Ko Te Maʼuli ʼo Te Kau Faka Mafola ʼo Te Puleʼaga
Te ʼĀteaina Fakalaumālie ʼi Kolopī
TALU mai te temi ʼa te kau conquistadors Sepania (ko te hahaʼi neʼe ʼomai mai Sepania moʼo puleʼi te ʼu fenua), ko te lotu katolika neʼe mālohi ʼi te potu Toga ʼo Amelika. ʼI Kolopī, neʼe ko te lotu faka puleʼaga ʼiloa. Lolotoga te ʼu taʼu e 105 kua hili, neʼe ʼi ai te felogoi ʼa te Vatikano pea mo te puleʼaga ʼo Kolopī ki te taupau maʼu ʼo te ’Ēkelesia pea mo ina maʼu ai te ʼu pilivilesio makehe ʼi te ʼaluʼaga ʼo te ako pea mo te fai ʼohoana.
ʼI tesepeli ʼo te taʼu 1990, ko te hahaʼi ʼo Kolopī neʼe nātou vote te fakatuʼutuʼu foʼou, ʼaē neʼe fakahoko ʼi te vaelua ʼo te taʼu 1991. Ko te fakatuʼutuʼu foʼou neʼe ina fetogi te ʼaluʼaga ʼo te ʼu lotu ʼi Kolopī. Kua ʼi ai te ʼu fealagia ʼo te ʼatu ʼu lotu fuli ia muʼa ʼo te lao, pea ʼe mole fakakinauʼi te ako faka lotu ʼi te ʼu faleako faka puleʼaga. Ko te felogoi ʼa te Vatikano pea mo te puleʼaga neʼe toe sivi ʼuhi ko te ʼu fetogi neʼe hoko ʼaki te fakatuʼutuʼu.
Ko te toe ʼāteaina lahi faka lotu ʼaia neʼe fakasiʼisiʼi ai te mālohi ʼo te lotu katolika, ʼo ina fakagafua ai kia nātou ʼaē ʼe loto agatonu ke nātou maʼu te mālama ʼo te Tohi-Tapu pea mo maʼu ai te ʼāteaina fakalaumālie.
ʼI muʼa ʼo te ʼāteaina fakalaumālie ʼaia, ko te toko 51 000 kau Fakamoʼoni ʼa Sehova neʼe nātou fai te teuteu ko te tokaga ʼaē kia nātou ʼe fia kakai ki te meʼa kai fakalaumālie. Ko tanatou filiale foʼou mo tana ʼatu ʼu fealagia, ʼe kau ai tanatou tāʼaga tohi lanu, kua vave ʼosi pe. Neʼe fakatotonu ki te kau pionie makehe faka temi ke nātou ʼolo ki te ʼu kolo liliki ʼo kumi te ʼu ōvi ʼa Sehova ʼaē neʼe hēhē, pea neʼe nātou fai te gāue fakatalakitupua ʼo ʼuhiga mo te ako faka tohi-tapu. ʼI te ʼu kolo e 63 ʼe takitahi tana hahaʼi ʼe teitei 10 000, neʼe fakatuʼutuʼu te ʼu kokelekasio pea mo te ʼu kūtuga e 47.
ʼAki te ʼekenaki e te laumālie ʼa Sehova te hahaʼi ʼaē ʼe loto agatonu, tokolahi mo te kau tūpulaga ʼe nātou tali te logo. Ko te tohi ʼaē Les jeunes sʼinterrogent — Réponses pratiques neʼe ʼi ai tona ʼuhiga mālohi ki te kau tūpulaga feiā aipe mo tanatou ʼu mātuʼa. ʼI tana gāue faka mafola ʼi te ʼu ʼapi, ko te Fakamoʼoni ʼa Sehova neʼe felāveʼi mo te tagata neʼe ina lau te ʼu koga ʼo te tohi ʼaia, neʼe fakatoʼo age e te tagata ʼo tona vāhaʼa fale. Neʼe ina leleiʼia te fakamatalatala lelei ʼa te tohi ʼo ʼuhiga mo te ʼu fihifihia faka famili. Neʼe ina leleiʼia tāfito te kapite 4 ʼaē ko tana ʼu kupu tāfito “He koʼe koa ʼe mavete ia papa pea mo mama?”, koteʼuhi ko ia pea mo tona ʼohoana neʼe teuteu ke nā mavete. Neʼe ina ʼui ko te tohi ʼaia neʼe ina hāofaki ia ia mai te tuʼutāmaki maʼuhiga. ʼI te temi nei, ko ia pea mo tona famili kua nātou ako te Tohi-Tapu mo te kau Fakamoʼoni ʼa Sehova pea mo nātou kau ki te ʼu fono ʼi te kokelekasio. ʼE lahi tanatou fakafetaʼi ki te poto ʼaoga ʼe foaki e Sehova ʼi tana Tohi-Tapu pea mo tana kautahi.
Ko te meʼa ʼaenī neʼe hoko ʼe ina fakahā ko te ʼāteaina fakalaumālie ʼe lolotoga hoko nei ʼi Kolopī pea mo te tokoni ʼe foaki e te kau Fakamoʼoni ʼa Sehova ki te hahaʼi ʼe hālofia ʼi te faʼahi fakalaumālie, ʼo akoʼi nātou ki te ʼu ʼamanaki taulekaleka ʼa Sehova pea mo tana mālama foʼou, ʼaē kua ōvi mai. — 2 Petelo 3:13.