ʼE Koutou Haga Agatonu Anai Koa?

KO MANULELE e fia neʼe mamate ʼanāfi? ʼE mole ʼiloʼi e he tahi, pea ʼe tokosiʼi te hahaʼi ʼe nātou tokakaga ki te faʼahi ʼaia—koteʼuhi ʼe lahi ʼaupito te ʼu manulele. Kae ʼe tokagaʼi ia e Sehova. ʼI tana palalau ki te ʼu misi ʼaia ʼe hage ʼe mole hona ʼuhiga, neʼe ʼui fēnei e Sesu ki ʼana tisipulo: “ ʼE mole he tahi ia nātou ʼe tō ki te kele ka mole ʼiloʼi e takotou Tāmai.” Pea neʼe ina toe ʼui fēnei: “ ʼAua naʼa koutou manavasiʼi: ʼE koutou maʼuhiga lahi ake koutou ʼi he tuʼuga misi.”—Mateo 10:29, 31, MN.

Ki muli age, neʼe mahino lelei te kau tisipulo ʼe nātou maʼuhiga kia mata ʼo Sehova. Neʼe tohi fēnei e te ʼapositolo ko Soane: “Nee fakaha fenei te ofa o te Atua kia tatou: nee ina fekaui mai tona Alo ulutokotahi ki te malama-nei, ke tou mauli aki iaʼia.” (1 Soane 4:9) Neʼe mole foaki pe e Sehova ia te totogi, kae neʼe ina toe fakaloto mālohiʼi fēnei tana kau kaugana fuli: “E mole au tukunoa anai koe, pea e mole au liaki anai koe.”—Hepeleo 13:5.

ʼE mahino mai, ʼe ʼofa mamahi ia Sehova ki tana hahaʼi. Kae ʼe ʼi ai te fehuʼi ʼe feala ke tou lagaʼi, ‘ ʼE tou ʼofa mālohi koa kia Sehova ʼo mole feala anai ʼi he temi ke tou līaki ia ia?’

Te ʼu Fakahala ʼa Satana Moʼo Maumauʼi Tatatou Agatonu

ʼI te fakatokagaʼi age e Sehova kia Satana ia te agatonu ʼa Sopo, neʼe tali fēnei age e Satana: “ ʼE tauhi anai koa ia Sopo kia te koe mo kapau ʼe mole ʼi ai hana meʼa?” (Sopo 1:9, Today’s English Version) Neʼe ina lau ai ko te agatonu ʼa te tagata ki te ʼAtua ʼe fakalogo ‘ki te ʼu lelei ʼaē ʼe ina foaki age kia nātou.’ Kanapaula neʼe moʼoni te faʼahi ʼaia, ʼe feala pe ke vaivai gafua te agatonu ʼa te kau Kilisitiano—mo kapau ʼe lahi te fakahala.

ʼO ʼuhiga mo Sopo, neʼe ʼuluaki lau e Satana ʼe ina līaki anai tana agatonu ki te ʼAtua mo kapau ʼe pulihi tona ʼu koloā. (Sopo 1:10, 11) ʼI te mole moʼoni ʼo te fasituʼu ʼaia, neʼe lau fēnei e Satana: “Ko te tagata ʼe lītuʼa anai kia meʼa fuli ke feala hana maʼuli.” (Sopo 2:4, TEV) Logola ʼe feala ke moʼoni te palalau ʼaia ʼa Satana ki niʼihi, kae kia Sopo neʼe mole fakafisi ki tana agatonu. ʼE fakamatala e te Tohi-Tapu ko Sopo neʼe nofo agatonu. (Sopo 27:5; 42:10-17) ʼE koutou feiā anai koa? Peʼe koutou tuku anai ia Satana ke ina holoʼi takotou agatonu? Koutou fakakaukauʼi age muʼa te ʼu moʼoni ʼaenī ʼe pipiki kiai te Kilisitiano fuli pe.

Neʼe tui te ʼapositolo ko Paulo ʼe feala ke mālohi ʼaupito te agatonu faka Kilisitiano. Neʼe ina tohi fēnei: “ ʼE kua ʼau ʼiloʼi papau ʼe mole he mate, he maʼuli . . . he ʼu meʼa ʼo te temi nei, he ʼu meʼa ka hoko mai . . . pe ko he tahi age meʼa neʼe fakatupu, ʼe ina lava fakamavae anai tatou mai te ʼofa ʼo te ʼAtua ʼaē ʼe ia Kilisito Sesu totatou ʼAliki.” (Loma 8:38, 39, MN ) ʼE feala ke tou maʼu te taʼi manatu ʼaia mo kapau ʼe tou ʼofa mamahi kia Sehova. Ko te taʼi ʼofa ʼaia ʼe mālohi ʼaupito, pea māʼia mo te mate ʼe mole feala ke ina veteki.

Kapau ʼe tou felogoi feiā mo te ʼAtua, ʼe mole tou fai anai te fehuʼi ʼaenī, ‘ ʼE hoko atu anai koa taku tauhi kia Sehova ʼi te ʼu taʼu ka haʼu?’ Ko te taʼi lotolotolua ʼaia ʼe ina fakahā ai ko tatatou agatonu ki te ʼAtua ʼe fakalogo ki te ʼu meʼa ʼe feala ke hoko ki totatou maʼuli. Ko te agatonu moʼoni ʼe mole fakalogo ki te ʼu meʼa ʼi tuʼa, kae ʼe fakalogo ia ki te ʼu meʼa ʼaē ʼi totatou loto. (2 Kolonito 4:16-18) Kapau ʼe tou ʼofa kia Sehova mo totatou loto katoa, ʼe mole tou fakaloto mamahiʼi anai ia ia ʼi he temi.—Mateo 22:37; 1 Kolonito 13:8.

Kae ʼe tonu ke tou manatuʼi, ʼe faigaʼi tuʼumaʼu e Satana ke ina maumauʼi tatatou agatonu. ʼE feala ke ina fakahalaʼi tatou ʼaki te ʼu holi ʼo te kakano, peʼe ina fakaʼaogaʼi te ʼu fakakaugā, peʼe ina fakatupu he faʼahiga fihifihia ke tou līaki ai te moʼoni. Ko te malamanei ʼaē ʼe mamaʼo mai te ʼAtua ʼe ko te faʼahi tāfito ʼaia ʼe fakaʼaogaʼi e Satana moʼo fakahoko te tau ʼaia, logola ko totatou ʼuhiga heʼe haohaoa ʼe ina faka faigafua tana gāue. (Loma 7:19, 20; 1 Soane 2:16) Kae ʼe ʼi ai totatou ʼu faigamālie, koteʼuhi ʼe tou mālama ki te ʼu fakatuʼutuʼu ʼa Satana.—2 Kolonito 2:11.

Koteā te ʼu fakatuʼutuʼu ʼa Satana? ʼI tana tohi ki te kau Efeso, neʼe fakamatalatala e Paulo te ʼu fakatuʼutuʼu ʼaia ʼo ina ʼui ʼe ko he ʼu “aga fakakākā.”a (Efeso 6:11) ʼE fai e Satana te ʼu puleʼaki fakakākā moʼo holoʼi ʼo tatatou agatonu. Kae meʼa lelei, heʼe tou lava mahino ki te ʼu aga fakakākā ʼaia, koteʼuhi kua tohi maʼa tatou ia te ʼu gāue ʼa te Tevolo ʼi te Folafola ʼa te ʼAtua. Ko te ʼu fakahala ʼaē neʼe fakaʼaogaʼi e Satana kia Sesu pea mo Sopo moʼo maumauʼi ʼo tanā agatonu, ʼe kau ki te ʼu faʼahiga fakahala ʼaē ʼe ina fakaʼaogaʼi moʼo maumauʼi ʼo tatatou agatonu faka Kilisitiano.

Neʼe Mole Feala He Holoʼi ʼo Te Agatonu ʼa Sesu

ʼI te kamataʼaga ʼo te minisitelio ʼo Sesu, neʼe faigaʼi mālohi e Satana ke ina fakahalaʼi te ʼAlo ʼo te ʼAtua ʼo ina ʼahiʼahiʼi ia ia peʼe feala la hana fakaliliu he maka ko he foʼi pane. Ko he toe kākā! Neʼe mole kai ia Sesu lolotoga ʼaho e 40, pea ʼe mahino ia neʼe kua kovi tona pakupaku. (Luka 4:2, 3) Neʼe ʼui e Satana kia Sesu ke ina foimo fakafimālieʼi tona fia kai ʼaia, ʼaki he milakulo neʼe mole ʼalutahi mo te finegalo ʼo Sehova. ʼO toe feiā pe ʼi te temi nei, ʼe fakaneke e te mālama ke tou foimo fakahoko te meʼa ʼaē ʼe tou loto kiai, ʼo mole tou lauʼia tona ʼu fua kia tatou. Koʼeni te ʼu palalau fakanounou ʼe fai mai kia tatou, ‘ ʼE tautonu te meʼa ʼaia mo koe,’ peʼe, ‘Fai koe te meʼa ʼaia!’

Kanapaula neʼe fakafimālieʼi e Sesu tona fia kai kae mole ina tokagaʼi te ʼu ikuʼaga ʼo te meʼa ʼaē neʼe loto kiai, neʼe feala pe ke mālo ia Satana ʼi tana maumauʼi te agatonu ʼa Sesu. Kae neʼe maʼu e Sesu ia te sio fakalaumālie, koia neʼe ina tali mālohi ai: “ ʼE tohi fēnei, ‘Ko te tagata ʼe mole tonu ke maʼuli ʼaki pe te pane.’ ”—Luka 4:4, MN; Mateo 4:4.

Neʼe fetogi leva e Satana tana fakahala. ʼAki tana fakaʼaogaʼi kovi te Tohi-Tapu, pea ko he faʼahi neʼe kua tokagaʼi e Sesu, neʼe fakaneke e te Tevolo ia Sesu ke fakatō ifo mai te fuga fale lotu. Neʼe lau age e Satana: ‘ ʼE taupau anai koe e he ʼaselo.’ Neʼe mole fia kole e Sesu he puipui faka milakulo mai tana Tāmai moʼo fakahā ʼe tokaga ki ai. Neʼe ʼui fēnei e Sesu: “ ʼAua naʼa ke ʼahiʼahiʼi ia Sehova tou ʼAtua.”—Mateo 4:5-7; Luka 4:9-12, MN.

Kae ko te fakahala fakamuli ʼa Satana neʼe fakahagatonu. Neʼe ina ʼahiʼahiʼi Sesu ʼo ina ʼui ʼe ina foaki age anai te malamanei katoa pea mo tona kolōlia, mo kapau ʼe fai age e Sesu he atolasio kia ia. Neʼe teitei pe ke fia foaki age e Satana te ʼu meʼa fuli. Kae ʼe atolasio anai koa ia Sesu ki te fili tāfito ʼo tana Tāmai? Kailoa! Neʼe tali fēnei age e Sesu: “Ko Sehova, tou ʼAtua, ʼaē ʼe maʼua ke ke atolasio ki ai, pea ʼe ko ia tokotahi pe ʼaē ʼe maʼua ke ke tauhi ki ai ʼaki he tauhi tapu.”—Mateo 4:8-11; Luka 4:5-8, MN.

ʼI te hili ʼo te ʼu fakahala e tolu ʼaē neʼe mole ʼi ai hona fua, ‘neʼe mavae leva ia Satana mai ia ia ʼo aʼu ki he tahi temi faigamālie.’ (Luka 4:13) ʼE fakahā ʼaki neʼe lama tuʼumaʼu e Satana he faigamālie ke ina ʼahiʼahiʼi te agatonu ʼa Sesu. Hili te ʼu taʼu e lua vaelua kiai, pea neʼe hoko te temi faigamālie, ʼi te temi ʼaē neʼe teuteuʼi ai e Sesu tana kau tisipulo ke nātou maʼu he faʼahiga aga fakapotopoto ki te kua ōvi mai ʼo tona mate. Neʼe ʼui fēnei age e te ʼapositolo ko Petelo: “Agalelei kia te koe, ʼAliki; kailoa, ʼe mole hoko anai kia te koe he meʼa feiā.”—Mateo 16:21, 22, MN.

Neʼe feala koa ke tali leleiʼi e Sesu ia te taʼi tokoni ʼaia ʼo tana tisipulo, ʼaē neʼe ina fai ʼaki he fakakaukau lelei kae neʼe ko he tokoni kovi? Neʼe mahino atu aipe ia Sesu ko te ʼu palalau ʼaia neʼe hā ai te ʼu manatu ʼa Satana, kae neʼe mole ko te ʼu manatu ʼa Sehova. Neʼe tali fakahagatonu ai e Kilisito: “Haʼu ʼi ʼoku tuʼa, Satana! ʼE ko koe ko te maka fakatupu tūkia kia te ʼau, heʼe mole ke manatu ʼaki te ʼu manatu ʼa te ʼAtua, kaʼe ʼaki te ʼu manatu ʼa te tagata.”—Mateo 16:23, MN.

ʼUhi ko te ʼofa mamahi ʼa Sesu kia Sehova, neʼe mole lavaʼi e Satana te holoʼi ʼo tana agatonu. Neʼe mole ʼi ai he meʼa neʼe lava foaki e te Tevolo, peʼe ko he ʼahiʼahi, logola hona faigataʼa, neʼe ina lava fakavaivai ifo te agatonu ʼa Sesu ki tana Tāmai ʼaē ʼe ʼi selo. ʼE tou maʼu anai koa he lotomālohi feiā ʼo taupau tatatou agatonu, mokā hoko mai he ʼu ʼaluʼaga faigataʼa? ʼE tokoni mai anai te faʼifaʼitaki ʼo Sopo ke tou mahino lelei ki te ʼu fihifihia ʼe lava tau mo tatou.

Ko Te Nofo Agatonu Logola Te ʼu Fihifihia

Ohage ko te meʼa ʼaē neʼe hoko kia Sopo, ʼe feala ke hoko mai kia tatou he ʼu fihifihia ʼi he temi pe. Neʼe ko te tagata ʼohoana neʼe maʼuli fīmālie mo tana fānau e toko hogofulu, pea neʼe lelei tona maʼuli fakalaumālie. (Sopo 1:5) Kae ko te meʼa ʼaē neʼe mole ʼiloʼi e Sopo, heʼe ʼi te lagi neʼe fakafihiʼi tana agatonu ki te ʼAtua, pea neʼe fakatotonu e Satana ke ina fai he ʼu puleʼaki moʼo maumauʼi tana agatonu ʼaia.

Neʼe vave te pulinoa ʼo te ʼu koloā ʼo Sopo. (Sopo 1:14-17) Kae neʼe tuʼu maʼu aipe te agatonu ʼo Sopo ʼi te ʼahiʼahi, koteʼuhi neʼe mole ʼi ai he temi neʼe falala ai ki te paʼaga. ʼI tana manatuʼi te temi ʼaē neʼe koloaʼia ai, neʼe ina tala fēnei: “Kapau neʼe ʼau falala ki te aulo, . . . kapau neʼe ʼau fakafiafia koteʼuhi neʼe lahi toku ʼu koloā, . . . ko te tahi ʼaia hala . . . , he ko haku fakafisi ki te ʼAtua moʼoni ʼaē ʼi ʼoluga.”—Sopo 31:24, 25, 28.

ʼI te temi nei, ʼe toe feala pe foki ke puli tokita ʼu koloā ʼi he po pe e tahi. Ko te tagata Fakamoʼoni ʼa Sehova fai matani gāue neʼe kaihaʼa tana falā, ʼo teitei pe ke mole kei toe age hona ʼu koloā. ʼE ina tala fakahagatonu: “Neʼe meihiʼi pe ke ʼoho toku mafu. ʼI tona fakahagatonu, neʼe lagi feala pe ke hoko he meʼa feiā, mo kanapaula neʼe mole ʼi ai haku ʼu felogoi mo te ʼAtua. Kae ʼaki te meʼa ʼaia neʼe hoko, neʼe mahino ai kia ʼau neʼe mole faʼa maʼuhiga te ʼu meʼa fakalaumālie ʼi toku maʼuli. Neʼe mole he meʼa neʼe maʼuhiga age kia ʼau ʼi te fia fai ki te falā.” Talu mai ai, ko te Fakamoʼoni ʼaia neʼe ina fakasiʼisiʼi tana gāue, pea ʼe tautau pionie vaeluaʼi temi, ʼo ina fai te ʼu hola e 50 peʼe laka atu ʼi te minisitelio faka Kilisitiano. Kae ʼe ʼi ai te tahi ʼu fihifihia ʼe feala pe ke fakatupu mamahi ʼaupito age ia ʼi te pulinoa ʼo te ʼu koloā.

Neʼe hoki fakahā age kia Sopo te pulinoa ʼo tona ʼu koloā, kae kua ʼosi tala age ki ai kua mamate tana fānau e toko hogofulu. Kae neʼe ina ʼui aipe: “Ke hoko atu te tapuakina ʼo te huafa ʼo Sehova.” (Sopo 1:18-21) ʼE tou haga agatonu anai koa mo kapau ʼe mamate fakafokifā he tokolahi ʼo totatou famili? Ko Francisco, ko he tēhina taupau ʼi Sepania, neʼe mamate tana ʼu toe e toko lua ʼi te fakaʼī ʼo te papikā. Neʼe ina maʼu te fakaloto fīmālie ʼi tana fakaōvi kia Sehova pea mo te lahi ʼo tana gāue ʼi te minisitelio faka Kilisitiano.

ʼI te hili ʼo te mate ʼo tana fānau, neʼe mole heʼeki ʼosi te ʼu mamahi ʼo Sopo. Neʼe fakahoko age e Satana te mahaki fakalialia pea mo fakatupu mamahi. ʼI te temi ʼaia, neʼe fai kia Sopo te tokoni kovi e tona ʼohoana. Neʼe ina uga fēnei ia ia: “Laukovi ki te ʼAtua pea ke mate!” Neʼe mole tokagaʼi e Sopo te tokoni ʼaia, pea neʼe “mole agahala ia Sopo ʼaki tona ʼu laugutu.” (Sopo 2:9, 10) Neʼe mole fakalogo tana agatonu ki te lagolago ʼo tona famili, kae neʼe fakalogo ia ki tana ʼu felogoi mo Sehova.

ʼE mahino ia Flora ki te ʼu meʼa ʼaē neʼe tau mo Sopo, koteʼuhi ko tona ʼohoana mo tana tama ʼuluaki neʼe nā mavae ʼi te moʼoni kua hili nei kiai taʼu e hogofulu tupu. ʼE ina ʼui fēnei: “Ka fokifā pe ʼe mole kei lagolago atu tokotou famili, pea ʼe ko he meʼa fakaloto mamahi ʼaupito. Kae neʼe mahino kia ʼau ʼe mole feala ke ʼau maʼu te fiafia ʼi tuʼa atu ʼo te kautahi ʼa Sehova. Koia neʼe ʼau pipiki maʼu ai kia Sehova pea mo ʼau fakamuʼamuʼa ia ia ʼi taku ʼu faiga ʼaē ke ʼau liliu ko he fafine ʼohoana pea mo he faʼe ʼe ina fai he ʼu aga lelei. Neʼe ʼau faikole tuʼumaʼu, pea neʼe fakamālohiʼi ia ʼau e Sehova. ʼE ʼau fiafia koteʼuhi, logola te fakafeagai mālohi ʼo toku ʼohoana, kae neʼe ʼau ako te tuku katoa ʼo taku falala kia Sehova.”

Ko te tahi puleʼaki ʼa Satana moʼo maumauʼi ʼo te agatonu ʼa Sopo, ʼe ko tona ʼu kaumeʼa e toko tolu. (Sopo 2:11-13) Neʼe lagi ko he meʼa fakaloto mamahi ʼi tanatou kamata fatufatuʼi ia ia. Kanapaula neʼe muliʼi e Sopo tanatou ʼu palalau, neʼe lagi feala aipe ke puli ai tana falala kia Sehova ʼAtua. Neʼe feala pe ki tanatou tokoni fakaloto vaivai ke mamahi ai tona loto pea mo puli ai tana agatonu, pea lagi feala ke mālo ai ia Satana.

Kae neʼe haga ʼui aipe e Sopo: “ ʼO aʼu ki toku mate, ʼe mole ʼau tuku anai taku agatonu!” (Sopo 27:5) Neʼe mole ina ʼui, ‘ ʼE mole ʼau tuku anai kia koutou tagata ke koutou maumauʼi taku agatonu!’ Neʼe ʼiloʼi e Sopo ʼe fakalogo tana agatonu kia ia totonu mo tona ʼofa kia Sehova.

Ko He Kākā ʼĀfea Moʼo Fakahiga ʼo He ʼu Hahaʼi Foʼou

ʼE kei fakaʼaogaʼi pe e Satana te ʼu tokoni kovi peʼe ko he ʼu palalau neʼe mole fakakaukauʼi mai he ʼu kaumeʼa pea mo he ʼu tēhina mo tuagaʼane. ʼE feala pe ke tou lotovaivai ʼi he ʼu meʼa ʼi te loto kokelekasio, ʼo lagi laka age tona mamahi ʼi he fakataga ʼe hoko ʼi te tuʼa kokelekasio. Ko te tagata ʼāfea, ki muʼa atu neʼe ko te tagata solia neʼe mālohi ʼi te tau, neʼe ina fakakeheʼi te tau pea mo te mamahi ʼe ina logoʼi mai he tēhina ʼe ina fai he ʼu palalau peʼe ko he ʼu aga neʼe mole ina fakakaukauʼi. ʼO ʼuhiga mo te ʼu meʼa ʼe ina logoʼi mai te ʼu tēhina, neʼe ina ʼui fēnei: “ ʼE ko he meʼa faigataʼa ʼaupito.”

ʼI te tahi faʼahi, ʼe feala ke tou lotomamahi ʼaupito ʼuhi ko he ʼu tōtō ʼo te ʼu tēhina, ʼo mole kei tou palalau ki ʼihi ia nātou, peʼe tou kamata tō fono. Ko te fakafimālieʼi ʼo totatou lotomamahi ʼe lagi ko te faʼahi ʼaia kua maʼuhiga ʼaupito kia tatou. Kae ʼe ko he meʼa fakaʼofaʼofa mo kapau ʼe tou fai te taʼi aga ʼaia, ʼuhi pe ko te ʼu palalau peʼe ko te aga ʼe fai e ʼihi, pea mo tou fakavaivaiʼi totatou koloā maʼuhiga ʼaupito—ʼaē ko tatatou ʼu felogoi mo Sehova. Kapau ʼe tou tali ke hoko te faʼahi ʼaia, pea ʼe feala pe ke tou tō ki he kākā ʼa Satana.

ʼE moʼoni ia, ʼe tou fia maʼu he ʼu aga ʼe lelei ʼi te loto kokelekasio. Kae kapau ʼe lahi fau tatatou ʼamanaki ki te ʼu aga ʼo totatou ʼu tēhina, ʼaē ʼe heʼe haohaoa, pea ʼe feala ke tou lotomamahi ai. Kae kia Sehova, ʼe mahino ki te ʼu meʼa ʼaē ʼe ina fakamaʼua ki tana kau kaugana. Kapau ʼe tou faʼifaʼitakiʼi ia ia, ʼe feala pe ke tou tauʼi tatatou ʼu lākahala. (Efeso 4:2, 32) Neʼe fai te tokoni ʼaenī e te ʼapositolo ko Paulo: “Iʼita pe, kae aua naa koutou agahala ai, vakai naa to ifo te laa ki toutou ita. Aua naa koutou tuku he faigamalie ki te temonio.”—Efeso 4:26, 27.

Ohage ko tona fakahā mai e te Tohi-Tapu, ʼe fakaʼaogaʼi e Satana te ʼu aga fakakākā kehekehe ke ina maʼu—mo kapau ʼe ina lavaʼi—he puleʼaki moʼo maumauʼi ʼo te agatonu ʼa he Kilisitiano. Ko tana tahi ʼu aga fakakākā ʼe ina fakaʼaogaʼi ai te kakano agahala, pea ko ʼihi ʼe ko he ʼu meʼa fakatupu mamahi. ʼAki te fakamatala ʼi ʼaluga, ʼe koutou sio ai ʼe tonu ke tou nofo tokaga tuʼumaʼu. Kae ʼaki tokotou ʼofa mamahi ki te ʼAtua, koutou fakahā ʼe loi te Tevolo, kae koutou fakafiafia te loto ʼo Sehova. (Tāʼaga Lea 27:11; Soane 8:44) Koutou manatuʼi, ʼe mole tonu ke tou maumauʼi tatatou agatonu faka Kilisitiano moʼoni, logope he faʼahiga faigataʼaʼia ʼe feala ke hoko kia tatou.

[Kiʼi nota]