ʼE Fakahoko Te Fakamāu ʼi Te Telea Mālalo ʼo Te Fakatotonu
“Ke . . . hake [te ʼu puleʼaga] ki te telea mālalo ʼo Sosafate; heʼe ʼau nofo ai anai ʼi te potu ʼaia moʼo fakamāuʼi te ʼatu puleʼaga fuli.”—Soele 3:12.
1. He koʼe ʼe sio ia Soele ki he ʼu hahaʼi tokolahi ʼe fakatahitahi ʼi “te telea mālalo ʼo te fakatotonu”?
“KO TE tokolahi, ko te tokolahi ʼe nātou nonofo ʼi te telea mālalo ʼo te fakatotonu”! ʼE tou maʼu te ʼu palalau mālohi ʼaia ia Soele 3:14. He koʼe ʼe fakatahi feiā te ʼu hahaʼi tokolahi ʼaia? ʼE tali fēnei e Soele: “Kua ōvi mai te ʼaho ʼo Sehova.” ʼE ko te ʼaho lagavaka lahi ʼo Sehova—ko te ʼaho ʼaē ka ina fakahoko ai anai tana fakamāu ki te hahaʼi ʼaē neʼe fakafisi ki te Puleʼaga ʼa te ʼAtua ʼaē ʼe takitaki e Kilisito Sesu. Moʼo fakaʼosi, ʼe tonu ai leva ki te ʼu “ ʼaselo e toko fā” ʼaē ʼe talanoa ki ai ia Fakahā kapite 7, ke nātou tuku age “te ʼu matagi ʼaē e fā ʼo te kele,” pea ʼe kamata ai anai te “mamahi lahi, [ʼaē] ʼe mole hona tatau kua hoko talu mai te kamataʼaga ʼo te malamanei ʼo kaku mai ki te temi nei, kailoa, pea ʼe mole toe hoko anai he tahi mamahi feiā.”—Fakahā 7:1; Mateo 24:21.
2. (a) He koʼe ʼe tonu te fakahigoaʼi ʼo te koga meʼa ʼaē ʼe fakahoko ai te fakamāu ʼa Sehova, ko “te telea mālalo ʼo Sosafate”? (b) Koteā te meʼa lelei ʼaē neʼe fai e Sosafate ʼi te temi ʼaē neʼe ʼohofiʼi ai tona puleʼaga?
2 Ia Soele 3:12, ʼe ʼui ai ko te fakamāu ʼaia ʼe hoko ʼi “te telea mālalo ʼo Sosafate.” ʼO ʼalutahi mo te faʼahi ʼaia, ʼi te temi ʼaē neʼe tokakovi ai Suta, neʼe fakahoko e Sehova tana fakamāu moʼo hāofaki te Hau agalelei ko Sosafate, ko tona faka ʼuhiga “Ko Sehova ʼe Tuʼi Fakamāu.” Kapau ʼe tou vakaʼi te ʼu meʼa ʼaē neʼe hoko ʼi te temi ʼaia, pea ʼe tou mahino lelei anai ki te meʼa ʼaē kua vave hoko ʼi totatou temi. ʼE tou maʼu tona fakamatala ʼi te koga tohi ʼo 2 Fakamatala kapite 20. ʼI te ʼuluaki vaega ʼo te kapite ʼaia, ʼe tou lau ai “ko te ʼu foha ʼo Moape pea mo te ʼu foha ʼo Amone, pea mo ʼihi tagata Amonime, neʼe nātou ʼōmai kia Sosafate ke nātou fetauʼaki.” Koteā te meʼa ʼaē neʼe fai e Sosafate? Neʼe ina fai te meʼa ʼaē ʼe fai tuʼumaʼu e te hahaʼi kaugana agatonu ʼa te ʼAtua mokā nātou tau mo he ʼu faigataʼaʼia. Neʼe kumi tokoni kia Sehova, ʼo faikole mālohi fēnei: “Ê tomatou ʼAtua, ʼe mole ke fakahoko anai koa te fakamāu kia nātou? Heʼe mole he mālohi ia mātou ʼi muʼa ʼo te tokolahi ʼaē ʼe ʼōmai ʼo fakafeagai mai kia mātou; pea ko mātou ʼe mole mātou ʼiloʼi pe koteā te meʼa ʼaē ʼe tonu ke mātou fai, kae ko ʼomātou mata ʼe fakahaga atu kia te koe.”—2 Fakamatala 20:12.
ʼE Tali e Sehova Ki He Faikole
3. Koteā te ʼu fakatotonu ʼaē neʼe fai e Sehova kia Suta ʼi te temi ʼaē neʼe ʼohofiʼi ai nātou e te ʼu puleʼaga ʼo te ʼu tafaʼaki?
3 Neʼe tali e Sehova ki te fehuʼi ʼaē neʼe lagaʼi kia “nātou fuli ʼo Suta ʼaē neʼe tutuʼu ia muʼa ʼo Sehova, māʼia mo tanatou ʼu tamaliki liliki, mo tanatou ʼu ʼohoana pea mo tonatou ʼu foha.” (2 Fakamatala 20:13) Ohage pe ko te fakaʼaogaʼi e Sehova tana “tagata kaugana agatonu mo poto” ia ʼaho nei, ʼo toe feiā aipe ko Ia ʼaē ʼe fagono ki te faikole neʼe ina foaki tona mālohi ki te polofeta Levite ko Saasiele, ke Ina tali ki te fehuʼi ʼa Sosafate ia muʼa ʼo nātou ʼaē neʼe fakatahitahi. (Mateo 24:45) ʼE tou lau fēnei: “Koʼeni te meʼa ʼaē neʼe ʼui atu e Sehova kia koutou, ‘ ʼAua naʼa koutou matataku peʼe koutou manavahe ʼuhi ko te toe tokolahi ʼaia; he ko te tau ʼe mole ʼa koutou, kae ʼa te ʼAtua. . . . ʼE mole ʼaoga anai ke koutou tau ʼi te lakaga ʼaia. Koutou tutuʼu ki ʼokotou tuʼulaga, koutou tutuʼu ai, pea koutou mamata ki te fakamaʼuli ʼa Sehova maʼa koutou. . . . ʼAua naʼa koutou matataku pea ʼaua naʼa koutou manavahe. ʼI ʼapogipogi koutou ʼolo ʼo fakafeagai kia nātou, pea ko Sehova ʼe kau anai mo koutou.’ ”—2 Fakamatala 20:15-17.
4. Koteā te meʼa ʼaē neʼe fakamaʼua e Sehova ki tana hahaʼi ke nātou fai ʼo ʼuhiga mo tonatou ʼu fili?
4 Neʼe mole ʼui pe e Sehova ki te Hau ko Sosafate pea mo tana hahaʼi ke nātou heheka ʼo talitali ke hoko he milakulo moʼo hāofaki ʼo nātou. Neʼe tonu ke nātou fai he ʼu fakatuʼutuʼu moʼo tauʼi tonatou ʼu fili. Ko te hau pea mo ‘nātou fuli ʼo Suta, māʼia mo tanatou tamaliki liliki, mo tonatou ʼu ʼohoana pea mo tonatou ʼu foha,’ neʼe nātou fakahā tanatou tui mālohi ʼi tanatou ʼaʼala ake ka kei hegihegi pea mo nātou ʼolo ʼo fakafetaulaki mo te hahaʼi ʼaē neʼe ʼōmai ʼo ʼohofiʼi nātou. ʼI tanatou lolotoga haʼele, neʼe haga foaki e te hau he ʼu tokoni pea mo he ʼu fakaloto mālohi, ʼo ina uga fēnei nātou: “Koutou tui kia Sehova tokotou ʼAtua ke koutou maʼuʼuli fualoa. Koutou tui ki tana kau polofeta pea ʼe koutou mālo anai.” (2 Fakamatala 20:20) Ko te tui kia Sehova pea mo tana kau polofeta, neʼe ko te puleʼaki ʼaia ʼaē neʼe feala ai ke nātou mālo. ʼO toe feiā aipe ia ʼaho nei ʼi tatatou haga gāue kia Sehova, ʼaua naʼa tou lotolotolua ʼo ʼuhiga mo te mālo ʼaē ka ina foaki mai anai kia tatou ʼuhi ko tatatou tui kia te ia!
5. Koteā te gāue ʼaē ʼe fai e te kau Fakamoʼoni ʼa Sehova ia ʼaho nei moʼo fakavikiviki kia Sehova?
5 Ohage ko te kau Sutea ʼo te temi ʼo Sosafate, ʼe tonu ke tou “fakavikiviki kia Sehova, he ko tona lotoʼofa ʼe aʼu ki he ʼu temi ʼe mole honatou gataʼaga.” ʼE tou vikiviki feafeaʼi kia ia? ʼE tou fai ʼaki tatatou faiva ʼi te gāue fai faka mafola ʼo te Puleʼaga! Ohage pe ko tona fai e te kau Sutea ʼaia ʼaē neʼe nātou “kamata ʼaki he kalaga fakafiafia pea mo he fakavikiviki,” ʼe tou hilifaki he ʼu gāue ki tatatou tui. (2 Fakamatala 20:21, 22) Ei, tou fakahā he tui fakamalotoloto ʼi te kua vave tauʼi e Sehova tona ʼu fili! Tatau aipe peʼe hage ʼe tuai te hoko mai ʼo te ʼaho ʼaia, kae tou lotomālohi ʼo tou kātaki, pea mo tou maʼuliʼi tatatou tui ohage pe ko tona fai e tana hahaʼi ʼi te ʼu potu maveuveu ʼo te kele ia ʼaho nei. ʼI ʼihi fenua ʼaē ʼe mālohi ai te ʼu fakataga, te ʼu agamālohi, te ʼu hoge pea mo te ʼu fihifihia faka ekonomika, ko te kau kaugana agatonu ʼa te ʼAtua ʼe nātou maʼu he ʼu fua lelei, ohage ko tona hā mai ʼi te tohi Annuaire des Témoins de Jéhovah 1998.
ʼE Hāofaki e Sehova Tana Hahaʼi
6. ʼE tokoni feafeaʼi tatatou tui mālohi ke tou nofo agatonu ia ʼaho nei?
6 Neʼe faigaʼi e te ʼu puleʼaga pagani ʼo te ʼu tafaʼaki ʼo Suta ke nātou ʼohofiʼi te hahaʼi ʼa te ʼAtua, kae neʼe fakahā e te hahaʼi kaugana ʼa Sehova he tui mālohi ʼo nātou hivaʼi he ʼu fakavikiviki kia te ia. ʼE toe feala foki mo tatou ke tou fakahā he tui feiā ia ʼaho nei. ʼI tatatou fai tuʼumaʼu he ʼu gāue ʼe fakavikivikiʼi ai ia Sehova, ʼe tou fakamālohiʼi ai tatatou teu tau fakalaumālie, ʼo mole feala ai ki te ʼu kākā ʼa Satana ke fakatupu kovi kia tatou. (Efesi 6:11) Ko he tui mālohi ʼe ina tāʼofi anai tatou ke ʼaua naʼa fakaleluʼi tatou e te ʼu fakafiafia heʼe ʼaoga, mo te mānumānu koloā ʼa te hahaʼi ʼo te mālama ʼaenī, pea mo tanatou mole tokagaʼi te ʼu meʼa ʼaē ʼe lolotoga hoko ʼi te malamanei. Ko te tui mālohi ʼaia ʼe tokoni anai kia tatou ke tou haga tauhi mo “te tagata kaugana agatonu mo poto,” ʼo tou kai tuʼumaʼu te meʼa kai fakalaumālie ʼaē ʼe ina foaki mai “ ʼi tona temi totonu.”—Mateo 24:45.
7. Neʼe tali feafeaʼi e te kau Fakamoʼoni ʼa Sehova te ʼu fakafeagai kehekehe ʼaē neʼe fai kia nātou?
7 Ko tatatou tui ʼaē ʼe fakatafito ki te Tohi-Tapu, ʼe ina fakamālohiʼi anai tatou ke tou nonofo agatonu mokā hoko anai kia tatou te fehiʼa ʼo nātou ʼaē ʼe nātou maʼu te manatu ʼo te “tagata kaugana agakovi” ʼaē ʼe talanoa ki ai ia Mateo 24:48-51. Ko te kau ʼaposita ʼe nātou fakahoko te lea faka polofeta ʼaia, pea ia ʼaho nei, ʼe lahi te ʼu fenua ʼaē ʼe nātou faka mafola ai he ʼu loi pea mo he ʼu fakafeagai, ʼo nātou faifaitahi māʼia mo nātou ʼaē ʼe maʼu tuʼulaga ʼi te ʼu puleʼaga. Neʼe tali e te kau Fakamoʼoni ʼa Sehova ki te ʼu loi ʼaia mokā neʼe ʼaoga, ‘ ʼo nātou hāofaki pea mo fakamoʼoni ki te logo lelei ia muʼa ʼo te lao,’ ohage ko tona ʼui ia Filipe 1:7. Ohage la ʼi te ʼaho 26 ʼo Sepetepeli 1996, ʼi te fakamāu ʼaē neʼe hoko ʼi Keleka, ko te ʼu tuʼi fakamāu e toko hiva ʼo te Telepinale ʼo Eulopa ki te Faʼitaliha ʼo te Tagata ʼaē ʼi Strasbourg, neʼe nātou faka tui, “ko te kau Fakamoʼoni ʼa Sehova ʼe feala ke lau ko he ‘lotu ʼe ʼiloʼi lelei e te hahaʼi,’ ” pea ʼe tonu ke faʼifaʼitaliha ʼi tana ʼu manatu, mo tana ʼu akonaki, pea ke ina maʼu te fealagia ʼaē ke ina faka mafola tana tui. Kae ko te kau ʼaposita, ʼe fakamāuʼi fēnei nātou e te ʼAtua: “Neʼe hoko kia nātou te meʼa ʼaē ʼe ʼui e te tāʼaga lea moʼoni: ‘Kua toe liliu te kuli ki tona lua, pea ko te sigamanu ʼaē neʼe kua ʼosi fakamaʼa kua [toe liliu ʼo] teka makafulifuli ʼi te pela.’ ”—2 Petelo 2:22.
8. ʼI te ʼu ʼaho ʼo Sosafate, neʼe fakahoko feafeaʼi e Sehova tana fakamāu ki te ʼu fili ʼo Tana hahaʼi?
8 ʼI te ʼu ʼaho ʼo Sosafate, neʼe fakahoko e Sehova tana fakamāu kia nātou ʼaē neʼe nātou fia fakamamahiʼi Tana hahaʼi. ʼE tou lau fēnei: “Neʼe fakanono e Sehova hana ʼu tagata ke nātou fakafeagai ki te ʼu foha ʼo Amone, mo Moape pea mo te ʼu hahaʼi ʼo te ʼu koga meʼa moʼugaʼia ʼo Seile ʼaē neʼe ʼōmai ki Suta, pea neʼe nātou fetauʼaki. Pea ko te ʼu foha ʼo Amone pea mo Moape neʼe nātou tutuʼu ʼo fakafeagai ki te hahaʼi ʼo te potu fenua moʼugaʼia ʼo Seile moʼo fakaʼauha nātou pea mo matehi nātou; ʼi tanatou ʼosi matehi te hahaʼi ʼo Seile, pea neʼe nātou fetokoniʼaki ke nātou fetāmateʼiʼaki.” (2 Fakamatala 20:22, 23) Neʼe fakahigoaʼi e te kau Sutea te koga meʼa ʼaia ko te Telea Mālalo ʼo Pelaka, ʼaē ʼe faka ʼuhiga ki te “Tapuakina.” ʼO toe feiā aipe mo te temi ʼaenī, ka fakahoko anai e Sehova tana fakamāu ki tona ʼu fili, pea ʼe hoko ai anai he ʼu tapuakina lahi maʼa tana hahaʼi.
9, 10. Ko ai te hahaʼi ʼaē ʼe tāu mo feʼauga ke fakamāuʼi nātou e Sehova?
9 Kae ʼe feala pe ke tou fai te fehuʼi ʼaenī, Ko ai ia ʼaho nei ʼaē ʼe tonu ke hoko ki ai te fakamāu ʼa Sehova? ʼE tonu ke tou toe vakaʼi te lea faka polofeta ʼa Soele moʼo tali ki te fehuʼi ʼaia. ʼE talanoa ia Soele 3:3 ki te ʼu fili ʼo tana hahaʼi ʼaē “neʼe nātou foaki te tamasiʼi tagata ki te paomutu, pea neʼe nātou fakatau te tamasiʼi fafine ki he moʼi vino.” Ei, ʼe nātou meʼa noaʼi ʼaupito te hahaʼi kaugana ʼa te ʼAtua, ʼo nātou ʼui ko tonatou ʼu fānau ʼe feʼauga pe moʼo totogi ʼo he fafine paomutu peʼe ko he moʼi ipu vino. ʼE tonu anai ke fakamāuʼi nātou ʼuhi ko te faʼahi ʼaia.
10 ʼE toe tāu mo feʼauga ke fakamāuʼi ia nātou ʼaē ʼe fai folonikasio ʼi te faʼahi fakalaumālie. (Fakahā 17:3-6) Ko te fakamāu ʼaia ʼe tāu tāfito mo nātou ʼaē ʼe nātou fakaneke te ʼu puleʼaga ke nātou fakatagaʼi te kau Fakamoʼoni ʼa Sehova pea mo tāʼofi tanatou gāue, ohage ko tona fai e ʼihi takitaki lotu ʼi Eulopa ʼo te potu Hahake, ʼaē ʼe nātou uga te hahaʼi ke nātou fakatupu maveuveu. ʼE fakahā e Sehova tana loto mālohi ʼaē ke ina fakaʼauha te hahaʼi heʼe faitotonu ʼaia ʼaē ʼe fakatupu maveuveu.—Soele 3:4-8.
“Koutou Tāpuhā Te Tau!”
11. Koteā te pāui ʼaē ʼe fai e Sehova ki tona ʼu fili ʼo ʼuhiga mo te tau?
11 Ki muli age, ko Sehova ʼe ina pāui tana hahaʼi ke nātou kalagaʼi te meʼa ʼaenī ki te ʼu puleʼaga: “Koutou tāpuhā te tau! Koutou fakaʼala te ʼu tagata mālohi! Ke nātou hoho mai! Ke nātou hahake mai, te kau tagata tau fuli!” (Soele 3:9) ʼE ko he kalaga ʼaia ki he tau makehe—ko he tau faitotonu. Ko te kau Fakamoʼoni agatonu ʼa Sehova, ʼe nātou fakaʼaogaʼi he ʼu mahafu fakalaumālie moʼo tali ki te fakafifihi ʼaē ʼe fai kia nātou, ʼo nātou fakafeagai ki te ʼu loi ʼaki te moʼoni. (2 Kolonito 10:4; Efesi 6:17) Mole tuai, pea ʼe tāpuhā anai e te ʼAtua “te tau ʼo te ʼaho lahi ʼo te ʼAtua Māfimāfi.” (Fakahā 16:14) ʼE mole toe maʼu anai ʼi te kele ia nātou fuli ʼaē ʼe fakafeagai ki te pule ʼa te ʼAtua. Ko tana hahaʼi ʼi te kele, ʼe mole nātou kau anai ki te tau ʼaia. ʼI tona ʼaluʼaga moʼoni pea ʼi tona ʼaluʼaga fakatā, kua nātou ‘tuki tanatou ʼu heletā ke liliu ko he ʼu huo fuli kele pea mo tanatou ʼu tao ke liliu ko he ʼu pipi moʼo pakimaga.’ (Isaia 2:4) Kae ʼe kole e Sehova ki te ʼu puleʼaga ke nātou fai te aga ʼaē ʼe fakafeagai ki te faʼahi ʼaia: “Koutou tuki ʼakotou huo fuli kele ke liliu ko he ʼu heletā, pea mo ʼakotou ʼu pipi tuʼusi ke liliu ko he ʼu tao.” (Soele 3:10) ʼE ina fakaafe nātou ke nātou fakaʼaogaʼi tanatou ʼu mahafu tau fuli ki te tau ʼaia. Kae ʼe mole nātou mālo anai, heʼe ʼa Sehova te tau pea mo te mālo!
12, 13. (a) Logope la kua ʼosi te Tau Momoko, neʼe fakahā feafeaʼi e ʼihi fenua ʼe kei nātou teuteu ki te tau? (b) Koteā te meʼa ʼaē ʼe mole teuteu kiai te ʼu puleʼaga?
12 ʼI te kamata ʼo te ʼu taʼu 1990, neʼe tala e te ʼu puleʼaga kua ʼosi te Tau Momoko. ʼAki te faʼahi ʼaia, neʼe fakahoko koa e te Kautahi ʼo te ʼAtu Puleʼaga Fakatahi tana fakatuʼutuʼu tāfito ʼaē ko te fakatuʼu ʼo te tokalelei pea mo te fīmālie? Kailoa ia! Koteā ʼaē ʼe hā mai ʼi te ʼu meʼa ʼaē neʼe hoko ʼi Burundi, mo te Lepupilika Temokalatike ʼo Congo, mo Ilake, mo Lipelia, mo Rwanda, mo Somalia, pea mo te Iukoselavia ʼāfea? ʼO mulimuli ki te ʼui ʼaē ʼa Selemia 6:14, ʼe nātou ʼui fēnei: “ ‘Kua tokalelei! Kua tokalelei!’ kae ʼe mole ʼi ai he tokalelei.”
13 Logope la neʼe fakagata te ʼu tau ʼi ʼihi fenua, kae ʼe kei fakataupiepie te ʼu fenua ʼo te Kautahi ʼo te ʼAtu Puleʼaga Fakatahi ʼo faʼu he ʼu mahafu tau foʼou. ʼE haga tānaki ʼihi fenua he ʼu tuʼuga mahafu tau faka nukeleʼea. ʼE faʼu e ʼihi puleʼaga he ʼu mahafu chimiques pea mo bactériologiques moʼo matehi ʼaki te hahaʼi tokolahi. ʼI te fakatahitahi ʼa te ʼu puleʼaga ʼaia ʼi te potu fakatātā ʼaē ʼe higoa ko Halamaketone, ʼe ina manukiʼi nātou ʼo ina ʼui fēnei: “Kae ke ʼui fēnei ia ia ʼaē ʼe vaivai: ‘Ko ʼau ko te tagata mālohi.’ Koutou tokoni mai pea mo koutou ʼōmai, ia koutou fuli ʼu puleʼaga ʼo te ʼu tafaʼaki, pea koutou fakatahitahi.” ʼOsi ʼaia, pea ʼui e Soele totonu ʼi te vaega ʼaia: “Ki te koga meʼa ʼaia, Ê Sehova, fakahifo mai kiai tau ʼu hahaʼi mālohi.”—Soele 3:10, 11.
ʼE Puipui e Sehova Tana Hahaʼi
14. Ko ai te hahaʼi mālohi ʼa Sehova?
14 Ko ai te hahaʼi mālohi ʼa Sehova? ʼI te Tohi-Tapu, ko te ʼAtua moʼoni ʼe fakahigoa tuʼa 280 ko “Sehova ʼo te ʼatu kautau.” (2 Hau 3:14) Ko te ʼu kautau ʼaia ʼe ko te ʼu ʼaselo tokolahi ʼaē ʼe nonofo ʼi selo pea ʼe nātou teuteu ke nātou fai te meʼa ʼaē ka fakatotonu anai e Sehova kia nātou. ʼI te temi ʼaē neʼe faiga ai e te kau Silia ke nātou puke ia Eliseo, neʼe avahi e Sehova te ʼu mata ʼo te tagata kaugana ʼa Eliseo, ʼo feala hana sio pe koʼe ʼe mole mālo anai te ʼu kautau Silia ʼaia: “Koʼeni! ko te koga meʼa moʼugaʼia neʼe fonu ai te ʼu hōsi pea mo te ʼu saliote tau afi ʼo nātou takatakai ia Eliseo.” (2 Hau 6:17) Neʼe ʼui e Sesu, neʼe feala ke ina pāui ki tana Tāmai ke hifo ifo “he ʼu lesio ʼaselo ʼe fakalaka ʼi te hogofulu-ma-lua.” (Mateo 26:53) ʼI tana talanoa ʼo ʼuhiga mo te haʼu ʼa Sesu ʼi tana hōsi moʼo fakahoko te fakamāu ʼi Halamaketone, ʼe ʼui fēnei e te tohi ʼo Fakahā: “Ko te ʼu kautau ʼaē neʼe ʼi selo, neʼe nātou mulimuli kia te ia ʼi te ʼu hōsi hina, pea neʼe nātou kofuʼi te lino mānifi hina pea mo maʼa. Pea ʼe haʼu mai tona gutu te heletā loa pea mo māsila, ke ina tāʼi ʼaki te ʼu puleʼaga, pea ʼe ina takitaki anai nātou ʼaki te tokotoko ukamea. ʼE ina toe molomoloki foki mo te meʼa lomi vite ʼo te ʼita ʼo te hāūhāū ʼo te ʼAtua te Māfimāfi.” (Fakahā 19:14, 15) ʼE ʼui ʼo ʼuhiga mo te meʼa lomi vite fakatā ʼaia, ʼe ko “te meʼa lomi vite lahi ʼo te hāūhāū ʼo te ʼAtua.”—Fakahā 14:17-20.
15. ʼE fakamatala feafeaʼi e Soele te tau ʼaē ʼe fakahoko e Sehova ki te ʼu puleʼaga?
15 Kae ʼe tali feafeaʼi e Sehova te kole age ʼa Soele ke ina fakahifo mai tana ʼu hahaʼi mālohi ki te tau? ʼE tou maʼu tona tali ʼi te fakamatala ʼaenī: “Ke ʼaʼala te ʼu puleʼaga pea mo nātou hake ki te telea mālalo ʼo Sosafate; heʼe ʼi te potu ʼaia, ʼe ʼau nofo ai anai moʼo fakamāuʼi te ʼatu puleʼaga fuli ʼo te ʼu tafaʼaki. Koutou ʼai te hele piko, heʼe kua momoho te taʼukai. Koutou ʼōmai, koutou hihifo mai, heʼe kua fonu te meʼa lomi vite. Ei kua fonu gutugutu te ʼu tane; heʼe kua mahu tanatou agakovi. Ko te tokolahi, ko te tokolahi ʼe nātou nonofo ʼi te telea mālalo ʼo te fakatotonu, heʼe kua ōvi mai te ʼaho ʼo Sehova ʼi te telea mālalo ʼo te fakatotonu. ʼE mahino ia, ʼe fakapōʼuli anai te laʼā mo te māhina, pea ʼe mole toe gigila anai te ʼu fetuʼu. Pea ʼe gugulu anai ia Sehova totonu mai Sione, pea mai Selusalemi ʼe ina fai anai ke logo tona leʼo. Pea ko te lagi pea mo te kele ʼe galulu moʼoni anai.”—Soele 3:12-16.
16. Ko ai ia nātou ʼaē ka fakahoko anai ki ai e Sehova tana fakamāu?
16 ʼO mulimuli ki te faka ʼuhiga ʼo te higoa ʼo Sosafate ʼaē “Ko Sehova ʼe Tuʼi Fakamāu,” ko Sehova ʼAtua ʼe ina faka lākatonuʼi anai tona pule faʼifaʼitaliha ʼi te temi ʼaē ka ina fakahoko ai anai tana fakamāu. ʼE hā mai ʼi te lea faka polofeta ʼaia, ko nātou ʼaē ka fakamāuʼi ʼe ‘ko te tokolahi, ko te tokolahi ʼe nātou nonofo ʼi te telea mālalo ʼo te fakatotonu.’ ʼE kau anai kia nātou ʼaia te hahaʼi fuli ʼaē ʼe kei nātou lagolago anai ki te lotu hala. ʼE toe kau ai anai mo nātou ʼaē ʼe talanoa ki ai te lua Pesalemo—ko te ʼu fenua, mo te ʼu puleʼaga, mo te ʼu hau ʼo te kele, pea mo te kau ʼaliki—ʼaē neʼe nātou manako ki te mālama fakahehema ʼaenī ka mole nātou fia ‘tauhi kia Sehova ʼi te manavasiʼi.’ Ko nātou ʼaia ʼe mole nātou fia ‘lagolago ki te ʼalo.’ (Pesalemo 2:1, 2, 11, 12) ʼE mole nātou fakamoʼoni kia Sesu ʼi tona ʼuhiga Hau ʼaē ʼe gāue fakatahi mo Sehova. Tahi ʼaē, ko te ʼu hahaʼi tokolahi ʼaē ka fakaʼiloga anai ki te fakaʼauha, ʼe kau ai anai mo nātou fuli ʼaē ka faka ʼuhiga e te Hau kolōlia ʼaia ko he ʼu “tao.” (Mateo 25:33, 41) Ka hoko anai te temi ʼaē ka gugulu ai ia Sehova mai te Selusalemi ʼaē ʼe ʼi Selo, pea ko tana Hau ʼaē kua fakanofo ʼe heka anai ki tana hōsi moʼo fakahoko tana fakamāu. ʼE mahino ia, ʼe galulu anai te lagi pea mo te kele! Kae ʼe tou maʼu te fakapapau ʼaenī: “Ko Sehova ʼe liliu anai ko he hāofakiʼaga ʼo tana hahaʼi, pea ko he kolotau maʼa te ʼu foha ʼo Iselaele.”—Soele 3:16.
17, 18. Ko ai ia nātou ʼaē ka hāo ʼi te mamahi lahi, pea koteā te ʼaluʼaga ʼaē ka nātou maʼuʼuli ai anai?
17 ʼE ʼui ia Fakahā 7:9-17, ko nātou ʼaē ʼe hāo ʼi te mamahi lahi ʼe ko he “toe hahaʼi tokolahi” ʼe faʼufaʼu e te hahaʼi ʼaē ʼe nātou tui ki te ʼuhiga faitotogi ʼo te taʼataʼa ʼo Sesu. ʼE puipui anai te hahaʼi ʼaia ʼi te ʼaho ʼo Sehova, mokā fakahoko anai te fakamāu ki te hahaʼi fakatupu maveuveu ʼaē ʼe talanoa ki ai te lea faka polofeta ʼo Soele. ʼE ʼui fēnei e Soele kia nātou ʼaē ka hāo anai: “Pea ʼe tonu anai ke koutou ʼiloʼi ko ʼau ia Sehova ko tokotou ʼAtua ʼaē ʼe nofo ʼi Sione toku moʼuga maʼoniʼoni,”—te nofoʼaga ʼo Sehova ʼaē ʼe ʼi selo.—Soele 3:17a.
18 ʼE fakahā mai e te lea faka polofeta, ko te potu ʼaē ka puleʼi anai e te Puleʼaga ʼo selo ʼa te ʼAtua, “ ʼe tonu anai ke liliu ko he koga meʼa maʼoniʼoni; pea ko te kau matāpule, ʼe mole nātou fakalaka ai anai.” (Soele 3:17b) ʼI selo pea ʼi te kele ʼaē ka puleʼi anai e te Puleʼaga ʼaia ʼaē ʼi selo, ʼe mole ʼi ai anai he matāpule, heʼe logo tahi anai te hahaʼi ʼi te tauhi maʼa.
19. ʼE fakamatala feafeaʼi e Soele te maʼuli fiafia ʼa te hahaʼi ʼa te ʼAtua ia ʼaho nei?
19 Māʼiape la mo te temi ʼaenī, ʼe mahu te tokalelei ʼa te hahaʼi ʼa Sehova ʼaē ʼe nonofo ʼi te kele. ʼAki he logo tahi, ʼe nātou kalagaʼi tana ʼu fakamāu ʼi te ʼu fenua e 230 tupu, pea ʼi te ʼu lea kehekehe e 300 tupu. ʼE matalelei te fakakikite ʼaē neʼe fai e Soele ʼo ʼuhiga mo te haʼele lelei ʼo tanatou gāue, ʼi tana ʼui ʼaē: “Pea ʼi te ʼaho ʼaia ʼe tonu anai ke hali te vino mālie mai te ʼu moʼuga, pea ʼe hali huʼa pipi anai te ʼu sia, pea ʼe tafe vai anai te ʼu vaitafe fuli ʼo Suta.” (Soele 3:18) Ei, ko Sehova ʼe ina haga foaki anai ki tana kau atolasio ʼaē ʼi te kele he ʼatu tapuakina, mo te fīmālie, pea mo te ʼu meʼa kai fakalaumālie ʼe hage ko he vaitafe ʼo te moʼoni taulekaleka. ʼI te temi ʼaia, kua faka lākatonuʼi katoa anai e Sehova tona pule faʼifaʼitaliha ʼi te telea mālalo ʼo te fakatotonu, pea ʼe mahu anai te fiafia ʼi te nofo ʼa Sehova mo tana hahaʼi ʼo talu ai.—Fakahā 21:3, 4.
ʼE Kei Koutou Manatuʼi Koa?
◻ Neʼe hāofaki feafeaʼi e Sehova tana hahaʼi ʼi te ʼu ʼaho ʼo Sosafate?
◻ Kia Sehova, ko ai ʼaē ʼe tāu mo feʼauga ke fakaʼauha ʼi “te telea mālalo ʼo te fakatotonu”?
◻ Ko ai te hahaʼi mālohi ʼa te ʼAtua, pea koteā te meʼa ʼaē ka nātou fai anai ʼi te tau ʼa te ʼAtua?
◻ Koteā te fiafia ʼaē ʼe maʼu e te kau atolasio agatonu?
[Paki ʼo te pasina 21]
Neʼe ʼui fēnei kia Suta: ‘ ʼAua naʼa koutou matataku, heʼe mole ʼa koutou te tau kae ʼe ko te tau ʼa te ʼAtua’
[Paki ʼo te pasina 23]
ʼE ʼui e Sehova ki tona ʼu fili ke nātou ‘tuki tonatou ʼu huo fuli kele ke liliu ko he ʼu heletā’
[Paki ʼo te pasina 24]
ʼE talanoa te Tohi-Tapu ki he toe hahaʼi tokolahi ʼe nātou hāo ʼi te mamahi lahi