Ko Te Fakalogo ʼAki He Loto Fiafia Ki Te ʼUhiga Pule
“Kua koutou kamata fakalogo ʼaki te loto katoa.”—Loma 6:17.
1, 2. (a) Ko te mālohi fea ʼaē ʼe ʼiloga ia ʼaho nei ʼi te mālama, pea ko ai tona matapuna pea koteā tona ʼu fua? (b) ʼE fakahā feafeaʼi koa e te ʼu kaugana ʼa Sehova ʼe nātou kehekehe?
“ ʼE FAKAPUNA’MAʼULI ʼosi te ʼiloga lelei ʼo te mālohi ʼaē ʼe gāue nei ʼi te ʼu foha ʼo te talagataʼa.” ʼE ko he manatu ia ʼo he loto faʼitaliha ʼe mole faka tuʼakoi, ʼe haʼu mai ia Satana, “te pule ʼo te puleʼaga ʼo te ʼaele.” Ko te manatu ʼaia, te “ ʼaele” peʼe ko te faʼahiga agaaga ʼaē ʼe mālohi ai te manatu pe ʼaē kia kita pea mo te talagataʼa, ʼe ina “takitaki” peʼe ina puleʼi te tokolahi ʼi te malamanei. ʼE ko he tupuʼaga la ʼaia ʼo te ʼui ʼaē ko te mālama ʼe tau nei mo te lakilisi ʼi te faʼahi ʼo te ʼuhiga pule.—Efesi 2:2.
2 Meʼa lelei foki, ia ʼaho nei ko te ʼu kaugana ʼa Sehova ʼe mole nātou fakafonu tonatou ʼu fatafata ʼaki te “ ʼaele” ʼuli ʼaia, peʼe ko te loto fakafeagai ʼaia. ʼE nātou ʼiloʼi ko te “hāūhāū ʼa te ʼAtua ʼe haʼu ki te ʼu foha ʼo te talagataʼa.” ʼE toe ʼui e te ʼapositolo ko Paulo: “Koia ʼaua naʼa ʼi ai hokotou pikipikiga mo nātou.” (Efesi 5:6, 7) Kae ko te kau Kilisitiano moʼoni ʼe nātou faiga ke nātou “fonu ʼi te laumālie ʼo [Sehova],” pea mo nātou ʼiʼinu ki te “poto mai ʼoluga,” ʼaē ʼe “maʼa, pea mo tokalelei, poto, lotolelei ʼo fakalogo.”—Efesi 5:17, 18; Sake 3:17.
Ko Te Fakalogo ʼAki He Lotolelei Ki Te Pule Faʼitaliha ʼa Sehova
3. Koteā te kalavi ʼo te fakalogo ʼaki he lotolelei, pea koteā te ako lahi ʼe tou maʼu mai te hisitolia?
3 Ko te kalavi ʼo ʼuhiga mo te fakalogo ʼaki he lotolelei, ko te fakamoʼoni ʼaē ki te ʼuhiga pule ʼe fakatafito ki te lao. ʼE ʼiloga ʼi te hisitolia ʼo te malamanei ko te situʼa ʼaē ki te pule faʼitaliha ʼa Sehova ʼe mole ina foaki te manuʼia. Ko te taʼi situʼa ʼaia neʼe mole ina foaki te manuʼia kia Atama pea mo Eva, ʼo toe feiā aipe kia ia ʼaē neʼe ina fakaneke ia nāua ke nā talagataʼa, ia Satana te Tevolo. (Senesi 3:16-19) ʼI tona kua noanoa ʼosi ʼaē ʼi te temi nei, ʼe nofo ia Satana mo tona “foʼi ʼita lahi” koteʼuhi ʼe ina ʼiloʼi kua nounou tona temi. (Fakahā 12:12) Ko te tokalelei pea mo te manuʼia ʼo te malamanei, peʼe ʼo te ʼatulaulau katoa, ʼe fakalogo ki te fakamoʼoni ʼaē ki te tuʼi pule faitotonu ʼa Sehova ki te ʼatulaulau.—Pesalemo 103:19-22.
4. (a) Koteā te faʼahiga fakalogo pea mo te faʼahiga talagafua ʼaē ʼe loto e Sehova ke fakahā e tana ʼu kaugana? (b) Koteā te meʼa ʼaē ʼe tonu ke tou mahino papau kiai, pea e feafeaʼi te talanoa ʼa te tagata fai pesalemo ki te faʼahi ʼaia?
4 Kae, ʼuhi ko te fakaʼaluʼalu fakapotopoto ʼo tona ʼu kalitate taulekaleka, ʼe mole leleiʼia e Sehova te fakalogo ʼaē ʼe fai fakakinau. ʼE moʼoni, ʼe māfimāfi ia! Kae ʼe mole ko he pule ia ʼe agamālohi. Ko ia ko te ʼAtua ʼe ʼofa, pea ko tona loto ʼo ʼuhiga mo te ʼu meʼa maʼuli ʼatamai ʼaē neʼe ina fakatupu, ke nātou fakalogo kia te ia ʼaki he lotolelei, ʼaki te ʼofa. ʼE loto ia Sehova ke nātou fakalogo ki tana pule faʼitaliha ʼuhi he neʼe nātou fili ʼaki tonatou loto katoa ke nātou fakalogo ki tana pule ʼaē ʼe faitotonu pea mo fakatafito ki te lao, ʼo mahino papau kia nātou ʼe mole ʼi ai he tahi age meʼa ʼe feala ke lelei age kia nātou ʼi te fakalogo pe ʼaē kia te ia ʼo talu ai. Ko te faʼahiga hahaʼi ʼaē ʼe loto kiai ia Sehova ʼi tona mālama, ʼe nātou manatu tahi mo te tagata fai pesalemo ʼaē neʼe ina tohi te manatu ʼaenī: “Ko te lao ʼa Sehova ʼe haohaoa, ʼe ina fakamaliu mai te nefesi. Ko te fakamanatu ʼa Sehova ʼe tau mo te falala, ʼo ina fakaliliu mai ia ia ʼaē ʼe mole heʼeki fakapotopoto. Ko te ʼu fakatotonu ʼa Sehova ʼe totonu, ʼo nātou fakafiafia te loto; ko te fakatotonu ʼa Sehova ʼe maʼa, pea ʼe ina fakagigila te ʼu mata. Ko te manavasiʼi kia Sehova ʼe maʼa, pea ʼe tuʼu ia ʼo talu ai. ʼE moʼoni te ʼu tonu ʼo te ʼu faifakamāu ʼa Sehova; neʼe ʼiloga tonatou totonu katoa.” (Pesalemo 19:7-9) Ko te falala ʼaē ki te pule faʼitaliha totonu pea mo faitotonu ʼa Sehova—ʼe tonu anai ke feiā tatatou aga mo kapau ʼe tou fia maʼuʼuli ʼi te mālama foʼou ʼa Sehova.
Fakalogo ʼAki He Loto Fiafia Ki Totatou Hau
5. Neʼe feafeaʼi te fakapale ʼo Sesu ʼo ʼuhiga mo tana fakalogo, pea koteā te meʼa ʼe mahino mai ai kia tatou?
5 Ko Kilisito Sesu totonu te faʼifaʼitaki lelei ʼo ʼuhiga mo te fakalogo ʼaē ki tana Tāmai ʼe ʼi selo. ʼE tou lau “neʼe ina haga ʼo fakamālaloʼi ia ia totonu pea neʼe talagafua ʼo aʼu ki te mate, ʼio, ki te mate ʼi te pou fakamamahi.” Pea ʼe toe ʼui fēnei e Paulo: “Ko te tahi la ʼaenā tupuʼaga ʼo tona hikihiki ʼaē e te ʼAtua ki te tuʼulaga māʼoluga pea mo ina foaki fakalelei age te higoa ʼaē ʼe māʼoluga age ʼi te higoa fuli pe, koteʼuhi ke tuʼutuli fuli ki te higoa ʼo Sesu ia nātou ʼe ʼi te lagi, pea mo nātou ʼe ʼi te kele, pea mo nātou ʼe ʼi te lalo kele, pea ke fakahā e te ʼalelo fuli pe ko Sesu Kilisito ʼe ʼAliki ke kolōlia ai te ʼAtua ko te Tāmai.” (Filipe 2:8-11) Ei, ʼe tou tuʼutuli fakafiafia ʼi muʼa ʼo ia ʼaē ko totatou Takitaki pea kua ʼafio Hau, ia Kilisito Sesu.—Mateo 23:10.
6. Neʼe fakahā feafeaʼi e Sesu ko ia ko te fakamoʼoni pea mo te takitaki ki ni ʼu kūtuga faka puleʼaga, pea ʼe feafeaʼi anai te hoko atu ʼo tona “pule fakaʼaliʼaliki” mokā hili te toe mamahi lahi?
6 ʼO ʼuhiga mo Kilisito ʼaē ko totatou Takitaki, neʼe fakakikite e Sehova, ʼo fēnei: “Koʼeni! Neʼe ʼau foaki ia ia ko he fakamoʼoni ki te ʼu kūtuga faka puleʼaga, ko te takitaki pea mo te pule ki te ʼu kūtuga faka puleʼaga.” (Isaia 55:4) ʼAki tona minisitelio ʼaē ʼi te kele pea mo tana taki ia te gāue fai faka mafola mai te lagi ʼi te hili ʼaē ʼo tona mate pea mo tona fakatuʼuake, neʼe fakahā e Sesu totonu, ko ia ko te “fakamoʼoni agatonu pea mo moʼoni” ʼo tana Tāmai ki te hahaʼi ʼo te ʼu puleʼaga kehekehe. (Fakahā 3:14; Mateo 28:18-20) Ko te ʼu kūtuga faka puleʼaga ʼaia ʼe kua fakafofoga nei ʼi te hahaʼi ʼaē hoholo pe tona kaugamālie ʼaki te “hahaʼi tokolahi” ʼaē ka maʼuʼuli anai ʼi te “toe mamahi lahi” ʼi te pule ʼa Kilisito. (Fakahā 7:9, 14) Kae ko te takitaki ʼa Sesu ʼe mole gata ʼaki aipe. Ko tana “pule fakaʼaliʼaliki” ʼe hoholo atu aipe anai lolotoga taʼu e afe. ʼO ʼuhiga mo nātou ʼaē ʼe talagafua, ʼe fakahoko anai e Sesu tana ʼu gāue ʼo mulimuli pe ki tona ʼu higoa ʼaenī “ko te Tokoni Taulekaleka, ko te ʼAtua Mālohi, ko te Tāmai Heʼegata, ko te ʼAliki ʼo te Tokalelei.”—Isaia 9:6, 7; Fakahā 20:6.
7. Kapau ʼe tou loto ke taki tatou e Kilisito Sesu ki te ʼu “matapuna vai ʼo te maʼuli,” koteā te meʼa ʼe tonu ke tou fai fakavilivili, pea koteā anai te meʼa ka ina faka fealagia anai ke tou maʼu te ʼofa ʼa Sesu pea mo Sehova?
7 Kapau ʼe tou fia ʼinu ki te ʼu “matapuna vai ʼo te maʼuli” ʼaē ʼe haga ia te Akeno ko Kilisito Sesu ʼo taki te hahaʼi agatonu kiai, ʼe tonu ke tou fakahā fakavilivili ʼaki tatatou faʼahiga aga ʼe tou fakalogo ʼaki he loto fakafiafia ki tana pule ʼi tona ʼuhiga Hau. (Fakahā 7:17; 22:1, 2; vakaʼi ia Pesalemo 2:12.) Neʼe ʼui e Sesu, ʼo fēnei: “Kapau ʼe koutou ʼofa kia te ʼau, ʼe koutou taupau anai taku ʼu folafola. Ko ʼaē ʼe nofo mo taku ʼu folafola pea mo ina maʼuliʼi, ko Ia ʼaia ʼaē ʼe ʼofa kia te ʼau. Pea ko ʼaē ʼe ʼofa kia te ʼau ʼe ʼofa anai ki ai taku Tāmai, pea ʼe ʼau toe ʼofa anai mo ʼau ki ai.” (Soane 14:15, 21) ʼE koutou loto koa ke ʼofa ia Sesu pea mo tana Tāmai kia koutou? Pea ʼe tonu ke koutou fakalogo ki tanā pule.
Ko Te ʼu Tagata Taupau ʼe Fakalogo ʼAki He Loto Fiafia
8, 9. (a) Koteā te meʼa neʼe foaki e Kilisito moʼo fakatuʼu ʼo te kokelekasio, pea ko te ʼu faʼahi fea ʼaē ʼe tonu anai ke liliu ai te ʼu tagata ʼaia ko ni ʼu faʼifaʼitaki ki te faga ōvi? (b) Neʼe feafeaʼi te fakatā ʼi te tohi ʼo te Fakahā ia te fakalogo ʼaē ʼa te ʼu tagata taupau faka Kilisitiano, pea ʼe tonu anai koa ke feafeaʼi tanatou kumi ʼo he “loto fakalogo” ʼi te ʼu temi ʼaē ʼe nātou fai fakamāu ai?
8 “Ko te kokelekasio ʼe fakalogo kia Kilisito.” ʼI tona ʼuhiga Tagata Taupau, neʼe ina foaki te ʼu “meʼa ʼofa fakatagata” moʼo “fakatuʼu” ʼo te kokelekasio. (Efesi 4:8, 11, 12; 5:24) ʼE tou mahino ko te ʼu tagata ʼāfea ʼaia ʼi te faʼahi fakalaumālie ʼe tonu ke nātou ‘fafaga te faga ōvi ʼa te ʼAtua ʼaē ʼe nātou taupau,’ ʼo mole “fai ohage ko he ʼu hahaʼi ʼe nātou lagiaki ohage ko he ʼu pule kia nātou ʼaē ko te tōfiga ʼa te ʼAtua, kae ʼo liliu ko ni ʼu faʼifaʼitakiʼaga ki te faga ōvi.” (1 Petelo 5:1-3) Ko te faga ōvi ʼa Sehova, pea ko Kilisito ʼe ko te “tauhi ōvi lelei.” (Soane 10:14) ʼUhi heʼe ʼamanaki te ʼu taupau ke kaugā gāue mo nātou te ʼu ōvi ʼaē neʼe tuku age e Sehova pea mo Kilisito ke nātou taupau, ʼe tonu anai ke nātou liliu ko ni ʼu faʼifaʼitaki lelei ʼo ʼuhiga mo te fakalogo.—Gāue 20:28.
9 ʼI te ʼuluaki sēkulō, neʼe fakahā ʼaki he fakatā ko te kau taupau fakanofo ʼe nātou “ ʼi loto ʼo te” peʼe “ ʼi te” nima mataʼu ʼa Kilisito, ʼo fakahā ʼaki ai tanatou fakalogo kia te ia ʼi tona ʼuhiga Pule ʼo te kokelekasio. (Fakahā 1:16, 20; 2:1) ʼO toe feiā aipe mo te temi nei, ko te kau taupau ʼi te ʼu kokelekasio ʼa te kau Fakamoʼoni ʼa Sehova ʼe tonu anai ke nātou fakalogo ki te taki ʼa Kilisito pea ‘ke nātou agavaivai ʼi te nima mālohi ʼa te ʼAtua.’ (1 Petelo 5:6) ʼI te temi ʼaē ʼe tonu ai ke nātou vakaʼi he ʼu faʼahi ʼe tonu ke fakamāuʼi, ohage ko Salomone ʼi te ʼu taʼu ʼaē neʼe kei nofo agatonu ai, ʼe tonu ke nātou faikole kia Sehova ʼo fēnei: “ ʼE tonu ke ke foaki ki tau tagata kaugana he loto fakalogo moʼo fakamāu tau hahaʼi, moʼo sivisivi te meʼa ʼaē ʼe lelei pea mo te meʼa ʼaē ʼe kovi.” (1 Hau 3:9) Ko he loto fakalogo ʼe ina uga anai he tagata ʼāfea ke mahino ki te ʼu meʼa ohage ko te mahino ʼaē ʼa Sehova pea mo Kilisito Sesu, ke tatau pe te tonu ʼaē neʼe fai ʼi te kele mo te tonu ʼaē neʼe fai ʼi selo.—Mateo 18:18-20.
10. ʼE tonu anai ke feafeaʼi ki te ʼu taupau fuli hanatou faʼifaʼitakiʼi ia Sesu ʼi tana faʼahiga tokaga ʼaē ki te kau ōvi?
10 Ko te ʼu taupau feʼaluʼaki pea mo te ʼu tagata ʼāfea ʼo te kokelekasio ʼe mahino ia ʼe nātou faiga anai ke nātou faʼifaʼitakiʼi ia Kilisito ʼi tana faʼahiga tokaga ʼaē ki te ʼu ōvi. ʼO mole hage ko te kau Faliseo, neʼe mole fakamaʼua e Sesu ni ʼu tuʼuga lekula ʼe faigataʼa tona maʼuliʼi. (Mateo 23:2-11) Neʼe ina ʼui ki te kau ōvi, ʼo fēnei: “Koutou ʼōmai kia te ʼau, ia koutou fuli ʼaē ʼe kinakina pea mo mafasia, pea ʼe ʼau fakafimālie anai koutou. Koutou toʼo kia koutou taku ʼakau toho pea ke koutou ako ia te ʼau, heʼe ʼau agamālū pea mo loto agavaivai, pea ʼe koutou maʼu anai he fīmālie ki ʼokotou nefesi. Heʼe ko taku ʼakau toho ʼe mālū pea ko taku kavega ʼe maʼamaʼa.” (Mateo 11:28-30) Logope la ko te kau Kilisitiano fuli ʼe nātou “tahi ʼamo tana kavega,” ʼe tonu anai ke manatuʼi e te kau taupau te faʼifaʼitaki ʼa Sesu, ʼo nātou tokoni ki tonatou ʼu tēhina ke hage kia nātou ʼaia ʼe “maʼamaʼa” tanatou kavega faka Kilisitiano pea ke nātou ʼamo fakafiafia.—Kalate 6:5.
Ko Te Fakalogo Faka Teokalatike
11. (a) ʼE lava feafeaʼi koa ki he tahi hana fakaʼapaʼapa ki te tuʼulaga pule kae ʼi te fakahagatonu ʼe mole aga faka teokalatike ia? Koutou fakamatala. (b) Koteā koa te faka ʼuhiga moʼoni ʼo he tahi ʼe aga faka teokalatike?
11 Ko te faka ʼuhiga ʼo te teokalasia, ko te pule ʼa te ʼAtua. ʼE pipiki kiai te pelesepeto ʼaē ʼe talanoa kiai te tohi ʼo 1 Kolonito 11:3 ʼo ʼuhiga mo te tuʼulaga pule. Kae ʼe mole gata aipe. ʼE feala pe ki he tahi ke hage mai ʼe fakaʼapaʼapa ki te tuʼulaga pule kae ʼi tona fakahagatonu ʼe mole katoa tana aga faka teokalatike. ʼE lava koa ke hoko feafeaʼi te faʼahi ʼaia? Moʼo fakamahino te faʼahi ʼaia, ko te faka ʼuhiga ʼo te temokalasi ko te pule faʼifaʼitaliha ʼa te hahaʼi, pea ko he tahi ʼe temokalate, ko he tahi neʼe faka ʼuhiga ohage ko he “tahi ʼe falala ki te ʼu fakatuʼutuʼu faka temokalasi.” ʼE feala pe ke ʼui e he tahi ʼe temokalatike ia, ʼo kau ia ki te ʼu vote, peʼe ko he tagata fai politike ʼe faʼa gāue. Kae kapau, ʼi tona maʼuli māhani, ʼe ina meʼa noaʼi te manatu ʼo te temokalasi pea mo te ʼu fakatuʼutuʼu fuli ʼe pipiki kiai, ʼe feala koa ke ʼui ko te tagata ʼaia ʼe aga faka temokalatike? ʼO toe feiā aipe, ko he tahi ʼe fia liliu ʼo aga faka teokalatike, ʼe mole tonu anai ke gata ʼaki pe tana ʼui ʼaē ʼe fakalogo ki te tuʼulaga pule ʼuhi he ko hona maʼua. ʼE tonu ke ina faʼifaʼitakiʼi te ʼu agaaga pea mo te ʼu kalitate ʼa Sehova. ʼE tonu ia ke takitaki tona maʼuli e Sehova ʼi te ʼu ʼaluʼaga fuli pe ʼo tona maʼuli. Pea mai tona ʼaluʼaga ʼaē ko Sehova neʼe ina foaki te pule katoa ki tona ʼAlo, ko te aga faka teokalatike ʼe toe faka ʼuhiga foki ke faʼifaʼitakiʼi ia Sesu.
12, 13. (a) Koteā ʼaē ʼe fakapipiki ki te aga faka teokalatike? (b) Ko te fakalogo faka teokalatike ʼe fakamaʼua koa ke talagafua ki ni ʼu tuʼulaga lao? Koutou fakamatala.
12 Tou manatuʼi, ʼe loto ia Sehova ki he fakalogo ʼe uga e te ʼofa. ʼE feiā la tana puleʼi ʼaē ʼo te ʼatulaulau. Ko ia tonu te natula ʼo te ʼofa. (1 Soane 4:8) Ko Kilisito Sesu ʼe “ko te ʼata ʼo te kolōlia pea ko te fakafofoga totonu ʼo tona ʼuhiga moʼoni.” (Hepeleo 1:3) ʼE ina fakamaʼua ki tana kau tisipulo moʼoni ke nātou feʼofaniʼaki. (Soane 15:17) Koia ke feala hakita aga faka teokalatike ʼe mole tonu pe ke tou fakalogo kae ʼe toe tonu foki ke tou maʼu te ʼofa. ʼE feala pe ke fakanounou te faʼahi ʼaia, ʼo fēnei: Ko te teokalasia ko te takitaki ʼe fai e te ʼAtua; ko te ʼAtua ʼe ʼofa; koia ko te teokalasia ʼe takitaki ia e te ʼofa.
13 ʼE feala pe ke manatu he tagata ʼāfea, ʼe tonu anai ke fakalogo te ʼu tēhina ki te ʼu lekula fuli ke feala ai he ʼui ʼe nātou aga faka teokalatike. Ko ʼihi tagata ʼāfea neʼe nātou fai te ʼu lekula ʼe kehekehe ia mo te ʼu tokoni ʼaē neʼe tautau foaki mai e “te tagata kaugana agatonu mo poto.” (Mateo 24:45) Ohage la, ki muʼa atu neʼe fai mai te tokoni ʼaē, ke feala hakita feʼiloʼiʼaki lelei mo te ʼu tēhina ʼo te kokelekasio, ʼe mole faʼa lelei anai hakita heka tuʼumaʼu ʼi he faʼahi pe e tahi ʼo te Fale Puleʼaga. Neʼe ko he tokoni pe ia moʼo faka faigafua te faʼahi ʼaia kae neʼe mole ko he lao ia ke fakakinauʼi. Kae ko ʼihi ʼu tagata ʼāfea neʼe nātou fakaliliu te faʼahi ʼaia ko he lao pea ki tanatou manatu ko nātou ʼaē ʼe mole nātou mulimuli ki te fakatuʼutuʼu ʼaia ʼe mole nātou aga faka teokalatike. Kae, lagi ʼe lahi te ʼu tupuʼaga ʼaē ʼo te fia heka ai ʼo he tēhina peʼe ko he tuagaʼane ʼi he faʼahi ʼo te fale. Kapau ʼe mole tokagaʼi e te tagata ʼāfea ʼaki he lotoʼofa te ʼu faʼahi ʼaia, ʼe feala koa ke ʼui ʼi te fakahagatonu ʼe aga faka teokalatike? Ke feala ke koutou aga faka teokalatike “koutou fai takotou ʼu gāue fuli ʼaki pe te ʼofa.”—1 Kolonito 16:14.
Kaugana ʼAki He Loto Fiafia
14, 15. (a) ʼE lava feafeaʼi koa ke pulihi e he tagata ʼāfea te fiafia ʼa ni ʼu tēhina peʼe ko ni ʼu tuagaʼane ʼi tanatou selevisi kia Sehova, pea he koʼe koa ʼe mole ko he aga anai ia ʼe faka teokalatike? (b) Neʼe feafeaʼi te fakahā e Sesu ʼe ina leleiʼia age te ʼofa ʼaē ʼe fakahā ʼi tatatou selevisi, kae mole ko tona lahi ʼaē ʼe maʼuhiga age? (c) Koteā te meʼa ʼe tonu anai ke tokagaʼi e te kau tagata ʼāfea?
14 Ko te tahi age faka ʼuhiga ʼo te aga faka teokalatike ko takita kaugana kia Sehova ʼaki he loto fiafia. Ko Sehova ʼe “ko te ʼAtua fiafia.” (1 Timoteo 1:11) ʼE loto ki tana kau atolasio ke nātou tauhi age kia te ia ʼaki he loto fiafia. Ko nātou ʼaē ʼe nātou fakakinauʼi ke muliʼi ni ʼu lao, ʼe tonu anai ke nātou manatuʼi te meʼa ʼaenī, ʼi te ʼu pelesepeto ʼaē neʼe foaki age kia Iselaele, neʼe tonu kia Iselaele ke “tokaga ʼo fakahoko” te meʼa ʼaenī: “ ʼE tonu anai ke ke fakafiafia ia muʼa ʼo Sehova tou ʼAtua ia meʼa fuli ʼaē ʼe ke ʼamanaki ke ke fai.” (Teutalonome 12:1, 18) Pe koteā pe he meʼa ʼe tou fai ʼi te selevisi ʼaē kia Sehova, ko te meʼa ʼaia ʼe tonu ke liliu ko he meʼa fakafiafia kae mole ko he kavega. ʼE lahi te ʼu meʼa ʼe feala ke fai e te kau taupau ke fiafia ai te ʼu tēhina ʼi te fai ʼo te meʼa ʼaē ʼe nātou fealagia ʼi te selevisi ʼaē kia Sehova. Pea ʼi te tahi age faʼahi, kapau ʼe mole tokakaga te kau tagata ʼāfea, ʼe feala pe ke nātou pulihi te fiafia ʼa niʼihi ʼu tēhina. Ohage la, kapau ʼe nātou fai he ʼu fakatatau, ʼo nātou vikiʼi ia nātou ʼaē neʼe fai faka mafola ʼo mulimuli ki te ʼu hola ʼaē neʼe fakatuʼutuʼu kiai te kokelekasio peʼe laka age ʼi te ʼu hola ʼaia kae nātou valoki ia nātou ʼaē neʼe mole nātou lavaʼi te faʼahi ʼaia, koteā anai te manatu ʼa nātou ʼaia logope la pe neʼe ʼi ai he tupuʼaga tāfito ʼo te mole lahi ʼo tanatou fai faka mafola? ʼE mole koa la feala ke haga te meʼa ʼaia ʼo hoʼi faka lotovaivai noa pe te ʼu tēhina pea mo pulihi tanatou fiafia?
15 Ko te ʼu kiʼi hola ʼaē ʼe feala ke fai e niʼihi ʼi te gāue faka mafola ʼe feala pe ke faka ʼuhiga ko he faiga ʼe lahi age ia ʼi te ʼu tuʼuga hola ʼaē ʼe fai e he tahi age ʼu tēhina ʼe kei tūpulaga, mālolohi, peʼe ko he tahi age pe ʼu ʼaluʼaga. ʼI te faʼahi ʼaia, ʼe mole tonu ke fakamāuʼi nātou e te kau tagata ʼāfea. ʼIo, ko Sesu ʼaē neʼe foaki age ki ai e Sehova “te pule ʼo te faifakamāu.” (Soane 5:27) Neʼe haga koa la ia Sesu ʼo fatufatuʼi te fafine vitua masiva ʼuhi he neʼe veliveli age tana meʼa ʼofa ʼi te meʼa ʼaē neʼe foaki e te tokolahi? Kailoa ia, neʼe mahino tona loto ki te maʼuhiga ʼo te ʼu kiʼi foʼi piesi ʼaia e lua ki te fafine. Neʼe ko te “meʼa katoa ʼaē neʼe ina maʼu, tana ʼu paʼaga fuli.” ʼI loloto foki ʼo te ʼofa ʼaia kia Sehova ʼaē neʼe fakatā ʼaki te ʼu kiʼi foʼi piesi e lua! (Maleko 12:41-44) ʼE tonu anai koa ia ke malave ʼi te loto ʼo te kau tagata ʼāfea te ʼu faiga ʼofa ʼo nātou ʼaē ʼe veliveli ʼosi “te meʼa ʼaē ʼe nātou maʼu”? ʼI te faʼahi ʼaē ʼo te ʼofa kia Sehova, ko te taʼi faiga ʼaia ʼe feala pe ke tou ʼui ʼe laka age ia ʼi te fakaʼutaʼuta!
16. (a) Kapau ʼe fakaʼaogaʼi e te kau tagata taupau te ʼu numelo ʼi tanatou ʼu akonaki, he koʼe koa ʼe ʼaoga kia nātou te fakasiosio lelei pea mo he fakafuafua lelei? (b) E feafeaʼi koa ki te ʼu tēhina hanatou maʼu ʼo he tokoni fakalelei ki te hikihiki ʼo tanatou selevisi?
16 ʼI te temi nei ʼe tonu anai koa ia ke liliu te ʼu fakatokaga ʼaia ko he “lao” ʼe fai tukupau—māʼiape la mo te ʼu fakafuafua ʼo te ʼu tānaki—ʼe mole tonu anai ke fakahā? Kailoa ia! Ko te meʼa ʼaē ʼe maʼuhiga ke fakafuafua lelei e te kau tagata taupau tanatou ʼu fakaloto mālohiʼi ʼaē ʼo te ʼu tēhina ke nātou hikihiki tanatou minisitelio pea mo te tokoni ʼaē ke nātou fai te meʼa ʼaē ʼe nātou lavaʼi ʼaki he loto fiafia. (Kalate 6:4) ʼI te lea fakatā ʼa Sesu ʼo ʼuhiga mo te ʼu tenalio, ko te pule neʼe ina tuku ki tana ʼu kaugana tana ʼu meʼa “ ʼo mulimuli pe ki te meʼa ʼe lavaʼi e te tagata takitokotahi.” (Mateo 25:14, 15) ʼO toe feiā aipe ki te kau tagata ʼāfea ʼe tonu anai ke nātou tokagaʼi te ʼu fealagia ʼa te tagata fai faka mafola takitokotahi ʼo te Puleʼaga. ʼE fakamaʼua e te faʼahi ʼaia he fakasiosio poto. E lagi feala pe ke ʼaoga age ki niʼihi he ʼu fakaloto mālohi ke feala ai hanatou hikihiki ʼo tanatou gāue. E lagi nātou leleiʼia anai he ʼu tokoni ʼo ʼuhiga mo te fakaʼaluʼalu lelei ʼaē ʼo tanatou gāue fai faka mafola. Kae ko te meʼa ʼaē ʼe mahino papau ia, kapau ʼe feala ke tokoni ia nātou ke nātou fai te meʼa ʼaē ʼe nātou lavaʼi ʼaki he loto fiafia, ko te fiafia ʼaia ʼe ina fakaloto mālohiʼi anai ia nātou ke nātou hikihiki tanatou ʼu gāue faka Kilisitiano ʼi te faʼahi ʼaē ʼe nātou fealagia.—Nehemia 8:10; Pesalemo 59:16; Selemia 20:9.
Ko Te Tokalelei ʼAē ʼe Maʼu Mai Te Fakalogo ʼAki He Loto Fiafia
17, 18. (a) ʼE lava feafeaʼi koa ke foaki mai e te fakalogo ʼaki he loto fiafia ia te tokalelei pea mo te agatonu? (b) Koteā te meʼa ʼe feala ke tou maʼu mo kapau ʼe tou tokakaga fakalelei ki te ʼu fakatotonu ʼa te ʼAtua?
17 Ko te fakalogo ʼaki he loto fiafia ki te pule faʼitaliha ʼa Sehova ʼaē ʼe fakatafito ki te lao, ʼe ina tuku mai kia tatou te tokalelei lahi. Neʼe ʼui e te tagata fai pesalemo ʼi tana faikole kia Sehova, ʼo fēnei: “ ʼE mahu te tokalelei ia nātou ʼaē ʼe ʼoʼofa ki tau lao, pea kia nātou ʼaia ʼe mole ʼi ai he maka fakatupu tūkia.” (Pesalemo 119:165) ʼAki te fakalogo ʼaē ki te lao ʼa te ʼAtua, ʼe fua lelei aipe kia tatou. Neʼe ʼui e Sehova kia Iselaele, ʼo fēnei: “Koʼeni te meʼa neʼe ʼui e Sehova, ia ia ʼaē ʼe ina Totogi ia koe, te Maʼoniʼoni ʼo Iselaele: ‘Ko ʼau, Sehova, ko ʼau tou ʼAtua, ia Ia ʼaē ʼe ina akoʼi koe ke ʼaoga kia te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai. E ka na pau la neʼe ke tokagaʼi fakalelei taku ʼu fakatotonu! Ko tou fīmālie ʼe hage anai ia ko te liuʼa, pea ko tau faitotonu, ʼe hage ko te ʼu peau ʼo te tai.’ ”—Isaia 48:17, 18.
18 Ko te sakilifisio faitotogi ʼo Kilisito ʼe ina foaki mai kia tatou te tokalelei mo te ʼAtua. (2 Kolonito 5:18, 19) Kapau ʼe tou tui ki te taʼataʼa faitotogi ʼo Kilisito pea mo tou tauʼi fakamalotoloto totatou ʼu vaivaiʼaga pea mo fai te finegalo ʼo te ʼAtua, ʼe tou fakafimālieʼi totatou loto mai he ʼu manatu ʼe nātou tukugakoviʼi tatou ʼo ʼuhiga mo he ʼu faʼahiga meʼa neʼe mole tou fai. (1 Soane 3:19-23) Ko te taʼi tui ʼaia, ʼe lagolago ʼaki ni ʼu gāue, ʼe ina faka lākatonuʼi tatou ia muʼa ʼo Sehova, pea mo foaki mai kia tatou te falala taulekaleka ʼaē ke tou hāo ʼi te “toe mamahi lahi” pea ke tou maʼuʼuli ʼo heʼegata ʼi te mālama foʼou ʼa Sehova. (Fakahā 7:14-17; Soane 3:36; Sake 2:22, 23) ʼE hoki feala pe ke tou maʼu te ʼu meʼa ʼaia ‘gata pe mo kapau ʼe tou fakatokagaʼi te ʼu fakatotonu ʼa te ʼAtua.’
19. ʼE fakalogo koa kiteā ia totatou manuʼia ʼi te temi nei pea mo tatatou falala ki he maʼuli heʼegata, pea neʼe feafeaʼi te fakahā e Tavite te meʼa ʼaē ʼe tou logoʼi mālohi?
19 ʼIo, ko totatou manuʼia ʼaē ʼi te temi nei pea mo tatatou falala ʼo ʼuhiga mo te maʼuli heʼegata ʼi he palatiso ʼi te kele ʼe fakatafito ki tatatou fakalogo ʼaki he loto fiafia ki te pule ʼa Sehova ʼi tona ʼuhiga Tuʼi ʼAliki ʼo te ʼatulaulau. ʼOfa pe ke tou maʼu tuʼumaʼu te ʼu manatu ʼaenī ʼa Tavite, neʼe ʼui maʼana: “ ʼE ke maʼu, Ê Sehova, te māʼoluga, pea mo te mālohi, pea mo te matalelei, pea mo te takimuʼa, pea mo te ʼalikisia; he ko meʼa fuli, ʼi te lagi pea mo te kele, ʼa koe. ʼE ʼa koe te puleʼaga, Ê Sehova, ia Koe ʼaē ʼe toe māʼoluga foki ia meʼa fuli ohage ko he pule. Pea ʼi te temi nei, Ê ʼAtua, ʼe mātou fakafetaʼi kia te koe pea mo mātou fakavikiviki ki tou huafa taulekaleka.”—1 Fakamatala 29:11, 13.
Ko Te ʼu Manatu Ke Tāʼofi
◻ Koteā te faʼahiga fakalogo pea mo te faʼahiga talagafua ʼaē ʼe loto e Sehova ke fakahā e tana ʼu kaugana?
◻ Neʼe feafeaʼi te fakapale ʼo Sesu ʼo ʼuhiga mo tana fakalogo, pea koteā te meʼa ʼe mahino kia tatou?
◻ ʼE tonu anai koa ke feafeaʼi te faʼifaʼitakiʼi e te kau taupau fuli ia Sesu ʼo ʼuhiga mo tana faʼahiga tokaga ʼaē ki te kau ōvi?
◻ Koteā ʼaē ʼe pipiki ki te aga faka teokalatike?
◻ Koteā te ʼu tapuakina ʼe tou maʼu ʼi te fakalogo ʼaki he loto fiafia?
[Paki ʼo te pasina 24]
ʼE tokoni te kau tagata ʼāfea ki te faga ōvi ke nātou fai ʼaki he loto fiafia te meʼa ʼaē ʼe nātou lavaʼi
[Paki ʼo te pasina 26]
ʼE fiafia Sehova ia nātou ʼaē ʼe fakalogo kia te ia ʼaki tonatou loto katoa