Ko Te Kau Fakamoʼoni ʼa Sehova ʼi Te Malamanei Katoa—Kolopī

KO TE fenua ʼaē ko Kolopī ʼe ko he fenua ʼe mole ʼi ai hona tatau ʼi te Potu Toga ʼo Amelika. Ko te ʼu Moana ʼo te Atlantique pea mo ʼaē ʼo te Pasifika ʼe nā tau toko lua ki te mata fenua ʼo te fenua ʼaia ʼaē ʼe lahi ai te ʼu moʼuga punaʼaga afi. Ko te ʼaluʼaga ʼo te temi ʼe fefetogiʼaki ai te vevela ʼo te ʼu mafa ʼo te faʼahi mālalo pea mo te momoko ʼo te ʼu moʼuga māʼoluga ʼo te Cordillère des Andes ʼaē ʼe niveʼia.a

Logope la te ʼiloa ʼo Kolopī ko he fenua ʼo te aulo pea mo te ʼu maka maʼuhiga ʼaē ko te ʼu emelote, ko tona koloā ʼaē ʼe maʼuhiga age ko tana hahaʼi. Ia ʼaho nei, ʼe fakafonu e Sehova tona fale fakalaumālie ʼaki te kolōlia. ʼAki tana matalelei, ʼe ʼolo kiai te kau atolasio ʼaē ʼe lotolelei mai te ʼu potu fuli pe ʼo te malamanei, ʼo kau kiai mo te fenua ko Kolopī.—Asea 2:7.

Neʼe Punamaʼuli Te Kau Takitaki Matani Gāue

Ko te ʼAhotapu ʼaho 1 ʼo Novepeli ʼo te taʼu 1992 neʼe fakaʼiloga ʼaki te avahi ʼaē ʼo te filiale foʼou pea mo te fale tā tohi ʼo te Sosiete Watch Tower ʼaē ʼi Facatativá, ko te kolo ʼe tuʼu ia kilometa e 42 ʼi te potu tokelau-hihifo ʼo Bogotá. Neʼe malave ki te loto ʼo te tokolahi neʼe mamata ki te filiale. ʼI tana liliu ki tona fale gāue, ko te tagata neʼe kau ʼi te kūtuga ʼaē neʼe ʼolo ʼo mamata ki te filiale, neʼe ina uga mālohi tona ʼu tagata pule ke nātou ʼolo ʼo mamata ki te kautahi ‘ ʼe fakaofoofo ʼaupito tana faʼa gāue, te tokalelei ʼo meʼa fuli, pea mo te aga fakaʼapaʼapa ʼa te hahaʼi gāue ʼaia.’ Lolotoga te kiʼi fakasiosio ʼaē neʼe nātou fai, neʼe fia ʼiloʼi ʼaupito e te kau takitaki matani gāue te ʼuhiga ʼa te kautahi ʼaia pea neʼe nātou fai te tuʼuga fehuʼi.

Ko te kau takitaki matani gāue ʼaia neʼe nātou fakatuʼutuʼu leva ke nātou fekauʼi tanatou ʼu sefe, tanatou ʼu hahaʼi ʼaē ʼe leʼoleʼo ki te gāue pea mo nātou ʼaē ʼe nātou fakaʼaluʼalu te gāue—ʼi tona fakahagatonu ko tanatou kau gāue fuli—ke nātou ʼolo ʼo mamata. ʼI te vāhaʼa fuli, ko te toko 15 peʼe ko te toko 25 hahaʼi gāue ʼaē ka ʼolo anai ʼo mamata ki te filiale ʼo aʼu ki te kua hoki ʼosi mamata anai ʼa te toko 1 300 ki te taʼi faiva gāue ʼo te kautahi ʼaia.

Neʼe lauʼi teau te kau gāue ʼaē neʼe ʼolo ʼo mamata ki te ʼu fale ʼo te filiale pea neʼe nātou sioʼi te foʼi fime viteo Les Témoins de Jéhovah: un nom, une organisation. Neʼe nātou punamaʼuli ʼi te maʼuhiga ʼaē ʼo te kautahi pea mo te lahi ʼaē ʼo te gāue fai faka mafola ʼe fai ʼi te malamanei katoa, pea neʼe nātou ʼofolele ʼuhi ko te maʼuhiga ʼaupito ʼo te poto ʼaē ʼe fakaʼaogaʼi e te Sosiete ʼi te faʼahi ʼo te faʼu masini. ʼI tanatou mavae mai ai, neʼe ʼui maʼa te tokolahi ia nātou ʼe hage kia nātou neʼe nātou ‘mavae mai te Palatiso ʼo liliu ki te mālama ʼaē ʼe tokakovi.’

Ko Te Moʼoni ʼe Kaku Ki Te Hahaʼi Fuli Pe

ʼE kaku te logo lelei ki te hahaʼi kehekehe. (1 Timoteo 2:3, 4) Ohage la, ko te tagata neʼe ʼi ai tana foʼi mahōlō heavy-metal pea neʼe ko he tahi neʼe faʼu hiva ʼi te temi ʼaē, neʼe ina tali te moʼoni faka Tohi-Tapu, ʼo ina fetogi tona maʼuli, ʼo mole tuai pea neʼe liliu ko te pionie vaeluaʼi temi. Ki muli age neʼe liliu ia ia ko he tagata faifekau faka minisitelio. ʼE lahi te hahaʼi neʼe nātou kau ʼuluaki ki ni ʼu kautahi ʼe nātou fakatupu maveuveu kae neʼe nātou ako te foaki ʼaē ʼo tonatou loto pea mo tanatou falala ki te Puleʼaga ʼo Sehova. ʼI te temi nei ʼe nātou kau mālohi ki te faka mafola ʼo te logo ʼaē ʼo ʼuhiga mo he mālama foʼou ʼe maʼu ai anai te tokalelei.

Māʼiape la mo ʼihi hahaʼi neʼe pipiki mālohi ki te toloke pea mo te fakatau ʼaē ʼo te toloke neʼe nātou maliu ki te moʼoni. Ko te tūpulaga kua liliu ko te Fakamoʼoni ʼi te temi nei, neʼe pule ia ki te toʼoga ʼo te toloke pea mo te fale ʼe gaohi ai te kokaine, pea ʼi te temi nei kua lītuʼa ia mai te taʼi maʼuli ʼaia. Neʼe ina maʼu te fiafia ʼaki tana ako te ʼu pelesepeto ʼo te Tohi-Tapu pea mo tana maʼuliʼi te ʼu pelesepeto ʼaia. ʼI te fale pilisoni, ko te ako ʼaē ʼo te Tohi-Tapu neʼe ina uga te kau fai fakapō neʼe fakatūʼa ke nātou kole mamahi kia Sehova ke ina fakamolemole age tanatou ʼu agahala pea ke ina tali nātou ko hana ʼu kaugana.

Koia ʼe ko te hahaʼi kehekehe ʼaia ʼaē ʼe nātou tali te logo ʼo ʼuhiga mo te Puleʼaga. ʼI Kolopī, ohage ko te tahi age ʼu faʼahi, ko Sehova ʼe ina lolotoga fakafonu nei tona ʼapi ʼaki te kolōlia.

[Nota ʼi te lalo pasina]

[Talanoa ʼo te pasina 8]

TE FAKAʼALUʼALU ʼO TE FENUA

ʼI Te Taʼu Gāue 1993

TE LAHI ʼO TE KAU FAI FAKA MAFOLA: 60 854

KO TE FAKAFUAFUA KO TE FAKAMOʼONI E 1 MAʼA TE TOKO: 558

TE HAHAʼI ʼI TE ʼAHO ʼO TE FAKAMANATU: 249 271

TE LAHI ʼO TE KAU PIONIE: 8 487

TE ʼU AKO FAKA TOHI-TAPU: 100 927

TE LAHI ʼO TE KAU PAPITEMA: 5 183

TE LAHI ʼO TE ʼU KOKELEKASIO: 751

TE TUʼUʼAGA ʼO TE FILIALE: FACATATIVÁ

[Paki ʼo te pasina 9]

Ko te kau gāue ʼo te Filiale pea mo te kau misionea ʼi te taʼu 1956

[Paki ʼo te pasina 9]

Ko he fakasiosio mai te lagi ki te filiale