Ko Sopo​—Ko He Tagata Neʼe Faʼa Kātaki Pea Mo Agatonu

“Kua ke tokagaʼi koa taku kaugana ko Sopo, ʼe mole he tahi ʼe tatau mo ia ʼi te kele, ko he tagata ʼe mole hana lākahala pea ʼe totonu ia, ʼe manavasiʼi ki te ʼAtua pea mo fakatafa mai te kovi?”​—Sopo 1:⁠8.

1, 2. (a) Koteā te ʼu malaʼia neʼe hoko faka punamaʼuli kiā Sopo? (b) Koutou fakamatala pe neʼe feafeaʼi te maʼuli ʼo Sopo ʼi muʼa ʼo te hoko ʼo te ʼu malaʼia.

NEʼE ko he tagata neʼe ina maʼu ia meʼa fuli​—neʼe maʼu koloā, neʼe ʼiloa, neʼe mole hona mahaki, pea neʼe ina maʼu he maʼuli faka famili fiafia. Kae neʼe hoko hoholo te ʼu malaʼia ki ai. Fokifā pe pea puli tona ʼu koloā. Hili kiai, neʼe mamate tana ʼu fānau fuli ʼi te toe afā neʼe tō. Mole fualoa kiai, neʼe pikisia ʼi te mahaki fakalialia, neʼe mafola ʼi tona sino kātoa te ʼu foʼi polo. Ko te tagata ʼaia neʼe ko Sopo, ko te tagata ʼaē ʼe talanoa tāfito kiai ʼi te tohi ʼaē ʼe higoa kiai ʼi te Tohi-Tapu.​—Sopo, kapite 1 pea mo te kapite 2.

² Neʼe hoi ia Sopo ʼi tona loto, pea neʼe ina ʼui fēnei: “Ê kana neʼe au toe liliu pe la ki te ʼu māhina ʼo te temi muʼa.” (Sopo 3:3; 29:2) Ka hoko he tuʼutāmaki, ʼe tou manatuʼi fuli te ʼu temi ki muʼa atu. ʼO ʼuhiga mo Sopo, neʼe maʼuli faitotonu, neʼe hage neʼe hāo mai te malaʼia. Ko te hahaʼi maʼuhiga neʼe nātou fakaʼapaʼapa pea mo nātou kumi tokoni ki ai. (Sopo 29:​5-11) Neʼe maʼu koloā, kae neʼe fakapotopoto ʼo ʼuhiga mo te faʼahi ʼaia. (Sopo 31:​24, 25, 28) Ka felāveʼi mo he ʼu fafine vītua peʼe ko he ʼu fānau ʼe hala mo tāmai ʼi te faigataʼaʼia, neʼe tokoni kiā nātou. (Sopo 29:​12-16) Pea neʼe agatonu tuʼumaʼu pe ki tona ʼohoana.​—Sopo 31:​1, 9, 11.

3. Neʼe koteā te manatu ʼa Sehova ʼo ʼuhiga mo Sopo?

³ Neʼe mole lākahala ia Sopo ʼi tona maʼuli he neʼe atolasio ki te ʼAtua. Neʼe ʼui fēnei e Sehova ʼo ʼuhiga mo Sopo: “ ʼE mole he tahi ʼe tatau mo ia ʼi te kele, ko he tagata ʼe mole hana lākahala pea ʼe totonu ia, ʼe manavasiʼi ki te ʼAtua pea mo fakatafa mai te kovi.” (Sopo 1:​1, 8) Kae logola te agatonu ʼaia ʼa Sopo, kae neʼe gata leva tona maʼuli fīmālie ʼi te hoko ki ai ʼo te ʼu malaʼia. Ko te ʼu fua ʼo tana gāue neʼe puli fuli, pea ko tona ʼulugaaga moʼoni neʼe ʼahiʼahiʼi ʼaki te lotomamahi pea mo te ʼita.

4. He koʼe ʼe lelei ke tou vakaʼi te ʼu faigataʼaʼia ʼaē neʼe tau mo Sopo?

⁴ ʼE mahino ia, ʼe mole gata pe kiā Sopo ʼi te ʼu kaugana ʼa te ʼAtua neʼe hoko ki ai he ʼu tuʼutāmaki. Tokolahi te kau Kilisitiano iā ʼaho nei ʼe toe hoko kiā nātou te ʼu meʼa ʼaē neʼe hoko kiā te ia. Koia, ʼe tonu ai ke tou vakaʼi te ʼu fehuʼi ʼaenī e lua: Ka hoko kiā tatou he tuʼutāmaki, ʼe lava tokoni feafeaʼi kiā tatou te ʼu faigataʼaʼia ʼaē neʼe tau mo Sopo? Pea e feafeaʼi totatou akoʼi ke tou lotomahino lahi age kiā nātou ʼaē ʼe mamahi?

Neʼe Fakafifihi Pea Mo ʼAhiʼahiʼi Ia Te Nofo Agatonu

5. ʼO mulimuli ki te ʼu meʼa ʼaē neʼe lau e Satana, koteā te tupuʼaga ʼo te tauhi ʼa Sopo ki te ʼAtua?

⁵ Neʼe makehe ʼaupito te faʼifaʼitaki ʼa Sopo. Neʼe fakafihiʼi e te Tevolo ia te tupuʼaga ʼo te tauhi ʼa Sopo ki te ʼAtua, kae neʼe mole ʼiloʼi e Sopo te faʼahi ʼaia. ʼI te fakatahiʼi ʼa te ʼu ʼāselo ʼi selo pea mo fakatokagaʼi age e Sehova te ʼu kalitātē ʼo Sopo, neʼe tali fēnei e Satana: “Neʼe mole koa la ke fakatuʼu he ʼā moʼo puipui ʼo ia, pea mo tona loto fale, pea mo meʼa fuli pe ʼa ia, ʼi te fenua kātoa?” Neʼe lau e Satana neʼe manatu pe ia Sopo kiā ia totonu​—ʼo feiā mo te ʼu kaugana fuli ʼa te ʼAtua. Neʼe ʼui fēnei e Satana kiā Sehova: “Fakalelei muʼa, kae ke faoʼi atu tou nima ki ai, pea ke fāfā ki te ʼu meʼa fuli ʼaʼana, pea ke sio peʼe mole laukovi anai kiā te koe ki tou fofoga.”​—Sopo 1:​8-11.

6. Koteā te fakafifihi maʼuhiga ʼaē neʼe lagaʼi e Satana?

⁶ Neʼe maʼuhiga ʼaupito te faʼahi ʼaē neʼe fakafihiʼi. Neʼe fakafihiʼi e Satana te faʼahiga puleʼi e Sehova te ʼatulaulau. ʼE feala koa ke puleʼi e te ʼAtua te ʼatulaulau ʼaki te ʼofa? Peʼe, ohage ko tona lau e Satana, ʼe mālohi age pe koa te manatu ʼaē kiā kita? Neʼe tuku e Sehova ke ʼahiʼahiʼi e te Tevolo ia Sopo, pea neʼe falala ia ki te agatonu ʼo Tana kaugana. Koia, neʼe ko Satana ʼaē neʼe ina fakatupu te ʼu malaʼia ʼaē neʼe hoko hoholo kiā Sopo. ʼI te mole he fua ʼo te ʼuluaki ʼohofi e Satana ia Sopo, neʼe ina fakatupu ai te mahaki. Neʼe lau fēnei e te Tevolo: “Ko te kili ki te kili, pea ko meʼa fuli ʼe maʼu e te tagata, ʼe ina foaki anai moʼo hāofaki ʼo tona maʼuli.”​—Sopo 2:⁠4.

7. Koteā te ʼu ʼahiʼahi’ ʼe hoko iā ʼaho nei ki te ʼu kaugana ʼa te ʼAtua ʼe tatau mo ʼaē neʼe hoko kiā Sopo?

⁷ Logola ʼe mole tokolahi te kau Kilisitiano ʼaē ʼe hoko kiā nātou te ʼu mamahi ʼaē neʼe tau mo Sopo, kae ʼe hoko kiā nātou te ʼu faigataʼaʼia kehekehe. Tokolahi neʼe fakatagaʼi nātou peʼe nātou tau mo he ʼu fihifihia faka famili. ʼE feala ke lotomamahi ʼihi ʼuhi ko te ʼu faigataʼaʼia faka ekonomika peʼe ko te mahaki. Ko ʼihi neʼe nātou mamate ʼi tanatou fia taupau tanatou tui. ʼE moʼoni, ʼe mole tou manatu leva ʼe ko Satana ʼaē ʼe ina fakatupu te ʼu malaʼia fuli ʼaē ʼe hoko kiā tatou. ʼI tona ʼuhiga moʼoni, ʼe feala ke tupu ʼihi fihifihia ʼuhi ko hatatou hala peʼe ko totatou ʼuhiga heʼe haohaoa. (Kalate 6:7) Pea tokolahi iā tatou ʼe tou tau mo te ʼu fua ʼo te temi matuʼa pea mo te ʼu tuʼutāmaki fakakelekele. ʼE fakamahino lelei ʼi te Tohi-Tapu ʼi te temi ʼaenī, ʼe mole puipui faka milakulo e Sehova tana ʼu kaugana mai te ʼu mamahi.​—Tagata Tānaki 9:⁠11.

8. ʼE lava fakaʼaogaʼi feafeaʼi e Satana te ʼu mamahi ʼaē ʼe tou tau mo ia?

⁸ Kae ʼe feala ke fakaʼaogaʼi e Satana te ʼu mamahi ʼaē ʼe tou tau mo ia moʼo fakavaivaiʼi tatatou tui. Neʼe talanoa ia te ʼapositolo ko Paulo ki tana mamahi ʼi “te tala ʼi [tona] kakano, ko te ʼāselo ʼa Satana,” neʼe ina haga “tāʼi” ia ia. (2 Kolonito 12:​7, MN ) Kapau neʼe ko hona mahaki, lagi neʼe mole kei faʼa sio lelei, peʼe ko he tahi age meʼa, kae neʼe mahino kiā Paulo neʼe feala ke fakaʼaogaʼi e Satana te fihifihia ʼaia pea feala ke puli ai te fiafia ʼa Paulo pea mo tana nofo agatonu. (Tāʼaga Lea 24:10) Iā ʼaho nei, ʼe feala ke fakaneke e Satana he ʼu hahaʼi ʼo te famili, he ʼu kaugā ako, peʼe ko he ʼu puleʼaga aga fefeka ke nātou fakatagaʼi te ʼu kaugana ʼa te ʼAtua ʼi ni ʼu ʼaluʼaga kehekehe.

9. He koʼe ʼe mole tou punamaʼuli ʼi te hoko mai kiā tatou te malaʼia peʼe ko te fakataga?

⁹ ʼE tou lava kātakiʼi feafeaʼi te ʼu faigataʼaʼia ʼaia? ʼE tonu ke tou manatu ko he ʼu faigamālie ʼaia moʼo fakahā tatatou ʼofa kiā Sehova, pea mo tatatou fakalogo ki tona pule tatau aipe peʼe koteā ʼaē ʼe hoko kiā tatou. (Sakopo 1:​2-4) Tatau aipe peʼe koteā te tupuʼaga ʼo tatatou mamahi, kae ko tatatou mahino ki te maʼuhiga ʼo te nofo agatonu ki te ʼAtua, ʼe tokoni mai anai ke tou haga nonofo mālolohi ʼi te faʼahi fakalaumālie. Neʼe tohi fēnei e te ʼapositolo ko Petelo ki te kau Kilisitiano: “Kau ʼofaina, ʼaua naʼa koutou punamaʼuli ʼi te ʼafi ʼaē ʼi te lotolotoiga ʼo koutou pea mo hoko kiā koutou moʼo ʼahiʼahiʼi koutou, ohage ko he meʼa makehe kiā koutou.” (1 Petelo 4:​12, MN ) Pea neʼe toe fakamahino fēnei e Paulo: “Ko natou katoa e fia mauli fakalotu ia Kilisito Sesu, e fakatagai anai.” (2 Timoteo 3:12) ʼE kei fakafihiʼi e Satana te agatonu ʼa te kau Fakamoʼoni ʼa Sehova, ohage ko tona fai ʼaē kiā Sopo. ʼI tona ʼuhiga moʼoni, ʼe fakahā ʼi te Tohi-Tapu ko Satana ʼe ina fakaʼāʼāsili tana ʼohofiʼi te hahaʼi ʼa te ʼAtua ʼi te ʼu ʼaho fakamuli ʼaenī.​—Apokalipesi 12:​9, 17.

Te Mahino Hala Pea Mo He Fai Tokoni Neʼe Mole Lelei

10. Koteā ʼaē neʼe mole ʼiloʼi e Sopo?

¹⁰ Neʼe ʼi ai te faʼahi neʼe mole ʼiloʼi e Sopo, kae kua tou ʼiloʼi tatou. Neʼe mole ina ʼiloʼi pe ko ai ʼaē neʼe ina fakahoko te ʼu malaʼia ʼaia ki ai. Neʼe manatu hala ai ia Sopo “neʼe foaki age e Sehova pea mo ina toe toʼo ia.” (Sopo 1:21) Neʼe lagi faiga e Satana ke manatu ia Sopo ʼe ko te ʼAtua ʼaē neʼe ina fakatupu tona mamahi.

11. Koutou fakamatala pe neʼe feafeaʼi ia Sopo ʼi te hoko ʼo tana ʼu malaʼia.

¹¹ Neʼe lotovaivai ʼaupito ia Sopo, kae neʼe fakafisi ia ke laukovi ki te ʼAtua, ohage ko tona fakaloto mālohiʼi e tona ʼohoana. (Sopo 2:​9, 10) Neʼe ina ʼui fēnei: ‘ ʼE hage ʼe maʼuli fiafia age te tagata agakovi iā te au.’ (Sopo 21:​7-9) Neʼe lagi feʼekeʼaki fēnei: ‘He koʼe ʼe fakatūʼā feiā au e te ʼAtua?’ Neʼe ʼi ai ʼihi lakaga neʼe fia mate ai ia Sopo. Neʼe ina ʼui fēnei: “Ê! Kanapaula neʼe ke fakanono au ʼi te Seole, kanapaula neʼe ke fufū au ʼo aʼu ki te maliu kehe ʼo tou hāūhāū.”​—Sopo 14:⁠13.

12, 13. Neʼe feafeaʼi ia Sopo ʼi te ʼu palalau neʼe fai e tona ʼu kaumeʼa e toko tolu?

¹² Neʼe ʼi ai te ʼu kaumeʼa ʼo Sopo e toko tolu neʼe nātou ʼolo age ʼo ʼaʼahi ia ia, ke nātou “kaugā mamahi pea mo fakafimālieʼi ia ia.” (Sopo 2:11) Kae neʼe “ko he ʼu tagata fakaloto fīmālie aga fakakinakina!” (Sopo 16:2) Neʼe feala ke fua lelei kiā Sopo he ʼu kaumeʼa neʼe feala ke palalau kiā nātou ʼo ʼuhiga mo tona ʼu fihifihia, kae ko te ʼu kaumeʼa ʼaia e toko tolu neʼe nātou fakaʼāsili age te mole mahino ʼa Sopo pea mo tona ʼita.​—Sopo 19:2; 26:⁠2.

¹³ Ko tona tupuʼaga la ʼaia ʼo te lagi fai e Sopo te ʼu fehuʼi ʼaenī: ‘He koʼe neʼe hoko te ʼu meʼa ʼaia kiā te au? Koteā koa ʼaē neʼe au fai ke hoko kiā te au te ʼu malaʼia fuli ʼaia?’ Neʼe foaki e tona ʼu kaumeʼa he ʼu fakamahino neʼe hala ʼaupito. Neʼe nātou ʼui ʼe mamahi feiā la ia Sopo he neʼe ina fai te agahala mamafa. Neʼe fehuʼi fēnei e Elifasi: “Pe ko ai ʼaē kua mate ka neʼe mole hana hala? . . . Ohage ko te meʼa ʼaē neʼe kua au sio kiai, ko te hahaʼi ʼaē ʼe metitāsio ki te meʼa ʼaē ʼe kovi pea mo nātou tūtū te mamahi, ʼe nātou utu anai te meʼa ʼaia.”​—Sopo 4:​7, 8.

14. He koʼe ʼe mole tonu ke tou manatu ʼe mamahi la he tahi he neʼe ina fai he agahala?

¹⁴ ʼE moʼoni, ʼe feala ke hoko he ʼu fihifihia mo kapau neʼe tou fai te ʼu aga ʼo te kakano kae mole ko te ʼu gāue fakalaumālie. (Kalate 6:​7, 8) Kae ʼi te tuʼu ʼaenī, ko te ʼu fihifihia ʼe mole tupu pe ʼuhi ko hatatou aga neʼe tou fai. Tahi ʼaē faʼahi, ʼe mole moʼoni te ʼui ʼaē ko ia ʼaē neʼe mole ina fai hana hala ʼe hāo ia ʼi te ʼu malaʼia fuli pe. Ko Sesu Kilisito, ʼaē neʼe “hee mele, nee vahei kehe mai te kau agahala,” neʼe matehi ʼi he pou fakamamahi, pea ko te ʼapositolo ko Sakopo neʼe mate faka maletile. (Hepeleo 7:26; Gaue 12:​1, 2) ʼUhi ko te manatu hala ʼa Elifasi pea mo tona ʼu kaumeʼa e toko lua, neʼe tupu ai te palalau ʼa Sopo ki tona matagafua pea mo talanoa tāfito ki tana mole lākahala. Koia, ʼi tanatou lau ʼaē ʼe mamahi la ia Sopo he neʼe ina fai te aga ʼe kovi, neʼe malave ki te manatu ʼa Sopo ʼo ʼuhiga mo te faitotonu ʼa te ʼAtua.​—Sopo 34:5; 35:⁠2.

Tou Maʼu Te Tokoni ʼi Te ʼu Temi Faigataʼaʼia

15. Koteā ʼaē ʼe tonu ke tou manatu kiai, ke tokoni kiā tatou ke tou kātakiʼi te mamahi?

¹⁵ ʼE ʼi ai koa he ako ʼe tou tāʼofi mai te faʼifaʼitaki ʼa Sopo? Ko he ʼu tuʼutāmaki, peʼe ko te mahaki, peʼe ko te fakataga ʼe ko he ʼu faʼahi ʼe mole tou tali. ʼE hage mai kiā tatou, ʼe maʼuli fīmālie pe ʼihi. (Pesalemo 73:​3-12) ʼI ʼihi temi, ʼe feala ke tou fai te ʼu fehuʼi maʼuhiga ʼaenī: ‘Ko toku ʼofa ki te ʼAtua ʼe ina uga koa au ke au tauhi kiā te ia ʼi te ʼu temi ʼaē ʼe au lelei ai pea mo te ʼu temi faigataʼaʼia? ʼE au loto moʼoni koa ke “tali [e Sehova ] kiā ia ʼaē ʼe manukinuki kiā te Ia?” ’ (Taʼaga Lea 27:11; Mateo 22:37) ʼE mole tonu ke tou kamata lotolotolua ʼo ʼuhiga mo tatatou Tāmai ʼaē ʼe ʼi selo ʼuhi ko he ʼu palalau ʼa ʼihi neʼe mole fakakaukauʼi. Ko te Kilisitiano agatonu neʼe mahaki talu mai ni ʼu taʼu, neʼe ina ʼui fēnei ʼi te tahi temi: “ ʼE au ʼiloʼi ko te ʼu meʼa ʼaē ʼe fakagafua e te ʼAtua ke hoko, ʼe feala ke tou kātakiʼi anai. ʼE au ʼiloʼi ʼe ina foaki mai anai te mālohi ʼaē ʼe ʼaoga kiā au, ohage pe ko tana fai feiā tuʼumaʼu pe kiā au.”

16. ʼE tokoni feafeaʼi te Folafola ʼa te ʼAtua kiā nātou ʼaē ʼe tau mo he ʼu faigataʼaʼia?

¹⁶ ʼO mole hage ko Sopo, ʼe tou ʼiloʼi tatou te ʼu faʼahiga fai ʼa Satana. “ ʼE mole pulipuli kiā tatou tana ʼu fakatuʼutuʼu.” (2 Kolonito 2:​11, MN ) Tahi ʼaē meʼa, ʼe lahi te poto ʼaē ʼe feala ke tou maʼu. ʼI te Tohi-Tapu, ʼe tou maʼu ai he ʼu fakamatala ʼa he ʼu tagata pea mo he ʼu fafine agatonu neʼe nātou kātakiʼi te ʼu faʼahiga faigataʼaʼia kehekehe. Ko te ʼapositolo ko Paulo ʼaē neʼe mamahi ʼaupito ʼi ʼihi age Kilisitiano, neʼe ina tohi fēnei: “Ko meʼa fuli ʼaē neʼe tohi ʼi te temi muʼa, neʼe tohi ia moʼo akoʼi ʼo tatou, koteʼuhi ke tou maʼu te ʼamanaki ʼaki tatatou faʼa kātaki pea mo te fakaloto fīmālie ʼaē ʼe haʼu mai te Tohi-Tapu.” (Loma 15:​4, MN ) Ko te Fakamoʼoni ʼa Sehova ʼi Eulopa neʼe pilisoniʼi ʼuhi ko tana tui lolotoga te lua tau faka malamanei, neʼe ina foaki ki he tahi tana meʼa kai kiā ʼaho e tolu ke feala hana maʼu he Tohi-Tapu. ʼE ina ʼui fēnei: “Neʼe fua lelei te faʼahi ʼaia! Logola taku pakupaku, kae neʼe au maʼu te meʼa kai fakalaumālie ʼaē neʼe tokoni mai kiā au pea mo ʼihi age, ʼi tamatou ʼahiʼahiʼi ʼi te ʼu temi faigataʼa ʼaia. Neʼe au taupau te Tohi-Tapu ʼaia ʼo aʼu mai ki te temi nei.”

17. Koteā te ʼu tokoni mai te ʼAtua e tou maʼu ke tou lava kātakiʼi?

¹⁷ ʼE mole gata pe mo te fakafimālie mai te Tohi-Tapu, kae ʼe tou toe maʼu mo te ʼu tuʼuga tohi ke tou mahino ai ki te Tohi-Tapu, ʼe foaki ai he takitaki ʼaoga moʼo tauʼi tatatou ʼu fihifihia. Kapau ʼe koutou vakaʼi te Index des publications Watch Tower, ʼe koutou maʼu ai anai he meʼa neʼe hoko ki he tēhina peʼe ko he tuagaʼane neʼe tatau mo koutou. (1 Petelo 5:9) ʼE feala ke toe tokoni atu mo kapau ʼe koutou fakahā takotou ʼu ʼaluʼaga ki he ʼu tagata ʼāfea peʼe ko he tahi age ʼu Kilisitiano kua fotufotuʼa. Pea ko te faʼahi maʼuhiga ʼaupito, ʼaki te faikole, ʼe feala ke koutou maʼu te tokoni ʼa Sehova pea mo tona laumālie maʼoniʼoni. Neʼe lava kātakiʼi feafeaʼi e Paulo te ʼu ‘tā’ ʼa Satana? ʼAki tana falala ki te mālohi ʼa te ʼAtua. (2 Kolonito 12:​9, 10) Neʼe ina tohi fēnei: “ ʼE au maʼu te mālohi kiā meʼa fuli, ʼuhi ko ia ʼaē ʼe ina foaki mai te mālohi.”​—Filipe 4:​13, MN.

18. ʼE lava foaki feafeaʼi e te ʼu tēhina mo tuagaʼane he fakaloto mālohi?

¹⁸ Koia ʼe feala pe ke tou maʼu te tokoni, kae ʼe tonu ke tou kumi te tokoni ʼaia. ʼE ʼui fēnei e te Tāʼaga lea: “Neʼe kua ke lotovaivai koa ʼi te ʼaho ʼo te mamahi? Ko tou mālohi ʼe siʼisiʼi anai.” (Tāʼaga Lea 24:10) Ohage pe ko te kaina e te ʼukaʼukamea ia he ʼukameʼa, ʼe feala ke mole kei mālohi tatatou nofo agatonu mo kapau ʼe tou lotovaivai. Ke mole hoko te tuʼutāmaki ʼaia, ʼe foaki mai e Sehova he tokoni ʼaki tatatou ʼu tēhina mo tuagaʼane ʼaē ʼe nātou kaugana ki te ʼAtua. Neʼe hā te ʼāselo kiā Sesu pea neʼe ina fakaloto mālohiʼi ia ia ʼi te pō ʼaē neʼe puke ai. (Luka 22:43) ʼI tana folau pilisoni ki Loma, ko Paulo “nee fakafetai ki te Atua, pea nee lotomalohi” ʼi tana felāveʼi mo te ʼu tēhina ʼi te Fakatauʼaga Meʼa ʼo Apiu pea mo Te ʼu Fale Tali Fagona e Tolu. (Gaue 28:15) ʼE kei manatuʼi e te Fakamoʼoni Siamani te tokoni ʼaē neʼe ina maʼu ʼi tana tau atu ki te lotoʼā fakamamahi ʼo Ravensbrück, ʼi tana kei finemui. ʼE ina ʼui fēnei: “Neʼe maʼu au e te tuagaʼane pea neʼe ʼalofa fakamalotoloto kiā au. Ko te tahi tēhina agatonu neʼe tokaga kiā au, pea neʼe liliu ia ko haku faʼē ʼi te faʼahi fakalaumālie.”

“Nofo Agatonu”

19. Koteā ʼaē neʼe tokoni kiā Sopo ke ina tauʼi te ʼu faiga ʼa Satana?

¹⁹ Neʼe ʼui e Sehova ʼo ʼuhiga mo Sopo ko he tagata neʼe ina “taupau maʼu . . . tana agatonu.” (Sopo 2:3) Logola te lotovaivai ʼa Sopo pea mo tana mole mahino ʼaē pe koʼe ʼe mamahi, neʼe mole he temi neʼe lotolotolua ai ʼi tana nofo agatonu. Neʼe mole fia fakafisi kiā meʼa fuli moʼo taupau tona maʼuli. Neʼe ina ʼui fēnei: “ ʼO aʼu ki toku mate, ʼe mole au tuku anai taku agatonu!”​—Sopo 27:⁠5.

20. He koʼe ʼe tonu ke tou faʼa kātaki?

²⁰ Ohage ko Sopo, kapau ʼe tou fakatotonu mo tatou ke tou nonofo agatonu, pea ʼe tokoni mai anai ke tou agatonu ʼi te ʼu ʼaluʼaga fuli pe​—ka fakahalaʼi tatou, peʼe fakatagaʼi tatou peʼe tou tau mo he ʼu faigataʼaʼia. Neʼe ʼui fēnei e Sesu ki te kokelekasio ʼo Simina: “ ʼAua naʼa ke mataku ki te ʼu mamahi ʼaē ka ʼamanaki hoko kiā te koe. Koʼeni ʼe hoholo anai te haga ʼa te Tevolo ʼo laku niʼihi ia koutou ki te fale pilisoni, ke kātoa te ʼahiʼahiʼi ʼo koutou, pea ke koutou maʼu he mamahi [he ʼu faigataʼaʼia, he ʼu fakaneke] iā ʼaho e hogofulu. Nofo agatonu ʼo aʼu ki te mate, pea ʼe au foaki atu anai te pale ʼo te maʼuli.”​—Apokalipesi 2:​10, MN.

21, 22. Ka tou kātakiʼi he ʼu faigataʼaʼia, ko tatatou mahino kiteā ʼaē ʼe fakaloto fīmālie kiā tatou?

²¹ ʼI te temi ʼaenī ʼaē ʼe pule Satana ʼi te malamanei, ʼe ʼahiʼahiʼi anai tatatou faʼa kātaki pea mo tatatou nofo agatonu. Kae ʼe ʼui lelei mai e Sesu ʼe mole tonu ke tou mātataku ʼo ʼuhiga mo tatatou ka haʼu. Ko te meʼa ʼaē ʼe maʼuhiga ʼe ko te nofo agatonu. Neʼe ʼui fēnei e Paulo: “Ko te mamahi ʼe faka temi pe” kae ko te “kolōlia,” peʼe ko te fakapale ʼaē ʼe fakapapau mai e Sehova, “ ʼe fakaofoofo age tona mamafa pea ʼe heʼegata.” (2 Kolonito 4:​17, 18, MN ) Māʼia mo te ʼu faigataʼaʼia ʼa Sopo neʼe faka temi mokā fakatatau mo te ʼu lauʼi taʼu ʼaē neʼe fiafia ai ʼi muʼa atu pea ki muli age ʼo tona ʼahiʼahiʼi.​—Sopo 42:⁠16.

²² Kae ʼe lagiʼi ai he ʼu temi ʼi totatou maʼuli ʼe hage kiā tatou ʼe mole gata anai totatou ʼahiʼahiʼi pea ʼe mole puli anai ʼi he temi tatatou lotomamahi. ʼI te alatike ka hoa mai ʼe tou vakaʼi anai te tahi ʼu ako ʼe tou lava maʼu mai te faʼifaʼitaki ʼa Sopo ʼo ʼuhiga mo te faʼa kātaki. ʼE tou vakaʼi anai mo he ʼu faʼahi ʼe feala ke tou fai moʼo fakaloto mālohi ia nātou ʼaē ʼe tau mo he ʼu faigataʼaʼia.

ʼE Koutou Tali Feafeaʼi Anai?

• Koteā te fakafifihi maʼuhiga neʼe lagaʼi e Satana ʼo ʼuhiga mo te nofo agatonu ʼa Sopo?

• He koʼe ʼe mole tonu ke tou punamaʼuli mokā hoko mai he ʼu faigataʼaʼia?

• ʼE tokoni feafeaʼi mai ia Sehova ke tou faʼa kātaki?

[Paki ʼo te pasina 15]

Ko te fai ʼo he ʼu kumi, mo te palalau mo he kau Kilisitiano kua fotufotuʼa, pea mo tatatou fakahā te ʼu meʼa ʼaē ʼi totatou loto ʼi te faikole, ʼe tokoni mai anai ke tou kātakiʼi