Ko Te Manatu Faka Kilisitiano ʼo ʼUhiga Mo Te Pule
“ ʼE mole ʼi ai he pule mo kapau neʼe mole fakagafua e te ʼAtua.”—Loma 13:1.
1. He koʼe koa neʼe feala ke ʼui ko Sehova ko te Pule Māʼoluga?
KO TE pule ʼe pipiki ki te tupuʼaga. Ko te ʼAtua Māʼoluga ʼaē neʼe ina foaki te maʼuli kia meʼa fuli ʼe gaūgaūe pea mo ʼaē ʼe mole gaūgaūe, ko Sehova ʼAtua. ʼE mahino papau ia ko ia te Pule Māʼoluga. ʼE tatau te ʼu manatu ʼa te kau Kilisitiano moʼoni mo te ʼu manatu ʼa te ʼu meʼa maʼuli ʼo selo, ʼaē ʼe nātou ʼui fēnei: “ ʼE tau mo koe, Sehova, ʼio, tomatou ʼAtua ke ke tali te kolōlia, pea mo te fakaʼapaʼapa, pea mo te mālohi, he ko koe ʼaē neʼe ke fakatupu ia meʼa fuli, pea ʼaki tou finegalo neʼe maʼuli te ʼu meʼa fuli ʼaia pea mo fakatupu ia nātou.”—Fakahā 4:11.
2. Neʼe feafeaʼi te fakamoʼoni e te kau ʼuluaki takitaki neʼe mole tāu mo nātou ke nātou puleʼi tonatou ʼu tatau, pea koteā te meʼa neʼe ʼui age e Sesu kia Posio Pilato?
2 Mai tona ʼaluʼaga ʼaē, ko te tokolahi ʼi te kau ʼuluaki hau neʼe nātou faiga ke nātou fakatafito ki te lao tonatou ʼuhiga pule ʼaki tanatou ʼui ʼaē ko nātou ko te ʼu ʼatua, pe ko ni ʼu fakafofoga ʼo he ʼatua, neʼe ko he fakamoʼoni ʼaia ʼo te mole tāu mo he tagata ke ina puleʼi he tahi age tagata.a (Selemia 10:23) Ko te matapuna pe e tahi ʼo te pule ʼe fakatafito ki te pule, ko Sehova ʼAtua. Neʼe ʼui e Kilisito kia Posio Pilato, te tuʼi Loma ʼi Sutea: “Neʼe mole feala ke ke pule mai anai kia te ʼau, mo ka na pau la neʼe mole foaki atu kia te koe mai ʼoluga.”—Soane 19:11.
“Mole ʼi Ai He Pule Mo Kapau Neʼe Mole Fakagafua e Te ʼAtua”
3. Koteā te meʼa ʼaē neʼe ʼui e te ʼapositolo ko Paulo ʼo ʼuhiga mo te ʼu “pule māʼoluga,” pea koteā te ʼu fehuʼi ʼe lagaʼi e te ʼu palalau ʼa Sesu mo Paulo?
3 Neʼe faitohi te ʼapositolo ko Paulo ki te kau Kilisitiano ʼaē neʼe maʼuʼuli ʼi te pule ʼo te Puleʼaga Loma, ʼo fēnei: “Ke fakalogo te nefesi fuli pe ki te ʼu pule māʼoluga, koteʼuhi heʼe mole ʼi ai he pule mo kapau neʼe mole fakagafua e te ʼAtua; pea ko nātou ʼaē ʼe tuʼu ʼe nātou tahi tuʼu ʼi tona tuʼulaga ʼuhi pe ko te ʼAtua.” (Loma 13:1) Koteā ʼaē neʼe fia fakamahino e Sesu ʼi tana ʼui ʼaē ko te pule ʼa Pilato neʼe foaki age ki ai “mai ʼoluga”? Pea koteā te manatu ʼa Paulo ʼi tana ʼui ʼaē ko te ʼu pule faka politike ʼo tona temi neʼe tahi tuʼu ʼi tona tuʼulaga ʼuhi pe ko te ʼAtua? ʼE faka ʼuhiga koa tanatou ʼu palalau ko Sehova totonu ʼaē ʼe ina fili te kau takitaki politike takitokotahi ʼo te malamanei?
4. Neʼe fakahigoaʼi feafeaʼi e Sesu mo Paulo ia Satana, pea koteā ʼaē neʼe ʼui e Satana ʼo mole fakafisi kiai ia Sesu?
4 He koʼe ʼe tou talanoa feiā, kae neʼe fakahigoaʼi e Sesu ia Satana “ko te pule ʼo te malamanei,” pea neʼe hinoʼi e Paulo ia Satana “ko te ʼatua ʼo te ʼu faʼahiga meʼa ʼo te tuʼu ʼaenī”? (Soane 12:31; 16:11; 2 Kolonito 4:4) Pea tahi ʼaē meʼa, ʼi te temi ʼaē neʼe fai ai te fakahala kia Sesu, neʼe momoli age e Satana kia ia “te pule” ʼo te ʼu “puleʼaga fuli ʼo te kele,” ʼo ina fakahā ai ko te pule ʼaia neʼe foaki age kia te ia. Neʼe fakafisi ia Sesu ki te meʼa ʼaē neʼe fia foaki age e Satana, kae neʼe mole fakafisi ia ki te tuʼulaga pule ʼaē neʼe foaki age kia Satana.—Luka 4:5-8.
5. (a) ʼE tonu ke tou mahino feafeaʼi ki te ʼu palalau ʼa Sesu pea mo Paulo ʼo ʼuhiga mo te pule? (b) Koteā te faka ʼuhiga ʼo te ʼui ʼaē ko te ʼu pule māʼoluga “ ʼe nātou tahi tuʼu ʼi tona tuʼulaga ʼuhi pe ko te ʼAtua”?
5 Neʼe tuku e Sehova te pule ʼo te mālama ʼaenī kia Satana ʼaki tana faka fealagia ʼaē kia te ia ke maʼuli ʼi te hili pe ʼaē ʼo tana fakaneke ia Atama pea mo Eva ke nā talagataʼa ki te pule faʼitaliha ʼa Sehova. (Senesi 3:1-6; vakaʼi ia Ekesote 9:15, 16.) Koia, ʼe tonu ke faka ʼuhiga te ʼu palalau ʼa Sesu pea mo Paulo, ʼi te hili ʼaē ki te situʼa ʼa te ʼuluaki taumatuʼa ki te takitaki faka teokalatike, peʼe ko te taki ʼa te ʼAtua, neʼe tuku e Sehova ki ni ʼu tagata ʼe manatu pe kia nātou ke nātou fakatuʼu he ʼu puleʼaki moʼo taki ʼo nātou, ke feala ai anai kia nātou ke nātou maʼuʼuli ʼi he sosiete ʼe mole maveuveu. ʼI ʼihi temi, moʼo fakahoko ʼo tana fakatuʼutuʼu, neʼe fakahifo e Sehova te ʼu pule peʼe ko ni ʼu puleʼaga. (Taniela 2:19-21) Ko ʼihi neʼe ina tuku ke hoko atu tanatou pule. Ki te kau pule ʼaē neʼe tuku e Sehova, ʼe feala pe ke ʼui neʼe nātou “tahi tuʼu ʼi tona tuʼulaga ʼuhi pe ko te ʼAtua.”
Ko Te Kau ʼUluaki Kilisitiano Pea Mo Te Kau Pule Loma
6. Neʼe koteā te manatu ʼa te kau ʼuluaki Kilisitiano ʼo ʼuhiga mo te ʼu pule faka Loma, pea koteā tona tupuʼaga?
6 Ko te kau ʼuluaki Kilisitiano neʼe mole nātou kau ki te ʼu kautau pea mo te ʼu magaʼi lotu faka Sutea ʼo ʼuhiga mo te fonofono pea mo te tauʼi ʼo te kau Loma ʼaē neʼe pule kia nātou. Mai tona ʼaluʼaga ʼaē ko te kau takitaki Loma ʼi te agamāhani neʼe nātou gāue ke ʼaoga ki te hahaʼi fuli pe, heʼe ʼaki tanatou ʼu fakatuʼutuʼu ʼaē neʼe fakatafito ki te lao, neʼe taupau maʼu te tokalelei ʼo te fenua feiā ki te tokalelei ʼo te tai; ʼo nātou faʼu te ʼu haʼuʼaga vai, te ʼu ala, pea mo te ʼu ʼalesō; koia la ʼaē neʼe faka ʼuhigaʼi ai nātou e te kau Kilisitiano ko te ‘minisi ia ʼa te ʼAtua [“kaugana,” vakaʼi te nota ʼi te lalo pasina ʼo te Tohi-Tapu fakapilitānia Traduction du monde nouveau] ki te lelei ʼo nātou.’ (Loma 13:3, 4) Ko te ʼu lao pea mo te tokalelei neʼe fakatupu ʼaki ai he ʼaluʼaga neʼe ina faka fealagia ki te kau Kilisitiano ke nātou faka mafola te logo lelei ʼi te ʼu potu taupotu, ohage ko te meʼa neʼe fakatotonu e Sesu. (Mateo 28:19, 20) ʼAki he leʼo ʼo loto ʼe lelei, neʼe nātou totogi te tukuhau ʼaē neʼe fakamaʼua age e te kau Loma, logope la mo kapau ko he potu ʼo te falā neʼe fakaʼaogaʼi ki ni ʼu gāue neʼe mole leleiʼia e te ʼAtua.—Loma 13:5-7.
7, 8. (a) Koteā ʼaē ʼe hā mai ʼi te lau fakalelei ʼo te tohi ʼo Loma 13:1-7, pea koteā te meʼa ʼaē ʼe fakahā mai e te ʼu vaega ʼaē ʼe tuʼu ʼi ʼona tafaʼaki? (b) Ko te ʼu faʼahi fea ʼaē neʼe mole gāue ai te ʼu pule Loma ohage ko he “minisi ʼa te ʼAtua,” pea ki te faʼahi ʼaia neʼe feafeaʼi te aga ʼa te kau ʼuluaki Kilisitiano?
7 Ko he lau fakalelei ʼo te ʼu ʼuluaki vaega e fitu ʼo te kapite 13 ʼo Loma, ʼe hā ʼaki mai ai ko te ʼu “pule māʼoluga” faka politike neʼe ko te “minisi ia ʼa te ʼAtua” moʼo vikiʼi ia nātou ʼaē ʼe nātou fai te meʼa ʼaē ʼe lelei pea mo fakatūʼa ia nātou ʼaē ʼe nātou fai te meʼa ʼaē ʼe kovi. Ko te ʼu vaega ki muʼa atu pea ki muli mai ʼo te kapite ʼaia ʼe talanoa mai, ko te ʼAtua kae mole ko te ʼu pule māʼoluga, ʼaē ʼe fakalogo kiai te meʼa ʼaē ʼe lelei pea mo te meʼa ʼaē ʼe kovi. Koia la ʼaē, kapau neʼe fakamaʼua age e te tuʼi Loma peʼe ko he tahi age pe pule faka politike he ʼu meʼa ʼe tapuʼi e te ʼAtua, neʼe mole kei gāue leva ia ohage ko he minisi ʼa te ʼAtua. Neʼe tala e Sesu, ʼo fēnei: “Koutou liufaki te ʼu meʼa ʼa Sesale kia Sesale, kaʼe ko te ʼu meʼa ʼa te ʼAtua ki te ʼAtua.” (Mateo 22:21) Kapau la neʼe kole age e te Puleʼaga Loma he ʼu meʼa ʼe tau ʼāteaina pe ia mo te ʼAtua, ohage la ko te atolasio peʼe ko te maʼuli ʼo he tahi, ʼe mulimuli anai pe te kau Kilisitiano moʼoni ki te tokoni ʼaenī ʼa te ʼapositolo: “ ʼE tonu ke tou fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata.”—Gāue 5:29.
8 Ko te fakafisi ʼaē ki te tuʼi pea mo te tauhi tamapua, ki te fakatotonu age ʼaē ke nātou līaki te ʼu fono faka Kilisitiano, feiā ki te gāue faka mafola ʼo te logo lelei, neʼe tupu ʼaki ai leva tonatou fakatagaʼi. Neʼe ʼui e te tokolahi ko te ʼapositolo ko Paulo neʼe matehi ʼuhi ko te Tuʼi ko Nelo. Ko ʼihi tuʼi, tāfito la ia Domitien, Marcus Aurelius, Septimius Severus, Decius, pea mo Dioclétien, neʼe nātou toe fakatagaʼi pe mo te kau ʼuluaki Kilisitiano. ʼI te temi ʼaē neʼe haga ai te ʼu tuʼi ʼaia pea mo nātou ʼaē neʼe lagolago ki tanatou pule ʼo fakatagaʼi te kau Kilisitiano, ʼe mahino papau ia neʼe mole kei nātou gāue foki ohage ko he “minisi ʼa te ʼAtua.”
9. (a) Koteā te meʼa ʼe mahino papau ia ʼo ʼuhiga mo te ʼu pule māʼoluga faka politike, pea ko ai ʼaē ʼe ina foaki age ki te manu te pule pea mo te mālohi? (b) Koia, koteā te meʼa ʼe feala ke tou tala fakahagatonu ʼo ʼuhiga mo te fakalogo ʼa te kau Kilisitiano ki te ʼu pule māʼoluga?
9 Ko te ʼu meʼa fuli ʼaia ʼe ʼaoga moʼo fakatā te faʼahi ʼaenī, logope la ko te kau pule māʼoluga faka politike ʼe nātou gāue ohage “ko he fakatuʼutuʼu ʼa te ʼAtua” moʼo taupau maʼu te tokalelei ʼi te Sosiete fakatagata. Ko te kau pule pe foki ʼaia, ʼe ko he koga pe ia ʼo te tuʼu ʼo te ʼu faʼahiga meʼa ʼo te mālama ʼaenī ʼaē ʼe puleʼi e Satana ʼaē ko ia ko tona ʼatua. (1 Soane 5:19) ʼE nātou kau ki te kautahi faka politike faka malamanei ʼaē ʼe fakatā e te “manu fekai” ia Fakahā 13:1, 2. ʼE maʼu e te manu ʼaia tona mālohi pea mo tana pule mai “te talakone lahi,” ia Satana te Tevolo. (Fakahā 12:9) Koia la ʼaē, ʼe mahino papau ia ko te fakalogo ʼa te kau Kilisitiano ki te ʼu puleʼaga ʼaia ʼe faka tuʼakoi foki, ʼe mole katoa ia.—Vakaʼi ia Taniela 3:16-18.
Ko Te Fakaʼapaʼapa ʼe Tau Mo Te Pule
10, 11. (a) Neʼe fakahā feafeaʼi e Paulo ʼe tonu anai ke tou fakaʼapaʼapa ki te ʼu tagata ʼaē ʼe pule? (b) Koteā te ʼu faikole ʼaē ʼe fai “ ʼo ʼuhiga mo ni ʼu hau pea mo nātou fuli ʼaē ʼe lelei tonatou ʼu tuʼulaga” pea he koʼe koa ʼe lava fai ni ʼu faikole feiā?
10 Kae ʼaua naʼa faka ʼuhigaʼi te meʼa ʼaia ʼe mole tonu ke fakaʼapaʼapa te kau Kilisitiano peʼe ke nātou agapauʼu ki te kau takitaki politike māʼoluga. ʼE moʼoni, ko te tokolahi ia nātou ʼaia ʼe mole tau mo nātou te fakaʼapaʼapa ʼuhi ko tonatou ʼu maʼuli takitokotahi māʼiape la mo tonatou maʼuli ʼaē ʼe tou sio kiai. Kae, neʼe fakahā e te kau ʼapositolo ʼaki te ʼu faʼifaʼitaki pea mo te ʼu tokoni, ʼe tonu ke tou fakaʼapaʼapa ki te kau takitaki. ʼI te temi ʼaē neʼe tuʼu ai ia Paulo ʼi muʼa ʼo te Hau aga fakalialia ko Helote Akilipa 2, neʼe palalau pe ia ki ai ʼaki te fakaʼapaʼapa ʼaē neʼe tau mo te hau ʼaia.—Gāue 26:2, 3, 25.
11 Neʼe toe ʼui pe foki la e Paulo ʼe ʼaoga ke tou talanoa ʼi ʼatatou ʼu faikole ʼo ʼuhiga mo te kau takitaki pule fakamālama, tāfito la mo kapau ʼe tonu ke nātou fai ni ʼu tonu ʼe pipiki ki totatou maʼuli pea mo ʼatatou ʼu gāue faka Kilisitiano. Neʼe ina tohi, ʼo fēnei: “Koia ʼe ʼau ʼekenaki ai, ʼuluaki, ke tou fai ni ʼu kolekole, he ʼu faikole, he ʼu pāui, he ʼu fakavikiviki, ʼo ʼuhiga mo te tagata fuape, ʼo ʼuhiga mo ni ʼu hau pea mo nātou fuli ʼaē ʼe lelei tonatou ʼu tuʼulaga; ke feala ai hatatou haga maʼu he maʼuli fīmālie pea mo tokalelei, ʼaki te aga lotu pea mo te tokaga fakamalotoloto. Ko te meʼa ʼaia ʼe matalelei pea mo lelei kia mata ʼo totatou Hāofakiʼaga, ia te ʼAtua, ʼaē ʼe loto ke hāofaki te faʼahiga tagata fuape pea ke nātou aʼu ki te ʼatamai mālama ʼo te moʼoni.” (1 Timoteo 2:1-4) ʼAki tatatou aga fakaʼapaʼapa ki te kau takitaki ʼaia ʼe feala pe ke nātou faka fealagia mai kia tatou, ke tou fai ʼāteaina tatatou gāue ʼaē ko te faigaʼi ke hāofaki “te ʼu faʼahiga tagata fuape.”
12, 13. (a) Koteā te tokoni fakapotopoto ʼo ʼuhiga mo te pule neʼe fai e Petelo? (b) E feafeaʼi koa hatatou fakafeagai ki “te fakapōʼuli ʼa te hahaʼi ʼaē ʼe mole fakakaukau” ʼuhi ʼe fakatupu kovi ki te kau Fakamoʼoni ʼa Sehova?
12 Neʼe tohi e te ʼapositolo ko Petelo, ʼo fēnei: “Ke koutou fakalogo, ki te tagata fuli pe ʼuhi ko te ʼAliki: peʼe ki te hau, heʼe nātou māʼoluga, peʼe ki te kau kovana, he neʼe fekauʼi mai nātou e ia moʼo tauteaʼi te kau agakovi, kae moʼo fakavikiviki ia nātou ʼaē ʼe agalelei. Ko te finegalo ia ʼo te ʼAtua ʼaē ke fai te aga ʼaē ʼe lelei, ke koutou tāʼofi ai te fakapōʼuli ʼa te hahaʼi ʼaē ʼe mole fakakaukau. Ke koutou hage ko he ʼu tagata ʼāteaina, kae ke koutou taupau aipe tokotou ʼāteaina, ʼo mole hage ko he pūlou moʼo ʼuʼufi he meʼa ʼe kovi, kae ohage ko ni ʼu kaugana ʼa te ʼAtua. Fakaʼapaʼapa ki te ʼu faʼahiga tagata kehekehe, ʼoʼofa ki te famili katoa ʼo te ʼu tēhina, manavasiʼi ki te ʼAtua, koutou fakaʼapaʼapa ki te hau.” (1 Petelo 2:13-17) ʼE ko he tokoni fakapotopoto ia! ʼE tou fakalogo katoa ki te ʼAtua ohage ko ni ʼu kaugana, ʼo foaki te fakalogo faka tuʼakoi pea mo fakaʼapaʼapa ki te kau takitaki faka politike ʼaē neʼe fekauʼi mai moʼo tauteaʼi te kau agakovi.
13 Neʼe fakatokagaʼi, e tokolahi te kau takitaki ʼo te mālama ʼe lahi tanatou ʼu manatu hala ʼo ʼuhiga mo te kau Fakamoʼoni ʼa Sehova. ʼI te agamāhani ʼe ia nātou te ʼu manatu hala ʼaia ʼuhi he neʼe mole lelei te ʼu fakamahino ʼaē neʼe tuku age e te kau fili aga kākā ʼo te hahaʼi ʼa te ʼAtua. Pea ʼe toe feala pe foki ʼo ʼuhiga mo te ʼu meʼa fuli ʼaē ʼe nātou ʼiloʼi ʼo ʼuhiga mo tatou ke gata ʼaki pe te ʼu meʼa ʼaē neʼe nātou akoʼi ʼi te ʼu sulunale ʼaē ko he ʼu talanoa ia ʼe mole talanoa tuʼumaʼu ki te moʼoni. ʼI ʼihi temi ʼe feala pe ke tou lolomi te talanoa kovi ʼaia ʼo ʼuhiga mo tatou ʼaki pe tatatou aga fakaʼapaʼapa, pea kapau ʼe ko he meʼa ʼe feala, ʼaki hatatou foaki age ki te kau takitaki he fakamahino totonu ʼo ʼuhiga mo te gāue pea feiā ki te ʼu akonaki ʼa te kau Fakamoʼoni ʼa Sehova. Ko te kaupepa (Les Témoins de Jéhovah du XXe siècle) ʼe ina fakamatalatala fakanounou te faʼahi ʼaia. Hilifaki ki te ʼu fakamatala ʼaia, ʼe feala ke nātou lau te tohi (Les Témoins de Jéhovah: Prédicateurs du Royaume de Dieu), ko he tohi lelei ʼe tau mo te ʼu fale tānakiʼaga tohi fakakolo peʼe fakafenua.
Ko Te Pule ʼi Te ʼu Loto Fale Faka Kilisitiano
14, 15. (a) Koteā ʼaē ʼe fakatafito kiai te pule ʼaē ʼi te loto fale faka Kilisitiano? (b) ʼE tonu anai koa ke feafeaʼi te aga ʼa te ʼu fafine ʼohoana Kilisitiano ki tonatou ʼu ʼohoana, pea koteā tona tupuʼaga?
14 ʼE mahino ia kapau ʼe fakamaʼua e te ʼAtua ki te kau Kilisitiano ke nātou foaki te fakaʼapaʼapa ʼaē ʼe tau mo te kau takitaki faka malamanei, ʼe toe tonu pe foki la, ke nātou toe fakaʼapaʼapa ki te fakatuʼutuʼu pule ʼaē neʼe fakatuʼu e te ʼAtua ʼi te ʼu loto fale faka Kilisitiano. ʼO mulimuli pe ki te manatu ʼaia neʼe tohi e te ʼapositolo ko Paulo te ʼu palalau fakahagatonu ʼo ʼuhiga mo te pule ʼaē ʼe maʼu ʼi te lotolotoiga ʼa te hahaʼi ʼa Sehova. Neʼe ina tohi, ʼo fēnei: “Ko te pule ʼo te tagata fuli pe, ko Kilisito; ko te pule ʼo te fafine, ko te tagata; ko te pule ʼo Kilisito, ko te ʼAtua.” (1 Kolonito 11:3) Ko te pelesepeto ʼaia ʼo te teokalasia, peʼe ko te takitaki ʼa te ʼAtua. Koteā ʼaē ʼe pipiki kiai?
15 Ko te fakaʼapaʼapa ki te teokalasia ʼe kamata ʼi fale. Ko te fafine ʼohoana Kilisitiano ʼaē ʼe mole ina foaki te fakaʼapaʼapa ʼaē ʼe tau mo te ʼuhiga pule ʼo tona ʼohoana—tatau aipe pe ko he kaugā fagona ʼi te tui peʼe kailoa—ʼe mole ko he aga faka teokalasia ia. Neʼe fēnei te tokoni ʼa te ʼapositolo ko Paulo ki te kau Kilisitiano: “Ke fefakalogoʼaki ʼi te manavasiʼi ʼaē kia Kilisito. Ke fakalogo te ʼu fafine ki ʼonatou ʼu ʼohoana ohage ko hanatou fakalogo ki te ʼAliki, ʼe pule te tagata ki tona ʼohoana ohage pe ko te pule ʼa Kilisito ki te kokelekasio, ia ia, ʼaē ko te fakamaʼuli ʼo te sino ʼaia. ʼIo, ohage ko te fakalogo ʼa te kokelekasio kia Kilisito, ke toe fakalogo feiā ia nātou fafine ʼi te meʼa fuli pe ki ʼonatou ʼohoana.” (Efesi 5:21-24) Ohage pe ko te tonu ʼaē ke fakalogo te ʼu tagata Kilisitiano ki te pule ʼa Kilisito, ko te ʼu fafine Kilisitiano ʼe tonu anai ke nātou fakamoʼoni ʼe ko he aga poto tanatou fakalogo ki te takitaki ʼaē ʼo tonatou ʼu ʼohoana heʼe ko te takitaki ʼaia neʼe tuku mai e te ʼAtua. ʼE nātou maʼu aipe anai he fīmālie ʼi tonatou ʼu loto, pea ko te tahi age meʼa ʼe maʼuhiga age, ko te tapuakina ʼa Sehova.
16, 17. (a) E feafeaʼi te kehekehe ʼo te ʼu tamaliki ʼaē neʼe akoʼi ʼi te loto fale Kilisitiano ʼi te kau tūpulaga ʼo te temi nei, pea koteā ʼaē ʼe tokoni kia nātou? (b) Koteā te faʼifaʼitaki lelei neʼe tuku mai e Sesu ʼo ʼuhiga mo te kau tūpulaga ʼo te temi nei, pea koteā ʼaē ʼe fakaloto mālohiʼi nātou ke nātou fai?
16 Ko te ʼu fānau ʼaē ʼe mulimuli ki te takitaki ʼa te ʼAtua ʼe nātou fiafia anai ʼi tanatou fakahā tanatou fakaʼapaʼapa ki tanatou ʼu mātuʼa. ʼO ʼuhiga mo te taʼiake ʼo te kau tūpulaga ʼo te ʼu ʼaho fakamuli, neʼe fakakikite ʼe nātou “talagataʼa anai ki te ʼu mātuʼa.” (2 Timoteo 3:1, 2) Kae ki te ʼu fānau ʼa te kau Kilisitiano, ʼe ʼui fēnei e te Folafola ʼa te ʼAtua: “Fānau, koutou fakalogo ʼi te meʼa fuli pe ki ʼakotou mātuʼa, heʼe ko te meʼa ʼaia ʼe lelei ʼi te ʼAliki.” (Kolose 3:20) Ko te fakaʼapaʼapa ʼaē ki te pule ʼa te ʼu mātuʼa ʼe leleiʼia e Sehova pea ʼe ina tuku mai tana tapuakina.
17 Neʼe ʼiloga te faʼahi ʼaia ʼi te faʼifaʼitaki ʼaē ʼa Sesu. ʼE ʼui fēnei ʼi te fakamatala ʼa Luka: “Neʼe hifo ia mo nāua [tana ʼu mātuʼa] pea ʼalu ki Nasaleti, pea neʼe hoko aipe tana fakalogo ʼaē kia nāua. . . . Pea neʼe tuputupu ia Sesu ʼo lahi ʼi te poto pea mo te ʼofa ʼi muʼa ʼo te ʼAtua pea mo te tagata.” (Luka 2:51, 52) Neʼe ko te taʼu 12 ʼaia ʼo Sesu, pea ko te kupu faka Keleka ʼaē neʼe fakaʼaogaʼi ʼi henī moʼo faka maʼuhigaʼi ʼo te “hoko aipe tana fakalogo” ki tana ʼu mātuʼa. Koia ko tana fakalogo neʼe mole gata ʼi tana kua tūpulaga. Kapau ko koutou ko ni kau tūpulaga ʼe koutou fia tuputupu ʼi te faʼahi fakalaumālie pea ʼi te ʼofa ʼa Sehova feiā ki te hahaʼi aga faka lotu, ʼe koutou fakahā anai te fakaʼapaʼapa ki te pule ʼi tokotou loto fale ʼo toe feiā aipe ki tuʼa.
Ko Te Pule ʼi Te Kokelekasio
18. Ko ai koa te Pule ʼo te kokelekasio faka Kilisitiano, pea ko ai ʼaē neʼe ina foaki age te pule?
18 ʼI tana talanoa ʼaē ki te ʼaoga ʼo he fakaʼaluʼalu lelei ʼi te kokelekasio faka Kilisitiano, neʼe tohi fēnei e Paulo: “Ko te ʼAtua, mole ʼo te maveuveu, kae ʼo te tokalelei . . . Ke fai ia meʼa fuli ʼi te fakapotopoto pea mo fakatokatoka [“tokalelei,” vakaʼi te nota ʼi te lalo pasina ʼo te Tohi-Tapu fakapilitānia Traduction du monde nouveau].” (1 Kolonito 14:33, 40) Ke fai ia meʼa fuli ʼi he ʼaluʼaga lelei, ko Kilisito, te Pule ʼo te kokelekasio faka Kilisitiano, neʼe ina tuku ifo te pule ki te ʼu tagata agatonu. ʼE tou lau fēnei: “Neʼe ina foaki ʼihi ko te kau ʼapositolo, ʼihi ko te kau polofeta, ʼihi ko te kau fagonogono ʼo te evaselio, ʼihi ko te kau tauhi ōvi pea mo te kau faiako, moʼo fakatonutonuʼi te kau maʼoniʼoni, ʼo ʼuhiga mo te gāue faka minisitelio . . . Kae ʼaki te palalau ʼi te moʼoni, tou tuputupu ia faʼahi fuli ʼaki te ʼofa ʼo ia ʼaē ko te ʼulu, ia Kilisito.”—Efesi 4:11, 12, 15.
19. (a) Ko ai koa ʼaē neʼe hinoʼi e Sesu ki tana ʼu meʼa fakakelekele fuli, pea ko ai koa ʼaē neʼe ina tuku kiai te pule makehe? (b) Ko te pule feafeaʼi ʼe tuʼu ʼi te kokelekasio faka Kilisitiano, pea koteā totatou maʼua ʼo ʼuhiga mo te faʼahi ʼaia?
19 ʼI te ʼu temi fakaʼosi ʼaenī, neʼe fakanofo e Kilisito te kūtuga ko te “kaugana agatonu mo poto” ki “tana ʼu meʼa fuli,” peʼe ko te ʼu meʼa ʼi te kele ʼo ʼuhiga mo te Puleʼaga. (Mateo 24:45-47) Ohage pe ko te ʼuluaki sēkulō, ʼe fakafofoga te kaugana ʼaia e te kolesi pule ʼo te kau Kilisitiano fakanofo ʼaē neʼe foaki kiai e Kilisito te pule moʼo fai ʼo te ʼu tonu pea mo fakanofo te tahi age ʼu tagata taupau. (Gāue 6:2, 3; 15:2) Pea ko te Kolesi Pule ʼe ina tuku ifo te pule ki te ʼu Komite ʼo te ʼu Filiale, te ʼu tagata taupau faka tisitilike pea mo fakakolo, pea mo te ʼu tagata ʼāfea ʼi te ʼu kokelekasio ʼaē e 73 000 ʼa te kau Fakamoʼoni ʼa Sehova ʼi te malamanei katoa. Ko te ʼu tagata Kilisitiano fuli ʼaia ʼe tau mo nātou ke tou lagolago pea mo fakaʼapaʼapa kia nātou.—1 Timoteo 5:17.
20. Koteā te faʼifaʼitaki ʼe hā ʼaki mai ko Sehova ʼe mole ina tali ia nātou ʼaē ʼe mole fakaʼapaʼapa ki ʼonatou ʼu kaugā fagona Kilisitiano ʼe pule?
20 ʼO ʼuhiga mo te fakaʼapaʼapa ʼaē ʼe tonu ke tou tuku kia nātou ʼaē ʼe pule ʼi te kokelekasio faka Kilisitiano, ʼe feala ke tou fakatatau tatatou fakalogo ʼaia mo tatatou fakalogo ʼaē ki te ʼu pule ʼo te malamanei. Mokā talagataʼa he tahi ki he lao fakatagata ʼe leleiʼia e te ʼAtua, ko te tūʼa ʼaē ʼe tuku “e te kau takitaki,” ʼe ko he fakahā pe ʼaia ʼo te ʼita ʼa te ʼAtua “ki he tahi ʼe kovi tana aga.” (Loma 13:3, 4) Kapau ʼe ʼita ia Sehova mokā ʼe talagataʼa he tahi ki te ʼu lao fakatagata pea mole ina fakaʼapaʼapa ki te ʼu pule ʼo te malamanei, e feafeaʼi age leva ki he Kilisitiano kua foaki tona maʼuli hana fakafeagai ki te ʼu pelesepeto ʼo te Tohi-Tapu pea mole aga fakaʼapaʼapa ki ʼona ʼu kaugā fagona Kilisitiano ʼaē ʼe pule!
21. Koteā te tokoni faka Tohi-Tapu ʼe tonu anai ke tou muliʼi fakafiafia, pea koteā anai ka tou vakaʼi ʼi te alatike ka hoa mai?
21 Ke mole tou liliu ko he tahi ʼe fehiʼaʼinaʼi e te ʼAtua, ʼi hatatou fakafeagai peʼe mo loto faʼitaliha, ʼe tou muliʼi anai te tokoni ʼa Paulo ki te kau Kilisitiano ʼo Filipe: “Koia ʼaē, nai kau ʼofaina, ohage pe ko takotou fakalogo tuʼumaʼu, ʼo mole gata ʼaki pe ʼi taku kei ʼi henī, kae tāfito age la ʼi te temi nei, ʼi taku lolotoga puli, koutou haga gāue ki tokotou maʼuli ʼaki te manavahe pea mo tekelili; heʼe ko te ʼAtua ʼi tona lotolelei, ʼe gāue ʼi ʼokotou ʼu loto koteʼuhi ke koutou fia fai pea mo koutou gāue ai. Koutou haga fai ia meʼa fuli ʼo mole koutou muhumuhu peʼe mo fakafihi, ke mole tukugakoviʼi ai koutou ʼi he meʼa pea ke koutou maʼa, ʼu fānau ʼa te ʼAtua ʼe koutou aga fakahagatonu ʼi te lotolotoiga ʼo he taʼiake aga fakalialia pea mo fakapikopiko, ʼe koutou mū ai ohage ko he ʼu nofoʼaga mālama ʼi te malamanei.” (Filipe 2:12-15) ʼO kehekehe ia mo te taʼiake heʼe agatonu ʼaenī pea mo fakapikopiko ʼaē neʼe ina ʼaumai te lakilisi ʼi te ʼaluʼaga ʼo te ʼuhiga pule, ko te hahaʼi ʼa Sehova ʼe nātou fakalogo fakalelei nātou ki te pule. Koia ʼe nātou utu ai te ʼu tapuakina lahi, ohage ko te meʼa ʼe tou vakaʼi anai ʼi te alatike ka hoa mai.
[Nota ʼi te lalo pasina]
a Vakaʼi te alatike kua hili.
Toe Fakamanatu
◻ Ko ai koa te Pule Māʼoluga, pea he koʼe koa ko tana pule ʼe totonu?
◻ Koteā te faka ʼuhiga ʼo te ʼui ʼaē ko te ʼu pule māʼoluga “ ʼe nātou tahi tuʼu ʼi tona tuʼulaga ʼuhi pe ko te ʼAtua”?
◻ Ko ʼafea ʼaē ka mole toe fakafofoga ai e te ʼu pule māʼoluga ohage ko he “minisi ʼa te ʼAtua,” kae ʼe lava feafeaʼi koa ki te kau Kilisitiano hanatou fakavikiviki ni ʼu tagata ʼe pule?
◻ Koteā te fakatuʼutuʼu ʼo ʼuhiga mo te tuʼulaga pule ʼe maʼu ʼi te ʼu famili faka Kilisitiano?
◻ Koteā te faʼahiga fakatuʼutuʼu ʼo ʼuhiga mo te pule ʼe fai ʼi te kokelekasio faka Kilisitiano?
[Paki ʼo te pasina 18]
Neʼe ʼui fēnei e Sesu: “Koutou liufaki te ʼu meʼa ʼa Sesale kia Sesale, kaʼe ko te ʼu meʼa ʼa te ʼAtua ki te ʼAtua”