Tou Faʼifaʼitakiʼi Te Kau Polofeta—Soele
1. ʼE tou lava faʼifaʼitakiʼi feafeaʼi ia te agavaivai ʼa Soele moka tou faifakamafola?
1 Neʼe ko ai ia te polofeta ko Soele? Neʼe ina fakaha pe ia ʼe ko ia ko “te foha o Petuele.” (Soe. 1:1) Neʼe fakamaʼuhigaʼi e te polofeta agavaivai ʼaia ia te logo ʼa Sehova, kaʼe mole ko tona ʼuhiga tagata ʼave logo. ʼO toe feia aipe kia tatou, ka tou faifakamafola, ʼe tonu anai ke tou fakakololiaʼi ia Sehova pea mo fakamaʼuhigaʼi tana Tohi-Tapu, kaʼe mole ko tatou totonu. (1 Ko. 9:16; 2 Ko. 3:5) Pea tahi, ʼe feala ke tou maʼu ia te malohi mai te logo ʼae ʼe tou tala. Ia ʼaho nei, ko te ʼu faʼahi fea ʼo te lea fakapolofeta ʼa Soele, ʼe feala ke ina uga ai tatou ke tou faʼafai pea mo maʼu he ʼamanaki lelei?
2. Kotea ʼae ʼe tonu ke tou fai mo kapau ʼe tou tokagaʼi kua ovi mai te ʼaho ʼo Sehova?
2 “Kua Ovi Mai Te Aho o [Sehova].” (Soe. 1:15): Logo la neʼe tohi te ʼu palalau ʼaeni kua hili ki ai ni taʼu ʼe lau ʼi afe, ʼe tou lolotoga maʼuʼuli nei ʼi te temi ʼae ʼe hoko ai tona fakaʼosi. ʼAki te ʼasili kovi ʼo te ʼu aluʼaga ʼo te malamanei, mo te mole fia logo ʼa te hahaʼi ki te logo lelei pea mo tanatou fakalainoaʼi tatou, ʼe ko te ʼu fakamoʼoni ʼaia kua ovi mai te fakaʼosi ʼo te tuʼu agakovi ʼaeni. (2 Tim. 3:1-5; 2 Pet. 3:3, 4) Kapau ʼe tou tokagaʼi te kua ovi mai ʼo te fakaʼosi, ʼe tou mahino ai ʼe tonu ke tou fakamuʼamuʼa ia te minisitelio ʼi totatou maʼuli.—2 Pet. 3:11, 12.
3. He ko ʼe ʼe maʼuhiga tafitō ia te gaue faifakamafola ʼi te kua fakaovi mai ʼo te mamahi lahi?
3 ʼE Liliu Anai Ia Sehova Ko He Holaʼaga Maʼa Tana Hahaʼi. (Soe. 3:16): Ko te ʼu aluʼaga fakamataku ʼae ʼe fakamatala ʼi te vaega ʼaeni, ʼe fakaʼuhiga pe ia ki te ʼaho ʼae ka hoko ai anai te fakamau ʼa Sehova, lolotoga te mamahi lahi. ʼE ko he fakalotofimalie kia tatou, tatatou iloʼi ʼae ʼe haofaki anai e Sehova ʼana kaugana agatonu lolotoga te ʼaho ʼaia. (Apk. 7:9, 14) Moka tou kau ki te gaue faifakamafola pea mo tou tokagaʼi te tokoni pea mo te fakalotomalohiʼi ʼo tatou e Sehova, ʼe tuputupu ai tatatou tui pea mo tatatou kataki fualoa ʼae ʼe ʼaoga anai kia tatou moka hoko mai te mamahi lahi.
4. He ko ʼe ʼe tonu ke tou fiafia kaʼe mole tou tuʼania ki te ka haʼu?
4 Logo la neʼe ui e ʼihi ko te lea fakapolofeta ʼa Soele ʼe fakamataku, kaʼe maʼa te hahaʼi ʼa te ʼAtua, ʼe fakaʼuhiga ia ki te ʼamanaki taulekaleka ʼo te haofaki. (Soe. 2:32) Koia, ʼe mole tonu ke tou tuʼania ki te ka haʼu kaʼe ke tou fakamafola ia te logo lelei ʼo te Puleʼaga ʼa te ʼAtua ʼaki he lotofaʼafai, pea mo tou mulimuli ki te ʼu palalau ʼae ʼe tuʼu ia Soele 2:23, MN: “Koutou fiafia pea mo fakafiafia ia Sehova tokotou ʼAtua.”