Ke Ke Nofo Agatonu Pea Mo Ke Maʼuli!
“LAUKOVI ki te ʼAtua pea mo ke mate!” Ko te takafi ʼo tamatou nusipepa ʼe ina fakahā te ʼohoana ʼo Sopo, ʼaē neʼe ina fai te ʼu talanoa mamafa ʼaia kia te ia. Ko te meʼa ʼaia neʼe hoko kua teitei hili kiai taʼu e 3 600. Kae ʼe ko te gaohi koviʼi ʼaia ʼo te kaugana agatonu ʼa te ʼAtua, ʼaki ni ʼu talanoa, ʼe ina faka maʼuhigaʼi foki he fehuʼi ʼe tau mo te hahaʼi ʼo aʼu mai ki te temi nei. Ko te tagata agatonu ʼaē ko Sopo neʼe mamahi ʼaupito he neʼe lahi tana ʼu meʼa neʼe puli—tana faga manu, tona ʼapi, pea mo tana toko hogofulu fānau. ʼI te temi nei ko tona sino kua fakatagaʼi e te mahaki neʼe hoholo aipe tona kovi, ʼo ʼahiʼahiʼi ai ia ia ki te gataʼaga ʼo tana faʼa kātaki. Neʼe koteā te tupuʼaga ʼo te faʼahi ʼaia? Ko te fili tāfito ʼo te ʼAtua pea mo te tagata, ia Satana te Tevolo, neʼe kei hoholo aipe tana fakafifihi ʼaē, ko te tagata ʼe mole feala ke nofo agatonu ki te ʼAtua ʼi he ʼaʼahi ʼe kovi ʼaupito.—Sopo 1:11, 12; 2:4, 5, 9, 10.
ʼI te temi nei, ohage ko te temi ʼo Sopo, “ko te malamanei katoa ʼe takoto ʼi te mālohi ʼo te agakovi,” ia Satana te Tevolo. (1 Soane 5:19) ʼIo, ko te faʼahi ʼaia ʼe ʼāsili age tona moʼoni ia ʼaho nei, koteʼuhi ʼi te temi nei kua lī ifo mai te lagi ki te kele ʼaenī “ia ia ʼaē ʼe ʼui ko te Tevolo mo Satana, ia ia ʼaē ʼe ina fakahēʼi te kele katoa.” (Fakahā 12:9) ʼE ko he tupuʼaga ʼaia ʼo te ʼu malaʼia lalahi ʼaē ʼe nātou fakamamahiʼi te malamanei ʼi totatou temi. Ko te ʼuluaki tau faka malamanei, ʼaē neʼe hoko ʼi te 1914, neʼe ina fakaʼiloga “te kamataʼaga ʼo te ʼu nunuʼa ʼo te tuʼania” ʼaē neʼe hoholo mai lolotoga te 20 sēkulō.—Mateo 24:7, 8.
ʼI te mālama aga fekai pea mo heʼemaʼa ʼaenī, neʼe mole koa la heʼeki koutou logoʼi kua koutou aʼu ki te gataʼaga ʼo te meʼa ʼaē ʼe feala ke kātakiʼi e he tagata? Neʼe mole heʼeki koutou feʼekeʼaki koa la ‘Peʼe ʼi ai koa he ʼuhiga ʼo te maʼuli?’ neʼe lagi manatu feiā ia Sopo, kae neʼe mole pe ʼi ai he temi neʼe puli ai tana tui ki te ʼAtua, logope la te ʼu hala ʼaē neʼe ina fai. Neʼe fēnei tana fakahā tana lotomālohi: “ ʼO aʼu ki toku mate, ʼe mole ʼau tuku anai taku agatonu!” Neʼe falala ia, ko te ʼAtua ʼe ina ‘ ʼiloʼi anai tana agatonu.’—Sopo 27:5; 31:6.
Ko Sesu Kilisito, te ʼAlo totonu ʼo te ʼAtua, neʼe toe tonu pe foki mo ia ke ina ʼutakiʼi ni ʼu ʼahiʼahi ʼi tana ʼi te kele. Ko Satana neʼe ina ʼahiʼahiʼi ia Sesu ʼi te ʼu ʼaluʼaga kehekehe. Neʼe ina fakaʼaogaʼi te ʼu meʼa ʼaē neʼe ʼaoga kia Sesu ʼi te faʼahi fakasino pea mo ina ʼahiʼahiʼi Tana falala ʼaē ki te Folafola ʼa te ʼAtua, ohage la ʼi te moʼuga ʼaē neʼe fia fakahalaʼi ai e Satana ia Sesu. (Mateo 4:1-11) Neʼe ina gaohi koviʼi ia Sesu ʼaki tana ʼeke te kau sekelipa fakafeagai pea mo te kau Faliseo ʼo feiā mo te hahaʼi ʼaē neʼe nātou fakahēhē, ke nātou fakatagaʼi ia ia, ke nātou tukugakoviʼi ia ia ʼe leakovi ia ki te ʼAtua, pea mo nātou fonofono ke nātou matehi ia ia. (Luka 5:21; Soane 5:16-18; 10:36-39; 11:57) Neʼe kovi ʼaupito age tanatou gaohi koviʼi ia Sesu ʼi te gaohi koviʼi ʼo Sopo e te toko tolu tagata fakaloto fīmālie loi.—Sopo 16:2; 19:1, 2.
ʼI te ʼōloto ʼo Setesemane, kae kua ʼamanaki hoko kia Sesu te ʼahiʼahi ʼaia, neʼe ina ʼui fēnei ki tana kau tisipulo: “Kua lotomamahi ʼaupito toku nefesi, ʼio, ʼo aʼu ki te mate.” Hili ʼaia, “neʼe tō ifo ki tona fofoga, ʼo faikole pea mo ʼui maʼana: ‘Tāmai, kapau ʼe ko he meʼa ʼe feala, pea ke fakamamaʼo te ipu ʼaenī ia te ʼau. Kaʼe, ke mole fai ki te meʼa ʼaē ʼe ʼau loto ki ai, kaʼe ke fai pe ki te meʼa ʼaē ʼe ke loto ki ai.’ ” Moʼo fakaʼosi, ʼi te pou fakamamahi, moʼo fakahoko ʼo te ʼu lea faka polofeta ʼo te Pesalemo 22:1, neʼe kalaga fēnei ia Sesu: “E toku ʼAtua, toku ʼAtua, koteā ʼaē kua ke līaki ai ʼau?” Kae ʼi te fakaʼosi neʼe mole līaki e te ʼAtua ia Sesu mai tona ʼaluʼaga ʼaē neʼe taupau aipe e Sesu he agatonu haohaoa kia te Ia ʼo ina foaki ai he faʼifaʼitaki lelei ke muliʼi e te kau Kilisitiano moʼoni fuli. Neʼe fakapale e Sehova te nofo agatonu ʼa Sesu ʼaki tana fakatuʼuake ia ia pea mo tana hikihiki ia ia ki te ʼu lagi ʼaē ʼe māʼoluga age. (Mateo 26:38, 39; 27:46; Gāue 2:32-36; 5:30; 1 Petelo 2:21) Ko te ʼAtua ʼe ina fakapale anai mo nātou fuli ʼaē ka nofo agatonu feiā kia te ia.
Ko te nofo agatonu ʼa Sesu neʼe mole gata ʼaki pe tana foaki he tali ʼe katoa ki te manuki ʼa Satana kae ko te sakilifisio ʼo tona maʼuli fakatagata haohaoa neʼe ina foaki te totogi, ʼaē ko te tāfito ʼaia ʼe feala ke maʼu te maʼuli heʼegata e te hahaʼi ʼaē ʼe nātou taupau tanatou agatonu. (Mateo 20:28) ʼUluaki, neʼe fakatahiʼi e Sesu te “kiʼi faga ōvi” ʼaē neʼe fakanofo ʼaē ʼe liliu ʼo kaugā hāko mo ia ʼi te Puleʼaga ʼo selo. (Luka 12:32) Hili te meʼa ʼaia, “ko te toe hahaʼi tokolahi” ʼe fakatahiʼi ke nātou maʼuʼuli ʼi te hili ʼo “te mamahi lahi,” ʼo nātou ʼōmai mai te faʼahi ʼaia ke nātou maʼu te maʼuli heʼegata ʼi te ʼu faʼahi ʼo te Puleʼaga ʼo te ʼAtua ʼaē ʼi te kele.—Fakahā 7:9, 14-17.
Ko te tagata agatonu ʼaē ko Sopo ʼe kau anai ʼi te toko miliale kau mamate ʼaē ʼe fakatuʼuake anai ke liliu ko he koga ʼo te sosiete tokalelei ʼaia ʼaē ko te “kele foʼou.” (2 Petelo 3:13; Soane 5:28, 29) Ohage ko tona fakahā ʼi te paki fakamuli ʼo tamatou nusipepa, ko te agatonu neʼe ʼi ai tona fakapale ʼi te temi ʼo Sopo, ʼi te temi ʼaē neʼe haga ai Sehova ʼo “tapuakiʼi te temi fakaʼosi ʼo Sopo . . . ʼo lahi age ʼi te meʼa ʼaē neʼe ina maʼu ʼuluaki.” Neʼe ina maʼu he mālohi fakalaumālie ohage ko he tahi “neʼe mole agahala ʼaki tona ʼu laugutu.” Ko te ʼAtua neʼe ina fakaloaloa atu tona maʼuli ia taʼu e 140. ʼI te faʼahi fakasino neʼe ina foaki age kia Sopo ʼo tuʼa lua ʼi te meʼa ʼaē neʼe ina maʼu ʼuluaki, pea ko Sopo “neʼe ina maʼu leva tona ʼu foha e fitu pea mo ʼona ʼofafine e tolu,” neʼe ʼui ko te ʼu taʼahine finemui tokotahi pe ʼaia neʼe maʼu ʼi te kele katoa. (Sopo 2:10; 42:12-17) Kae ʼe ko te ʼu manuʼia fuli ʼaia neʼe ko he faka ʼuakai fakatomuʼa pe ia ʼo te ʼu tapuakina ʼaē ka maʼu anai e te kau agatonu ʼi te palatiso ʼo te “kele foʼou.” ʼE toe feala pe foki la kia koutou ke koutou kau ki te fiafia ʼaia, ohage ko tona fakamahino anai e te ʼu pasina ʼaē ka hoa mai!
[Paki ʼo te pasina 4]
Ko Sesu neʼe ina foaki te faʼifaʼitaki haohaoa ʼo ʼuhiga mo he tahi ʼe nofo agatonu