Ko Te ʼOfa Ki Te Kāiga ʼe Ko Te Meʼa ʼe Feala

KO TE lea fakatātā ʼa Sesu Kilisito ʼo ʼuhiga mo te Samalita neʼe ina fakahā peʼe koteā te faka ʼuhiga moʼoni ʼo te ʼofa fakamalotoloto ki te kāiga (Luka 10:25-37). Neʼe toe akonaki fēnei ia Sesu: “ ‘ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa.’ Koʼena te folafola ʼaē e lahi tokotahi pea mo ʼuluaki. Pea koʼeni te lua ʼaē ʼe tatau mo ia: ‘ ʼE tonu ke ke ʼofa ki tou kāiga ohage pe ko koe totonu.’ ” — Mateo 22:37-39.

Ohage ko te tokolahi, ʼe koutou faigataʼaʼia koa te ʼofa ki tokotou kāiga ʼe mole lanu tahi mo koutou? Mahalo ʼe hoko te faʼahi ʼaia koteʼuhi neʼe koutou ako te fehiʼa ki he tahi lanu pea mo te heʼe faitotonu peʼe ko he meʼa neʼe hoko tonu kia koutou. E lagi tau mo koutou peʼe ko nātou ʼaē ʼe koutou ʼoʼofa ai ia te gaohi koviʼi e he tahi age kūtuga.

Koteʼuhi neʼe fakahā e Sesu ʼi te ʼu folafola ʼa te ʼAtua ʼe ʼui ai ke tou ʼoʼofa ki totatou kāiga, e lagi feala hatatou mālo ʼi te taʼi ʼu meʼa mālohi ʼaia ʼi totatou loto. Ko te fealagia ʼaē ke fakahoko te faʼahi ʼaia kia tatou ʼe ko te faka ʼuhigaʼi ʼo te hahaʼi ohage ko tanā fai ʼaē e te ʼAtua mo Kilisito. ʼI te faʼahi ʼaia, tou fakatokagaʼi te faʼifaʼitaki ʼa Sesu pea mo te kau kilisitiano ʼo te temi muʼa.

Ko te faʼifaʼitaki lelei ʼa Sesu

Ko te kau Sutea ʼo te ʼuluaki sēkulō neʼe ʼi ai tonatou ʼu holi fakafeagai mālohi ki te kau Samalita, ko he hahaʼi ʼe nātou maʼuʼuli ʼi te koga meʼa ʼi te vaha ʼo Sutea pea mo Kalilea. ʼI te tahi lakaga ko te kau fili Sutea neʼe nātou fehuʼi age kia Sesu ʼaki he loto fehiʼa: “ ʼE mole koa la tonu tamatou ʼui ʼaē ko koe ko te Samalita pea ʼe maʼu te temonio ia te koe?” (Soane 8:48). Neʼe mālohi ʼaupito te fehiʼaʼinaʼi ʼo te kau Samalita ʼo tupu ai te laukoviʼi e ʼihi kau Sutea te kau Samalita ʼi muʼa ʼo te hahaʼi ʼi te ʼu sinakoka, pea mo nātou faikole ʼi te ʼaho fuli ke ʼaua naʼa maʼu e te kau Samalita te maʼuli heʼegata.

ʼI tana mahino ki te loloto ʼo te loto fehiʼa, neʼe fai ai e Sesu te lea fakatātā ʼo ʼuhiga mo te Samalita ʼaē neʼe ina fakamoʼoni ko ia ko te kāiga moʼoni koteʼuhi neʼe ina taupau lelei te tagata Sutea ʼaē neʼe tāmateʼi e te kau kaihaʼa. Neʼe feafeaʼi anai he tali ʼa Sesu ki te fehuʼi ʼa te tagata Sutea ʼaē neʼe ina ʼiloʼi lelei te Lao ʼa Moisese: “Ko ai moʼoni koa toku kāiga?” (Luka 10:29). ʼIo, neʼe feala he tali fakahagatonu ʼa Sesu ʼo ina ʼui: ‘Ko tou kāiga ʼe mole fakagata pe ki ʼou ʼu kaugā fagona Sutea kae ʼe hoko ki ʼihi hahaʼi, ʼo feiā ki he Samalita.’ Kae, neʼe feala pe ke tali gataʼa e te kau Sutea te meʼa ʼaia. Koia neʼe ina fai ai te lea fakatātā ʼo ʼuhiga mo te Sutea ʼaē neʼe ina maʼu te manavaʼofa ʼo te Samalita. ʼAki tana fai ʼaia, neʼe tokoni ai ia Sesu ki tana kau fakalogo Sutea ke nātou kaku ki te manatu ʼaē ko te ʼofa moʼoni ki te kāiga ʼe fakahoko atu ki te hahaʼi ʼaē ʼe mole Sutea.

Neʼe mole maʼu e Sesu he ʼu manatu ʼe ina tekeʼi ai te kau Samalita. ʼI tana fagona ʼi Samalia ʼi te tahi lakaga, neʼe mālōlō ʼi te vai keli, lolotoga te temi ʼaia ko tana ʼu tisipulo neʼe nātou ʼolo ki te kolo ʼe ōvi ʼo kumi meʼa kai. ʼI te temi ʼaē neʼe haʼu ai te fafine Samalita ʼo ʼutu vai, neʼe ina ʼui age fēnei: “Mai he meʼa ke ʼau ʼinu.” ʼI te mole felogoi ʼa te kau Sutea pea mo te kau Samalita, neʼe fēnei te fehuʼi age ʼa te fafine: “He koʼe ko koe ʼaenā, ko te Sutea, ʼe ke kole mai kia ʼau hau meʼa ʼinu, kia ʼau ʼaenī ko te fafine Samalita?” Neʼe fagonogono age ia Sesu ki te fafine, ʼo ina fakahā fakahagatonu age ko ia neʼe ko te Mesia, ʼo ʼalu ai te fafine ki te kolo pea mo ina pāui ʼihi ke nātou ʼomai ʼo fakalogo kia te ia. Koteā tona fua? “Tokolahi te kau Samalita neʼe nātou tui kia te ia.” ʼE ko he fua lelei koteʼuhi neʼe mole pikisia ia Sesu ʼi te aga neʼe mālohi ʼi te kau Sutea ʼo tona temi! — Soane 4:4-42.

Ko te ʼAtua ʼe mole fakapulepule

Neʼe ko te finegalo ʼa Sehova ke fagonogono tāfito ia Sesu ki te kau Sutea, “te ʼu ōvi ʼaē kua hēhē ʼo te ʼapi ʼo Iselaele”. (Mateo 15:24.) Koia, ko tana ʼu ʼuluaki tisipulo neʼe ko te kau Sutea. Kae hili te taʼu e tolu ki te folahi ʼo te laumālie maʼoniʼoni ʼi te Penikosite ʼo te taʼu 33 ʼo totatou temi, neʼe fakamahino lelei e Sehova neʼe ina loto ke fakahoko e te kau hahaʼi Sutea ʼaē ʼe tui te gāue ʼaē ko te fai ʼo he kau tisipulo ki te hahaʼi ʼo te ʼatu ʼu puleʼaga kehekehe, te kau Senitile.

Ki te fakakaukau ʼa te Sutea, ko te ʼofa ki he Samalita ohage ko te ʼofa kia kita neʼe faigataʼa ʼaupito. Kae neʼe faigataʼa age ia te fakahā te ʼofa fakakāiga ki te kau Senitile ʼaē mole heʼeki silikosisio, ko he hahaʼi neʼe siʼisiʼi tanatou felogoi mo te kau Sutea ohage pe ko te kau Samalita. ʼI tana fakamatala ʼo ʼuhiga mo te aga ʼo te kau Sutea ki te kau Senitile, e fēnei te fakahā ʼa te encyclopédie (The International Standard Bible Encyclopaedia): “ ʼI te temi ʼo te T[auhi] F[oʼou], ʼe tou maʼu ai te fehiʼa ʼaupito ki ʼihi, te manukinuki. Ko nātou [te kau Senitile] neʼe sioʼi ohage ko he ʼu hahaʼi ʼe nātou ʼuli, pea neʼe mole fakagafua e te lao he faka kaumeʼa mo nātou. Neʼe ko te ʼu fili ʼo te ʼAtua pea mo tana hahaʼi, pea ko te ʼatamai mālama ʼo te ʼAtua neʼe mole fakafua age kia nātou, gata mokā nātou liliu ko he kau poloselite, pea neʼe tatau aipe neʼe mole pe feala ia, ʼi te ʼu temi ʼāfea, ke fakakaugā ʼosi mo nātou. Neʼe tapuʼi ki te kau Sutea hanatou fai tokoni kia nātou, pea kapau ʼe nātou fakaʼui he meʼa ʼo ʼuhiga mo te ʼu meʼa fakaʼatua, ke nātou malaʼia.”

ʼI te temi ʼaē neʼe maʼu e te tokolahi te ʼu taʼi manatu ʼaia, neʼe fai e Sehova ke sio ia Petelo ki te meʼa ʼaia neʼe ʼui age ki ai ke ina ‘fakagata tana ʼui ʼaē ʼe ʼuli te ʼu meʼa ʼaē neʼe fakamaʼa e te ʼAtua’. Hili ʼaia pea neʼe taki ia ia e te ʼAtua ki te ʼapi ʼo te Senitile ko Kolonelio. Ko Petelo neʼe ina fagonogono ʼo ʼuhiga mo Kilisito kia Kolonelio, ki tona famili, pea mo ʼihi kau Senitile. Neʼe ʼui fēnei e Petelo: “Kua mahino kia ʼau ko te ʼAtua ʼe mole fakapulepule, ʼi te fenua fuli pe ko te tagata ʼaē ʼe manavasiʼi kia te ia pea mo maʼuli ʼi te faitotonu ʼe ina leleiʼia.” Lolotoga te fai faka mafola ʼa Petelo, neʼe ʼalu ifo te laumālie ki te kau tui foʼou, ʼaē neʼe papitema pea mo liliu ko te ʼu ʼuluaki tisipulo Senitile ʼaia ʼa Kilisito. — Gāue, kapite 10.

Neʼe tali e te kau tisipulo Sutea te tuputupu ʼaia, ʼo mahino kia nātou ko te fakatotonu ʼa Sesu ke nātou “fai he kau tisipulo ʼi te hahaʼi ʼo te fenua fuli pe” ʼe mole faka tuʼakoi pe ki te kau Sutea ʼo te fenua fuli, kae ʼe kau ai foki mo te kau Senitile (Mateo 28:19, 20; Gāue 11:18). ʼI tanatou mālo ʼi te ʼu faʼahiga manatu ʼe tekeʼi ai te kau Senitile, e lagi ko he ʼu manatu neʼe nātou maʼu, neʼe nātou fakatuʼutuʼu fakamalotoloto te gāue faka mafola ko te fai ʼo he kau tisipulo ʼi te ʼatu ʼu puleʼaga. Mole heʼeki hili kiai te taʼu e 30, neʼe kua feala te ʼui ko te logo lelei kua faka mafola “ ʼi te ʼu meʼa fakatupu fuli ʼi te lalo lagi”. — Kolose 1:23.

Neʼe ko te ʼapositolo ko Paulo, ko he kilisitiano Sutea, ʼaē neʼe ina takimuʼa te gāue ʼaia. ʼI muʼa ʼo tana liliu ko he tisipulo ʼa Kilisito, neʼe ko he tahi neʼe fakamalotoloto ʼi te magaʼi lotu ʼa te kau Faliseo. Neʼe mole gata pe tanatou manukinuki ki te kau Senitile kae neʼe nātou fakahoko atu ki te hahaʼi noa ʼaē ʼe lanu tahi mo nātou (Luka 18:11, 12). Kae neʼe mole faka fealagia e Paulo ki te ʼu faʼahiga manatu ʼaia ke nātou tāʼofi ia ia mai te fakahā ʼo te ʼofa kāiga ki niʼihi. Kailoa, neʼe liliu ia ko te “ ʼapositolo ʼo te ʼu puleʼaga [te kau Senitile]”, ʼo ina foaki tona maʼuli ki te gāue ʼaē ʼo te fai ʼo he kau tisipulo ʼi te ʼu fenua ʼo te Metitelane. — Loma 11:13.

Lolotoga tana minisitelio, ko Paulo neʼe taumakaʼi, pea mo tāmateʼi, pea mo pilisoniʼi (Gāue 14:19; 16:22, 23). Ko te ʼu mamahi ʼaē neʼe tau mo ia neʼe nātou fakatupu fiu koa kia ia pea mo ina ʼui ʼi tona loto ʼe lolotoga pulinoa tona temi ʼi ʼihi ʼu fenua pea mo ʼihi ʼu lanu? Kailoa ia. Neʼe ina ʼiloʼi neʼe ʼi ai te ʼu hahaʼi agatonu ʼe nātou mafola ʼi te ʼatu ʼu kaugamālie e lanu kehekehe ʼo tona temi.

Ka maʼu e Paulo he kau Senitile ʼe nātou lotolelei ke nātou ako te ʼu ala ʼo te ʼAtua, neʼe ʼofa ai ia nātou. Ohage la, neʼe fēnei tana faitohi ki te kau Tesalonika: “Neʼe mātou liliu ʼo agamālū ʼi te lotolotoiga ʼo koutou, ohage ko he faʼe ʼe tokaga fakalelei ki tana fānau ʼaē ʼe ina fafaga. ʼI tamatou ʼofa ʼaē kia koutou, ko tamatou fiafia neʼe mole gata ʼaki pe tamatou fakahoko atu te logo lelei ʼa te ʼAtua, kae feiā mo tomatou nefesi totonu pe, koteʼuhi kua koutou liliu ʼo maʼuhiga kia mātou.” (1 Tesalonika 2:7, 8). Ko te ʼu palalau lave loto ʼaia ʼe nātou fakahā ko Paulo neʼe ʼofa moʼoni ʼi te kau Senitile ʼo Tesalonika pea neʼe mole ina faka fealagia ki he meʼa ke ina holoʼi te fiafia ʼo te vāhaʼa lelei mo nātou.

Ko te maʼuliʼi ʼo te ʼofa kāiga

ʼI te temi nei, ohage pe ko te ʼuluaki sēkulō, ko nātou ʼaē ʼe nātou pipiki ki te kokelekasio faka kilisitiano ʼe nātou fakatuputupu te ʼofa kāiga ki te ʼu lanu kehekehe. ʼAki te fakatuputupu ʼo he faʼahiga fakatokagaʼi faka lotu ki te hahaʼi pea mo vaevae te logo lelei ʼo te Puleʼaga mo nātou, ko te kau kilisitiano moʼoni neʼe nātou fakalahi tanatou mahino ki te hahaʼi, ʼaē lagi ko he meʼa neʼe mole pe feala ke nātou ʼiloʼi mo kapau neʼe mole nātou fakatahi ki te kokelekasio. Pea ʼe ia nātou te ʼofa fakatautehina kia nātou (Soane 13:34, 35). ʼE feala pe ke hoko mo te meʼa ʼaia kia koutou.

Ko te taʼi ʼofa ʼaia ʼe maʼu ʼi te kau Fakamoʼoni ʼa Sehova, logope ʼe nātou ʼi te ʼu fenua e 229 pea ʼe nātou fakatā “te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli”. (Fakahā 7:9.) Ohage ko he fakatahi fakatautehina faka malamanei, ʼe nātou logo tahi ʼi te tauhi ʼa Sehova, ʼo nātou fakafisi ʼi te kau ki te ʼu fefihiʼaki ʼo te ʼu lanu, pea mo nātou tekeʼi te ʼu fetukugakoviʼiʼaki ʼo tupu ai te holoʼi te ʼu vāhaʼa lelei ʼo te tagata.

Koutou fakatahi mo te kau Fakamoʼoni, pea ʼe koutou sisio anai peʼe feafeaʼi te fakahoko e te hahaʼi ʼo te ʼu lanu kehekehe te finegalo ʼo te ʼAtua. ʼE koutou sisio anai ki te maʼuliʼi ʼo te ʼofa kāiga ʼi tanatou kalagaʼi te logo lelei ʼo te Puleʼaga ʼa te ʼAtua. ʼIo, pea ʼi tanatou ʼu kokelekasio, ʼe koutou felāveʼi anai mo he hahaʼi agaʼofa pea mo fakamalotoloto ʼe nātou fakahā ʼi tonatou maʼuli neʼe nātou ako moʼoni te ʼofa ki tonatou kāiga.

[Paki ʼo te pasina 6]

ʼI te ʼu kokelekasio ʼo te kau Fakamoʼoni ʼa Sehova, ʼe koutou maʼu anai he hahaʼi fiafia ʼo te lanu kehekehe.

[Haʼuʼaga ʼo te paki pasina 4]

Arrival of the Good Samaritan at the Inn/The Doré Bible Illustrations/Dover Publications, Inc.