Ko Te Kau Fakamoʼoni ʼa Sehova ʼi Te Malamanei Katoa—Porto Rico
ʼI TE vaha ʼo te Mer des Caraïbes pea mo te Océan Pacifique ʼe tuʼu ai te motu matalelei pea mo māfana ʼo Porto Rico. Neʼe kalagaʼi e Christophe Colomb ko he telituale ʼo Sepania ʼi te taʼu 1493 pea neʼe ina fakahigoaʼi ko San Juan Bautista moʼo fakamanatu kia Soane Patita. Ko tona kolo lahi neʼe fakahigoaʼi ko Porto Rico, peʼe ko te “ ʼUafu Koloaʼia.” ʼAki te temi, neʼe fakaʼaogaʼi te higoa ʼaia ki te motu katoa, kae neʼe fakahigoaʼi leva te kolo ko San Juan.
ʼE lahi te ʼu potu neʼe ʼiloga ai ia Porto Rico ko he ʼuafu koloaʼia. Neʼe lahi te aulo neʼe momoli mai ai ʼi te ʼu ʼuluaki taʼu ʼo te pule faka Sepania. ʼI te temi nei, ʼe fetuku e te motu te to, te kafe, te siaina, pea mo te faʼahiga moli kehekehe, logope ko te sosiete gāue masini pea mo te ʼu matani gāue lalahi ʼaē ʼe lahi ai te ekonomi ʼi te temi nei. Kae, neʼe fakahā e Porto Rico ʼe ko he ʼuafu koloaʼia ʼi te tahi ʼaluʼaga ʼe maʼuhiga age.
Neʼe kamata faka mafola ʼi ai te logo lelei ʼo ʼuhiga mo te Puleʼaga ʼo te ʼAtua ʼi te ʼu taʼu 1930. ʼI te temi nei, ʼe ʼi ai te toko 25 000 tupu kau faka mafola ʼi Porto Rico. ʼI te taʼu 1993 ko te kau gāue ʼi te filiale ʼaia ʼo te Sosiete Watch Tower neʼe tuputupu mai te toko 23 ki te toko 100 tupu. Ko te tuputupu ʼaia neʼe maʼuhiga ke feala ai ki te filiale ke tokaga ki te fakaliliu ʼo te ʼu tohi faka Tohi-Tapu ki te lea faka Sepania, ʼo lava maʼu ai te ʼu tohi ʼaia e te toko 350 000 000 kau hahaʼi ʼe palalau ʼi te lea faka Sepania ʼi te malamanei katoa.
Ko Te Telituale Foʼou
ʼE fakamatala e te pilō ʼo te filiale: “Ko te telituale foʼou kua avahi ʼi Porto Rico koteʼuhi kua mātou faiga ke mātou fakakaku te logo ʼo te Puleʼaga ki te kau tuli. ʼE fakamatala e te tuagaʼane te meʼa ʼaenī neʼe hoko: ‘Neʼe ʼau gāue ʼi te lotolotoiga ʼo te kau tuli pea neʼe ʼau ʼaʼahi te fafine mo ʼona ʼu tamaliki liliki e lua. ʼI tana mahino ʼaē ko ʼau ko te Fakamoʼoni, neʼe ina kapu ʼau koteʼuhi ko tona ʼohoana, ʼaē ʼe tuli mo ia, neʼe mole ina leleiʼia te kau Fakamoʼoni ʼa Sehova.
“ ‘Hili te ʼu māhina ko te fafine ʼaia neʼe ina ʼaʼahi tana kaumeʼa neʼe lolotoga ako te Tohi-Tapu mo te kau Fakamoʼoni. Neʼe kau ki te ako tohi pea neʼe ina leleiʼia. Neʼe ʼau toe ʼaʼahi te fafine ʼaia pea neʼe ina toe ʼui ko tona ʼohoana ʼe mole ina leleiʼia te kau Fakamoʼoni. Kae neʼe fia mahino ki te Tohi-Tapu pea neʼe kua fiu ia ʼi tana ʼēkelesia koteʼuhi ʼe mole nātou ako he meʼa e tahi ʼi te Tohi-Tapu. Neʼe ma kamata te ako, ʼo ma fakaʼaogaʼi te kiʼi pepa lotu. ʼI te tahi ʼaho neʼe ina ʼui mai ke ʼau toe liliu age ʼi te Moeaki koteʼuhi ʼe ʼi hē anai tona ʼohoana. Neʼe ʼau fehuʼi age ki ai: “Kae, ʼe mole koa fehiʼa ia mātou?” Neʼe ina tali fēnei: “ ʼE ina fia ʼiloʼi lelei te meʼa ʼaē ʼe akoʼi e te kau Fakamoʼoni ʼa Sehova.”
“ ‘ ʼI te ʼaho ake neʼe fisifisi e nāua toko lua ki toku matapā! Mai tona ʼaluʼaga ʼaē neʼe lahi te ʼu fehuʼi ʼo te tagata, neʼe ʼau fakaafe ia nāua ki tamatou ʼu fono ki te hahaʼi tuli. Neʼe kua nofo te tagata ʼi te fono ʼi muʼa ʼo taku kaku atu pea talu mai ai neʼe mole heʼeki tō ʼi he fono. ʼE faka mafola ki te hahaʼi tuli ʼaē, pea neʼe kau ki te fakatahi, pea ʼe lolotoga faiga ki te papitema.’ ”
ʼE toe fakamatala e te filiale: “ ʼI tamatou fakatahi faka tisitilike ʼi te taʼu ʼaenī, neʼe fai te polokalama katoa ʼaki te lea ʼi te ʼu nima, pea neʼe kaugamālie te hahaʼi tuli neʼe nātou kau ai mo tonatou famili. Neʼe hoko te temi fakaofoofo lolotoga te akonaki fakaʼosi ʼi te palalau ʼa te tagata fai akonaki ki te gāue ʼaē ʼe fai ʼi te lotolotoiga ʼo te kau tuli pea neʼe ina ʼui e lagi ko te toko 70 neʼe nātou kau ai. Neʼe hoko ai te toe pasipasi, kae, ohage ko tana fakatokagaʼi e te tagata fai akonaki, neʼe mole feala ke logoʼi e nātou ʼaē ʼe tuli. Koia ʼi tana fakaʼui ki te kau tuli ke nātou sisio kia nātou ʼaē ʼe kau ki te fakatahi, neʼe toe fai e te tagata fai akonaki te fehuʼi ʼaenī, ‘ ʼE koutou fiafia koa ʼi te ʼi henī ʼo ʼakotou ʼu tēhina ʼaē ʼe tuli?’ pea neʼe ina fakaʼui kia nātou ʼaē ʼe kau ki te fakatahi ke nātou pasipasi ʼo ue ʼonatou ʼu nima lualua. Neʼe ko he meʼa fakamanavahe te sio ki te ʼu tēhina pea mo tuagaʼane e 11 000 ʼe nātou pasipasi ʼo nātou ueue ʼonatou ʼu nima. Neʼe lahi te fiafia ʼo totatou ʼu tēhina pea mo tuagaʼane ʼe tuli pea neʼe nātou logoʼi ai ʼe nātou kau ki te toe famili ʼo te ʼu tēhina. Tokolahi neʼe nātou fetāgihi ʼi te fiafia.”
ʼI te kau ʼaē ʼa te kau Fakamoʼoni ʼa Sehova ki te gāue ʼo te taʼukai ʼi Porto Rico, ʼe mahino ia ʼe hoko atu pe anai tona ʼuhiga ʼuafu koloaʼia. Ko te ʼu “ōvi” ʼa te ʼAtua, ʼaē ʼe ina fakahigoaʼi ko “te ʼu meʼa ʼaē ʼe manakoʼia ʼo te ʼu puleʼaga fuli,” ʼe nātou haga ʼōmai anai ʼo aʼu ki te fonu ʼo te ʼapi ʼa Sehova ʼi te kolōlia.—Soane 10:16; Asea 2:7.
[Talanoa ʼo te pasina 9]
TE FAKAʼALUʼALU ʼO TE FENUA
ʼi Te Taʼu Gāue 1994
TE LAHI ʼO TE KAU FAI FAKA MAFOLA: 25 428
KO TE FAKAFUAFUA: Ko te Fakamoʼoni e tahi maʼa te toko 139
TE HAHAʼI ʼI TE ʼAHO ʼO TE FAKAMANATU: 60 252
TE LAHI ʼO TE KAU PIONIE: 2 329
TE ʼU AKO FAKA TOHI-TAPU: 19 012
TE LAHI ʼO TE KAU PAPITEMA: 919
TE LAHI ʼO TE ʼU KOKELEKASIO: 312
TE TUʼULAGA ʼO TE FILIALE: GUAYNABO