ʼE Feafeaʼi Anai Hakotou Maʼu He Lelei Mai Te Evaselio?
KO TE Tohi-Tapu ʼe tokagaʼi ʼaupito ʼuhi ko te maʼuhiga ʼo tana ʼu tohi — māʼia pe la mo ʼihi kau hahaʼi ʼe mole tui ki te ʼAtua ʼe nātou tokagaʼi te Tohi-Tapu. Kae, ʼe mole lahi ia nātou ʼaē ʼe nātou lau te Tohi-Tapu feiā ke nātou maʼuliʼi te meʼa ʼaē ʼe talanoa kiai. Pea tahi ʼaē meʼa, ko te logo lelei ʼaē ʼi te Tohi-Tapu kua lagi hili ki ai taʼu e lua afe, tokolahi ʼe nātou ʼui ʼe tonu ke fakafoʼou tana ʼu manatu, ke fakafelogoi mo te temi. Kua ʼāfea koa te Evaselio peʼe mole kei fakaʼaoga? Kailoa.
Ko te toko miliona fafine pea mo tagata, feiā mo te kau tūpulaga pea mo te kau matutuʼa, ʼe nātou ʼiloʼi ko te Tohi-Tapu ʼe ko he tokoni ʼe mole maʼu hona fakatatau. Ko te meʼa ʼaia ʼe tou lau ʼi te Tohi-Tapu (Today’s English Version), ʼo fēnei: “Ko te Tohi-Tapu ʼe mole ko he foʼi tohi pe ia ke vikiʼi pea mo fakaʼapaʼapa ki ai; ʼe ko he logo lelei ia ki te hahaʼi ʼi te potu fuli pe — ko he logo ʼe tonu ke mahino pea mo maʼuliʼi ʼi te ʼaho fuli pe.”
Koteā koa te ʼuhiga ʼo te Evaselio kia koutou? ʼE ko he takitaki koa kia koutou ʼi tokotou maʼuli ʼi te ʼaho fuli pe? Koutou fakatokagaʼi te fua manuʼia ʼo te logo lelei ki ʼihi neʼe nātou fagono kiai ʼi te ʼuluaki sēkulō pea mo ʼihi ʼi totatou temi.
Ko te hahaʼi ʼaē neʼe tokoniʼi e te Evaseliol
Ko te hahaʼi ʼo te temi ʼo Sesu, ohage ko te kau tautai faʼafai pea mo te ʼu fafine ʼohoana neʼe nātou leleiʼia te logo lelei pea neʼe nātou ako te moʼoni ʼaē ʼo ʼuhiga mo te fakatuʼutuʼu ʼa te ʼAtua ki te tagata. Ko te logo lelei neʼe ina fetogi ʼosi tonatou maʼuli feiā aipe mo he fīmālie moʼoni. Ohage la, ko Malia Maketalena ʼaē neʼe puleʼi e te ʼu temonio, neʼe ina maʼu te fakamālōlō. Ko te tagata pule ʼo te tānaki tukuhau ko Sakeo, neʼe ina liaki tona faʼahiga maʼuli mānumānu (Luka 8:2; 19:1-10). ʼI te ʼomai ʼa te kau kivi pea mo te kau kilia kia Sesu ʼaē neʼe fagonogono te logo lelei, neʼe nātou maʼu te fakamālōlō (Luka 17:11-19; Soane 9:1-7). Koia neʼe feala ai ke ʼui e Sesu fēnei: “Kua toe sio te kivi, pea kua haʼele te ketu, kua fakamaʼa te kilia, pea kua logo te tuli, pea kua fakatuʼu ake te mate, pea ko te logo lelei kua fakahā ki te kau masiva.” — Mateo 11:5.
Kae, neʼe ʼi ai te tahi ake meʼa maʼuhiga ʼi tonatou fakamālōlō, ko te haga ʼaē ʼo te logo lelei ʼo fetogi te tokolahi neʼe mole faʼa lelei tonatou maʼuli. Ko te hahaʼi ʼaē neʼe tui moʼoni neʼe nātou maʼu te falala lahi ki he temi ka haʼu. Neʼe nātou tuku tanatou falala ki te Puleʼaga ʼo te ʼAtua — ko he meʼa lelei age ia ʼi he faʼahiga evaselio faka sosiale (Mateo 4:23). Neʼe mole hoha tanatou falala ʼi te mate ʼa Sesu. ʼO ʼuhiga mo te fakamatalatala ʼo te ʼu meʼa neʼe hoko ʼi te hili ʼo te mate ʼa Sesu, ʼe tohi fēnei ia Gāue 5:42 ʼo ʼuhiga mo tana kau tisipulo: “ ʼI te ʼaho fuli pe, ʼi te fale lotu pea mo te ʼu ʼapi, tuʼumaʼu pe, ʼe nātou haga akoʼi pea mo tala te logo lelei ʼo ʼuhiga mo Kilisito, Sesu.” ʼI te ʼuluaki sēkulō, neʼe maʼu e te hahaʼi ʼo te ʼatu fenua te tokoni fakalaumālie he neʼe nātou tali te fagonogono ʼaia.
Neʼe ko he logo maʼuhiga pe ʼaia e tahi ʼaē ko te Puleʼaga. ʼE ko he logo lelei tuʼumaʼu koa te Puleʼaga?
Koteā te faka ʼuhiga ʼo te ʼu logo lelei ʼa te ʼAtua ia ʼaho nei?
Kapau ʼe koutou holi ki he tokalelei, he fīmālie faka malamanei, pea ʼe mahino ia ko te logo lelei ʼo te Puleʼaga ʼe ko he meʼa lelei. Pea tahi ʼaē, ko te logo lelei pe ʼaia e tahi ʼe moʼoni ki te malamanei, ko te toko lauʼi teau miliona hahaʼi ʼe mole nātou makokona pea ʼe nātou nonofo pakupaku, feiā aipe mo te ʼu mahaki fakamataku ʼe hoko ki te hahaʼi fuli, pea mo te tuputupu fakavilivili ʼo te fakapō, pea mo te mafola ʼo te fetofetogi faka politike. Ko te ʼamanaki moʼoni pe ʼaia e tahi ʼo he fīmālie.
Ko te tupuʼaga ʼaia ʼo te fakakikite e Sesu te ʼu palalau ʼaenī ʼo ʼuhiga mo totatou temi: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, moʼo fakamoʼoni ki te ʼu puleʼaga katoa; pea hoki hoko mai ai leva mo te fakaʼosi.” (Mateo 24:14). Ko te ʼu palalau ʼaia neʼe fakahoko fakaofoofo e te faka mafola ʼa te kau Fakamoʼoni ʼa Sehova ʼi te ʼu fenua e 200 tupu. Ko te tohi faka katolika, Nova Evangelização 2000, neʼe ina vikiʼi te kau Fakamoʼoni ki te faʼahi ʼaia, ʼo ina ʼui fēnei: “ ʼE tou maʼu koa ʼifea te kau Fakamoʼoni ʼa Sehova? ʼI te ʼu muʼa matapā ʼo te ʼu ʼapi. Ko he tahi ʼe liliu ko he tagata Fakamoʼoni ʼa Sehova, ʼe kau ia mo Sehova, ʼe ko he tahi ʼe fakamoʼoni. Koia, ʼe nātou gāue, faka mafola, pea mo fakahā te ʼu meʼa ʼaē ʼe nātou ʼiloʼi.”
Koia, ʼe mole maʼu fakafua noa te logo lelei. ʼE tokoni anai pe ia kia nātou ʼaē ʼe fagono pea mo talagafua. Ke ʼiloga te puani ʼaia, neʼe fai e Sesu te lea fakatā ʼo ʼuhiga mo te tagata ʼe ʼalu ʼo tūtu pulapula. Ko te ʼu faʼahiga kele kehekehe ʼaē ʼe to kiai te ʼu pulapula ʼe fakatā ki te ʼu faʼahiga ʼaluʼaga ʼo te loto ʼaē ʼe fagono ki te logo lelei. ʼE ʼui e Sesu fēnei: “Ka fagono he tahi ki te folafola ʼo te puleʼaga, kaʼe mole mahino ki tona ʼuhiga, ko te agakovi ʼe haʼu pea ina taʼaki te meʼa ʼaē neʼe kua tūtū ʼi tona loto. (...) Kaʼe ko ia ʼaē neʼe tūtū ki ai te pulapula ʼi te kele lelei, ʼe ko ia ia ʼaē ʼe logo ki te folafola pea mahino ki tona ʼuhiga, pea ʼe ʼi ai moʼoni tona ʼu fua pea ʼe fua ia ʼo teau te tahi, pea onogofulu te tahi, pea tolugofulu te tahi.”— Mateo 13:18-23.
Ohage ko te ʼuluaki sēkulō, ʼe tokolahi te hahaʼi ʼe mole nātou faiga fakamalotoloto ke nātou mahino ki te logo lelei. ʼE mole nātou maʼu tona ʼuhiga, ʼo mole nātou maʼu ai te ʼu fua manuʼia. Ko ʼihi ʼe nātou fakahā tanatou leleiʼia te logo lelei pea mo nātou akoʼi te ʼu meʼa ʼaē ke feala ai tanatou maʼuli tahi mo te finegalo ʼo te ʼAtua. Pea ʼaki te meʼa ʼaia, neʼe tapuakina nātou. ʼI te ʼu kūtuga ʼaenī e lua, ʼe koutou fia kau koa ki te kūtuga fea?
Te mālohi ʼo te Evaselio ʼi te temi nei
Ko te ʼu meʼa ʼaē neʼe hoko ʼe nātou fakamoʼoni ko te mālama ʼaē ki te logo lelei ʼe ina tokoniʼi ia nātou ʼaē “ ʼe mole hanatou falala pea mo hāla mo ʼAtua”. (Efesi 2:12; 4:22-24.) ʼI Rio de Janeiro neʼe ʼaoga kia Roberto he tokoni. ʼI tona temi tūpulaga, neʼe ina maʼu te faʼahiga maʼuli heʼeʼaoga, ohage ko te fakaʼaoga ʼo te toloke, te ʼu aga heʼeʼaoga, pea neʼe kaihaʼa. ʼO liu pilisoniʼi ai. ʼI te temi ʼaia neʼe ako leva Roberto te Tohi-Tapu mo te tagata Fakamoʼoni neʼe ʼaʼahi kia ia. ʼI te lelei ʼo tana ʼu faiga fakalaumālie, ko tona temi pilisoniʼi neʼe fakanounou.
ʼI te ʼosi ʼo tona temi fakapilisoniʼi, neʼe felāveʼi ia Roberto mo te taʼahine neʼe ina haga ʼo fakamatakuʼi ʼaki te fana. Mo te taʼahine pe foki ʼaia neʼe lolotoga ako te Tohi-Tapu mo te kau Fakamoʼoni ʼa Sehova. Koteā te meʼa neʼe hoko? Ko te koga ʼaenī ʼo te tohi ʼe ina fakamatala te meʼa ʼaē neʼe hoko: “Ko tanā hoki toe fesioʼakie talu te meʼa ʼaē neʼe hoko ʼi te Fale ʼo te Puleʼaga. Neʼe faka malave loto tanā felāveʼi ʼaia. Neʼe nā fetagihi fakafiafia pea mo nā feʼalofaʼaki faka tautuagaʼane. ʼI te temi nei, ko ia ʼaē neʼe kaihaʼa pea mo te taʼahine ʼaē neʼe fakamatakuʼi ʼaki te fana kua nā tauhi kia Sehova.”
Ko te tahi ko Isabelle neʼe toe ʼaoga ki ai te tokoni, koteʼuhi neʼe logona ia ia ʼi tana aga ʼita. Neʼe mālohi ki te ʼu gāue fakatemonio pea mo fakalauakau, pea neʼe fakamamahiʼi ia e te kau temonio. ʼI tana ako leva ʼaē mo te kau Fakamoʼoni ʼa Sehova te Tohi-Tapu, neʼe ina ʼiloʼi ai te tokoni moʼoni ʼaē ʼa te logo lelei kia te ia. Hili kiai te kiʼi temi, neʼe ʼāteaina leva ia ʼi te pule ʼa te kau temonio pea neʼe ina fetogi tona natula — pea neʼe ina ʼiloʼi te lolomi ʼo tana aga. ʼI te temi nei ko te kilisitiano agatonu, kua logona ko te fafine ʼe agalelei ʼo ʼuhiga mo tana felogoi ʼaē mo ʼihi.
Ei, ko te logo lelei ʼe mole ko he fakamatala pe ʼi he ʼu tohi. ʼE ia ia te mālohi moʼoni moʼo fetogi ʼo te ʼu maʼuli (1 Kolonito 6:9-11). Kae, ʼe maʼuhiga age ia. ʼE ina hinoʼi te ʼu tapuakina ki he temi ka haʼu.
Te ʼu tapuakina ki he temi ka haʼu
ʼE tuku mai e te Folafola ʼa te ʼAtua, ʼe ʼi ai te ʼu ʼamanaki fakatalakitupua ki he temi ka haʼu. ʼE tou mamata anai ki te fakahoko ʼo te faikole ʼa Sesu ʼo uhiga mo te Puleʼaga ʼa te ʼAtua ke haʼu pea ke hoko Tona finegalo ʼi te kele ohage ko selo (Mateo 6:10). Kua vave pe, ko te ʼu faʼahiga meʼa ʼo te tuʼu ʼaenī ohage ko tana agamālohi pea mo fakahehema ka mole anai, pea ko te Puleʼaga ʼi selo ʼa te ʼAtua, ʼaē ka ina puleʼi anai te hahaʼi loto faitotonu ʼaē neʼe nātou fagono pea mo talagafua fakalelei ki te logo lelei. — Taniela 2:44.
Ko te ʼu fetogi moʼoni ʼe maʼu anai e te hahaʼi agatonu ʼaē neʼe taki moʼo fetogi te kele ko he palatiso ʼaē ka maʼuʼuli ai te kau agavaivai ʼo heʼegata (Pesalemo 37:11, 29). ʼE moʼoni, ʼe ko he logo lelei mokā ko te fakapō, te mahaki, te hoge, te fakahehema, pea mo te ʼu tau ʼe pupuli anai ʼo talu ʼosi! ʼE feala koa hakotou fakakaukauʼi kia koutou pea mo tokotou famili hakotou maʼuʼuli ʼi te mālama foʼou tokalelei pea mo haohaoa, ʼo mole manavahe ki te agahala peʼe ko te mate? — Fakahā 21:4.
ʼIo, ʼe tokolahi ʼe nātou faka ʼuhiga te logo lelei ʼaia ohage ko he tohi ʼe mole faʼa maʼuhiga pea ʼe mole hona ʼu fua. Kae ʼe hāla tanatou manatu. Ko te logo lelei ʼaia ʼe fakatafito ki te fakamoʼoni lahi ʼaupito, pea neʼe kua ina fetogi te maʼuli ʼo te toko miliona hahaʼi. Koia ʼaē, ʼaua naʼa tou lotovaivai mo kapau ʼe mole tui niʼihi.
Koutou fakakaukauʼi he tagata matapoto ʼe ina totogi he kele ʼi he koga meʼa ʼe lelei, heʼe falala ʼe fua manuʼia ai tana ʼu gāue. ʼE faka lākahalaʼi anai tana faʼahiga fakaʼaogaʼi feiāʼi ʼo tana falā? Kailoa. ʼE lagi ʼe ʼui anai e te hahaʼi ko te tagata poto. Koia, he koʼe koa ʼe mole fai he fakatuʼutuʼu ʼo ʼuhiga mo te Puleʼaga pea mo tana ʼu gāue ʼi te logo lelei? Ko te faka ʼuhiga ʼo te tali ʼaē ʼo te logo lelei, ko te hāofaki, ʼe mole he tahi age meʼa ʼe maʼuhiga. — Loma 1:16.
ʼE feafeaʼi hatatou faʼahiga fai ʼo ʼuhiga mo te logo lelei? ʼUluaki, ke tou tali ke akoʼi tatou e te ʼAtua. Pea ke tou maʼuliʼi te ʼu meʼa ʼaē ʼe tou ako. Ke tou mulimuli ki te ʼu fakatuʼutuʼu tāfito, ohage ko te talanoa ʼa te polofeta hepeleo ʼāfea: “Koteā ʼe kole atu e Sehova kia te koe, mo kapau pe ko hau haga fai te faitotonu, pea mo manako ki te agalelei, pea mo haʼele fia mālalo mo tou ʼAtua?” (Mikea 6:8). ʼE tonu ke maʼu he temi pea mo he ʼu faiga moʼo ako te haʼele mo te ʼAtua. Kae, ko te kau Fakamoʼoni ʼa Sehova, ʼaē neʼe nātou tokoni kia Roberto pea mo Isabelle, ʼe nātou fiafia anai ʼi hanatou tokoni kia koutou ʼi te faʼahi ʼaia — ohage ko tanatou tokoniʼi te toko miliona ʼi te ʼu taʼu fuli.
ʼI he fakatalitali ki te fakahoko ʼo te ʼu fakapapau ʼa te ʼAtua, koutou taupau maʼu te tukuʼaga ʼo takotou mālohi ʼo koutou maʼuliʼi te logo lelei, ke koutou maʼu te ʼatamai fīmālie feiā aipe mo he felogoi mālohi mo te ʼAtua. Ko te faʼahi ʼaē neʼe tuku ki ai tokotou mālohi ʼe mole ʼalu noa anai ia — ʼe mole he tuʼutāmaki faka ekonomike peʼe faka politike ʼe lave anai kiai. Pea, ʼe ina foaki atu anai he totogi fakatalakitupua. Koteā te totogi ʼaia? ʼE tohi fēnei e te ʼapositolo ko Soane: “ ʼE mole te malamanei pea mo tona loto, ka ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.” — 1 Soane 2:17.
[Paki ʼo te pasina 7]
Ko te ʼu pulapula ʼo te logo lelei ʼe to ki te ʼu faʼahiga kele kehekehe.
[Haʼuʼaga ʼo te paki]
Garo Nalbandian