Ko Te Hāofaki ʼa Sehova ʼe Hoko ʼi Te Temi Nei

ʼE ʼUI fēnei mai e te Tohi-Tapu ʼo ʼuhiga mo Sehova: “ ʼE lahi te ʼu malaʼia ʼo ia ʼaē ʼe faitotonu, kae ʼe hāofaki ia e Sehova mai te ʼu malaʼia fuli ʼaia” pea “ ʼe ʼiloʼi e Sehova peʼe feafeaʼi te hāofaki ʼo te ʼu tagata aga faka lotu mai he ʼahiʼahi”. — Pesalemo 34:19; 2 Petelo 2:9.

E feafeaʼi te tokoni ʼa Sehova ki tana hahaʼi mokā nātou felāveʼi mo he ʼu mamahi? ʼE mole ina fakahoko tana tokoni ʼaki hana fetogi faka milakulo te ʼu mālohi ʼaē ʼo te kele peʼe ʼaki hana fai ʼo he ʼu gāue fakamanamana, ohage ko te manatu ʼa te tokolahi, kae ʼaki te tahi age mālohi. Tokolahi ʼe mole nātou mahino lelei ki te mālohi ʼaia — ko te ʼofa. Ei, ʼe ʼofa ia Sehova ki tana hahaʼi, pea neʼe ina fakaloto mālohiʼi nātou ke lahi tanatou feʼofaʼaniʼaki ke feala ai kia ia ke ina fakahoko maʼa nātou he meʼa ʼe hage ko he milakulo. — 1 Soane 4:10-12, 21.

Ko ʼihi ʼe feala ke nātou ʼui ʼi he temi faigataʼa, ko te meʼa ʼaē ʼe maʼuhiga ko te meʼa kai, te faitoʼo, te meʼa fakasino — kae mole ko te ʼofa. ʼIo, ko te meʼa kai, ko te ʼu faitoʼo, pea mo te ʼu meʼa fakasino ʼe maʼuhiga. Kae, ko te manatu ʼa te ʼapositolo ko Paulo, ʼe fēnei: “Kapau ʼe ʼau maʼu te tui katoa ke ʼau faʼa hiki ai he ʼu moʼuga, kae mole ʼau maʼu te ʼofa, pea ko ʼau ia ko te meʼa noa pe. Pea kapau ʼe ʼau tufaki toku ʼu koloā fuli moʼo fafaga te hahaʼi māsisiva; pea kapau ʼe ʼau tuku toku sino mo ʼoku faka kolōlia, ka mole ʼau maʼu te ʼofa, pea ʼe mole hona ʼaoga kia ʼau.” — 1 Kolonito 13:2, 3.

ʼE tou tautau logo ko te ʼu meʼa ʼofa ʼe maumau peʼe neʼe kaina, kae ko te hahaʼi ʼaē ʼe ʼaoga kiai ʼe nātou mamate pakupaku peʼe mahahaki. Ko te ʼu fakatuʼutuʼu ʼofa ʼaia ʼe feala ke puleʼi ʼe nātou ʼaē ʼe holi fakavale pea mo heʼe fakakaukau, heʼe nātou fakaʼaogaʼi pe maʼa nātou te faʼahi ʼaia. Koia, ʼe ko he meʼa lelei ia te maʼu ʼo te ʼu meʼa ʼofa, kae ʼe ko he tahi age meʼa fakaʼofaʼofa kia nātou ʼaē ʼe maʼuli mamahi hanatou mole maʼu ʼo te ʼu meʼa ʼofa ʼaia. ʼE feala ke ʼiloga kehe ia te ʼofa moʼoni pea mo te tokaga.

ʼE hā te ʼofa

ʼI te māhina ʼo sepetepeli ʼo te taʼu 1992, neʼe tō te afā ko Iniki ʼi te motu Vaihi ʼo Kauai, ko te toko 55 000 ʼe nonofo ʼi te motu ʼaia. Ko te ʼu matagi ʼo te afā ʼaia ko Iniki neʼe mālohi ia kilometa e 210 ʼi te hola pea mo te ʼu tuʼani matagi ʼe mālohi ia kilometa e 260 ʼi te hola, ʼo mamate ai te tokolua pea lāvevea te toko 98, ʼo maumau te ʼu ʼapi ʼe fakafuafua ko te 75 ki te teau, pea ko te toko 8 000 hahaʼi ʼe mole kei ʼi ai honatou nofoʼaga, pea ʼe fakafuafua te totogi ʼo te ʼu meʼa ʼaē neʼe maumau ki te 1 miliale tola (Amelika). Ia nātou ʼaē neʼe maʼuʼuli ʼi te kiʼi motu ʼaia neʼe lagi ko te toko 800 kau Fakamoʼoni ʼa Sehova ʼi te ʼu kokelekasio e ono. Koteā te meʼa ʼaē neʼe hoko kia nātou?

ʼI te mole heʼeki hoko ʼo te afā ko Iniki, ko te ʼu tagata ʼāfea ʼo te ʼu kokelekasio ʼaē neʼe takitaki e te tagata taupau feʼaluʼaki, neʼe nātou ʼaʼahi te hahaʼi fuli ʼo te ʼu kokelekasio ke nātou ʼiloʼi pe nātou puipui lelei mokā hoko mai te afā. ʼAki te taʼi tokaga ʼofa ʼaia neʼe mole lavea kovi pe neʼe mate he Fakamoʼoni. — Vakaʼi ia Isaia 32:1, 2.

Logope la ʼaē ko te faka felogoi faka telefoni pea mo te fetuku neʼe lahi tona maumau, ko te ʼu fakafofoga e tolu ʼo te filiale ʼo te Sosiete Watch Tower ʼi Honolulu neʼe kau ia nātou ʼaē neʼe ʼuluaki ʼōmai ʼi te hili ʼo te afā, ʼi tanatou maʼu te faka fealagia makehe mai te Protection Civile ke nātou folau ki Kauai. Mole tuai, neʼe nātou felāveʼi mo te kau Fakamoʼoni ʼo te koga meʼa, pea ʼi te ʼala uhu age, neʼe nātou fono moʼo fai he puleʼaki ʼo ʼuhiga mo te tokoni ʼaē ke fai. Ko te komite tokoni neʼe fakatuʼu moʼo fakafuafua te ʼu meʼa ʼaē ʼe ʼaoga pea moʼo maʼu mai te filiale ʼo Honolulu te ʼu meʼa fakasino ʼaē ʼe ʼaoga. ʼAki te gāue hoholo, neʼe nātou tokakaga ki te tufa ʼaē ʼo te ʼu meʼa maʼuli kia nātou ʼe ʼaoga kiai pea mo fakamaʼa pea mo toe gaohi te ʼu ʼapi ʼaē neʼe maumau.

Ko te kau Fakamoʼoni ʼo ʼihi ʼu motu neʼe nātou tali fakavilivili ki tonatou ʼu tēhina ʼaē neʼe tuʼutāmakiʼia. ʼI te ava ʼaē ʼo te malaʼe vakalele ʼo Kauai, ko te kau Fakamoʼoni e 70 neʼe ʼōmai. Neʼe lau te totogi ʼo te ʼu meʼa ʼofa ʼaē neʼe fetuku ki te 100 000 tola (Amelika), ko te ʼu masini hila, te ʼu kiʼi gutuʼumu, te ʼu mālama taki, pea mo te meʼa kai. Ko te tahi Fale ʼo te Puleʼaga ʼi Kauai neʼe fakaʼaogaʼi ko te fale tukuʼaga meʼa; kae, neʼe tuʼania pe foki naʼa kaihaʼa te ʼu meʼa ʼaē ʼi loto. Pea ko te ʼu kamio solia neʼe hū ki te tauʼaga motokā ʼo te Fale ʼo te Puleʼaga, pea neʼe kole e te kau taki kamio peʼe feala hanatou tau ai. Neʼe nonofo ai te kau solia moʼo leʼoleʼo te ʼu kamio, pea mo taupau naʼa kaihaʼa te ʼu meʼa ʼofa.

Ko te ʼu tēhina neʼe nātou ʼave haʼele ʼi te ʼu ʼapi fuli te ʼu masini hila ia hola e lua peʼe tolu moʼo fakahaʼele te ʼu ʼaisi ʼa te hahaʼi. Neʼe vae te ʼu tēhina ki te ʼu ʼapi kehekehe moʼo fakamaʼa pea mo fakatokatoka te ʼu meʼa ʼaē neʼe maumau. Neʼe nātou gāue ʼi te ʼapi ʼo te tuagaʼane ʼe ʼohoana mo te tagata neʼe fakafeagai ʼaupito ki te tuagaʼane, pea ko te tokoni ʼaē ʼa te ʼu tēhina neʼe malave ʼaupito ki te ʼohoana ʼo te tuagaʼane, ʼo ina mamata pe ki tanatou gāue pea mo tagi. Ko te tagata ʼaʼahi mai te fenua neʼe mamata ki te tahi kūtuga Fakamoʼoni ʼe gāue, pea ko te aga mo te faʼahiga gāue ʼa te kau Fakamoʼoni ʼaia neʼe malave ʼaupito kia ia, pea neʼe ʼunuʼunu ia kia nātou pea mo fehuʼi age, pe koteā te meʼa ʼaē ʼe nātou kehekehe ai. ʼI te fakamahino age ʼaē e te tēhina ko tonatou ʼofa ʼaē ki te ʼAtua pea mo tonatou ʼu kaugā fagona kilisitiano, neʼe tali age e te tagata, ʼo fēnei: “ ʼE feala ke ʼau ʼiloʼi feafeaʼi te ʼAtua?” (Mateo 22:37-40). Neʼe ina toe ʼui, ʼo fēnei: “Ko koutou ko te hahaʼi faʼufaʼu gāue poto, ʼe mahino ia ʼe ʼau tali anai he tahi ia koutou mokā ʼe ʼau liliu ki Floride!”

Koia neʼe lagolago te kau Fakamoʼoni ʼa Sehova ki te fakamaʼa pea mo te fakatokatoka ʼo te ʼu ʼapi e 295 ʼi Kauai. Ko te ʼu ʼapi e 207 ʼi te ʼu ʼapi ʼaia, neʼe mole lahi fau te ʼu meʼa ʼaē neʼe maumau, kae ko te ʼu ʼapi e 54 neʼe tuʼutāmaki kovi, pea ko te ʼu ʼapi e 19 neʼe holoʼi. Neʼe nātou toe ʼaʼahi te kau Fakamoʼoni fuli ʼo te motu pe neʼe nātou maʼu fuli he tokoni. ʼI te foaki ʼo te ʼu meʼa ʼofa ki te tuagaʼane, neʼe ʼui e te bouddhiste ʼe vāhaʼa fale mo te tuagaʼane, neʼe mole ina maʼu pe la he lau tī mai tana lotu. Ko te tahi fafine, neʼe fakamaʼa tona ʼapi e te kau Fakamoʼoni, neʼe ʼui maʼana: “Kua fualoa pe takotou tau tatuʼu mai ki toku ʼapi, kae ʼi taku pe manatu ko koutou ko te ʼu vāhaʼa fale lelei, kae ko te aga fakakāiga ʼaenī ʼe ina fakahā lelei mai te ʼuhiga ʼo tokotou kautahi.”

ʼO mole gata ʼaki pe te ʼu meʼa fakasino ʼaē ki ʼonatou ʼu kaugā fagona kilisitiano fuli, neʼe nātou toe tokaga aipe ki te ʼaluʼaga fakalaumālie ʼo ʼonatou ʼu kaugā fagona. Mole heʼeki hili ʼaho e lua ki te afā, kae kua lahi ʼaupito te ʼu kokelekasio kua nātou fai tanatou ʼu fono. Mole tuai, neʼe toe fai mo te ʼu kiʼi ako tohi. Ko te ʼu tagata ʼāfea e hogofulu mai ʼihi motu neʼe ʼōmai ʼo tokoni ki te ʼu tagata ʼāfea ʼo Kauai ke nātou fai te ʼu ʼaʼahi faka tauhi ōvi ki te kau Fakamoʼoni fuli ʼo te motu. Ko te ʼahotapu ki muli age, ko te ʼu kokelekasio fuli ʼaē e ono neʼe nātou ako Te Tule Leʼo, ko te akonaki e minuta 30 ʼo ʼuhiga mo te ʼu fakatuʼutuʼu ki te tokoni neʼe fai e te tagata ʼāfea ʼo te komite tokoni, pea neʼe fai leva te akonaki fakaʼosi e minuta 30 e te tēhina ʼo te Komite ʼo te filiale ʼaē neʼe haʼu mai Honolulu ʼo ʼuhiga mo te fakatuʼutuʼu ʼaia. ʼE ʼui e te tahi neʼe mamata kiai, ʼo fēnei: “Ko te hahaʼi fuli neʼe loto fīmālie ʼuhi ko te tokoni lelei ʼaē neʼe fai pea kua nātou mālolohi fakalaumālie moʼo fakatokatoka ʼo ʼonatou ʼu fihifihia. Tokolahi ʼaupito neʼe fetagihi ʼi te fakaʼosi ʼo te fono pea mo pasipasi fakamalotoloto.”

Ko te ʼofa fakatautehina faka malamanei

Ko te ʼofa pea mo te tokaga ʼaia ʼe ko he fakaʼiloga ia ʼa te hahaʼi ʼa Sehova ʼi te malamanei. ʼI te haga ʼaē ʼa te afā ko Val ʼo fueʼi te potu hihifo ʼo Haʼamoa ʼi te taʼu ki muʼa atu, neʼe lahi te ʼu meʼa neʼe maumau, kae ko te kau Fakamoʼoni ʼa Sehova ʼi ʼihi ʼu potu ʼo te malamanei neʼe nātou ʼōmai fakavilivili ʼo tokoni ki ʼonatou ʼu tēhina. Pea ʼi te foaki ʼaē e te puleʼaga te falā ki te ʼu lotu fuli — ʼo kau ai foki mo te kau Fakamoʼoni ʼa Sehova — moʼo fakatokatoka tanatou ʼu meʼa ʼaē neʼe maumau, neʼe liufaki e te kau Fakamoʼoni te falā ʼaki te tohi ʼe nātou fakahā ai ko ʼanatou ʼu meʼa fuli ʼaē neʼe maumau neʼe kua ʼosi gaohi ia, pea ko te falā ʼaia neʼe feala ke gaohi ai ʼihi ʼu fale ʼo te puleʼaga fakatagata neʼe maumau. Neʼe fakahā tanatou aga ʼaia ʼi te sulunale ʼo te potu ʼaia. Koutou fakatokagaʼi te meʼa ʼaenī, ko te ofisie ʼo te puleʼaga neʼe ina fakahā ki te Fakamoʼoni, ʼe ufiufi ki tana ’Ēkelesia, koteʼuhi neʼe nātou tali te falā ʼaē mai te puleʼaga logope la ko ʼanatou ʼu fale fuli ʼaē neʼe maumau lolotoga ʼo te afā neʼe gaohi ʼaki te falā ʼe tuku kehe ki te taʼi tuʼutāmaki ʼaia.

ʼO toe feiā pe, ʼi sepetepeli ʼo te taʼu 1992, ko te liuʼa ʼo Ouvèze ʼi te potu toga-hahake ʼo Falani neʼe lōfia pea mo maumauʼi Vaison-la-Romaine pea mo te ʼu kolo e 15 ʼi ʼona ʼu tafa, ko te kau Fakamoʼoni neʼe nātou tokoni fakavilivili kiai. ʼI te pōʼuli, ko te toko 40 neʼe mamate ʼi te lōfia, ko te ʼu ʼapi e 400 neʼe holoʼi, pea ko ʼapi e teau tupu neʼe maumau, pea ko te ʼu famili ʼe lauʼi afe ʼe mole kei maʼu honatou ʼu moʼi vai pea mo te hila. ʼI te kei hegihegi ʼo te ʼaho age, neʼe ko te kau Fakamoʼoni ʼo te ʼu kokelekasio ʼo te koga meʼa ʼaē neʼe mumuʼa mai ʼo tokoni ki te kau vikitima ʼo te lōfia. Ko nātou ʼaē neʼe ʼaoga kiai he nofoʼaga neʼe tali fakalelei nātou e te ʼu famili Fakamoʼoni ʼo Vaison-la-Romaine. Ko te kau Fakamoʼoni ʼe toko teau tupu ʼaē neʼe ʼōmai mai te ʼu potu fuli pe, ʼo tokoni kia nātou. Ko te komite tokoni neʼe fakatuʼu ʼi te kolo ʼe ōvi ki Orange moʼo takitaki te ʼu faiga ʼa te ʼu kūtuga e fā, neʼe nātou heu te pela pea mo fufulu te ʼu ʼapi, neʼe nātou fō te ʼu tuʼuga mutuʼi meʼa pelapela, pea neʼe nātou teuteuʼi pea mo tufa te meʼa kai pea mo te vai maʼa ʼi te ʼu faʼahi ʼaē ʼe ʼaoga kiai. Neʼe toe tali lelei pe e nātou ke nātou fakamaʼa te fale ako pea mo te ʼatu ʼu fale faka puleʼaga. Ko tanatou ʼu tokoni fakamalotoloto ʼaia neʼe leleiʼia e ʼonatou ʼu tēhina pea mo te hahaʼi ʼo te koga meʼa ʼaia.

ʼI ʼihi ʼu koga meʼa, ko te kau Fakamoʼoni ʼa Sehova neʼe nātou mamahi ʼi te ʼu tuʼutāmaki, ohage ko te ʼu lōfia, te ʼu tuʼani matagi, pea mo te ʼu mafuike, ohage pe ko te hahaʼi fuli. ʼI tanatou mahino ʼaē ko te ʼu meʼa ʼaia ko te ʼu ikuʼaga ʼo te ʼu meʼa fakafokifā pea mole lava hona tekeʼi, ʼe mole nātou laukovi ki te ʼAtua peʼe ko he tahi age (Tagata Tānaki 9:11). Kae, ʼe nātou falala ko te ʼofa faka sakilifisio ʼo tonatou ʼu kaugā fagona ʼe tokoni anai kia nātou ʼi he faʼahiga ʼaluʼaga pe ʼe hoko kia nātou. Ko te ʼu gāue ʼofa ʼaia, ko te fua ʼaia ʼo te tui ʼaē ia nātou fuli. ʼE fakamatala e te tisipulo ko Sake, ʼo fēnei: “Kapau ko he tēhina peʼe ko he tuagaʼane ʼe telefua pea mo hāla ʼi te meʼa kai ʼo te ʼaho fuli, pea ka ʼe ʼi ai he tahi ia koutou ʼe ina ʼui age fēnei: ‘Koutou ʼolo ʼi te tokalelei, koutou tokaga kia koutou pea mo koutou haga kakai fakalelei’, kae ʼe mole ina foaki age te meʼa ʼaē ʼe ʼaoga ki ʼonatou sino, koteā tona ʼuhiga? ʼO tatau aipe ki te tui, kapau ʼe mole ʼi ai hana ʼu gāue ʼe mate ia.” — Sake 2:15-17.

Te matapuna ʼo te puipui moʼoni

Ko te kau Fakamoʼoni ʼa Sehova ʼe nātou mahino ko te puipui ʼe maʼu mai tonatou ʼofa fakatautehina faka malamanei kae ʼe mole nātou ʼamanaki ke hoko he ʼu faʼahiga milakulo fakaʼatua makehe. ʼI tona fakahagatonu, ko te meʼa ʼaē ʼe feala ke fai e te ʼofa fakatautehina ʼi te ʼu temi mamahi ʼe hage ʼe faka milakulo pe. ʼE nātou manatuʼi te ʼu palalau ʼa Sesu ia Mateo 17:20: “Kapau ʼe koutou maʼu he tui ʼe fualahi ohage he tegaʼi sinapi, pea ʼe koutou ʼui age anai ki te moʼuga nei: ‘Hiki ia koe ʼi henī ki he atu’, pea ʼe hiki anai ia, pea ʼe mole toe faigataʼa he meʼa kia koutou.” Ei, ko te ʼu faigataʼaʼia ʼaē ʼe hage ko he ʼu moʼuga ʼe puli ia mokā ko te tui faka kilisitiano moʼoni ʼo fakatahi mo te ʼofa, ʼe gāue.

Ko te hahaʼi ʼa Sehova ʼi te malamanei ʼe nātou logoʼi te nima puipui ʼo tonatou ʼAtua ʼi te ʼu temi maveuveu pea mo faigataʼa. ʼE nātou logoʼi te manatu ʼaē ʼa te tagata fai pesalemo: “ ʼI te tokalelei ʼe ʼau takoto anai pea ʼe ʼau moe ai anai, he ko koe tokotahi pe, ê Sehova, ʼe ke fakanofo ʼau ʼi te fīmālie.” (Pesalemo 4:8). ʼAki he loto falala, ʼe nātou tokakaga ki te maʼua ʼaenī: “Pea ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:14). Pea ʼe mahino ia, ʼe nātou fakatalitali ki te fakahoko ʼo te fakapapau ʼa Sehova ʼo ʼuhiga mo te mālama foʼou tokalelei pea mo faitotonu, ʼaē ʼe mole toe ʼi ai anai he ʼu tuʼutāmaki, peʼe mai te tagata peʼe mai te kele. — Mikea 4:4.

[Paki ʼo te pasina 12]

Ko te kau Fakamoʼoni mai te ʼu potu fuli neʼe nātou ʼōmai ʼo tokoni kia nātou ʼaē neʼe tuʼutāmakiʼia ʼi te lōfia.