ʼE Nātou Foaki He Tokoni ʼi Te Lotolotoiga ʼo Te ʼu Maumau

ʼE MAHINO papau ia, ko te ʼu faiga ʼa te tagata moʼo foaki ʼo he tokoni ʼi te hili ʼo he tuʼutāmaki, ʼe ko he meʼa ʼe tonu ke fakavikiviki. Ko te ʼatu ʼu polokalama ʼaē neʼe fai, neʼe nātou tokoni ki te toe laga ʼo te ʼu ʼapi, mo te fakatahiʼi ʼo te ʼu famili, pea ia meʼa fuli, neʼe nātou hāofaki te hahaʼi.

Ka hoko he ʼu tuʼutāmaki, ʼe fakaʼaogaʼi e te kau Fakamoʼoni ʼa Sehova te ʼu fakatuʼutuʼu fuli ʼaē neʼe fai e te ʼu polokalama ʼaia, pea ʼe nātou loto fakafetaʼi ʼo ʼuhiga mo te ʼu faʼahi ʼaia. ʼI te temi ʼaia, ʼe ko tonatou maʼua faka Tohi-Tapu ke nātou “fai te meʼa ʼaē ʼe lelei . . . tāfito kia nātou ʼaē ko [tonatou] ʼu kāiga ʼi te tui.” (Kalate 6:​10) Ei, ki te kau Fakamoʼoni ʼa Sehova ʼe nātou kāiga mo nātou ʼaia; ʼe nātou hage ko he foʼi “famili.” Ko te tupuʼaga la ʼaia ʼo tanatou fehigoaʼaki ia nātou ko “tēhina” pea mo “tuagaʼane.”​—Vakaʼi ia Maleko 3:​31-​35; Filemone 1, 2.

Koia, mokā hoko he tuʼutāmaki ʼi te ʼu kolo ʼo te ʼu tafaʼaki, ʼe faiga fakamalotoloto te kau tagata ʼāfea ʼo te kau Fakamoʼoni ʼa Sehova ke nātou ʼiloʼi te koga meʼa ʼaē neʼe hoko ai te tuʼutāmaki, pea mo nātou ʼiloʼi te ʼu meʼa ʼaē ʼe ʼaoga ki te hahaʼi fuli ʼo te kokelekasio, pea mo nātou fai he ʼu fakatuʼutuʼu moʼo tokoni kia nātou. Tou vakaʼi pe neʼe hoko feafeaʼi te faʼahi ʼaia ʼi Accra, ʼi Ghana; ʼi San Angelo, ʼi Amelika; pea ʼi Kobe, ʼi Saponia.

Accra​—“Ko He Tulivio Veliveli”

Neʼe kamata tō te ʼua ʼi te hola 11 ʼo te pōʼuli, pea neʼe ʼua hoholo lolotoga ni ʼu hola. “Neʼe mole mamoe tamatou loto fale ʼi te ʼua ʼaē neʼe tō,” ko te ʼui ʼaia ʼo John Twumasi, ko te Fakamoʼoni ʼa Sehova ʼi Accra. Neʼe fakahigoaʼi te ʼua ʼaia e te nusipepa Daily Graphic ko te “tulivio veliveli.” Neʼe toe ʼui fēnei e John: “Neʼe mātou faiga ke mātou fetuku he ʼu meʼa maʼuhiga ki te falefata, kae ʼi tamatou avahi te matapā ʼo te tuʼuga, neʼe hū mai te vai ki tomatou ʼapi.”

Neʼe fakatatagi e te kau takitaki ʼo te kolo te fakatokaga ʼaē ke mavae te hahaʼi, kae ko te tokolahi neʼe lotolotolua, he neʼe nātou matataku naʼa hū te hahaʼi kaihaʼa ki tonatou ʼu ʼapi lāvaki, māʼiape la pe neʼe fonu ai te vai. Ko ʼihi, neʼe mole feala hanatou mavae, māʼiape la pe neʼe nātou loto kiai. ʼE ʼui fēnei e te taʼahine ʼe higoa ko Paulina: “Neʼe mole feala ke ma avahi mo taku faʼe ia te matapā. Neʼe hakehake tuʼumaʼu te vai, koia neʼe ma tutuʼu ʼi te ʼu foʼi poe, ʼo ma tapiki ki te ʼu papa ʼo te ʼato. Moʼo fakaʼosi, ʼi te lagi hola nima māfoatā, neʼe hāofaki māua e tomā ʼu vāhaʼa fale.”

Mole tuai, pea neʼe kamata tokoni te kau Fakamoʼoni ʼa Sehova ki te hahaʼi. ʼE fakamatala fēnei e te tuagaʼane ʼe higoa ko Béatrice: “Neʼe kumi mātou e te ʼu tagata ʼāfea ʼo te kokelekasio, pea neʼe nātou maʼu mātou ʼi te ʼapi ʼo te tēhina ʼaē neʼe mātou ʼolo ʼo kumi hāofaki ai. Hili pe kiai ʼaho e tolu ʼi te ʼosi ʼo te lōfia, neʼe ʼōmai te kau tagata ʼāfea pea mo te kau tūpulaga ʼo te kokelekasio ki tomatou faʼahi, pea mo nātou fakamaʼa te pela ʼaē neʼe ʼi loto pea ʼi tuʼa ʼo tomatou ʼu ʼapi. Neʼe foaki e te Sosiete Watch Tower he ʼu meʼa fakamaʼa, te pena, te ʼu matela, mo te ʼu hekaʼaga, mo te ʼu mutuʼi meʼa, pea mo te ʼu mutuʼi meʼa maʼa te ʼu tamaliki. Neʼe foaki mai e te ʼu tēhina te meʼa kai neʼe feʼauga ki ni ʼu ʼaho. Neʼe malave ʼaupito kia ʼau te faʼahi ʼaia!”

ʼE ʼui fēnei e John Twumasi, ʼaē neʼe tou talanoa ki ai ʼi te kamata: “Neʼe ʼau ʼui age kia nātou ʼaē neʼe nonofo ʼi te ʼu kogafale lue, neʼe foaki mai e te Sosiete kia mātou he ʼu meʼa fakamaʼa, neʼe feʼauga moʼo fakamaʼa te falefata katoa. Neʼe lagi ko te toko 40 hahaʼi ʼaē neʼe nonofo ʼi te ʼu kogafale lue neʼe nātou tokoni ki te fakamaʼa ʼaia. Neʼe ʼau foaki he ʼu meʼa fakamaʼa ki te hahaʼi ʼo toku vāhaʼa fale, ʼo kau ai mo te tagata ʼaē ʼe patele ʼi te ʼēkelesia ʼo te kolo. Neʼe manatu hala toku ʼu kau kaugā gāue, he neʼe nātou manatu ʼe ʼofa pe te kau Fakamoʼoni ʼa Sehova ki tanatou hahaʼi.”

Neʼe loto fakafetaʼi lahi te ʼu tēhina pea mo tuagaʼane ki te tokoni ʼofa ʼaē neʼe foaki age kia nātou. Neʼe fakaʼosi fēnei e te tēhina ko Twumasi: “Logope la neʼe totogi kovi age tamatou ʼu meʼa ʼaē neʼe maumau ʼi te lōfia, ʼi te ʼu meʼa ʼaē neʼe foaki mai, kae ʼe ʼau manatu mo toku famili, neʼe lahi age te ʼu meʼa ʼaē neʼe mātou maʼu ʼi tamatou ʼu meʼa ʼaē neʼe maumau, ʼuhi ko te fakatuʼutuʼu ʼofa ʼaia ʼaē neʼe fai e te Sosiete.”

San Angelo​—“Neʼe Hage Ia Ko Te Fakaʼosi ʼo Te Malamanei”

Ko te afā ʼaē neʼe ina maumauʼi ia San Angelo ʼi te ʼaho 28 ʼo Maio 1995, neʼe ina taʼaki te ʼu fuʼu ʼakau, mo fasifasiʼi te ʼu pou hila, pea leta ai te ʼu kauʼi filo hila ʼi te ʼu ala. Ko te mālohi ʼo te matagi neʼe ko te 160 kilometa ʼi te hola, ʼo ina maumauʼi te ʼu fale ʼo te ʼu sosiete lalahi. Neʼe mole he hila ʼi te ʼu ʼapi e 20 000. Pea neʼe tō leva te ʼua maka. Neʼe fakahā e te Tala Logo ʼo te Meteo, ko te fualahi ʼo te ʼua maka neʼe tatau mo te fualahi ʼo he tīpolo, pea neʼe fualahi leva ohage ko he foʼi moli, pea ʼi te fakaʼosi leva, ohage ko he pamplemousse. Neʼe logoaʼa ʼaupito te tō ʼo te ʼua maka. Neʼe ʼui fēnei e te tagata: “Neʼe hage ia ko te fakaʼosi ʼo te malamanei.”

Pea neʼe gona te afā. Neʼe hū ki tuʼa te hahaʼi ʼi tonatou ʼu ʼapi ʼaē neʼe kua maumau, ke nātou mamata ki te ʼu maumau ʼaē neʼe hoko. Ko te ʼu fuʼu ʼakau ʼaē neʼe kei tuʼu, neʼe mole kei ʼi ai honatou ʼu lau. Ko te ʼu ʼapi ʼaē neʼe kei tuʼu neʼe hage neʼe maumauʼi katoa. ʼI ʼihi ʼu koga meʼa, neʼe ʼaofi e te ʼua maka te kele, pea neʼe fetātānaki ai ʼo meta tahi tona mātolu. Ko te ʼu lauʼi afe matapā sioʼata ʼo te ʼu ʼapi pea mo te ʼu motokā neʼe foafoaʼi ʼi te afā, koia ʼi te temi ʼaia neʼe gigila te ʼu eveʼi sioʼata ʼi te ʼua maka ʼaē neʼe leta ʼi te kele. ʼE ʼui fēnei e te fafine: “ ʼI taku ʼalu ʼaē ki toku ʼapi, neʼe ʼau heka ki taku motokā ʼaē neʼe tuʼu ʼi te ala, pea neʼe ʼau tagi. ʼI te lahi ʼaupito ʼo te maumau, neʼe mole kei feala ke ʼau kātakiʼi toku mamahi.”

Ko te ʼu polokalama ʼaē moʼo tokoni pea mo te ʼu fale mahaki, neʼe nātou foimo foaki he tokoni ʼi te faʼahi faka paʼaga, mo te ʼu meʼa gāue ʼaē ʼe ʼaoga moʼo laga ʼo he ʼu fale, mo te ʼu meʼa faitoʼo, pea mo te ʼu hahaʼi ʼe ko tanatou gāue ʼe ko te tokoniʼi ʼo te hahaʼi ʼo ʼuhiga mo tonatou ʼu fihifihia. ʼE tau mo feʼauga ke vikiʼi te hahaʼi ʼaē neʼe hoko kia nātou te ʼu tuʼutāmaki, ka neʼe nātou tokoni mo nātou ki ʼihi.

ʼI te temi ʼaia, neʼe toe gāue mo te ʼu kokelekasio ʼo te kau Fakamoʼoni ʼa Sehova moʼo tokoni ki te hahaʼi. ʼE fakamatala fēnei e Aubrey Conner, ko te tagata ʼāfea ʼi San Angelo: “ ʼI te temi pe ʼaē neʼe ʼosi ai te afā, neʼe mātou fetelefoniʼaki ke mātou ʼiloʼi te ʼaluʼaga ʼo te ʼu tēhina mo tuagaʼane. Neʼe mātou fetokoniʼaki, pea mo tokoni ki te hahaʼi ʼo tomatou ʼu vāhaʼa fale ʼaē neʼe mole ko he ʼu Fakamoʼoni ʼa Sehova, ʼo mātou gaohi te ʼu matapā sioʼata, mo ʼai te palasitike ki te ʼu ʼato, pea neʼe mātou faiga ke mātou ʼai he ʼu meʼa moʼo puipui te ʼu ʼapi naʼa hū ki loto te vai. Pea neʼe mātou fai te lisi ʼo nātou ʼi te kokelekasio ʼaē neʼe maumau tonatou ʼu ʼapi. Neʼe ko lagi ʼapi e teau ʼaē neʼe tonu ke toe gaohi, pea ko te ʼu meʼa gāue ʼaē neʼe foaki mai e te ʼu fale tokoni neʼe mole feʼauga. Koia, neʼe mātou totogi te tahi ʼu meʼa gāue, pea neʼe mātou fai he ʼu fakatuʼutuʼu ki te gāue. ʼI tona katoa, neʼe ko te toko 1 000 kau Fakamoʼoni ʼaē neʼe ʼōmai ʼo tokoni ʼaki tanatou lotolelei, neʼe ko te lagi toko 250 hahaʼi ʼi te ʼu fakaʼosi vāhaʼa fuli. Neʼe nātou ʼōmai mai mamaʼo, ia kilometa e 740. Ko nātou fuli neʼe nātou gāue kinakina, ʼo nātou gāue ʼi ʼihi temi ʼi te vevela ʼaē neʼe teitei ke 40° C. Māʼiape la mo te tuagaʼane finematuʼa, e taʼu 70, neʼe gāue mo mātou ʼi te ʼu fakaʼosi vāhaʼa fuli, gata pe ʼi te fakaʼosi ʼo te vāhaʼa e tahi, he neʼe ko te temi ʼaē neʼe toe gaohi ai tona ʼapi. Pea ʼi te fakaʼosi vāhaʼa ʼaia, neʼe kake ki te fuga ʼato ʼo tona ʼapi moʼo tokoni ki tona toe gaohi!

“Neʼe mātou tau logo ki te palalau fēnei ʼa nātou ʼaē neʼe mamata ki tamatou gāue: ‘ ʼE mole ko he meʼa lelei koa la mo kanapaula neʼe fai feiā e ʼihi ʼu lotu ki tonatou ʼu hahaʼi?’ Neʼe ōfo te hahaʼi ʼo te kolo ʼi tanatou sio ʼaē ki te kau gāue e toko 10 ki te toko 12 (ʼo kau kiai mo te ʼu tuagaʼane), neʼe nātou ʼōmai ʼi te Feliaono uhuuhu, ki te ʼapi ʼo te Fakamoʼoni ʼa Sehova, ʼo nātou fakatokatoka pea mo toe fau te ʼato katoa, ka mole totogi nātou. ʼE lahi te ʼu ʼaluʼaga, neʼe fai te gāue ʼaia ʼi te fakaʼosi vāhaʼa pe e tahi. ʼI te tahi lakaga, ko te tagata poto ʼi te faʼu fale, neʼe ina gaohi te ʼato pea mo tana hahaʼi gāue, ʼi te temi ʼaē neʼe mātou ʼōmai ai ki te tahi ʼapi. Neʼe mātou toʼo te ʼu taliave ʼāfea ʼo te ʼato, pea neʼe mātou ʼai tona ʼu taliave foʼou, pea neʼe mātou fakamaʼa te malaʼe, ka neʼe mole heʼeki ʼosi tanatou gaohi ʼo te ʼato ʼaē neʼe nātou gāue ai. ʼI ʼihi temi, neʼe nātou tuku tanatou gāue pea neʼe nātou fakasiosio mai.”

ʼE fakaʼosi fēnei e te tēhina ko Conner: “ ʼE mātou manatuʼi fuli anai te ʼu gāue ʼaē neʼe mātou fai fakatahi. Neʼe kua mātou feʼiloʼi leleiʼaki, ʼi tamatou fakahā pea mo maʼu te ʼofa fakatautehina, ʼaē neʼe mole heʼeki feiā ki muʼa atu. ʼE mātou logoʼi ʼi ʼomātou loto ko te faʼahi ʼaia ʼe ko he faʼifaʼitaki ʼaia ʼo te meʼa ʼaē ka hoko anai ʼi te mālama foʼou ʼo te ʼAtua, ʼi te fakamalotoloto ʼaki ʼo te ʼu tēhina mo te ʼu tuagaʼane.”​—2 Petelo 3:​13.

Ko Kobe​—“Ko Te Toe Maumau ʼo Te ʼu Fuʼu ʼAkau, Mo Te Simā, Pea Mo Te Kau Mātea”

Neʼe ʼui neʼe kua ʼosi teuteu te hahaʼi ʼo Kobe. ʼI tona fakahagatonu, ʼi te ʼu ʼuluaki ʼaho fuli ʼo Sepetepeli, neʼe nātou fai te ʼAho Teuteu ki he Tuʼutāmaki. Neʼe fai ʼi te ʼu faleako te ʼu akoako mokā hoko he mafuike, neʼe fai e te ʼu vakalele pūpū te ʼu akoako moʼo hāofaki ʼo te hahaʼi, pea neʼe toʼo mai ki tuʼa e te ʼu tagata tamate vela tanatou ʼu masini fakatupu mafuike, pea neʼe fai ai e ni ʼu hahaʼi tanatou ʼu gāue hāofaki ʼi te foʼi loto puha, ʼaē ʼe galulu ohage pe ko he mafuike moʼoni. Kae, ʼi te temi ʼaē neʼe hoko moʼoni ai te mafuike, ʼi te ʼaho 17 ʼo Sanualio 1995, neʼe hage ia neʼe mole he ʼaoga ʼo te ʼu meʼa fuli ʼaē neʼe nātou teuteuʼi. Neʼe ko ʼato e hogofulu afe ʼaē neʼe maumau, pea ko te meʼa ʼaia neʼe mole heʼeki hoko ʼi te ʼu akoako ʼaē neʼe nātou fai ʼi te ʼu masini ʼaē ʼe nātou faʼifaʼitakiʼi te galulu ʼo te mafuike. Neʼe mafuli te ʼu saliote afi; neʼe maumau te ʼu ala lalahi; neʼe motuhi te ʼu tuio ʼo te kasa pea mo te vai; neʼe holo te ʼu ʼapi ohage ko he ʼu kalato. Neʼe fakamatala e te Time te meʼa ʼaē neʼe hoko ohage ko he “toe maumau ʼo te ʼu fuʼu ʼakau, mo te simā, pea mo te kau mātea.”

Neʼe hoa leva kiai te afi. Neʼe vela te ʼu falefata kae lotomamahi te ʼu tagata tamate vela ʼi te mole feala ʼo tanatou fakalaka ʼuhi ko te lahi ʼo te ʼu motokā ʼaē neʼe leta ʼi te ala. Ko nātou ʼaē neʼe aʼu atu ki te ʼu koga meʼa ʼaē neʼe ʼi ai te afi, ʼi ʼihi temi neʼe mole nātou maʼu he vai ʼi te kolo ʼaē neʼe maumauʼi ai te ʼu matapuna vai. Neʼe ʼui e te tagata tamate vela “ko te ʼuluaki ʼaho neʼe mole kei ʼiloʼi e te hahaʼi pe koteā te meʼa ʼaē ʼe tonu ke nātou fai. Neʼe mole heʼeki ʼi ai he temi neʼe ʼau logoʼi ai te mole feala ʼaē ke ʼau fai he meʼa, ʼi taku ʼiloʼi ʼaē ko te tokolahi ʼo te hahaʼi kua tanumia ʼi te ʼu ʼapi ʼaē neʼe vela, pea mo taku ʼiloʼi ʼaē neʼe mole he meʼa neʼe feala ke ʼau fai ʼo ʼuhiga mo te faʼahi ʼaia.”

ʼO fakakatoa ʼaia, neʼe mamate te toko 5 000 hahaʼi, pea neʼe ko falefata ʼe teitei 50 000 ʼaē neʼe maumau. Neʼe maʼu ʼi Kobe te vahe tolu ʼo te meʼa kai ʼaē neʼe ʼaoga. Ke feala hanatou maʼu he vai, ko ʼihi neʼe nātou ʼohu te vai ʼuli ʼaē neʼe hali ʼi te ʼu tuio ʼaē neʼe kua maumau. Tokolahi ia nātou ʼaē neʼe mole kei ʼi ai honatou ʼu nofoʼaga, neʼe nātou ʼolo ki te ʼu fale hāofaki, ʼaē neʼe nātou maʼu ai te meʼa kai, pea neʼe tufa ki te hahaʼi ʼi te ʼaho fuli te kiʼi moʼi laisi veliveli. Mole tuai, pea neʼe tupu te ʼita ʼo te hahaʼi. Neʼe ʼui fēnei e te tagata: “Neʼe mole fai pe la he meʼa e te puleʼaga. Kapau ʼe mātou haga falala kia nātou, pea ʼe mātou mamate pakupaku anai.”

ʼI te moʼi temi pe ʼaia, neʼe gāue te ʼu kokelekasio ʼo te kau Fakamoʼoni ʼa Sehova ʼi Kobe pea mo te ʼu kokelekasio ʼo te ʼu kolo. Neʼe ʼui fēnei e te pailate ʼo te pūpū ʼaē neʼe sio tonu ki tanatou gāue: “ ʼI te ʼaho ʼaē neʼe hoko ai te mafuike, neʼe ʼau haʼu ki te koga meʼa ʼaē neʼe hoko ai te ʼu maumau, pea neʼe ʼau nofo ai ʼi te vāhaʼa katoa. ʼI taku aʼu ki te koga meʼa ʼaē neʼe kumi hāofaki ai te hahaʼi, neʼe mole heʼeki fai he fakatuʼutuʼu. Neʼe mole fai he gāue moʼo tokoni ki te hahaʼi. Neʼe gata pe ki te kau Fakamoʼoni ʼa Sehova ʼaē neʼe nātou ʼōmai ki te koga meʼa ʼaia, ʼo nātou fai te ʼu gāue kehekehe ʼaē neʼe tonu ke fai.”

ʼI tona fakahagatonu, neʼe lahi te ʼu gāue ʼaē neʼe tonu ke fai. Ko te ʼu Fale e 10 ʼo te Puleʼaga neʼe mole kei feala ke fakaʼaogaʼi, pea neʼe ko te toko 430 kau Fakamoʼoni neʼe mole kei ʼi ai honatou ʼu ʼapi. Pea tahi ʼaē meʼa, neʼe tonu ke toe gaohi te ʼu ʼapi e 1 206 ʼaē neʼe nātou nonofo ai. Tahi ʼaē meʼa, neʼe tonu ke fakaloto fīmālieʼi te ʼu famili ʼo te toko 15 kau Fakamoʼoni ʼa Sehova ʼaē neʼe mamate ʼi te mafuike.

Ko te toko 1 000 kau Fakamoʼoni mai te ʼu kolo tafaʼaki, neʼe nātou foaki ʼaki he lotolelei tonatou temi moʼo tokoni ki te toe gaohi ʼo te ʼu meʼa ʼaē neʼe maumau. Neʼe ʼui fēnei e te tēhina: “ ʼI te temi ʼaē neʼe mātou fakatokatoka ai te ʼu ʼapi ʼo nātou ʼaē kei ako, kae mole heʼeki papitema, neʼe nātou fehuʼi tuʼumaʼu mai: ‘ ʼE tonu ke mātou totogi atu te fia ki te gāue ʼaē neʼe koutou fai?’ ʼI tamatou ʼui age ʼaē ko te gāue ʼe fai ʼaki te falā ʼa te ʼu kokelekasio, neʼe nātou fakamālo mai, ʼo nātou ʼui fēnei: ‘Ko te meʼa ʼaē neʼe mātou ako, kua liliu ʼi te temi nei ko he meʼa moʼoni!’ ”

Tokolahi neʼe nātou ōfo ʼi te gāue fakavilivili ʼa te kau Fakamoʼoni ʼi te hili ʼo te tuʼutāmaki. “Neʼe ʼau ōfo lahi,” ko te ʼui ʼaia ʼa te pailate ʼo te pūpū ʼaē neʼe tou talanoa kiai ʼi ʼoluga. “ ʼE koutou fehigoaʼaki ko ‘tēhina’ pea mo ‘tuagaʼane.’ Neʼe ʼau sio ki takotou fetokoniʼaki; ko koutou ʼe ko he foʼi famili moʼoni.”

Neʼe toe maʼu e te kau Fakamoʼoni ʼa Sehova he ako ʼe lelei mai te mafuike ʼaē neʼe hoko. Neʼe tala fēnei e te tuagaʼane: “Neʼe ʼau manatu tuʼumaʼu, kapau ʼe kaugamālie ʼaupito he kautahi, pea ʼe toe faigataʼa ʼaupito age te tokaga ʼaē ki te hahaʼi takitokotahi.” Kae ko te tokaga ʼofa ʼaē neʼe fai kia ia, neʼe ina fetogi ai tana manatu. “ ʼI te temi nei, kua ʼau ʼiloʼi ko Sehova ʼe tokaga kia tatou ʼo mole tokaga pe kia tatou ʼi totatou ʼuhiga kautahi, kae ʼe ina fai kia tatou takitokotahi.” Kae, ʼe tou fakatalitali ki te temi ʼaē ʼe mole toe hoko ai anai he tuʼutāmaki.

Kua Ōvi Mai Te Fīmālie Heʼegata!

ʼE talitali te kau Fakamoʼoni ʼa Sehova ki te temi ʼaē ʼe mole toe mamate ai anai te hahaʼi, pea mo hoge meʼa kai pea mo meʼa ʼinu ʼuhi ko te ʼu tuʼutāmaki. ʼI te mālama foʼou ʼaē ka fakatuʼu e te ʼAtua, ʼe akoʼi anai ki te hahaʼi ke nātou gaohi fakalelei te ʼu koga meʼa ʼaē ʼe nātou maʼuʼuli ai. ʼE mole lahi anai te ʼu tuʼutāmaki ʼaē ka hoko, heʼe mole kei manatu te hahaʼi kia nātou totonu.

Ki muli age, ko Sehova ʼAtua​—ʼaē neʼe ina fakatupu te ʼu meʼa mālohi fuli—​ʼe tokaga anai ke mole toe hoko he tuʼutāmaki ki tana hahaʼi pea mo te ʼu meʼa ʼaē neʼe ina fakatupu. ʼI te temi ʼaia, ʼe liliu moʼoni anai te kele ko he palatiso. (Isaia 65:17, 21, 23; Luka 23:43) ʼE hoko faka kolōlia anai te lea faka polofeta ʼaē ʼe tuʼu ia Fakahā 21⁠:​4, ʼaē ʼe ʼui fēnei ai: “ ʼE ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.”

[Paki ʼo te pasina 5]

ʼE fakahā e Béatrice Jones (ʼi te faʼahi hema) pe neʼe feafeaʼi tanatou fakalaka ʼi te ʼu vai ʼaki tanatou fetapikiʼaki

[Paki ʼo te pasina 6]

Ko te ʼu gāue ʼaē neʼe fai moʼo tokoni ki te hahaʼi ʼi te hili ʼo te afā