He Koʼe Koa Kua Lahi Te Loto Heʼe ʼAmanaki?

KO HE fakaʼamu ki he maʼuli lelei — kua hoko! Tokolahi te hahaʼi neʼe maʼuʼuli ʼi te Siamani ʼo te potu Hahake neʼe nātou tui ki te meʼa ʼaia, ʼi te holoʼi ʼo te kaupā ʼo Berlin ʼi novepeli 1989. ʼO laka ʼi te taʼu katoa te temi kua hili ki ai, ko ʼihi neʼe nātou ʼui “ko te maʼuli ʼi te mālama kapitalisi pea mo temokalatike, ʼe faigataʼa ʼaupito ʼi te maʼuli ʼaē neʼe maʼu ia muʼa ʼo te holoʼi ʼo te kaupā ʼo Berlin”. Koteā tona ikuʼaga? Ko te fai hāla pea mo te tuputupu ʼo te loto heʼe ʼamanaki.

ʼAki te agakovi ʼaē kua hoko ʼi te potu fuli, ko ʼihi hahaʼi kua mavae ʼi tonatou ʼu ʼapi ʼo kumi honatou hāofakiʼaga, pea tokosiʼi ʼe nātou maʼu. ʼO fakamulimuli, ko ʼihi kua momoe ʼi te ala. ʼI ʼihi fenua, ko te tokolahi ʼe nātou tau pea mo te ʼu fai pepa ʼe loaloaga ʼaupito ʼi te puleʼaga. ʼE mole feala ke maʼu he ʼapi ʼuhi ko te mole maʼu ʼaē ʼo he gāue, pea ʼe mole feala ke foaki he gāue ʼuhi ko te mole maʼu ʼaē ʼo he ʼapi. Ko te ʼu tokoni faka puleʼaga ʼe nātou faigaʼi aipe ke nātou maʼu he fakatokatoka ʼo te ʼu faigataʼa ʼaia, kae ʼe loaloaga fau. Koia ko te tuʼania pea mo te loto heʼe ʼamanaki ʼe hoko atu aipe.

ʼE tokolahi te hahaʼi fafine ʼe nātou loto heʼe ʼamanaki ʼe nātou fai te ʼu meʼa ʼe mole matamatalelei. ʼI te tohi Les femmes et le crime en 1990, ko te fafine ʼo te lao ko te Dr. Susan Edwards neʼe ina fakamahino fēnei: “Ko te tuputupu ʼo te lahi ʼo te tamaliki fafine ʼi te potu ʼaē [ʼo te paʼomutu] ko he fakahā lelei ʼaia ʼo te faigataʼa ia ʼo te maʼuli, kae mole ko he hāla ia ʼo te takitaki takitokotahi pe ʼe ko te takitaki faka famili.” ʼE toe feiā pe ki te tamaliki tagata, ʼe nātou mavae ʼi tonatou ʼu ʼapi ko he kumi gāue, kae ʼe toko siʼi ʼe nātou maʼu he gāue. ʼI te mole kei ʼi ai honatou ʼaluʼaga, kua nātou liliu ko he kau ‘tama ke totogi’, ʼo tupu ai tanatou tuku tonatou ʼu sino ki te hahaʼi ʼaē ʼe manako tagata kae totogi ʼaki he meʼa kai pea mo honatou nofoʼaga, ʼo liliu ai ia ko he ʼu kiʼi meʼa gaoʼi ʼa te ʼu taʼi hahaʼi ʼaia.

ʼAki te ʼu faigataʼa faka politike, te agakovi, te ʼu faigataʼa ia faka ekonomike, ko te ʼu meʼa fuli ʼaia ʼe nātou fakatuputupu aipe te loto heʼe ʼamanaki. Māʼia mo te hahaʼi maʼu tuʼulaga ʼe mole nātou hāo mai te ʼu fahaʼi ʼaia heʼe nātou faigaʼi aipe ke nātou taupau tonatou faʼahiga maʼuli lolotoga te ʼu faigataʼa ia ʼaē ki te paʼaga. Kae koteā te ʼu fua ʼo te ʼu meʼa fuli ʼaia? “Ko te fakamālohi ʼe ina fakaliliu ʼo vale te tagata ʼaē ʼe poto”, ko te tala ʼaia ʼa te hau ko Salomone (Tagata Tānaki 7:7)a! ʼE moʼoni, ko te heʼe ʼamanaki ʼe ina toho te tokolahi ki te ala ʼaē: ko te fakamate.

Ko te holaʼaga ʼo te hahaʼi

ʼE lahi te ʼu fakamate ʼe nātou kei ʼeva ʼe fakahā ko nātou ʼe mole nātou hāo mai te fahaʼi ʼaē ko te loto heʼe ʼamanaki. Ko te fafine gāue ʼi te nusipepa fakapilitānia neʼe ina fai te fehuʼi ʼaenī: “Koteā te meʼa ʼi totatou temi ʼe ina taki ia nātou ʼaē kei ʼeva ki te loto heʼe ʼamanaki?” Neʼe hoko te kumi neʼe fai ki te kau toe ʼaē e taʼu 8 ki te taʼu 16 neʼe hu ki te lopitali ʼuhi ko tanatou ʼahiʼahiʼi te ʼu meʼa ʼe kona kia nātou, ko te tōketā ko Eric Taylor ʼo te Institut de Psychatrie ʼi Lonitoni neʼe ina fakahā fēnei: “Ko te meʼa ʼaē neʼe fakatokagaʼi ʼi te tokolahi ia nātou ʼe mole ʼi ai honatou ʼamanaki ʼi te ʼu meʼa fuli.” Ko te fenua ko Pilitania ʼaē ʼe lahi ai te ʼu meʼa feiā ʼe fakafuafua ki te toko 100 000 ʼe nātou folo te ʼu meʼa kona ʼi te taʼu fuli ʼi tanatou faiga ʼaē ke tokaga age te hahaʼi kia nātou ʼuhi ʼaē ko te mole kei ʼi ai honatou ʼamanaki.

Ko te kautahi fakapilitānia neʼe ina fai tana pāuʼi ko he fakatokaga ki te hahaʼi ʼaē ʼe nonofo ʼi te ʼu faigataʼa ia ʼaia. ʼI te fahaʼi ʼaia, ko te ʼu hahaʼi ʼaē ʼe nātou takitaki te kautahi ʼaia ʼe nātou fakaʼui ke tuku age ki te hahaʼi ʼaia “he fetogiʼaga ʼo tonatou maʼuli kae lītuʼa ki te fakamate”. Kae ʼe nātou fakamoʼoni ʼe mole feala hanatou fakatokatoka te ʼu faigataʼa ia ʼaē ʼe nātou toho te hahaʼi ki te loto heʼe ʼamanaki.

Ko te tuputupu ʼo te lahi ʼo te ʼu fakamate ʼe ina fakahā ai “te vaha kehekehe ʼo te ʼu meʼa ʼaē ʼe fakatupu ai te ʼu faʼahiga mahaki fakatupu ʼulu vale pea mo te logo kehekehe ʼo te ʼu ʼuhiga faka sosiale ʼi te sosiete”, koʼena te fakamatala ʼa te nusipea ʼaē ko te Sunday Correspondent. Kae koteā koa te tupuʼaga ʼo te fakamate ʼa te hahaʼi ʼi te temi nei? Ko te nusipepa ʼe ina toe fakahā te ʼu tupuʼaga ohage “ko te mole maʼu ʼo he nofoʼaga, ko te lahi ʼo te ʼinu kava, ko te faitoʼo ʼo te SIDA pea mo te pupunu ʼo te ʼu fale mahaki ki te kau vale”. Koʼena he ʼu meʼa ʼe ina taki te hahaʼi ʼaē kua hēʼia tanatou fakakaukau ke nātou ʼui ai ʼe lelei age pe tanatou pule ki tonatou maʼuli, ko he holaʼaga lelei ki tonatou ʼu faigataʼa ia.

Kae ʼe ʼi ai koa he ʼamanaki ke ina pulihi te loto heʼe ʼamanaki? Ei! “Koutou tuʼu totonu pea lagaʼi ake tokotou ʼulu ki ʼoluga”, ko te palalau ʼaia ʼa Sesu (Luka 21:28)! ʼE faka ʼuhiga feafeaʼi koa tana palalau? Koteā koa te ʼamanaki ʼaia?

[Nota ʼi te lalo pasina]