. ʼI Italia ko te toko 180 000 Fakamoʼoni ʼa Sehova. Pea kua ʼiloa ia ohage ko te lua lotu mālohi ʼaia ʼo hoa ki te kau katolika. ʼE ʼalu noa te mamahi ʼa te moseniolo katolika loma ʼi Italia ʼo ʼuhiga mo te haga ʼaē ʼa te kau Fakamoʼoni ʼa Sehova ʼo toʼo mai te ʼēkelesia te toko ‘10 000 katolika’ ʼi te ʼu taʼu fuli pea. ʼE fiafia te kau Fakamoʼoni ʼa Sehova ʼi te ʼomai ʼa te hahaʼi. — Isaia 60:8, 22.

14, 15. Neʼe feafeaʼi te fakamatala e Soele ʼo ʼuhiga mo te faga heʼe, pea ʼe hoko feafeaʼi te meʼa ʼaia ia ʼaho nei?

¹⁴ ʼI te fakamatala ʼaē ʼo ʼuhiga mo te faga heʼe ʼo te kau Fakamoʼoni fakanofo, ʼe fakahā fēnei ia Soele 2:7-9: “Ohage ko he ʼu tagata mālolohi ʼe nātou feleleʼi. Ohage ko he ʼu tagata tau ʼe nātou fekākeʼi ʼi te kaupā. Pea ʼe nātou tahi ʼolo takitokotahi ʼi tonatou ʼu ala, pea ʼe mole nātou fetogi tonatou ʼu ala. Pea ʼe mole nātou tahi fehumukiʼaki. Ohage ko he tagata mālohi ʼi tana haʼele, ʼe nātou haga ʼolo; pea kapau ko ʼihi ʼe to ʼi te lotolotoiga ʼo te ʼu mahafu tau, ko nātou ia ʼaē, ʼe mole tutuʼu mai nātou. ʼI te kolo ʼe nātou feʼohoʼaki. ʼE nātou feleleʼi ʼi te fuga kaupā. ʼE nātou fekākeʼi ʼi te ʼu fuga ʼapi. ʼI te ʼu matapā sioʼata ʼe nātou fehūfi ʼi ai ohage ko he tagata kaihaʼa.”

¹⁵ Ko te fakatātā lelei ʼo te kautau fakanofo ko te ʼu “heʼe”, ʼaē kua fakatahiʼi ki ai te toko fā miliona, ko te tahi ʼu ōvi! Mole he “kaupā” ʼa te kau fili faka lotu ʼe feala hana taʼofi nātou. ʼAki te lototoʼa, ʼe nātou “haga haʼele tuʼumaʼu fakalelei ʼi te ala totonu” ʼo nātou faka mafola ʼi te potu fuli pea mo fai ʼihi age gāue faka kilisitiano (Fakatatau mo Filipe 3:16). ʼI hanatou fai he meʼa fakafeagai, neʼe nātou tali lelei honatou matehi, ohage la ko te lauʼi afe kau Fakamoʼoni ʼaē neʼe ‘mamate ʼi te ʼu mahafu tau’, he neʼe mole nātou tali te pule ʼa te tagata katolika nasia Siamani ko Itilele. Ko te faga heʼe neʼe nātou fakamoʼoni ʼi “te kolo” ʼo te keletiate, ʼo nātou fakalaka ʼi te ʼu faigataʼa ia fuli, ʼo nātou fehūfi ki te ʼu loto fale ohage ko he tagata kaihaʼa moʼo tufa te ʼu miliona tohi faka tohi-tapu ʼi tanatou gāue faka mafola. Ko te finegalo ʼaē ʼo Sehova ke hoko te fakamoʼoni ʼaia, pea ʼe mole ʼi ai he mālohi ʼi te lagi pe ʼe ʼi te kele ʼe feala hana taʼofi te gāue ʼaia. — Isaia 55:11.

“Fonu ʼi te laumālie maʼoniʼoni”

16, 17. a) ʼE hoko anai ʼi te temi fea te ʼu palalau ʼaē ia Soele 2:28, 29? b) Ko te lea faka polofeta fea ʼa Soele neʼe mole hoko katoa ʼi te ʼuluaki sekulo?

¹⁶ ʼE ʼui e Sehova ki tana kau Fakamoʼoni: “ ʼE koutou ʼiloʼi anai ʼe ʼau nofo ʼi te lotolotoiga ʼo Iselaele [fakalaumālie], pea ko ʼau ia Sehova, tokotou ʼAtua, pea ʼe mole he tahi age ia te ʼau.” (Soele 2:27). Kua vave aʼu tana hahaʼi ki te meʼa maʼuhiga ʼaia mokā haga anai Sehova ʼo kamata fakahoko tana ʼu folafola ʼaē ia Soele 2:28, 29: “ ʼE hoko moʼoni anai ʼe ʼau tufa toku laumālie ki te kakano fuape, pea, ʼe mahino papau, ko takotou ʼu foha pea mo takotou ʼu ʼofafine ʼe nātou fakakikite anai.” Ko te meʼa ʼaia neʼe hoko ʼi te Penikosite ʼo te taʼu 33 ʼo totatou temi, ʼi te fakatahiʼi ʼaē e Sesu tana kau tisipulo ʼaē kua fakanofo “pea neʼe fonu ia nātou fuli te laumālie maʼoniʼoni”. ʼAki te mālohi ʼo te laumālie maʼoniʼoni, ʼe nātou faka mafola, pea ʼi te ʼaho pe ʼaia, “lagi ko te toko tolu afe nefesi neʼe fakakatoa kia nātou”. — Gāue 2:4, 16, 17, 41.

¹⁷ Ko he meʼa lelei foki, neʼe toe talanoa ia Petelo ʼo ʼuhiga mo te ʼu palalau ʼa Soele 2:30-32: “ ʼE ʼau foaki anai te ʼu fakakikite ʼi te lagi pea mo te kele, te toto, pea mo te afi, pea mo te ʼu tuʼuga ʼahu. ʼE fetogi anai te laʼā ʼo fakapōʼuli, pea mo te māhina ʼo toto, ʼi muʼa ʼo te aʼu mai ʼo te ʼaho ʼo Sehova, ʼaho lahi pea mo fakamanavahe. Pea ʼe hoko moʼoni anai ia ko ʼaē ʼe ina kalagaʼi te huafa ʼo Sehova ʼe hāo anai ia.” Neʼe hoko fakakoga te ʼu palalau ʼaia ʼi te temi neʼe tautea ai Selusalemi ʼi te taʼu 70 ʼo totatou temi.

18. Ko te temi fea ʼaē neʼe kamata hoko faka lahi age ai ia Soele 2:28, 29?

¹⁸ Kae neʼe kei toe age foki te hoko ʼo te ʼu palalau ʼaē ia Soele 2:28-32. Ko te lea faka polofeta ʼaia neʼe hoko fakatalakitupua talu mai te taʼu 1919 ʼo sepetepeli. ʼI te temi ʼaia, neʼe fai te fakatahi ʼa te hahaʼi ʼa Sehova ʼi Cedar Point, Ohio, ʼi Amelika. Neʼe ʼiloga lelei ai te laumālie ʼo te ʼAtua, neʼe ina fakaloto mālohiʼi tana kau kaugana fakanofo ke nātou fai te gāue faka mafola ʼaē ka mafola ʼo aʼu mai kia ʼaho nei. Neʼe fakalaka tona hahaʼi ʼi te toko 7 000 neʼe kau ki te fakatahi ʼi Cedar Point, pea neʼe tuputupu aipe, he neʼe ko te toko 10 650 158 neʼe kau ki te ʼaho Fakamanatu ʼo te mate ʼo Sesu ʼi te ʼaho 30 ʼo malesio 1991. Ia nātou ʼaia, neʼe ko te toko 8 850 kau kilisitiano fakanofo. ʼE ko he fakafiafia kia nātou ʼaia tanatou sisio ki te fua ʼo tanatou gāue, heʼe ko nātou ʼaē neʼe fekauʼi fakatomuʼa e te laumālie mālohi ʼaē ʼo Sehova! — Isaia 40:29, 31.

19. ʼI te kua ōvi mai te ʼaho ʼo Sehova, ʼe feafeaʼi anai hatatou aga takitokotahi?

¹⁹ Pea hoko age ki ai “te ʼaho ʼo Sehova, ʼaho lahi pea mo fakamanavahe” ʼaē ka ina maumauʼi anai te ʼu faʼahiga meʼa ʼo te tuʼu fakasatana ʼaenī (Soele 2:31). Ko he meʼa lelei foki, “ko ʼaē ʼe ina kalagaʼi te huafa ʼo Sehova ʼe hāo anai ia”. (Gāue 2:21.) ʼO feafeaʼi? ʼE ʼui mai e te ʼapositolo ko Petelo kia tatou ko te “ ʼaho ʼo Sehova ʼe haʼu anai ohage ko he tagata kaihaʼa” pea ʼe ina toe ʼui mai: “Pea kapau ko te ʼu meʼa fuli ʼaia ʼe tonu ke pulihiʼi, ko te faʼahiga tagata feafeaʼi koa ia koutou ʼo ʼuhiga mo te aga maʼa pea mo te aga faka lotu, ʼi takotou fakalogo mo takotou manatuʼi aipe te ʼaho ʼo Sehova.” Tou manatuʼi tuʼumaʼu ʼi totatou ʼatamai te ʼaho ʼo Sehova ʼaē kua ōvi mai, ʼe tou fiafia anai ʼi te hoko ʼo te fakapapau faitotonu ʼa Sehova ʼaē “ko te ʼu lagi foʼou pea mo te kele foʼou”. — 2 Petelo 3:10-13.

[Nota ʼi te lalo pasina]

ʼE feala koa ha kotou fakamatala?

◻ Koteā koa “te ʼaho ʼo Sehova”?

◻ ʼE feafeaʼi anai te utu e Sesu ‘te vite ʼo te kele’, pea koteā tona tupuʼaga?

◻ Neʼe feafeaʼi te tauteaʼi e te faga heʼe te keletiate talu mai te taʼu 1919?

◻ Neʼe tuku feafeaʼi mai e Sehova tona laumālie ki tana hahaʼi ʼi te taʼu 33 ʼo totatou temi, pea ʼi te taʼu 1919?