Te Fakaʼapaʼapa Ki Te Pule—He Koʼe ʼe Maʼuhiga?

KO AI ʼaē ʼe mole fakafetaʼi ki te pule ʼaē ʼe maʼu e te kau polisi moʼo puke ʼo te hahaʼi fai fakapō ʼaē ʼe nātou kaihaʼa tatatou ʼu koloā peʼe nātou fai he ʼu meʼa kovi ki totatou famili? Pea ʼe mole tou leleiʼia koa la te pule ʼaē ʼe maʼu e te ʼu telepinale moʼo tauteaʼi ʼo te hahaʼi fai fakapō moʼo puipui te hahaʼi?

ʼE feala ke tou toe manatuʼi foki mo te ʼu gāue faka puleʼaga, ohage la ko te gaohi ʼo te ʼu ala, te fakamaʼa ʼo te ʼu kolo pea mo te fakatuʼu ʼo te ʼu faleako​—⁠pea ʼi te agamāhani ʼe fakaʼaogaʼi kiai te ʼu tukuhau ʼaē ʼe totogi ki te puleʼaga. Kua ʼiloʼi e te kau Kilisitiano moʼoni ʼe maʼuhiga ke nātou fakaʼapaʼapa ki te ʼu pule ʼaē kua fakatuʼu. Kae ʼe tonu koa ke feafeaʼi tatatou fakaʼapaʼapa ʼaia? Pea ko te ʼu ʼaluʼaga fea ʼaē ʼe fakamaʼua mai ke tou fakaʼapaʼapa ki te pule?

Te Pule ʼi Te Fenua

ʼE ʼui e te Tohi-Tapu ki te hahaʼi fuli, peʼe tui peʼe kailoa, ke nātou fakaʼapaʼapa ki te pule ʼaē ʼe takitaki, ʼaē ʼe gāue moʼo fakahaʼele lelei ʼo te fenua. Neʼe faitohi te ʼapositolo Kilisitiano ko Paulo ki tona ʼu tēhina ʼi Loma ʼo ʼuhiga mo te faʼahi ʼaia, pea ʼe ʼaoga anai kia tatou hatatou vakaʼi te ʼu meʼa ʼaē ʼe ina ʼui, ʼaē ʼe tuʼu ia Loma 13⁠:​1-7.

Ko Paulo neʼe ko te tagata Loma, pea ko Loma neʼe ko te puleʼaga faka malamanei ʼi te temi ʼaia. Ko te tohi ʼa Paulo, ʼaē neʼe ina fai ʼi te lagi taʼu 56 ʼo totatou temi, neʼe ina tokoniʼi ai ki te kau Kilisitiano ke nātou liliu ko he ʼu faʼifaʼitakiʼaga. Neʼe ina tohi fēnei: “Ke fakalogo te tagata fuli ki te u pule e taki. Koteuhi e mole i ai he pule e to kehe mo te Atua, pea ko te u aluaga pule kua tuu nee fakatuu e te Atua.”

ʼE fakamahino mai ʼi henī e Paulo, ʼe tuʼu te ʼu puleʼaga fakatagata heʼe fakagafua e te ʼAtua. Ko tona faka ʼuhiga, ʼe ʼaoga faka temi te ʼu pule taki moʼo fakahoko te fakatuʼutuʼu ʼa te ʼAtua. Koia, “ko he tahi e fakafihi ki te pule e fakafehagai ki te finegalo o te Atua.”

Ko te hahaʼi ʼaē ʼe nātou fai te meʼa ʼaē ʼe lelei, ʼe vikiʼi nātou e te ʼu pule taki, pea ʼi te tahi faʼahi, ko te ʼu pule taki ʼaia ʼe nātou lava tauteaʼi te hahaʼi ʼaē ʼe nātou māmio kovi. Ko te tupuʼaga la ʼaia ʼaē ʼe tonu ai ki te hahaʼi ʼaē ʼe nātou fai te ʼu meʼa kovi, ke nātou matataku ki te fealagia ʼaē ʼe maʼu e te ʼu puleʼaga ke nātou “fakahoko [te] hauhau [ʼo te ʼAtua],” koteʼuhi ko te ʼu puleʼaga ʼe ko “te faifekau a te Atua.”

ʼE fakaʼosi e Paulo tana ʼu palalau, ʼo ina ʼui fēnei: “Ko te tupuaga aia o te maua fakalogo, e mole uhipe ko te hauhau kae e uhiga mo te [“leʼo ʼo loto,” MN ]. Pea koia leva, koutou li te u tukuhau, he ko natou alâ e ko te u faifekau a te Atua i tanatou faafai aipe te mea aia.”

ʼE fakalogo ki te ʼu pule māʼoluga te fakaʼaogaʼi ʼo te tukuhau, kae ʼe mole fakalogo ki te hahaʼi. Mai tona ʼaluʼaga ʼaē ko te Kilisitiano ʼe ko he tahi ʼe agatonu, koia ʼe ina taupau ai he leʼo ʼo loto ʼe lelei. ʼE ina ʼiloʼi, kapau ʼe fakalogo ki te ʼu puleʼaga pea mo totogi te ʼu tukuhau, pea ʼe mulimuli ki te fakatuʼutuʼu ʼo tona fenua, pea ʼe toe mulimuli ai ki te ʼu meʼa ʼaē ʼe fakamaʼua age e te ʼAtua.

Te Pule ʼi Te Loto Fale

E feafeaʼi ʼo ʼuhiga mo te pule ʼi te loto fale? ʼI te agamāhani, ko he kiʼi toe kei meamea, ʼe tagi peʼe kalaga anai ke tokagaʼi ia ia. Kae ko te ʼu mātuʼa aga fakapotopoto, ʼe nā tokagaʼi anai te ʼu meʼa ʼaē ʼe ʼaoga moʼoni ki te kiʼi tamasiʼi pea ʼe mole nā fai anai ʼaki te ʼita. ʼE tuku ʼihi fānau, ʼi tanatou lahilahi ake ke nātou faʼifaʼitaliha pea nātou fakatuʼutuʼu te ʼu meʼa ʼaē ʼe nātou loto kiai. ʼI tanatou mole heʼeki māhani ʼi te maʼuli, ʼe lagi nātou fai anai he ʼu meʼa ʼe kovi, ʼo tupu ʼaki ai he ʼu maveuveu ʼi te loto fale pea mo te kolo, pea ʼe lahi te ʼu puleʼaga kua nātou ʼiloʼi lelei te faʼahi ʼaia.

ʼE ʼui fēnei e te fafine ko Rosalind Miles, ʼaē neʼe ina fai te tohi Children We Deserve: “ ʼE akoʼi tauhala e te ʼu mātuʼa tanatou ʼu fānau. Ko te temi ʼaē ʼe tonu ke kamata fai ai te faʼahi ʼaia, ʼe ko te temi ʼaē ʼe tupu ai te tamasiʼi.” Kapau ʼi tona kamataʼaga, ʼe palalau fakalelei te ʼu mātuʼa, mo nātou fakahoko tonatou maʼua pea mo nātou tuku he faʼifaʼitaki lelei, pea ʼe akoʼi tautonu anai tanatou fānau ke nātou tali te pule ʼaia pea mo tanatou fakatonutonuʼi ʼofa.

ʼE maʼu ʼi te Tohi-Tapu te ʼu tuʼuga tokoni ʼo ʼuhiga mo te pule ʼi te loto fale. ʼI te tohi ʼo Tāʼaga Lea, ʼe fakatokagaʼi mai e te tagata poto ko Salomone te felogoi tahi ʼa te ʼu mātuʼa ʼaē ʼe manavasiʼi ki te ʼAtua ia muʼa ʼo tanā fānau: “Fakalogo, Ê toku foha, ki te akonaki ʼo tau tāmai, pea ʼaua naʼa ke līaki te lao ʼo tau faʼe.” (Tāʼaga Lea 1⁠:⁠8) ʼI hona ʼaluʼaga fakapotopoto, mo kapau ʼe taupau e te ʼu mātuʼa tanā logo tahi ia muʼa ʼo te fānau, pea ʼe ʼiloʼi ai e te fānau te manatu ʼa te ʼu mātuʼa pea mo te meʼa ʼaē ʼe nā fakamaʼua ke nātou fai. ʼE lagi nātou faiga anai ke fetokakoviʼaki te ʼu mātuʼa ke feala hanatou maʼu te ʼu meʼa ʼaē ʼe nātou loto kiai, kae ko he ʼu mātuʼa ʼe nā logo tahi moʼo fakahoko tanā pule, ʼe ko he hāofakiʼaga ʼaia maʼa te kau tūpulaga.

ʼE fakamahino mai e te Tohi-Tapu, ko te maʼua tāfito ʼa te tagata ʼohoana ʼe ko te tokaga ki te maʼuli fakalaumālie ʼo tana fānau pea mo tona ʼohoana. ʼE ina ʼui ko ia te pule famili. ʼE tonu ke feafeaʼi te pule famili ʼaia? ʼE fakahā lelei mai e Paulo, ohage pe ko Kilisito ʼe Pule ki te kokelekasio, ʼo toe feiā pe mo te tagata, ʼe pule ki tona ʼohoana. Pea ʼe toe ʼui fēnei e Paulo: “Ki te u tagata ohoana, koutou oʼofa ki outou ohoana, o hage ko Kilisito nee ofa ki te [“kokelekasio,” MN; tona ʼohoana fakalaumālie] pea nee ina tukuʼage iaʼia o uhiga mo ia.” (Efeso 5⁠:25) Kapau ʼe mulimuli te tagata ki te faʼifaʼitaki ʼa Sesu pea mo ina fai tona ʼuhiga pule ʼaki te ʼofa, ʼe ina maʼu anai te “fakaʼapaʼapa loloto” ʼo tona ʼohoana. (Efeso 5⁠:​33, MN ) Tahi ʼaē meʼa, ko te ʼu fānau ʼo te loto fale ʼaia, ʼe nātou sio ai ki te maʼuhiga ʼo te pule ʼaē neʼe tuku age e te ʼAtua pea ʼe nātou tali anai.​—⁠Efeso 6⁠:​1-3.

E feafeaʼi ki he faʼe peʼe ko he tāmai ʼe ina taupau tokotahi tana fānau, ʼo feiā mo nātou ʼaē kua mate tonatou ʼohoana? Peʼe tāmai peʼe faʼe, kae ʼe feala ke nātou mulimuli ki te pule ʼa Sehova ʼAtua pea mo Sesu Kilisito. Neʼe palalau tuʼumaʼu Sesu ʼo ina fakaʼaogaʼi te pule ʼaē neʼe tuku age kia te ia​—⁠e tana Tāmai pea mo te Tohi-Tapu.​—⁠Mateo 4⁠:​1-10; 7⁠:29; Soane 5⁠:​19, 30; 8⁠:⁠28.

ʼE foaki mai e te Tohi-Tapu te ʼu tuʼuga pelesepeto maʼuhiga ʼo ʼuhiga mo te ʼu fihifihia ʼaē ʼe tau mo te fānau. Kapau ʼe ina maʼu te ʼu pelesepeto ʼaia pea mo mulimuli kiai, ʼe feala anai ki he tāmai peʼe ko he faʼe ke ina foaki he tokoni ʼofa pea mo ʼaoga ki te fānau. (Senesi 6⁠:22; Tāʼaga Lea 13⁠:20; Mateo 6⁠:33; 1 Kolonito 15⁠:33; Filipe 4⁠:​8, 9) ʼE feala ki te ʼu mātuʼa ke nātou toe fakaʼaogaʼi mo te ʼu tohi faka Tohi-Tapu ʼaē neʼe fai tāfito moʼo tokoni kia nātou, ke nātou akoʼi tanatou fānau ke nātou tali te ʼu fua lelei ʼaē ka nātou maʼu mo kapau ʼe nātou fakaʼapaʼapa ki te pule ʼo te Tohi-Tapu.a

Te Pule ʼi Te Kokelekasio Faka Kilisitiano

“E ko toku Alo aeni, te Ofaina, ia te ia e katoa ai toku loto, koutou fakalogo kia te ia.” (Mateo 17⁠:⁠5) Neʼe fai tonu e Sehova ʼAtua te ʼu palalau ʼaia, ʼo ina tuku ai kia Sesu ke palalau ʼaki te pule fakaʼatua. Ko te ʼu palalau ʼaē neʼe ina fai ʼe tuʼu ʼi te ʼu Evaselio e fā pea ʼe faigafua hatatou maʼu.

ʼI muʼa ʼo tana hake ki selo, neʼe ʼui fēnei e Sesu ki tana kau tisipulo: “Ko te pule katoa i Selo mo te kelekele kua foaki mai kia te au.” (Mateo 28⁠:18) ʼI tona ʼuhiga Pule ki tana kokelekasio, neʼe haga leʼoleʼo e Sesu tana ʼu tisipulo fakanofo ʼi te kele ʼaē neʼe nātou mulimuli ki tona ʼu tafuga vaʼe, pea talu mai tana folahi ʼo te laumālie maʼoniʼoni ʼi te Penikosite ʼo te taʼu 33 ʼo totatou temi, neʼe ina toe fakaʼaogaʼi nātou moʼo faka mafola ʼo te moʼoni, ʼi tonatou ʼuhiga “kaugana agatonu mo fakapotopoto.” (Mateo 24⁠:​45-47; Gaue 2⁠:​1-36) Koteā te meʼa ʼaē neʼe ina fai moʼo fakahoko te ʼu meʼa fuli ʼaia, ke fakaloto mālohi ai te kokelekasio faka Kilisitiano? “ ʼI te temi ʼaē neʼe hake ai ki ʼoluga, . . . neʼe ina foaki he ʼu meʼa ʼofa ko he ʼu tagata.” (Efeso 4⁠:​8, MN ) Ko te ʼu “meʼa ʼofa [ʼaia] ko he ʼu tagata,” ʼe ko te kau tagata ʼāfea ʼaē neʼe fakanofo ʼaki te laumālie maʼoniʼoni, pea neʼe foaki kia nātou te pule ke nātou tokakaga ki te ʼu meʼa ʼaē ʼe ʼaoga ki tonatou ʼu tēhina ʼi te faʼahi fakalaumālie.​—⁠Gaue 20⁠:⁠28.

Koia, ʼe tokoni fēnei ai ia Paulo: “Koutou manatuʼi ia nātou ʼaē ʼe nātou takitaki koutou, ʼaē neʼe nātou tala atu kia koutou te folafola ʼa te ʼAtua, pea ʼi takotou tokagaʼi te ikuʼaga ʼo tanatou aga, koutou faʼifaʼitaki ki tanatou tui.” Mai tona ʼaluʼaga ʼaē ʼe mulimuli fakalelei te ʼu tagata agatonu ʼaia ki te ʼu tafuga vaʼe ʼo Sesu, koia ʼe mahino ia ʼe ko he aga fakapotopoto hatatou faʼifaʼitakiʼi tanatou tui. Pea ʼe toe ʼui fēnei e Paulo: “Koutou fakalogo kia nātou ʼaē ʼe nātou takitaki koutou, pea mo koutou talagafua, [“koutou tali tuʼumaʼu ke nātou takitaki koutou,” The Amplified Bible] heʼe nātou leʼoleʼo tuʼumaʼu ʼokotou ʼu nefesi, ohage ko he ʼu tagata ʼe nātou huʼi maʼua anai; koteʼuhi ke nātou fai fakafiafia te faʼahi ʼaia kae ke ʼaua naʼa nātou fai ʼaki he lāuga, heʼe fakatupu kovi anai kia koutou.”​—⁠Hepeleo 13⁠:​7, 17, MN.

Koteā ʼaē ʼe hoko mokā mole kita tokagaʼi te takitaki ʼaia? Ko ʼihi ʼo te kokelekasio faka Kilisitiano ʼo te temi muʼa, neʼe feiā tanatou aga pea neʼe nātou liliu ko he kau ʼaposita. Neʼe ʼi ai te ʼu tagata, ko Imeneo mo Fileto, neʼe nā fakahiga te tui ʼa ʼihi pea ʼaki tana ʼu akonaki noa neʼe nā ‘ ʼulihi te meʼa ʼaē ʼe maʼoniʼoni.’ Neʼe nā lau kua hoko ia te fakatuʼuake, lagi ko he fakatuʼuake fakalaumālie peʼe ko he fakatuʼuake fakatātā, pea ʼe mole toe ʼi ai he tahi age fakatuʼuake ʼi te temi ka haʼu, ʼi te pule ʼo te Puleʼaga ʼa te ʼAtua.​—⁠2 Timoteo 2⁠:​16-18.

Neʼe fakagata te faʼahi ʼaia e te ʼu tagata takitaki fakanofo. Neʼe lava tauʼi e te kau tagata ʼāfea te ʼu manatu hala ʼaia, heʼe ʼi tonatou ʼuhiga fakafofoga ʼo Sesu Kilisito, neʼe nātou fakaʼaogaʼi te mālohi ʼo te Tohi-Tapu. (2 Timoteo 3⁠:16, 17) ʼE toe moʼoni te faʼahi ʼaia ia ʼaho nei ʼi te kokelekasio faka Kilisitiano, ʼaē ʼe fakahigoaʼi ko “te pou mo te tafito o te mooni.” (1 Timoteo 3⁠:15) ʼE mole tou tuku anai ʼi he temi he ʼu akonaki loi ke nātou fetogi te ʼu “folafola mauli,” ʼaē neʼe taupau maʼa tatou ʼi te Tohi-Tapu ohage ko he koloā matalelei.​—⁠2 Timoteo 1⁠:​13, 14.

Logola te puli fakavilivili ʼo te fakaʼapaʼapa ʼi te malamanei, kae ko tatou kau Kilisitiano ʼe tou ʼiloʼi ko te ʼu pule ʼo te fenua, ʼi te loto fale, pea ʼi te kokelekasio neʼe fakatuʼu heʼe nātou ʼaoga kia tatou. Ko te fakaʼapaʼapa ki te pule ʼe maʼuhiga, ke fua lelei ai kia tatou ʼi te faʼahi fakasino, mo totatou loto, pea mo te faʼahi fakalaumālie. Kapau ʼe tou tali pea mo fakaʼapaʼapa ki te ʼu pule ʼaia neʼe tuku mai e te ʼAtua, pea ʼe hāofaki anai tatou e te ʼu takitaki ʼaē ʼe lalahi tokotahi​—⁠ia Sehova ʼAtua pea mo Sesu Kilisito—​ke fua lelei ai kia tatou ʼo talu ai.​—⁠Pesalemo 119⁠:165; Hepeleo 12⁠:⁠9.

[Kiʼi nota]

[Paki ʼo te pasina 5]

ʼE maʼu ʼi te Tohi-Tapu te ʼu tuʼuga tokoni ʼo ʼuhiga mo te pule ʼi te loto fale

[Paki ʼo te pasina 6]

Ko te tāmai peʼe ko te faʼe ʼaē ʼe ina taupau tokotahi tana fānau, ʼe feala ke ina tokagaʼi te pule ʼa Sehova ʼAtua pea mo Sesu Kilisito

[Paki ʼo te pasina 7]

ʼE ʼiloʼi e te kau Kilisitiano ʼe ʼaoga kia nātou te pule ʼo te loto fale, mo te kokelekasio, pea mo tonatou fenua

[Haʼuʼaga ʼo te paki pasina 4]

Photo by Josh Mathes, Collection of the Supreme Court of the United States