Ko Te Tuʼulaga Tonu ʼo Te Tauhi Kia Sehova ʼi Totatou Maʼuli
“ ʼE ʼau tapuakina anai kia te koe ʼi te ʼaho fuli pe, pea ʼe ʼau vikiviki anai ki tou huafa ki he ʼu temi ʼe mole ʼiloʼi hona gataʼaga, ʼio, ke talu ai.”—Pesalemo 145:2.
1. ʼO ʼuhiga mo te tauhi, koteā te meʼa ʼe fakamaʼua mai e Sehova?
“KO ʼAU ia Sehova, tou ʼAtua, ko ʼau ko te ʼAtua ʼe ʼau fakamaʼua he pipiki ʼāteaina pe kia te ʼau.” (Ekesote 20:5) Neʼe logo ia Moisese ki te talanoa ʼaia mai ia Sehova, pea neʼe ina toe fakahā te palalau ʼaia ki muli age ʼi tana talanoa ʼaē ki te hahaʼi ʼo Iselaele. (Teutalonome 5:9) ʼI te ʼatamai ʼo Moisese neʼe mole ʼi ai he loto mahalohalo, ko Sehova ʼAtua neʼe ʼamanaki ia ke pipiki ʼāteaina age pe Tana ʼu kaugana kia te Ia.
2, 3. (a) Koteā ʼaē neʼe malave ki te kau Iselaelite ʼo ʼuhiga mo te meʼa ʼaē neʼe hoko ʼo ōvi ki te Moʼuga ʼo Sinaï? (b) Koteā te ʼu fehuʼi ʼe tou vakaʼi anai ʼo ʼuhiga mo te tauhi ʼa te kau Iselaelite pea mo te kau kaugana ʼa te ʼAtua ia ʼaho nei?
2 ʼI te fakatuʼu ʼo tonatou nofoʼaga ʼo ōvi ki te Moʼuga ʼo Sinaï, ko te kau Iselaelite pea mo te “toe hahaʼi kehekehe” ʼaē neʼe mavae mai mo nātou mai Esipito, neʼe nātou mamata ki te meʼa fakaofoofo. (Ekesote 12:38) Neʼe mole hage ko te atolasio ʼaē neʼe fai ki te ʼu ʼatua ʼo Esipito, ʼaē neʼe fakalainoaʼi nātou e te ʼu tautea e hogofulu. ʼI te temi ʼaē neʼe fakahā ai e Sehova tana nofo mo Moisese, neʼe hoko te meʼa fakamataku: ko te mana, te ʼuhila, pea mo te tagi leʼolahi ʼo te puhi fakatagi ʼo fakatupu ʼaki ai te tete ʼi te nofoʼaga katoa. Pea neʼe ʼi ai te afi pea mo te kohu ʼi te temi ʼaē neʼe galulu ai te moʼuga katoa. (Ekesote 19:16-20; Hepeleo 12:18-21) Ka na pau neʼe loto he Iselaelite ki he fakamoʼoni ʼo ʼuhiga mo te meʼa ʼaē neʼe hoko neʼe fakaofoofo, ko te meʼa ʼaia neʼe mole tuai tona hoko mai. ʼO mole fualoa kiai, neʼe mamata anai ia ki te fakamoʼoni ʼaki tana sio kia Moisese ʼi tana hifo mai te moʼuga ʼi te kua ʼosi foaki age kia te ia te ʼu maka e lua ʼo te ʼu Lao ʼa te ʼAtua. ʼI te fakamatala ʼa te Tohi-Tapu, “ko te kili ʼo te fofoga ʼo [Moisese] neʼe ina fakatapa te mālama pea [ko te hahaʼi] neʼe matataku ʼi te fakaōvi kia te ia.” ʼE mahino ia, neʼe ko he meʼa ʼe fakagalo gataʼa pea mo fakaofoofo!—Ekesote 34:30.
3 ʼO ʼuhiga mo te hahaʼi ʼaia ʼa te ʼAtua, neʼe mole ʼi ai he lotolotolua ʼo ʼuhiga mo te tuʼulaga ʼo te tauhi ʼaē kia Sehova. Neʼe ko ia tonatou Hāofakiʼaga. Ko tonatou maʼuli ʼe fakalogo kia te ia. Neʼe ko ia pe foki ko tonatou Tagata fai lao. Kae neʼe nātou tuku koa te tauhi kia Sehova ke takimuʼa ʼi tonatou maʼuli? Pea e feafeaʼi ki te kau kaugana ʼa te ʼAtua ia ʼaho nei? Koteā te tuʼulaga ʼo te tauhi kia Sehova ʼi tonatou maʼuli?—Loma 15:4.
Ko Te Tauhi ʼa Iselaele Kia Sehova
4. Neʼe feafeaʼi te agaaga ʼo te nofoʼaga ʼo Iselaele ʼi tana lolotoga fagona ʼi te toafa, pea neʼe koteā ʼaē neʼe tuʼu ʼi lotomalie ʼo te nofoʼaga?
4 Ka na pau la neʼe koutou sisio ohage ko te sio ʼa he manulele ki te nofoʼaga ʼo Iselaele ʼi te toafa, koteā anai te meʼa ʼe koutou sisio kiai? Ko te toe koga meʼa, kae neʼe fakatokatoka lelei, neʼe fakaʼatuʼatu ai te ʼu fale lā ʼo feala ke nonofo ai he toko miliona hahaʼi tupu, neʼe fakamāʼopoʼopo te ʼu fale lā ʼo mulimuli pe ki te ʼu vaevae ʼo te ʼu telepi, ʼo taki tolu ki te potu tokelau, ki te potu toga, ki te potu hahake, pea mo te potu hihifo. ʼAki te fakasiosio ʼe loloto age, ʼe koutou toe fakatokagaʼi anai te tahi tuʼuga fale lā ʼe tuʼu ʼo ōvi ki te lotomalie ʼo te nofoʼaga. Ko te tuʼuga kiʼi fale lā e fā ʼaia ʼaē neʼe veliveli age, neʼe nofoʼi e te ʼu famili ʼo te telepi ʼo Levi. ʼI te lotomalie ʼo te nofoʼaga, ʼe tuʼu ai te fale lā ʼe vaheʼi ʼaki te kie, neʼe ko te fakatuʼutuʼu makehe ia. Neʼe ko te “fale lā ʼo te fono,” peʼe ko te tapenakulo, neʼe laga e te kau Iselaelite “fakapotopoto” ʼo mulimuli pe ki te fakatuʼutuʼu ʼa Sehova.—Faka au 1:52, 53; 2:3, 10, 17, 18, 25; Ekesote 35:10.
5. Neʼe koteā te fakatuʼutuʼu ʼo ʼuhiga mo te tapenakulo ʼi Iselaele?
5 ʼI te ʼu mānanavaʼaga fuli ʼaē e 40 lolotoga tanatou fagona ʼi te toafa, neʼe fakatuʼu e Iselaele te tapenakulo, pea neʼe liliu ko te meʼa maʼuhiga ʼo tonatou nofoʼaga. (Faka au, kapite 33) Koia la ʼaē, ʼe talanoa te Tohi-Tapu kia Sehova ʼe nofo mo tana hahaʼi ʼi te lotomalie ʼo tonatou nofoʼaga. Neʼe fonu te tapenakulo ʼi tona kolōlia. (Ekesote 29:43-46; 40:34; Faka au 5:3; 11:20; 16:3) ʼE ʼui fēnei e te tohi (Our Living Bible): “Ko te tapenakulo fehikitaki ʼaia neʼe ko te meʼa maʼuhiga tāfito, koteʼuhi neʼe ina faka fealagia he felogoi faka lotu ʼa te ʼu telepi. Koia, neʼe ina fakalogo tahi ia nātou ʼi te ʼu taʼu loaloaga ʼaē neʼe nātou fehikiʼaki ai ʼi te toafa pea mo ina fai ke logo tahi tanatou gāue.” ʼO mole gata ʼaki aipe, ko te tapenakulo neʼe liliu ko te meʼa fakamanatu tuʼumaʼu ʼo te atolasio ʼa te kau Iselaelite ki tonatou Tupuʼaga ʼaē neʼe ko te meʼa tāfito ʼo tonatou maʼuli.
6, 7. Koteā te fakatuʼutuʼu ʼo ʼuhiga mo te tauhi ʼaē neʼe ina fetogi te tapenakulo, pea neʼe feafeaʼi tona ʼaoga ki te fenua ʼo Iselaele?
6 Hili leva ki te tau ʼa te kau Iselaelite ki te Kele ʼo te Fakapapau, neʼe hoholo aipe te maʼuhiga tuʼumaʼu ʼaē ʼo te tapenakulo ki te tauhi ʼa Iselaele. (Sosue 18:1; 1 Samuele 1:3) Ki muli age, ko te Hau ko Tavite neʼe ina fakatuʼutuʼu ke laga he fale ke tuʼu maʼu. Ko te fakatuʼutuʼu ʼaia neʼe liliu ko te fale lotu, pea neʼe laga ki muli age e tona foha ko Salomone. (2 Samuele 7:1-10) ʼI te temi ʼaē neʼe fakatapuʼi ai, neʼe hifo mai te ʼao moʼo fakahā ia te tali ʼaē e Sehova te fakatuʼutuʼu ʼaia. Neʼe fēnei te faikole ʼa Salomone: “Neʼe ʼau laga ʼo lava lelei maʼa te koe he fale nofoʼaga māʼoluga, ko he potu ʼe tuʼu maʼu ke ke nofo ai ki he ʼu temi ʼe mole ʼiloʼi honatou gataʼaga.” (1 Hau 8:12, 13; 2 Fakamatala 6:2) Ko te fale lotu foʼou neʼe liliu ko te tafitoʼaga ʼo ʼuhiga mo te ʼu faikole ʼa te hahaʼi.
7 ʼE tuʼa tolu ʼi te taʼu, ko te hahaʼi tagata Iselaelite fuli neʼe nātou hake ki Selusalemi ʼo kau ki te ʼu toʼotoʼoga fakafiafia ʼi te fale lotu, ʼe ko he fakafetaʼi ki te tapuakina ʼa te ʼAtua. Koia la ʼaē, ko te ʼu fakatahi ʼaia neʼe higoaʼi “ko te ʼu ʼaho lalahi ʼa Sehova,” ʼaē neʼe faka ʼuhigaʼi tāfito ki te tauhi ki te ʼAtua. (Levitike 23:2, 4) Ko te ʼu fafine ʼe tauhi fakamalotoloto ki te ʼAtua neʼe nātou kau kiai mo ʼihi ake ʼo nātou ʼu kāiga.—1 Samuele 1:3-7; Luka 2:41-44.
8. E feafeaʼi te fakamoʼoni e te Pesalemo 84:1-12 ia te maʼuhiga ʼaē ʼo te tauhi kia Sehova?
8 Ko te ʼu pesalemo ʼaē haʼu mai te ʼAtua neʼe nātou fakamoʼoni ki te maʼuhiga ʼaē ʼo te māʼoluga ʼo te tauhi ʼi tonatou maʼuli. Neʼe hiva fēnei te ʼu foha ʼo Kolea: “ ʼI lelei ʼaupito leva ʼo tou tapenakulo taulekaleka, Ê Sehova ʼo te ʼatu kautau!” ʼE mahino ia neʼe mole nātou fai te fakavikiviki ki te fale ʼaē neʼe laga. Kailoa ia, neʼe nātou fai tanatou ʼu fakavikiviki kia Sehova ʼAtua, ʼo ʼui maʼa nātou: “Ko toku loto pea mo toku kakano ʼe nā fai te ʼu kalaga fakafiafia ki te ʼAtua maʼuli.” Ko te gāue ʼa te kau Levite neʼe ina fakatupu kia nātou te fiafia lahi. Neʼe nātou faka mafola fēnei: “Manuʼia ia nātou ʼaē ʼe nonofo ʼi tou fale! ʼE kei nātou vikiviki pe kia te koe.” ʼIo, neʼe feala pe ia ki te kau Iselaelite fuli ke nātou hiva fēnei: “ ʼE manuʼia te kau tagata ʼaē ko tonatou mālohi ʼe ia te koe, ʼaia ʼe ʼi tonatou loto te ʼu ala lalahi. . . . ʼE nātou haʼele anai ʼi te mālohi pea mo te mālohi; ʼo takitahi hā pe ki te ʼAtua ʼi Sione.” Logope la ʼaē ko te fagona ʼa he Iselaelite ki Selusalemi neʼe feala pe ke loaloaga pea mo fakatupu gaʼegaʼe, ko tona mālohi neʼe toe fakafoʼou ʼi te temi ʼaē neʼe tau ai ki te kolo ʼaliki. Ko tona loto neʼe fonu ʼi te fiafia ʼi tana faka maʼuhigaʼi tona pilivilesio ʼaē ko te atolasioʼi ʼo Sehova: “Ko he ʼaho e tahi ʼi tou malaʼe ʼe lelei age ia ʼi ni ʼaho e afe ʼi he tahi faʼahi! Neʼe ʼau fili ke ʼau nofo ʼi te muʼa matapā ʼo toku ʼAtua ʼi haku feʼaluʼaki ʼi te ʼu fale lā ʼo te agakovi. . . . Ê Sehova ʼo te ʼatu kautau, ʼe manuʼia te tagata ʼaē ʼe falala kia te koe.” Ko te ʼu faʼahiga palalau ʼaia ʼe hā ʼaki ai te faka maʼuhigaʼi ʼaē e te kau Iselaelite te tauhi kia Sehova.—Pesalemo 84:1-12.
9. Koteā te meʼa neʼe hoko ki te hahaʼi ʼo Iselaele ʼi te temi ʼaē neʼe mole kei nātou faka maʼuhigaʼi ai te tauhi kia Sehova?
9 Kae meʼa fakaʼofaʼofa foki, ko Iselaele neʼe mole ina taupau maʼu ke maʼuhiga te tauhi moʼoni. Neʼe nātou fakagafua ki te tauhi ʼo te ʼu ʼatua loi ke ina maumauʼi tanatou gāue fakamalotoloto ʼaē kia Sehova. Koia la ʼaē, neʼe tuku e Sehova ia nātou ki tonatou ʼu fili, ʼo ina fakagafua ke ʼave ia nātou ʼo faka ʼaunofo ʼi Papiloni. ʼI te temi ʼaē neʼe nātou toe ʼōmai ai ki tonatou kele ʼi te ʼosi ʼo taʼu e 70, neʼe foaki e Sehova ki Iselaele, te ʼu tokoni fakaloto mālohi ʼa te kau polofeta agatonu ko Asea, Sakalia, pea mo Malakia. Ko te pelepitelo ko Esitalasi pea mo te Kovana ko Nehemia neʼe nā uga te hahaʼi ʼa te ʼAtua ke nātou toe laga te fale lotu pea mo toe fakatuʼu te tauhi moʼoni ʼi ai. Kae ʼi te fakaʼaluʼalu ʼo te ʼu sēkulō, ko te tauhi moʼoni neʼe toe liliu pe ia ko he meʼa noa ʼi te fenua.
Ko Te Gāue Fakamalotoloto ʼi Te ʼUluaki Sēkulō ʼo ʼUhiga Mo Te Tauhi Moʼoni
10, 11. Neʼe koteā te tuʼulaga ʼo te tauhi kia Sehova ʼi te maʼuli ʼo te kau agatonu ʼi te temi ʼaē neʼe nofo ai Sesu ʼi te kele?
10 ʼI te temi ʼaē neʼe fakakatofa e Sehova, neʼe hā te Mesia. Ko te hahaʼi agatonu neʼe nātou fakatalitali ki te fakamaʼuli ʼa Sehova. (Luka 2:25; 3:15) Ko te fakamatala ʼa te Evaselio ko Luka ʼe talanoa fakahagatonu ki te finematuʼa ko Ana e taʼu 84, ko te fafine vitua “neʼe mole puli ia ʼi he ʼaho ʼi te fale lotu, ʼo ina fai te tauhi tapu ʼi te po mo te ʼaho ʼaki te ʼaukai pea mo te ʼu kole mamahi.”—Luka 2:37.
11 Neʼe ʼui fēnei e Sesu: “Ko taku meʼa kai ʼe ko te fai ʼo te finegalo ʼo ia ʼaē neʼe ina fekauʼi mai ʼau pea ʼe tonu ke ʼau fakaʼosi tana gāue.” (Soane 4:34) Koutou manatuʼi pe neʼe feafeaʼi te aga ʼa Sesu ʼi te temi ʼaē neʼe fakafeagai ai ki te kau fetogi paʼaga. Neʼe ina holoki tonatou ʼu laupapa ʼo toe feiā aipe ki te ʼu hekaʼaga ʼo nātou ʼaē ʼe fakatau lupe. ʼE ʼui fēnei e Maleko: “Ko [Sesu] neʼe mole ina tuku ke ʼi ai he tahi ʼe ina fetuku he meʼa ʼi te fale lotu, kaʼe neʼe akonaki ia ʼo ʼui maʼana: ‘Neʼe mole tohi koa la, “Ko toku fale ʼe fakahigoa anai ko te fale faikole ki te ʼu puleʼaga fuli”? Kaʼe kua gaohi ia ʼe koutou ko he ʼana ʼo he kau kaihaʼa.’ ” (Maleko 11:15-17) ʼIo, neʼe mole fakagafua e Sesu ki he tahi ke ina tuʼusi ʼi te malaʼe ʼo te fale lotu moʼo fetuku ʼo he ʼu meʼa, mai he faʼahi ki he tahi faʼahi ʼo te kolo. Ko te ʼu aga ʼa Sesu neʼe ʼalutahi ia mo tana tokoni ʼaē neʼe ina fai ki muʼa atu: “Ke koutou haga kumi muʼa te puleʼaga pea mo tona faitotonu [ʼa te ʼAtua].” (Mateo 6:33) Neʼe tuku mai e Sesu kia tatou te faʼifaʼitaki taulekaleka ʼo ʼuhiga mo te foaki ʼaē kia Sehova he tauhi katoa. Neʼe ina maʼuliʼi moʼoni te meʼa ʼaē neʼe ina faka mafola.—1 Petelo 2:21.
12. Neʼe fakahā feafeaʼi e te ʼu tisipulo ʼa Sesu te takimuʼa ʼaē ʼi tonatou maʼuli te tauhi kia Sehova?
12 Neʼe toe tuku pe foki e Sesu te faʼifaʼitaki ki tana kau tisipulo ke nātou muliʼi tana faʼahiga fakahoko te gāue ʼaē neʼe hinoʼi age ki ai moʼo faka ʼāteaina te kau Sutea lotomamahi kae agatonu, mai te ʼu kavega ʼo te ʼu gāue faka lotu ʼaē ʼe hala. (Luka 4:18) Moʼo fakalogo ki te fakatotonu ʼa Sesu ke fai he kau tisipulo pea mo papitemaʼi nātou, ko te kau ʼuluaki Kilisitiano neʼe nātou tala ʼaki te lototoʼa te finegalo ʼo Sehova ʼo ʼuhiga mo tonatou fakatuʼuake e te ʼAliki. Neʼe fiafia ia Sehova ʼi tanatou foaki ʼaē te tuʼulaga ʼuluaki ki te tauhi ʼaē kia te Ia. Koia, ko te ʼaselo ʼa te ʼAtua neʼe ina fakamavae faka milakulo te ʼu ʼapositolo ko Petelo pea mo Soane mai te pilisoni pea mo ina akoʼi nātou: “Koutou ʼolo, pea, ka koutou tutuʼu anai ʼi te fale lotu, koutou haga ʼui age ki te hahaʼi te ʼu palalau fuli ʼo te maʼuli ʼaia.” ʼI tonatou kua fakaloto mālohiʼi, neʼe nātou mulimuli pe kiai. ʼI te ʼaho fuli pe, ʼi te fale lotu ʼo Selusalemi pea mo te ʼu ʼapi, “tuʼumaʼu pe, ʼe nātou haga akoʼi pea mo tala te logo lelei ʼo ʼuhiga mo Kilisito, ia Sesu.”—Gāue 1:8; 4:29, 30; 5:20, 42; Mateo 28:19, 20.
13, 14. (a) Talu mai te temi ʼo te kau ʼuluaki Kilisitiano, koteā te meʼa neʼe faigaʼi e Satana ke ina fai ki te ʼu kaugana ʼa te ʼAtua? (b) Koteā te meʼa neʼe haga fai e te ʼu kaugana agatonu ʼa te ʼAtua?
13 ʼUhi ko te fakafeagai ʼaē neʼe tuputupu ki tanatou faka mafola, neʼe taki e te ʼAtua tana ʼu kaugana agatonu ke nātou tohi te tokoni ʼe ʼaoga. Mole tuai ki te hili ʼo te taʼu 60 ʼo totatou temi, neʼe tohi fēnei e Petelo: “Vevete kia te ia [Sehova] takotou ʼu tuʼania fuli, heʼe tokaga ia kia koutou. Koutou nonofo ʼalaʼala, koutou nonofo tokaga. Ko tokotou fili, ia te Tevolo, ʼe hage ko he laione ʼe gugulu, ʼe feʼaluʼaki ke ina kai he tahi. Kae ke koutou tekeʼi fakamālohi ia ia ʼaki te tui, heʼe koutou ʼiloʼi ko te ʼu mamahi ʼaia ʼe toe felāveʼi mo ʼokotou ʼu tēhina ʼaē ʼi te famili katoa ʼi te malamanei.” ʼE mahino ia ko te kau ʼuluaki Kilisitiano neʼe nātou maʼu he loto fīmālie mai te ʼu palalau ʼaia. Neʼe mahino kia nātou ʼi te hili ʼaē ʼo tonatou mamahi lolotoga he temi siʼisiʼi, ʼe fakaʼosi anai e te ʼAtua tonatou akoʼi. (1 Petelo 5:7-10) ʼI te lolotoga ʼo te ʼu ʼaho fakamuli ʼo te tuʼu ʼo te ʼu faʼahiga meʼa faka Sutea, ko te kau Kilisitiano moʼoni neʼe nātou hikihiki te tauhi ʼofa ʼa Sehova ke māʼoluga age.—Kolose 1:23.
14 Ohage ko te meʼa neʼe fakakikite e te ʼapositolo ko Paulo, neʼe hoko te ʼapositasia, ko te situʼa mai te tauhi moʼoni. (Gāue 20:29, 30; 2 Tesalonika 2:3) Ko te ʼu taʼu e hogofulu fakamuli ʼo te ʼuluaki sēkulō neʼe nātou fakamoʼoni ki te faʼahi ʼaia. (1 Soane 2:18, 19) Neʼe lava lelei te to e Satana te kau Kilisitiano loi ʼi te lotolotoiga ʼo te kau Kilisitiano moʼoni, ʼo faigataʼa ai te fakakehekeheʼi ʼo te “vao kovi” ʼaia mai te kau Kilisitiano ʼaē ʼe fakatatau ki te fulumeto. Kae, ʼi te fakaʼaluʼalu ʼo te ʼu sēkulō, ko ʼihi neʼe nātou tuku ki te ʼuluaki tuʼulaga te tauhi ki te ʼAtua, māʼiape la ʼi te tuʼutāmakiʼia ʼo tonatou maʼuli. Kae ia muʼa ʼo te fakaʼosi ʼo te ʼu taʼu e hogofulu ʼo te ʼu “temi ʼaē kua fakakatofa ki te ʼu puleʼaga,” ʼe toe fakamāʼopoʼopo e te ʼAtua tana ʼu kaugana ke nātou hikihiki te tauhi moʼoni.—Mateo 13:24-30, 36-43; Luka 21:24.
Ko Te Tauhi Kia Sehova Kua Faka Māʼoluga Ia ʼAho Nei
15. Talu mai te 1919, neʼe hoko feafeaʼi te ʼu lea faka polofeta ʼaē ia Isaia 2:2-4 pea mo Mikea 4:1-4?
15 ʼI te taʼu 1919, ko Sehova neʼe ina tuku age te mālohi ki te toe ʼo te kau Kilisitiano fakanofo moʼo fakahoko ʼo te gāue fagonogono faka malamanei fakaloto toʼa ʼaē neʼe ina hikihiki te tauhi ki te ʼAtua moʼoni. ʼAki te tokolahi ʼaē ʼo te “tahi ʼu ōvi” fakatātā mai te taʼu 1935, ko te mahu ʼo te hahaʼi ʼaē ʼe hake ki “te moʼuga ʼo te ʼapi ʼo Sehova” neʼe ʼāʼāsili tona tuputupu. ʼI te lolotoga ʼo te taʼu gāue 1993, ko te kau Fakamoʼoni ʼa Sehova e toko 4 709 889 neʼe nātou vikiviki kia Sehova ʼaki hanatou fakaafe niʼihi ke ʼōmai ke nātou kau fakatahi ʼi tana tauhi māʼoluga. ʼE kehekehe ia mo te ʼaluʼaga fakaʼofaʼofa ʼi te faʼahi fakalaumālie ʼo te ʼu “kiʼi moʼuga liliki” fakamagaʼi lotu ʼo te puleʼaga faka malamanei ʼa te lotu hala, tāfito la te Keletiate!—Soane 10:16; Isaia 2:2-4; Mikea 4:1-4.
16. Koteā te meʼa ʼe tonu ke fai e te ʼu kaugana fuli ʼa te ʼAtua ʼo mulimuli pe ki te meʼa ʼaē neʼe fakakikite ia Isaia 2:10-22?
16 ʼI te manatu ia ʼa te hahaʼi ʼaē ʼi te lotu hala, ko tonatou ʼu ʼēkelesia pea mo tonatou ʼu katetalale, pea mo tonatou ʼu takitaki lotu ʼe “makehe age” ia, pea ʼe nātou foaki kia nātou te ʼu tuʼulaga fakaʼaliʼaliki pea mo te ʼu fakaʼapaʼapa. Kae koutou fakatokagaʼi neʼe fakakikite e Isaia, ʼo fēnei: “Ko te ʼu mata fiatuʼu ʼo te tagata ʼaē neʼe toʼo mai te kele ʼe tonu anai ke punou; pea ko Sehova tokotahi pe ʼe tonu anai ke tuku ki ʼoluga ʼi te ʼaho ʼaia.” Ko ʼafea anai ʼe hoko ai te faʼahi ʼaia? ʼI te lolotoga ʼo te toe mamahi lahi, ʼi te temi ʼaia “ko te ʼu ʼatua noa ʼe pulihi anai ʼo talu ai.” ʼI te kua ōvi ʼo te ʼaho fakamataku, ko te kau kaugana fuli ʼa te ʼAtua ʼe tonu ke nātou vakaʼi fakalelei peʼe tuʼu ʼifea ʼi tonatou maʼuli te tauhi ʼaē kia Sehova.—Isaia 2:10-22.
17. ʼE fakahā feafeaʼi e te ʼu kaugana ʼa Sehova ia ʼaho nei te takimuʼa ʼaē kia nātou ʼo te tauhi kia Sehova?
17 ʼI tonatou ʼuhiga fale tautehina faka malamanei, ʼe logona te kau Fakamoʼoni ʼa Sehova ʼi tanatou gāue fakamalotoloto ʼaē ʼo fagonogono te Puleʼaga. Ko tanatou tauhi ʼaē kia Sehova, ʼe mole ko he lotu fakamalualoi ʼe maʼuliʼi pe ʼi he hola e tahi ʼi te vāhaʼa. Kailoa, kia nātou ko te lotu ʼe ko he faʼahiga maʼuli. (Pesalemo 145:2) ʼIo, ʼi te taʼu kua ʼosi, ko te toko 620 000 tupu neʼe nātou fakahoahoa lelei tanatou ʼu gāue ke nātou kau ki te minisitelio faka Kilisitiano katoa. ʼE mahino ia, e ko nātou ʼaē, ʼe mole nātou meʼa noaʼi te tauhi kia Sehova. ʼE ʼiloga lelei te faʼahi ʼaia ʼi tanatou ʼu fai palalau ʼaē ʼi te ʼaho fuli pea mo tanatou fai faka mafola, tatau aipe peʼe fakamaʼua kia nātou ʼe tonatou ʼu maʼua faka famili ke nātou gāue kinakina ʼi tanatou gāue fakamālama.
18, 19. Koutou fakamatalatala te ʼu faʼifaʼitaki fakaloto mālohi neʼe koutou maʼu mai te ʼu hisitolia ʼo te kau Fakamoʼoni ʼaē neʼe koutou lau.
18 Ko te ʼu hisitolia ʼo te kau Fakamoʼoni neʼe tā ʼi Te Tule Leʼo moʼo fakahā he fakasiosio poto ki te ʼu tēhina kehekehe pea mo te ʼu tuagaʼane, ke nātou fakamuʼamuʼa tuʼumaʼu ʼi tonatou maʼuli te tauhi ʼaē kia Sehova. Ko te tuagaʼane finemui neʼe ina foaki tona maʼuli kia Sehova ʼi tona taʼu ono neʼe fakatuʼutuʼu ke liliu ʼi he temi ko he misionea. Kia koutou ʼu tēhina pea mo tuagaʼane kei tūpulaga, koteā te fakatuʼutuʼu ʼe feala ke koutou fili ke tokoni anai kia koutou ke koutou taupau maʼu te tauhi ʼaē kia Sehova ke maʼuhiga tuʼumaʼu ʼi tokotou maʼuli?—Vakaʼi ʼi te alatike “ ʼE ʼau fakahoko te fakatuʼutuʼu ʼaē neʼe ʼau fakapapau kiai ʼi toku taʼu ono,” ʼi Te Tule Leʼo (fakafalani) ʼo te ʼaho 1 ʼo Malesio 1992, ʼi te ʼu pasina 26 ki te 30.
19 Ko te tuagaʼane vitua kua finematuʼa ʼe ko he tahi ʼaia faʼifaʼitaki lelei ʼo ʼuhiga mo te tuku ʼaē ki tona tuʼulaga tonu ia te tauhi kia Sehova. Neʼe ina maʼu te lotomālohi lahi moʼo kātakiʼi ʼo nātou ʼaē neʼe tokoni kia nātou ke nātou ako te moʼoni. Neʼe ko nātou ʼaia tona “famili.” (Maleko 3:31-35) Kapau ʼe hoko kia koutou te faʼahi ʼaia, ʼe koutou tali anai koa he fakaloto mālohi pea mo he tokoni mai ia nātou ʼaē ʼi te kokelekasio kei tūpulaga age ia koutou? (Koutou vakaʼi pe neʼe feafeaʼi te fakamatalatala e te Tuagaʼane ko Winifred Remmie “Neʼe ʼau tali ki te pāui ʼaē ʼo ʼuhiga mo te taʼukai,” neʼe tā ʼi Te Tule Leʼo (fakafalani) ʼo te ʼaho 1 ʼo Sūlio 1992, ʼi te ʼu pasina 21 ki te 23.) Ia koutou ʼaē ko te kau kaugana ʼe gāue katoa kia Sehova, koutou fakahā ko te tauhi kia Sehova ʼe ko te ʼuluaki meʼa maʼuhiga ʼaia ʼi tokotou maʼuli ʼaki hakotou kaugana mo he loto agavaivai ʼi te ʼu koga meʼa ʼaē ʼe hinoʼi koutou kiai, ʼaki hakotou fakalogo mo he lotolelei ki te takitaki faka teokalatike. (Koutou vakaʼi te faʼifaʼitaki ʼa te Tēhina ko Roy Ryan ʼe fakamatala ʼi te alatike “Pipiki maʼu ki te kautahi ʼa te ʼAtua,” ʼi Te Tule Leʼo (fakafalani) ʼo te ʼaho 1 ʼo Tesepeli 1991, ʼi te ʼu pasina 24 ki te 27.) Koutou manatuʼi ʼi te temi ʼaē ʼe tou fakamuʼamuʼa ai te tauhi kia Sehova, ʼe tou ʼiloʼi papau ʼe tokaga anai ia kia tatou. ʼE mole tonu ke tou tuʼania peʼe feafeaʼi anai te maʼu ʼo te ʼu meʼa tāfito ʼaē ki te maʼuli. ʼE ʼiloga te faʼahi ʼaia ʼi te hisitolia ʼo te ʼu Tuagaʼane ko Olive pea mo Sonia Springate.—Vakaʼi ʼi te alatike “Neʼe ma haga kumi muʼa te Puleʼaga,” ʼi Te Tule Leʼo (fakafalani) ʼo te ʼaho 1 ʼo Fepualio 1994, ʼi te ʼu pasina 20 ki te 25.
20. Koteā te ʼu fehuʼi maʼuhiga ʼe tonu anai ke tou fai takitokotahi kia tatou totonu pe?
20 Koia, ke tou fai takitokotahi kia tatou te ʼu fehuʼi maʼuhiga ʼaenī? Koteā koa te tuʼulaga ʼo te tauhi kia Sehova ʼi toku maʼuli? ʼE tuku katoa koa toku maʼuli ki te fai ʼo te finegalo ʼo te ʼAtua? Ko te ʼu faʼahi fea koa ʼo toku maʼuli ʼe feala ke ʼau fetogi? Ko te vakaʼi fakalelei ʼo te alatike ka hoa mai anai, ʼe ina faka fealagia anai ke fakakaukauʼi tatatou faʼahiga fakaʼaogaʼi ʼo totatou ʼu koloā moʼo taupau maʼu te meʼa tāfito ʼaē neʼe tou fili ʼi totatou maʼuli—te tauhi ki te Tuʼi ʼAliki ko Sehova, tatatou Tāmai ʼofa.—Tagata Tānaki 12:13; 2 Kolonito 13:5.
Toe Vakaʼi
◻ ʼO ʼuhiga mo te tauhi, koteā te meʼa ʼe fakamaʼua mai e Sehova?
◻ Neʼe liliu feafeaʼi te tapenakulo ko he meʼa fakamanatu?
◻ ʼI te ʼuluaki sēkulō ʼo totatou temi, ko ai ʼaē neʼe ko te ʼu faʼifaʼitaki fakaofoofo ʼo ʼuhiga mo te gāue fakamalotoloto ʼaē ki te tauhi moʼoni, pea neʼe hoko feafeaʼi?
◻ Talu mai te taʼu 1919, neʼe feafeaʼi te hikihiki ki ʼoluga ʼo te tauhi kia Sehova?